عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
داواكردنی نیشانه‌ی ئاسمانی 
1
فه‌ریسی و سه‌دوقییه‌كان هاتنه‌ لای عیسا بۆ ئه‌وه‌ی تاقی بكه‌نه‌وه‌، داوایان لێكرد نیشانه‌یه‌كی ئاسمانییان پیشان بدات.
2
وه‌ڵامی دایه‌وه‌: «كه‌ ئێواره‌ داهات، ده‌ڵێن ”ساماڵه‌، چونكه‌ ئاسمان سوور هه‌ڵگه‌ڕاوه‌،“
3
سه‌ر له‌ به‌یانیش، ”ئه‌مڕۆ هه‌وره‌، ئاسمان سوور هه‌ڵگه‌ڕاوه‌ و ڕووگرژه‌.“ ئێوه‌ ده‌زانن ڕووی ئاسمان بخوێننه‌وه‌، به‌ڵام ناتوانن نیشانه‌كانی زه‌مانه‌ لێكبده‌نه‌وه‌!
4
نه‌وه‌یه‌كی به‌دكار و داوێنپیس داوای نیشانه‌ ده‌كات، نیشانه‌ی نادرێتێ، جگه‌ له‌ نیشانه‌ی یونس.» ئینجا به‌جێی هێشتن و ڕۆیشت.
5
كاتێك قوتابییه‌كان گه‌یشتنه‌ ئه‌وبه‌ری ده‌ریاچه‌كه‌، له‌بیریان چووبوو له‌گه‌ڵ خۆیان نان ببه‌ن.
6
عیسا پێی فه‌رموون: «وریابن، ئاگاداری هه‌ویرترشی فه‌ریسی و سه‌دوقییه‌كان بن.»
7
له‌ناو خۆیاندا گفتوگۆیان كرد و گوتیان: «له‌به‌ر ئه‌وه‌یه‌ كه‌ نانمان نه‌هێناوه‌.»
8
عیسا زانی و پێی فه‌رموون: «ئه‌ی كه‌م باوه‌ڕینه‌، بۆچی له‌نێو خۆتان ده‌ڵێن نانمان نییه‌؟
9
ئایا هێشتا تێنه‌گه‌یشتوون؟ نایه‌ته‌ بیرتان پێنج نانه‌كه‌ی پێنج هه‌زاره‌كه‌ و چه‌ند سه‌به‌ته‌شتان هه‌ڵگرته‌وه‌؟
10
یان حه‌وت نانه‌كه‌ی چوار هه‌زاره‌كه‌ و چه‌ند سه‌به‌ته‌شتان هه‌ڵگرته‌وه‌؟
11
چۆن تێناگه‌ن من باسی نانم بۆ نه‌كردن؟ له‌ هه‌ویرترشی فه‌ریسی و سه‌دوقییه‌كان ئاگاداربن!»
12
ئینجا تێگه‌یشتن كه‌ ئه‌و له‌ هه‌ویرترشی نان ئاگاداریان ناكاته‌وه‌، به‌ڵكو له‌ فێركردنی فه‌ریسی و سه‌دوقییه‌كان.
په‌ترۆس دان به‌ مه‌سیحدا ده‌نێت 
13
كه‌ عیسا گه‌یشته‌ ناوچه‌ی قه‌یسه‌رییه‌ی فیلیپۆس، له‌ قوتابییه‌كانی پرسی: «ئایا خه‌ڵك ده‌ڵێن كوڕی مرۆڤ كێیه‌؟»
14
گوتیان: «هه‌ندێك ده‌ڵێن یه‌حیای له‌ئاوهه‌ڵكێشه‌، هه‌ندێكی دیكه‌ ده‌ڵێن ئه‌لیاسه‌، هه‌ندێكیش یه‌رمیا یان یه‌كێك له‌ پێغه‌مبه‌ران.»
15
پێی فه‌رموون: «ئه‌ی ئێوه‌ ده‌ڵێن من كێم؟»
16
شیمۆن په‌ترۆس وه‌ڵامی دایه‌وه‌: «تۆ مه‌سیحیت، كوڕی خودای زیندووی.»
17
عیساش وه‌ڵامی دایه‌وه‌: «شیمۆنی كوڕی یۆنا، خۆزگه‌ت پێ ده‌خوازرێت، چونكه‌ گۆشت و خوێن ئه‌مه‌یان بۆت ئاشكرا نه‌كرد، به‌ڵكو ئه‌و باوكه‌م كه‌ له‌ ئاسمانه‌.
