عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
نموونه‌ی بێوه‌ژن و دادوه‌رێك 
1
عیسا نموونه‌یه‌كی بۆ هێنانه‌وه‌ كه‌ پێویسته‌ هه‌میشه‌ نوێژ بكه‌ن و وره‌ به‌رنه‌ده‌ن.
2
فه‌رمووی: «له‌ شارێك دادوه‌رێك هه‌بوو له‌ خودا نه‌ده‌ترسا و ڕێزی مرۆڤیشی نه‌ده‌گرت.
3
له‌و شاره‌دا بێوه‌ژنێك هه‌بوو، ده‌هاته‌ لای و ده‌یگوت: ”مافم له‌ نه‌یاره‌كه‌م بستێنه‌وه‌.“
4
«ئه‌ویش ماوه‌یه‌ك نه‌یده‌ویست، به‌ڵام دواتر له‌ دڵی خۆیدا گوتی: ”هه‌رچه‌نده‌ له‌ خودا ناترسم و ڕێزیش له‌ مرۆڤ ناگرم،
5
به‌ڵام له‌به‌ر ئه‌وه‌ی ئه‌م بێوه‌ژنه‌ بێزارم نه‌كات، مافه‌كه‌ی بۆ وه‌رده‌گرمه‌وه‌، ئه‌گینا وازناهێنێت و وه‌ڕسم ده‌كات.“»
6
مه‌سیحی خاوه‌ن شكۆ فه‌رمووی: «گوێ بگرن له‌وه‌ی دادوه‌ره‌ زۆرداره‌كه‌ ده‌یڵێت.
7
باشه‌ خودا مافی هه‌ڵبژێردراوه‌كانی خۆی كه‌ شه‌و و ڕۆژ لێی ده‌پاڕێنه‌وه‌ وه‌رناگرێت؟ ئایا دره‌نگ وه‌ڵامیان ده‌داته‌وه‌؟
8
پێتان ده‌ڵێم: خێرا مافیان بۆ وه‌رده‌گرێت. به‌ڵام كاتێك كوڕی مرۆڤ دێته‌وه‌، ئایا باوه‌ڕ له‌سه‌ر زه‌وی ده‌دۆزێته‌وه‌؟»
نموونه‌ی فه‌ریسی و باجگر 
9
بۆ ئه‌وانه‌ی دڵنیا بوون كه‌ خۆیان به‌ بێتاوان داده‌نا و خه‌ڵكیان به‌ سووك سه‌یر ده‌كرد، ئه‌م نموونه‌یه‌ی هێنایه‌وه‌:
10
«دوو كه‌س بۆ نوێژكردن چوونه‌ په‌رستگا، یه‌كێكیان فه‌ریسی و ئه‌وه‌ی دیكه‌ باجگر.
11
فه‌ریسییه‌كه‌ وه‌ستا، له‌ دڵی خۆیدا ئه‌م نوێژه‌ی ده‌كرد: ”خودایه‌ سوپاست ده‌كه‌م وه‌ك خه‌ڵكی دیكه‌ نیم، كه‌ قۆڵبڕ و خراپه‌كار و داوێنپیسن، وه‌ك ئه‌م باجگره‌ش نیم.
12
هه‌فته‌ی دوو جار به‌ڕۆژوو ده‌بم، ئه‌وه‌ی ده‌ستم ده‌كه‌وێت ده‌یه‌كی ده‌به‌خشم.“
13
«به‌ڵام باجگره‌كه‌ له‌ دووره‌وه‌ ڕاوه‌ستا، نه‌یده‌ویست چاوی بۆ ئاسمان به‌رز بكاته‌وه‌، سنگی خۆی ده‌كوتا و ده‌یگوت: ”ئه‌ی خودایه‌ به‌زه‌ییت[a] به‌ منی گوناهباردا بێته‌وه‌.“
14
«پێتان ده‌ڵێم، ئه‌مه‌ گه‌ڕایه‌وه‌ ماڵی خۆی بێتاوان كرابوو، پێچه‌وانه‌ی ئه‌وی دیكه‌، چونكه‌ ئه‌وه‌ی خۆی به‌رز بكاته‌وه‌ نزم ده‌كرێته‌وه‌، ئه‌وه‌ش خۆی نزم بكاته‌وه‌ به‌رز ده‌كرێته‌وه‌.»
