عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
ئەرد و ئەسمانێ نوی 
1
پشتی هنگی من ئەردەكێ نوی و ئەسمانەكێ نوی دیتن، چنكو ئەسمانێ ئێكێ و ئەردێ ئێكێ دەرباز بوون و ئێدی دەریا ژی نەما.[a]
2
من دیت باژێڕێ پیرۆز، ئورشەلیما نوی، یا ئامادەبووی وەكو بویكەكا خەملاندی بۆ زاڤایێ خۆ، ژ ئەسمانی، ژ نك خودێ دهاتە خوارێ.
3
من ژ تەختی دەنگەكێ بلند بهیست، دگۆت: «ئها ئەڤەیە، خیڤەتا خودێ د ناڤ مرۆڤان دا! ئەو دێ ل گەل وان ئاكنجی بیت و ئەو دێ بنە گەلێ وی و خودێ ب خۆ دێ ل گەل وان بیت و بیتە خودایێ وان.[b]
4
ئەو دێ هەمی رۆندكان ژ چاڤێن وان پاقژ كەت و ئێدی مرن نابیت، نە شینی و نە گری و نە ئێشان ژی، چنكو تشتێن بەرێ دەرباز بوون.»[c]
5
پاشی یێ روینشتی ل سەر تەختی گۆت: «ئها ئەڤە ئەز هەر تشتەكی نوی دكەم!» پشتی هنگی گۆت: «بنڤیسە، چنكو ئەڤ پەیڤە د دلسۆز و راستن.»
6
هەروەسا گۆتە من: «ب جهـ هات! ئەزم ئەلفا و ئۆمێگا[d] ، دەستپێك و دویماهیك. ئەز دێ بێ بەرامبەر ژ كانیا ئاڤا ژیانێ دەمە یێ تێهنی.
7
ئەوێ سەركەفتنێ دئینیت، دێ بیتە میراتگرێ ڤان تشتان و ئەز دێ بمە خودایێ وی و ئەو دێ بیتە كوڕێ من.[e]
8
لێ یێن ترسنۆك و یێن بێباوەر و یێن جهێ دلڕەشیێ و یێن مێركوژ و یێن دەهمەنپیس و یێن جادووگەر و یێن پووتپەرێس[f] و هەمیێن درەوین، دێ بەهرا وان دەریاكا هەل ب ئاگری و كپریتێ بیت. ئەڤە مرنا دوویێیە.»
ئورشەلیما نوی 
9
پشتی هنگی ئێك ژ وان حەفت فریشتەیێن حەفت ترارێن تژی ژ حەفت دربێن دویماهیێ ڤێ بوون هات و ل گەل من ئاخفت و گۆت: «وەرە، ئەز دێ بویكێ، ئانكو ژنا بەرخی، نیشا تە دەم.»
10
ئینا ب رێكا گیانێ پیرۆز ئەز برمە سەر چیایەكێ مەزن و بلند. وی ئورشەلیم، باژێڕێ پیرۆز، نیشا من دا، ژ ئەسمانی، ژ نك خودێ، دهاتە خوارێ.[g]
11
مەزناهیا خودێ د ناڤ وی دا بوو و شەوقا وێ وەكو بهاگرانترین بەر، وەكو بەرێ یەشپ، زەڵال وەكو كریستالی بوو.
12
شویرهەكا مەزن و بلند هەبوو، دوازدە دەرگەهـ هەبوون و ل بەر وان دەرگەهان دوازدە فریشتە هەبوون. ناڤێ دوازدە هۆزێن كوڕێن ئیسرائیلی ل سەر وان دەرگەهان یێ نڤیسای بوو.
13
ل رۆژهەلاتی سێ دەرگەهـ و ل باكووری سێ دەرگەهـ و ل باشووری سێ دەرگەهـ و ل رۆژئاڤایی سێ دەرگەهـ هەبوون.[h]
14
شویرها باژێڕی دوازدە بنیات هەبوون و دوازدە ناڤێن دوازدە هنارتیێن بەرخی ل سەر بوون.
15
ئەوێ ل گەل من دئاخفت، لەڤەنەكێ پیڤانێ یێ زێڕین ڤێ بوو، دا باژێڕی و دەرگەهێن وێ و شویرها وێ بپیڤیت.
16
باژێڕ ب چوارگۆشەیی هاتبوو دانان، درێژیا وێ هندی فرەهیێ بوو. ئینا باژێڕ ب لەڤەنی پێڤا، دوازدە هزار ستادی[i] بوون. درێژی و فرەهی و بلندی تەمەت ئێك بوون.
