عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
ئاسمانێكی نوێ و زه‌وییه‌كی نوێ 
1
پاشان ئاسمانێكی نوێ و زه‌وییه‌كی نوێم بینی، چونكه‌ ئاسمانی یه‌كه‌م و زه‌وی یه‌كه‌م به‌سه‌رچوون، ئیتر ده‌ریاش نه‌ما.
2
شاره‌ پیرۆزه‌كه‌ش، ئۆرشه‌لیمی نوێم بینی له‌ ئاسمانه‌وه‌ له‌لایه‌ن خوداوه‌ ده‌هاته‌ خواره‌وه‌، وه‌ك بووكێكی ڕازاوه‌ بۆ زاوایه‌كه‌ی ئاماده‌ كرابێت.
3
گوێم له‌ ده‌نگێكی گه‌وره‌ بوو له‌ ته‌خته‌كه‌وه‌ فه‌رمووی: «ئه‌وه‌تا نشینگه‌ی خودا له‌گه‌ڵ خه‌ڵك، ئه‌ویش له‌گه‌ڵیان نیشته‌جێ ده‌بێت. ئه‌وانیش ده‌بن به‌ گه‌لی ئه‌و، خودا خۆی له‌گه‌ڵیاندایه‌ و ده‌بێته‌ خودای ئه‌وان.
4
ئه‌ویش هه‌موو فرمێسكێكی چاویان ده‌سڕێته‌وه‌، ئیتر مردن نابێت، شیوه‌ن و هاوار و ئازار نامێنن، چونكه‌ شته‌كانی پێشوو به‌سه‌رچوون.»
5
دانیشتووی سه‌ر ته‌خته‌كه‌ فه‌رمووی: «ئه‌وه‌تا هه‌موو شتێك نوێ ده‌كه‌مه‌وه‌.» هه‌روه‌ها ده‌فه‌رموێ: «بنووسه‌، چونكه‌ ئه‌م وتانه‌ متمانه‌دار و ڕاستن.»
6
پاشان پێی فه‌رمووم: «ئه‌وا هاته‌ دی. من ئه‌لف و یێم[a] ، سه‌ره‌تا و كۆتاییم. له‌ كانی ئاوی ژیان به‌خۆڕایی ده‌ده‌مه‌ تینوو.
7
ئه‌وه‌ی سه‌ربكه‌وێت ئه‌وانه‌ی به‌ میرات بۆ ده‌مێنێته‌وه‌، ده‌بمه‌ خودای و ئه‌ویش ده‌بێته‌ كوڕم.
8
به‌ڵام ترسنۆك و بێباوه‌ڕ و قێزه‌ونان، هه‌روه‌ها بكوژ و داوێنپیس و جادووگه‌ر و بتپه‌رستان، له‌گه‌ڵ هه‌موو درۆزنان، به‌شیان له‌ ده‌ریاچه‌ی به‌ ئاگر و گۆگرد داگیرساوه‌ كه‌ مردنی دووه‌مه‌.»
ئۆرشه‌لیمی نوێ 
9
یه‌كێك له‌و حه‌وت فریشته‌یه‌ی حه‌وت جامه‌كه‌یان پێیه‌ كه‌ به‌ دوایین حه‌وت ده‌رده‌كه‌ پڕكراون، هات بۆ لام و پێی گوتم: «وه‌ره‌ بووكه‌كه‌ت پیشان ده‌ده‌م، ژنی به‌رخه‌كه‌.»
10
به‌ ڕۆحی پیرۆز بردمی بۆ چیایه‌كی گه‌وره‌ و به‌رز، ئۆرشه‌لیمی شاره‌ پیرۆزه‌كه‌ی پیشاندام، له‌ ئاسمانه‌وه‌ له‌لایه‌ن خوداوه‌ ده‌هاته‌ خواره‌وه‌.
11
شكۆی خودای هه‌بوو، دره‌وشانه‌وه‌ی وه‌ك گرانبه‌هاترین به‌رد، وه‌ك یه‌شب، ڕوون وه‌ك كریستاڵ.
12
شوورایه‌كی گه‌وره‌ و به‌رز و دوازده‌ ده‌رگای هه‌بوو، له‌سه‌ر ده‌رگاكان دوازده‌ فریشته‌ هه‌بوون، ناوی دوازده‌ هۆزه‌كه‌ی كوڕانی ئیسرائیل له‌سه‌ر ده‌رگاكان نووسرابوون.
13
له‌ ڕۆژهه‌ڵاته‌وه‌ سێ ده‌رگا هه‌بوون، له‌ باكووره‌وه‌ سێ ده‌رگا، له‌ باشووره‌وه‌ سێ ده‌رگا، له‌ ڕۆژئاواوه‌ سێ ده‌رگا.