شانشینی خودا وه‌ك منداڵ 
15
خه‌ڵك منداڵی ساوایان هێنایه‌ لای عیسا تاوه‌كو ده‌ستیان له‌سه‌ر دابنێت. كاتێك قوتابییه‌كان ئه‌مه‌یان بینی سه‌رزه‌نشتیان كردن.
16
به‌ڵام عیسا بانگی منداڵه‌كانی كرد و فه‌رمووی: «لێگه‌ڕێن منداڵان بێنه‌ لام، ڕێیان لێ مه‌گرن، چونكه‌ شانشینی خودا هی وه‌ك ئه‌مانه‌یه‌.
17
ڕاستیتان پێ ده‌ڵێم: ئه‌وه‌ی وه‌ك منداڵێك[b] شانشینی خودا قبوڵ نه‌كات، هه‌رگیز ناچێته‌ ناویه‌وه‌.»
ده‌وڵه‌مه‌ندی و ژیانی هه‌تاهه‌تایی 
18
كابرایه‌كی ده‌سه‌ڵاتدار پرسیاری لێكرد: «مامۆستای باش، چی بكه‌م تاكو ژیانی هه‌تاهه‌تایی به‌ میرات وه‌ربگرم؟»
19
عیسا پێی فه‌رموو: «بۆچی به‌ باش ناوم ده‌به‌یت؟ بێجگه‌ له‌ خودا كه‌س باش نییه‌.
20
ڕاسپارده‌كان ده‌زانیت: {داوێنپیسی مه‌كه‌، مه‌كوژه‌، مه‌دزه‌، شایه‌تی درۆ مه‌ده‌، ڕێزی دایك و باوكت بگره‌.}[c] »
21
ئه‌ویش گوتی: «هه‌موو ئه‌مانه‌م له‌ منداڵییه‌وه‌ پاراستووه‌.»
22
عیساش گوێی له‌مه‌ بوو، پێی فه‌رموو: «هێشتا شتێكت كه‌مه‌. چیت هه‌یه‌ هه‌مووی بفرۆشه‌ و به‌سه‌ر هه‌ژاران دابه‌شی بكه‌، له‌ ئاسماندا گه‌نجینه‌یه‌كت ده‌بێت. ئینجا وه‌ره‌ دوام بكه‌وه‌.»
23
كاتێك ئه‌مه‌ی بیست، زۆر خه‌مناك بوو، چونكه‌ زۆر ده‌وڵه‌مه‌ند بوو.
24
كاتێك عیسا ئه‌وی به‌ خه‌مناكی بینی، فه‌رمووی: «چه‌ند گرانه‌ بۆ ده‌وڵه‌مه‌ندان بچنه‌ ناو شانشینی خوداوه‌!
25
ئاسانتره‌ وشترێك به‌ كونی ده‌رزییه‌كه‌وه‌ بچێت له‌وه‌ی ده‌وڵه‌مه‌ندێك بچێته‌ ناو شانشینی خوداوه‌.»
26
ئه‌وانه‌ی گوێیان لێبوو گوتیان: «كه‌واته‌ كێ ده‌توانێت ڕزگاری بێت؟»
27
عیسا فه‌رمووی: «ئه‌وه‌ی له‌لای خه‌ڵكی مه‌حاڵه‌، لای خودا ده‌بێت.»
28
په‌ترۆس گوتی: «ئه‌وه‌تا هه‌موو شتێكمان به‌جێهێشتووه‌ و دوات كه‌وتووین.»