17
شویرها وێ ژی پێڤا، سەد و چل و چوار نیڤگەز بوون[j] ، ل دویڤ پیڤانا مرۆڤان، كو فریشتەی ژی ب كار دئینا.
18
شویرهە ژ بەرێ یەشپ هاتبوو ئاڤاكرن و باژێڕ زێڕێ پاقژ بوو وەكو شویشەیێ پاقژ.
19
بنیاتێن شویرها باژێڕی ب هەمی بەرێن بهاگران د خەملاندی بوون. بنیاتێ ئێكێ بەرێ یەشپ بوو، یێ دوویێ یاقوتێ شین بوو، یێ سێیێ بەرێ ئاشقبەند[k] یێ سپی بوو، یێ چوارێ زەمروود بوو،
20
یێ پێنجێ بەرێ ئاشقبەندێ سۆر یێ تاری بوو، یێ شەشێ بەرێ ئاشقبەندێ سۆر بوو، یێ حەفتێ یاقوتێ زەیتونی بوو، یێ هەشتێ زەمروودێ كەسك بوو، یێ نەهێ یاقوتێ زەر بوو، یێ دەهێ بەرێ ئاشقبەندێ كەسك بوو، یێ یازدێ یاقوتێ مۆر بوو و یێ دوازدێ یاقوتێ بنەفشی بوو[l] .
21
هەر دوازدە دەرگەه، دوازدە مراری بوون، هەر دەرگەهەك ژ مراریەكێ بوو. جادەیا باژێڕی زێڕێ پاقژ بوو وەكو شویشەیێ زەڵال.[m]
22
من چ پەرستگەهـ د باژێڕی دا نەدیتن، چنكو خودان خودێ، هێزدارێ هەر تشتی، ئەو و بەرخ پەرستگەها ویە.
23
باژێڕ نە یێ پێدڤی رۆژێ و هەیڤێ بوو كو رۆناهیێ بدەنێ، چنكو مەزناهیا خودێ رۆناهی دابوویێ و چرایێ وی بەرخ بوو.[n]
24
مللەت دێ ب رۆناهیا باژێڕی بڕێڤە چن و پاشایێن ئەردی دێ مەزناهیا خۆ ئیننە ناڤ وی باژێڕی.
25
دەرگەهێن وی چ جاران ناهێنە گرتن، چنكو ل وێرێ هەمی گاڤا دێ رۆژ بیت، شەڤ نینە.[o]
26
دێ مەزناهی و رێزا مللەتان ئیننە ناڤ وی.
27
قەت تشتەكێ هەڕمی ناچیتە ناڤ وی، نە ژی كەسەك ژ ئەوێن تشتێن جهێ دلڕەشیێ و درەوێ دكەن، لێ ب تنێ ئەو دێ چن یێن ناڤێن وان د پەرتووكا ژیانێ یا بەرخی دا هاتیە نڤیسین.[p]
  1. a. 21‏:1 ئیشایا 65‏:17؛ 2 پەترۆس 3‏:13
  2. b. 21‏:3 پەرستن و پیرۆزی 26‏:11؛ حزقیێل 37‏:28
  3. c. 21‏:4 ئیشایا 25‏:8
  4. d. 21‏:6 ئەلفا و ئۆمێگا پیتێن ئێكێ و دویماهیێ یێن ئەلفەبێیا یونانینە.
  5. e. 21‏:7 زەبوور 89‏:26‏-27
  6. f. 21‏:8 صەنەمپەرێس
  7. g. 21‏:10 حزقیێل 40‏:2
  8. h. 21‏:12‏-13 حزقیێل 48‏:30‏-35
  9. i. 21‏:16 ئانكو 2220 كیلۆمەتر. هەر ستادیەك 185 مەترە.
  10. j. 21‏:17 144 نیڤگەز ئانكو نێزیكی 70 مەتران.
  11. k. 21‏:19 جۆرەكێ بەرێن بهاگرانە ب زمانێ عەرەبی دبێژنێ‹عەقیق›، هندەك جاران ب كوردی دبێژنێ (شەڤ چرا) و ب رەنگێ سۆر، یان سپی، یان زەڵال، یان كەسك پەیدا دبیت.
  12. l. 21‏:20 ناڤێ ڤان جۆرێ بەران ب تەمامی د بەرنیاس نینن.
  13. m. 21‏:18‏-21 ئیشایا 54‏:11‏-12
  14. n. 21‏:23 ئیشایا 60‏:19‏-20
  15. o. 21‏:24‏-25 ئیشایا 60‏:3‏، 11
  16. p. 21‏:27 حزقیێل 44‏:9