14
شوورای شاره‌كه‌ دوازده‌ بناغه‌ی هه‌بوو، دوازده‌ ناو له‌ سه‌ریان هه‌بوو، ناوی دوازده‌ نێردراوه‌كه‌ی به‌رخه‌كه‌.
15
ئه‌و فریشته‌یه‌ی له‌گه‌ڵم ده‌دوا دارێكی پێوانه‌ی زێڕینی پێبوو، تاكو شاره‌كه‌ و ده‌رگاكانی و شووراكه‌ی بپێوێت.
16
شاره‌كه‌ به‌ چوار گۆشه‌یی دانرابوو، درێژییه‌كه‌ی هێنده‌ی پانییه‌كه‌ی بوو. شاره‌كه‌ی به‌ داره‌كه‌ پێوا، دوازده‌ هه‌زار ستادیا[b] بوو، درێژی و پانی و به‌رزییه‌كه‌ی یه‌كسان بوون.
17
شووراكه‌شی پێوا، سه‌د و چل و چوار باڵ[c] بوو به‌ باڵی مرۆڤ كه‌ فریشته‌كه‌ به‌كاریده‌هێنا.
18
بینای شووراكه‌ له‌ یه‌شب بوو، شاره‌كه‌ش له‌ زێڕی بێگه‌رد بوو، وه‌ك شووشه‌ی ساف.
19
بناغه‌كانی شوورای شاره‌كه‌ به‌ هه‌موو به‌ردێكی گرانبه‌ها ڕازێنرابووه‌وه‌. بناغه‌ی یه‌كه‌م یه‌شب، دووه‌م یاقووتی شین، سێیه‌م یاقووتی سپی، چواره‌م زمروود،
20
پێنجه‌م شیلانه‌، شه‌شه‌م یاقووتی سوور، حه‌وته‌م زه‌به‌رجه‌د، هه‌شته‌م زمروودی سه‌وز، نۆیه‌م یاقووتی زه‌رد، ده‌یه‌م یاقووتی سه‌وز، یازده‌یه‌م یاقووتی زه‌عفه‌رانی، دوازده‌یه‌م جه‌مشت.
21
دوازده‌ ده‌رگاكه‌ش دوازده‌ مروارین، هه‌ر ده‌رگایه‌ك له‌ یه‌ك ده‌نكه‌ مرواری بوو. شه‌قامی شاره‌كه‌ له‌ زێڕی بێگه‌رد بوو وه‌ك شووشه‌ی ڕۆشن.
22
په‌رستگام تێیدا نه‌بینی، چونكه‌ یه‌زدانی په‌روه‌ردگاری هه‌ره‌ به‌ توانا له‌گه‌ڵ به‌رخه‌كه‌ په‌رستگای ئه‌ون.
23
شاره‌كه‌ش پێویستی به‌ خۆر و مانگ نییه‌ به‌سه‌ریدا بدره‌وشێنه‌وه‌، چونكه‌ شكۆی خودا ڕووناكی كردووه‌ته‌وه‌ و به‌رخه‌كه‌ چرایه‌تی.
24
نه‌ته‌وه‌كان به‌ ڕووناكییه‌كه‌ی ده‌ڕۆن و پاشاكانی زه‌وی شكۆی خۆیانی بۆ ده‌هێنن.
25
ده‌رگاكانی به‌ ڕۆژ هه‌رگیز داناخرێن، چونكه‌ له‌وێ شه‌و دانایه‌ت.
26
شكۆ و ڕێزی نه‌ته‌وه‌كانیشی بۆ ده‌هێنن.
27
هیچ شتێكی گڵاو و هیچ كه‌سێكی قێزه‌ون و درۆزن ناچنه‌ ناوی، به‌ڵكو ته‌نها ئه‌وانه‌ی كه‌ ناویان له‌ په‌ڕتووكی ژیانی به‌رخه‌كه‌دا نووسراوه‌.
  1. a. 21‏:6 له‌ یۆنانی نووسراوه‌ \+tl ئه‌لفا \+tl*و \+tl ئۆمێگا\+tl* یه‌كه‌م و دوایین پیتی ڕێنووسی یۆنانییه‌، مه‌به‌ستی له‌ سه‌ره‌تا و كۆتاییه‌.
  2. b. 21‏:16 دوازده‌ هه‌زار ستادیا: نزیكه‌ی دوو هه‌زار و دوو سه‌د كیلۆمه‌تره‌.
  3. c. 21‏:17 نزیكه‌ی 65 مه‌تر.