عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
عیسا ده‌بێته‌ میوانی زه‌كا 
1
ئینجا چووه‌ ناو ئه‌ریحا و پێیدا تێده‌په‌ڕی.
2
له‌وێ كابرایه‌كی لێبوو به‌ ناوی زه‌كا، ده‌وڵه‌مه‌ند و گه‌وره‌ی باجگران بوو.
3
ده‌یویست ببینێت عیسا كێیه‌، به‌ڵام له‌به‌ر خه‌ڵكه‌كه‌ نه‌یده‌توانی، چونكه‌ كورته‌باڵا بوو.
4
ڕایكرد و سه‌ركه‌وته‌ سه‌ر دار هه‌نجیرێك تاكو بیبینێت، چونكه‌ عیسا به‌وێدا تێده‌په‌ڕی.
5
كه‌ عیسا گه‌یشته‌ شوێنه‌كه‌، چاوی هه‌ڵبڕی و پێی فه‌رموو: «زه‌كا، خێرا وه‌ره‌ خواره‌وه‌، چونكه‌ ده‌بێت ئه‌مڕۆ له‌ ماڵی تۆ بمێنمه‌وه‌.»
6
جا خێرا هاته‌ خواره‌وه‌ و به‌ خۆشییه‌وه‌ پێشوازی لێكرد.
7
هه‌موو بینییان و ده‌ستیان كرد به‌ بۆڵه‌بۆڵكردن و گوتیان: «چووه‌ بووه‌ته‌ میوانی گوناهبارێك.»
8
به‌ڵام زه‌كا ڕاوه‌ستا و به‌ مه‌سیحی خاوه‌ن شكۆی گوت: «گه‌وره‌م، ئه‌وه‌تا نیوه‌ی سامانه‌كه‌م ده‌ده‌مه‌ هه‌ژاران و ئه‌گه‌ر به‌ هه‌ر شێوه‌یه‌ك فێڵم له‌ كه‌سێك كردبێت، چوارقاتی ده‌ده‌مه‌وه‌.»
9
عیساش پێی فه‌رموو: «ئه‌مڕۆ ڕزگاری بۆ ئه‌م ماڵه‌ هات، له‌به‌ر ئه‌وه‌ی ئه‌ویش كوڕی ئیبراهیمه‌،
10
چونكه‌ كوڕی مرۆڤ هاتووه‌ به‌دوای له‌ناوچواندا[a] بگه‌ڕێت و ڕزگاریان بكات.»
نموونه‌ی ده‌ مه‌ناكه‌ 
11
كاتێك گوێیان له‌مانه‌ ده‌گرت، درێژه‌ی پێدا و نموونه‌یه‌كی هێنایه‌وه‌، چونكه‌ له‌ ئۆرشه‌لیم نزیك بوو، وایان ده‌زانی كه‌ پاشایه‌تی خودا خه‌ریكه‌ ئێستا ده‌رده‌كه‌وێت.
12
ئینجا فه‌رمووی: «پیاوماقوڵێك بۆ وڵاتێكی دوور ڕۆیشت، تاوه‌كو شانشینێك بۆ خۆی وه‌ربگرێت و بێته‌وه‌.
13
ده‌ له‌ كۆیله‌كانی خۆی بانگكرد و ده‌ كیسه‌ زیوی[b] پێدان و پێی گوتن، هه‌تا دێمه‌وه‌ بازرگانی بكه‌ن.
14
«به‌ڵام دانیشتووانی ناوچه‌كه‌ ڕقیان لێی بوو، شاندێكیان به‌دوایدا نارد و گوتیان: ”نامانه‌وێت ئه‌مه‌ پاشایه‌تیمان بكات.“
15
«ئه‌وه‌ بوو كه‌ گه‌ڕایه‌وه‌ پاشایه‌تییه‌كه‌ی وه‌رگرتبوو، فه‌رمانی دا ئه‌و كۆیلانه‌ی زیوه‌كه‌ی پێدابوون بانگ بكرێنه‌ لای، تاكو بزانێت چییان له‌ بازرگانی قازانج كردووه‌.