18
منیش پێت ده‌ڵێم، تۆ په‌ترۆسی[a] و له‌سه‌ر ئه‌م به‌رده‌ كۆمه‌ڵه‌ی[b] خۆم بنیاد ده‌نێم كه‌ ده‌روازه‌كانی دۆزه‌خ[c] پێی ناوێرێت.[d]
19
كلیله‌كانی شانشینی ئاسمانت ده‌ده‌مێ، ئه‌وه‌ی تۆ له‌سه‌ر زه‌وی گرێی بده‌یت، له‌ ئاسماندا گرێدراو ده‌بێت، ئه‌وه‌ی تۆ له‌سه‌ر زه‌وی بیكه‌یته‌وه‌، له‌ ئاسماندا كراوه‌ ده‌بێت.»
20
ئینجا فه‌رمانی دایه‌ قوتابییه‌كان به‌ كه‌س نه‌ڵێن كه‌ ئه‌و مه‌سیحه‌.
یه‌كه‌م باسی مردنی عیسا 
21
له‌و كاته‌وه‌ عیسا ده‌ستی به‌ ڕوونكردنه‌وه‌ كرد بۆ قوتابییه‌كانی كه‌ ده‌بێت بچێته‌ ئۆرشه‌لیم، له‌وێ به‌ ده‌ستی پیران و كاهینانی باڵا و مامۆستایانی ته‌ورات زۆر ئازار بچێژێت و بكوژرێت و له‌ ڕۆژی سێیه‌م هه‌ستێنرێته‌وه‌.
22
په‌ترۆس هێنایه‌ ئه‌م لاوه‌ و ده‌ستی كرد به‌ سه‌رزه‌نشتكردنی: «خودا نه‌كات گه‌وره‌م! هه‌رگیز ئه‌مه‌ت به‌سه‌رنه‌یه‌ت!»
23
عیسا ئاوڕی دایه‌وه‌ و به‌ په‌ترۆسی فه‌رموو: «له‌به‌رچاوم لاچۆ، ئه‌ی شه‌یتان! تۆ كۆسپی له‌به‌رده‌مم، چونكه‌ بیر له‌ شته‌ خوداییه‌كان ناكه‌یته‌وه‌، به‌ڵكو شتی مرۆڤانه‌.»
خۆ ئاماده‌كردن بۆ مردن 
24
ئینجا عیسا به‌ قوتابییه‌كانی فه‌رموو: «ئه‌گه‌ر یه‌كێك ویستی دوام بكه‌وێت، با نكۆڵی له‌ خۆی بكات و خاچه‌كه‌ی هه‌ڵبگرێت و دوام بكه‌وێت.
25
ئه‌وه‌ی بیه‌وێت ژیانی خۆی ڕزگار بكات، ده‌یدۆڕێنێت، به‌ڵام ئه‌وه‌ی له‌ پێناوی من ژیانی خۆی بدۆڕێنێت، ده‌یدۆزێته‌وه‌.
26
چی به‌كه‌ڵكی مرۆڤ دێت ئه‌گه‌ر هه‌موو جیهان بباته‌وه‌ و خۆی بدۆڕێنێت؟ یان مرۆڤ بۆ كڕینه‌وه‌ی خۆی چی ده‌دات؟
27
كوڕی مرۆڤ به‌ شكۆی باوكییه‌وه‌ له‌گه‌ڵ فریشته‌كانی خۆی ده‌گه‌ڕێته‌وه‌، ئه‌وسا پاداشتی هه‌ركه‌سێك به‌پێی كرداری ده‌داته‌وه‌.
28
ڕاستیتان پێ ده‌ڵێم: هه‌ندێك له‌وانه‌ی لێره‌ ڕاوه‌ستاون، مردن ناچێژن تاكو كوڕی مرۆڤ نه‌بینن به‌ شانشینه‌كه‌یه‌وه‌ دێته‌وه‌.»
  1. a. 16‏:18 په‌ترۆس به‌ زمانی یۆنانی واته‌ به‌رد.
  2. b. 16‏:18 یۆنانی: كڵێسا.
  3. c. 16‏:18 مه‌به‌ست له‌وه‌یه‌ كه‌ دوژمن له‌ به‌هێزترین خاڵی خۆی ناتوانێت به‌ره‌نگاری كڵێسا ببێته‌وه‌ و هه‌رگیز كڵێسا تێكناشكێت.
  4. d. 16‏:18 مه‌به‌ست له‌وه‌یه‌ كه‌ كڵێسا نامرێت.