29
ئه‌ویش پێی فه‌رموون: «ڕاستیتان پێ ده‌ڵێم: كه‌س نییه‌ ماڵ یان ژن یان برا یان دایك و باوك یان منداڵی له‌به‌ر شانشینی خودا به‌جێهێشتبێت،
30
له‌م دنیایه‌ چه‌ند ئه‌وه‌نده‌ له‌ به‌رامبه‌ری وه‌رنه‌گرێته‌وه‌ و له‌و دنیاش ژیانی هه‌تاهه‌تایی.»
باسی مردن و هه‌ستانه‌وه‌ی عیسا 
31
عیسا دوازده‌ قوتابییه‌كه‌ی برد و پێی فه‌رموون: «ئه‌وا به‌ره‌و ئۆرشه‌لیم سه‌رده‌كه‌وین، هه‌رچی پێغه‌مبه‌ران له‌باره‌ی كوڕی مرۆڤه‌وه‌ نووسیویانه‌ دێته‌ دی.
32
ده‌درێته‌ ده‌ستی نه‌ته‌وه‌كان، گاڵته‌ی پێ ده‌كرێت و جنێوی پێده‌درێت و تفی لێ ده‌كرێت،
33
به‌ قامچی لێی ده‌ده‌ن و ده‌یكوژن. له‌ ڕۆژی سێیه‌میش هه‌ڵده‌ستێته‌وه‌.»
34
به‌ڵام هیچ له‌مه‌ تێنه‌گه‌یشتن و ئه‌م باسه‌ لێیان شاراوه‌ بوو، ئه‌وه‌ی گوترا دركیان پێی نه‌كرد.
عیسا كه‌سێكی نابینا چاك ده‌كاته‌وه‌ 
35
كاتێك عیسا له‌ ئه‌ریحا نزیك بووه‌وه‌، كه‌سێكی نابینا له‌سه‌ر ڕێگا دانیشتبوو سواڵی ده‌كرد.
36
كه‌ گوێی له‌ خه‌ڵكه‌كه‌ بوو ده‌ڕۆیشتن، پرسیاری كرد ئه‌مه‌ چییه‌.
37
پێیان گوت: «عیسای ناسیره‌یی لێره‌وه‌ تێده‌په‌ڕێت.»
38
جا هاواری كرد: «عیسای كوڕی داود، به‌زه‌ییت پێمدا بێته‌وه‌!»
39
ئه‌وانه‌ی له‌پێشه‌وه‌ ده‌ڕۆیشتن سه‌رزه‌نشتیان كرد بۆ ئه‌وه‌ی بێده‌نگ بێت، به‌ڵام ئه‌و زۆر زیاتر هاواری ده‌كرد: «كوڕی داود، به‌زه‌ییت پێمدا بێته‌وه‌!»
40
عیسا ڕاوه‌ستا و فه‌رمانی دا بیهێننه‌ لای. كاتێك نزیك بووه‌وه‌، لێی پرسی:
41
«چیت ده‌وێ بۆت بكه‌م؟» گوتی: «گه‌وره‌م، ده‌مه‌وێ ببینم.»
42
عیساش پێی فه‌رموو: «ببینه‌، باوه‌ڕه‌كه‌ت تۆی چاككرده‌وه‌.»
43
ده‌ستبه‌جێ بینی، دوای كه‌وت و ستایشی خودای ده‌كرد. هه‌روه‌ها هه‌موو خه‌ڵكه‌كه‌ش كه‌ بینییان ستایشی خودایان كرد.
  1. a. 18‏:13 یۆنانی: ببیته‌ كه‌فاره‌تی من، واته‌ ئه‌م قوربانییه‌ی كه‌ تووڕه‌یی خودا لاده‌دات.
  2. b. 18‏:17 بڕوانه‌ \+xt مه‌تا 18‏:4‏\+xt*‏.
  3. c. 18‏:20 \+xt ده‌رچوون 20‏:12 و دواوتار 5‏:16‏-20‏\+xt*‏