16
«یه‌كه‌میان هات و گوتی: ”گه‌وره‌م، كیسه‌ زیوه‌كه‌ت ده‌ كیسه‌ زیوی قازانج كردووه‌.“
17
«ئه‌ویش پێی گوت: ”ئافه‌رین كۆیله‌ی چاك، چونكه‌ له‌ كه‌مترین شت ده‌ستپاك بوویت، ببه‌ به‌ فه‌رمانڕه‌وای ده‌ شار.“
18
«دووه‌میان هات و گوتی: ”گه‌وره‌م، كیسه‌ زیوه‌كه‌ت پێنج كیسه‌ زیوی قازانج كردووه‌.“
19
«به‌مه‌شیانی گوت: ”تۆش ببه‌ به‌ فه‌رمانڕه‌وای پێنج شار.“
20
«ئه‌وی دیكه‌ هات و گوتی: ”گه‌وره‌م ئه‌وه‌تا كیسه‌ زیوه‌كه‌ت، له‌ ده‌سته‌سڕێك پێچابوومه‌وه‌ و هه‌ڵمگرتبوو.
21
له‌ ڕاستیدا لێت ترسام، له‌به‌ر ئه‌وه‌ی پیاوێكی سه‌ختیت، ئه‌وه‌ی داتنه‌ناوه‌ ده‌یبه‌یت و ئه‌وه‌ی نه‌تچاندووه‌ دروێنه‌ی ده‌كه‌یت.“
22
«ئه‌ویش پێی گوت: ”ئه‌ی كۆیله‌ی به‌دكار، به‌ زارت تاوانبارت ده‌كه‌م، كه‌ ده‌تزانی كابرایه‌كی توندم، ئه‌وه‌ی دامنه‌ناوه‌ ده‌یبه‌م و ئه‌وه‌ی نه‌مچاندووه‌ دروێنه‌ی ده‌كه‌م.
23
ئیتر بۆچی زیوه‌كه‌مت له‌ بانك دانه‌نا، كاتێك ده‌هاتمه‌وه‌ له‌گه‌ڵ قازانجه‌كه‌ی وه‌رمده‌گرته‌وه‌؟“
24
«به‌وانه‌ی گوت كه‌ له‌وێ ڕاوه‌ستابوون: ”كیسه‌ زیوه‌كه‌ی لێ بسه‌ننه‌وه‌ و بیده‌نه‌ ئه‌وه‌ی ده‌ كیسه‌ زیوه‌كه‌ی پێیه‌.“
25
«ئه‌وانیش پێیان گوت: ”گه‌وره‌م، ده‌ كیسه‌ زیوی هه‌یه‌!“
26
«وه‌ڵامی دایه‌وه‌: ”پێتان ده‌ڵێم: ئه‌وه‌ی هه‌یه‌تی پێی ده‌درێت، به‌ڵام ئه‌وه‌ی نییه‌تی، ته‌نانه‌ت ئه‌وه‌ی هه‌شیه‌تی لێی ده‌سه‌نرێته‌وه‌.
27
دوژمنانیشم، ئه‌وانه‌ی نه‌یانده‌ویست پاشایه‌تییان بكه‌م، بیانهێننه‌ ئێره‌ و له‌به‌رده‌مم بیانكوژن.“»
كه‌ژاوه‌ی پاشایانه‌ 
28
دوای ئه‌وه‌ی عیسا ئه‌مه‌ی فه‌رموو، له‌ پێشه‌وه‌ ڕۆیشت و به‌ره‌و ئۆرشه‌لیم سه‌ركه‌وت.
29
كاتێك له‌ گوندی بێت‌فاجی و بێت‌عه‌نیا نزیك بووه‌وه‌، كه‌ له‌لای ئه‌و كێوه‌ی كه‌ كێوی زه‌یتوونی پێ ده‌گوترێت، دووان له‌ قوتابییه‌كانی نارد و
30
فه‌رمووی: «بڕۆنه‌ ئه‌و گونده‌ی به‌رامبه‌رتان، كه‌ ده‌چنه‌ ناوی، ده‌بینن جاشكێك به‌ستراوه‌ته‌وه‌ هه‌تا ئێستا كه‌س سواری نه‌بووه‌، بیكه‌نه‌وه‌ و بیهێنن.
31
ئه‌گه‌ر یه‌كێك پرسیاری لێكردن: ”بۆچی ده‌یكه‌نه‌وه‌؟“ له‌ وه‌ڵامدا بڵێن: ”گه‌وره‌مان پێویستی پێیه‌تی.“»
32
دوو قوتابییه‌كه‌ چوون و چی پێ گوتبوون بینییان.
33
كاتێك جاشكه‌كه‌یان ده‌كرده‌وه‌، خاوه‌نه‌كانی لێیان پرسین: «بۆچی جاشكه‌كه‌ ده‌كه‌نه‌وه‌؟»
34
گوتیان: «گه‌وره‌مان پێویستی پێیه‌تی.»
