عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
1
هه‌لیلویا!
چه‌نده‌ باشه‌ مۆسیقا ژه‌نین بۆ خودامان!
ستایشكردن چه‌نده‌ خۆشه‌ و شیاوه‌!
2
یه‌زدان ئۆرشه‌لیم بنیاد ده‌نێته‌وه‌،
ڕاپێچكراوه‌كانی[a] ئیسرائیل كۆده‌كاته‌وه‌.
3
دڵشكاوان چاك ده‌كاته‌وه‌ و
برینیان ساڕێژ ده‌كات.
4
ژماره‌ی ئه‌ستێره‌كان دیاری ده‌كات و
هه‌ریه‌كه‌یان به‌ ناوێك بانگ ده‌كات.
5
په‌روه‌ردگارمان گه‌وره‌یه‌ و هێزی زۆره‌،
تێگه‌یشتنی بێ سنووره‌.
6
یه‌زدان یارمه‌تی بێفیزه‌كان ده‌دات و
به‌دكاران به‌ره‌و زه‌وی نزم ده‌كاته‌وه‌.
7
به‌ سوپاسه‌وه‌ گۆرانی بۆ یه‌زدان بڵێن،
به‌ قیساره‌ مۆسیقا بۆ خودامان بژه‌نن.
8
ئه‌وه‌ی ئاسمان به‌ هه‌ور داده‌پۆشێت،
باران بۆ زه‌وی ئاماده‌ ده‌كات،
گیا له‌سه‌ر چیاكان ده‌ڕوێنێت،
9
خۆراكی ئاژه‌ڵ و
بێچووه‌ قه‌له‌ڕه‌شی ده‌م به‌ قیڕه‌ ده‌دات.
10
یه‌زدان به‌ هێزی ئه‌سپ خۆشحاڵ نابێت،
به‌ قاچی مرۆڤ دڵشاد نییه‌،
11
به‌ڵام یه‌زدان به‌وانه‌ دڵشاده‌ كه‌ ترسی ئه‌ویان له‌ دڵدایه‌،
ئه‌وانه‌ی هیوایان به‌ خۆشه‌ویستییه‌ نه‌گۆڕه‌كه‌ی هه‌یه‌.
12
ئه‌ی ئۆرشه‌لیم، ستایشی یه‌زدان بكه‌،
ئه‌ی سییۆن، ستایشی خودات بكه‌،
13
یه‌زدان شمشیره‌ی[b] ده‌روازه‌كانت به‌هێز ده‌كات،
كوڕه‌كانت له‌ناو خۆت به‌ره‌كه‌تدار ده‌كات.
14
له‌ سنووره‌كانت ئاشتی به‌رقه‌رار ده‌كات،
له‌ باشترین گه‌نم تێرت ده‌كات.
15
فه‌رمانه‌كه‌ی بۆ سه‌ر زه‌وی ده‌نێرێت،
په‌یامی ئه‌و زوو دێته‌جێ.
16
به‌فر وه‌ك خوری ده‌بارێنێت،
زوقم وه‌ك خۆڵه‌مێش بڵاو ده‌كاته‌وه‌.
17
ته‌رزه‌ وه‌ك نانه‌ڕه‌ق فڕێده‌دا.
كێ له‌ ڕووی سه‌رمای ئه‌و خۆی ڕاده‌گرێت؟
18
په‌یامی خۆی ده‌نێرێت و ده‌یانتوێنێته‌وه‌.
بای خۆی هه‌ڵده‌كات و ئاو به‌ڕێده‌كه‌وێت.
19
په‌یامی خۆی به‌ یاقوب ڕاده‌گه‌یه‌نێت،
فه‌رز و حوكمه‌كانی به‌ ئیسرائیل.
20
ئه‌مه‌ی له‌گه‌ڵ هیچ نه‌ته‌وه‌یه‌كی دیكه‌ نه‌كردووه‌،
حوكمه‌كانی ئه‌ویان نه‌زانیوه‌.
هه‌لیلویا!
  1. a. 147‏:2 ڕاپێچكراوه‌كان بۆ بابل.
  2. b. 147‏:13 شمشیر، پارچه‌ دارێك بووه‌ له‌ جیاتی قوفڵ له‌ دواوه‌ی ده‌رگا به‌ شێوه‌ی ئاسۆیی دانراوه‌ بۆ داخستنی ده‌رگا.