35
ئینجا بۆ عیسایان هێنا و كه‌واكانیان خسته‌ سه‌ر جاشكه‌كه‌ و عیسایان سواری كرد.
36
كاتێك به‌ڕێوه‌ بوو، خه‌ڵك كه‌واكانیان له‌سه‌ر ڕێگا ڕاده‌خست.
37
له‌ لێژاییه‌كه‌ی كێوی زه‌یتوون نزیك بووه‌وه‌، هه‌موو كۆمه‌ڵی قوتابییه‌كان ده‌ستیان پێكرد به‌ شادی و به‌ ده‌نگی به‌رز ستایشی خودا بكه‌ن، بۆ هه‌موو ئه‌و په‌رجووانه‌ی بینییان، ده‌یانگوت:
38
«{پیرۆزه‌ ئه‌و پاشایه‌ی به‌ ناوی یه‌زدانه‌وه‌ دێت!}[c] »
«ئاشتی له‌ ئاسمان و شكۆ بۆ خودا له‌ به‌رزایی!»
39
هه‌ندێك فه‌ریسی نێو خه‌ڵكه‌كه‌، به‌ عیسایان گوت: «مامۆستا، قوتابییه‌كانت سه‌رزه‌نشت بكه‌.»
40
وه‌ڵامی دایه‌وه‌: «پێتان ده‌ڵێم: ئه‌گه‌ر ئه‌وانه‌ بێده‌نگ بن، به‌رده‌كان هاوار ده‌كه‌ن.»
گریانی عیسا بۆ ئۆرشه‌لیم 
41
كاتێك له‌ ئۆرشه‌لیم نزیك بووه‌وه‌ و شاره‌كه‌ی بینی، بۆی گریا،
42
فه‌رمووی: «خۆزگه‌ بتزانیایه‌، ته‌نانه‌ت تۆش، له‌م ڕۆژه‌دا چ شتێك بۆت مایه‌ی ئاشتییه‌! به‌ڵام ئێستا له‌به‌رچاوت شاراوه‌یه‌.
43
ڕۆژانێكت به‌سه‌ردێت، كه‌ دوژمنانت سه‌نگه‌رت لێ ده‌گرن، ئابڵوقه‌ت ده‌ده‌ن و له‌ هه‌موو لایه‌كه‌وه‌ ده‌ورت ده‌گرن.
44
خۆت و منداڵه‌كانت له‌ناو شووراكانت له‌گه‌ڵ زه‌وی ته‌خت ده‌كرێن. به‌ردت به‌سه‌ر به‌رده‌وه‌ ناهێڵن، چونكه‌ كاتی به‌سه‌ركردنه‌وه‌ت[d] نه‌زانی.»
عیسا په‌رستگا پاك ده‌كاته‌وه‌ 
45
كاتێك عیسا چووه‌ ناو حه‌وشه‌كانی په‌رستگا، ده‌ستی به‌ ده‌ركردنی فرۆشیاران كرد.
46
پێی فه‌رموون: «نووسراوه‌: {ماڵه‌كه‌م ماڵی نوێژه‌،}[e] كه‌چی ئێوه‌ كردووتانه‌ به‌ {ئه‌شكه‌وتی دزان!}[f] »
47
ڕۆژانه‌ له‌ په‌رستگا خه‌ڵكی فێرده‌كرد، كاهینانی باڵا و مامۆستایانی ته‌ورات و ڕابه‌رانی گه‌ل هه‌وڵیان ده‌دا بیكوژن.
48
به‌ڵام هیچیان بۆ ئه‌نجامدانی نه‌ده‌دۆزییه‌وه‌، چونكه‌ هه‌موو گه‌ل په‌یوه‌ستی گوێ لێگرتنی بوون.
  1. a. 19‏:10 ئه‌و كه‌سانه‌ی شایسته‌ی دۆزه‌خن.
  2. b. 19‏:13 مه‌نا: نزیكه‌ی كرێی سێ مانگی كرێكارێك.
  3. c. 19‏:38 \+xt زه‌بووره‌كان 118‏:26‏\+xt*‏
  4. d. 19‏:44 مه‌به‌ستی هاتنی مه‌سیحه‌ بۆ ڕزگاركردنیان.
  5. e. 19‏:46 \+xt ئیشایا 56‏:7‏\+xt*‏
  6. f. 19‏:46 \+xt یه‌رمیا 7‏:11‏\+xt*‏