عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
مه‌به‌ستی ئه‌م نووسینه‌ 
1
ئه‌ی ساوفیلۆسی[a] پایه‌به‌رز، زۆر كه‌س هه‌ستان به‌ داڕشتنی چیڕۆكی ئه‌و شتانه‌ی[b] له‌لای ئێمه‌ هاتنه‌ دی،
2
وه‌ك ئه‌وه‌ی له‌لایه‌ن ئه‌وانه‌وه‌ پێمان گه‌یشت كه‌ له‌ سه‌ره‌تاوه‌ شایه‌تحاڵ و خزمه‌تكاری په‌یامه‌كه‌[c] بوون.
3
له‌دوای ئه‌وه‌ی من له‌ سه‌ره‌تاوه‌ پشكنینێكی وردم بۆ هه‌موو شتێك كرد، ئێستاش به‌ باشم زانی به‌ ڕیزبه‌ندی بۆت بنووسم،
4
تاكو له‌ ڕاستی ئه‌و قسانه‌ دڵنیابی كه‌ فێركراوی.
له‌دایكبوونی یه‌حیا 
5
له‌و سه‌رده‌مه‌ی هێرۆدسی باوك پاشای یه‌هودیا بوو، كاهینێك[d] له‌ نۆره‌ی نه‌وه‌ی ئه‌بیا[e] هه‌بوو ناوی زه‌كه‌ریا، ئه‌لیساباتی ژنیشی له‌ نه‌وه‌ی هارون بوو.
6
هه‌ردووكیان له‌به‌رچاوی خودا ڕاستودروست بوون، بێ گله‌یی بوون له‌ په‌یڕه‌وكردنی هه‌موو ڕاسپارده‌ و حوكمه‌كانی[f] یه‌زدان.
7
به‌ڵام منداڵیان نه‌ده‌بوو، چونكه‌ ئه‌لیسابات نه‌زۆك بوو، هه‌ردووكیشیان به‌ ساڵدا چووبوون.
8
كاتێك زه‌كه‌ریا له‌ نۆره‌ی كۆمه‌ڵه‌كه‌ی خۆیدا كاروباری كاهینیێتی جێبه‌جێ ده‌كرد له‌به‌رده‌م خودا،
9
به‌گوێره‌ی نه‌ریتی كاهینیێتی[g] ، تیروپشكی كه‌وته‌ سه‌ر تاكو بچێته‌ ناو په‌رستگای یه‌زدان و بخوور بسووتێنێت.
10
له‌ كاتی سووتانی بخووره‌كه‌دا، خه‌ڵكی هه‌موو له‌ ده‌ره‌وه‌ نوێژیان ده‌كرد.
11
له‌وێ فریشته‌یه‌كی یه‌زدانی بۆ ده‌ركه‌وت، له‌لای ڕاستی قوربانگای بخوور ڕاوه‌ستابوو.
12
كاتێك زه‌كه‌ریا فریشته‌كه‌ی بینی، په‌شۆكا و ترسی لێ نیشت.
13
به‌ڵام فریشته‌كه‌ پێی گوت: «زه‌كه‌ریا مه‌ترسه‌، چونكه‌ پاڕانه‌وه‌كه‌ت بیسترا، ئه‌لیساباتی ژنیشت كوڕێكی بۆت ده‌بێت و ناوی لێ ده‌نێیت یه‌حیا[h] .
14
ئه‌و ده‌بێته‌ مایه‌ی خۆشی و شادی بۆ تۆ، زۆر كه‌س به‌ له‌دایكبوونی دڵخۆش ده‌بن،
15
چونكه‌ ئه‌و له‌به‌رچاوی یه‌زدان ده‌بێته‌ كه‌سێكی مه‌زن و پایه‌به‌رز. هه‌رگیز شه‌راب و مه‌ی ناخواته‌وه‌. له‌ سكی دایكییه‌وه‌ پڕده‌بێت له‌ ڕۆحی پیرۆز و
16
زۆر له‌ ڕۆڵه‌كانی ئیسرائیل بۆ لای یه‌زدانی په‌روه‌ردگاری خۆیان ده‌گه‌ڕێنێته‌وه‌.
17
به‌ ڕۆح و توانای ئه‌لیاسه‌وه‌ پێش یه‌زدان ده‌كه‌وێت[i] ، تاكو دڵی باوكان بۆ لای منداڵه‌كان ڕابكێشێت و یاخیبووانیش بۆ لای دانایی ڕاستودروستان بگه‌ڕێنێته‌وه‌، بۆ ئه‌وه‌ی گه‌لێكی ئاماده‌ بۆ یه‌زدان پێكبهێنێت.»
18
زه‌كه‌ریاش به‌ فریشته‌كه‌ی گوت: «به‌ چی ئه‌مه‌ بزانم، چونكه‌ خۆم پیرم و ژنه‌كه‌شم به‌ ساڵدا چووه‌؟»
19
فریشته‌كه‌ وه‌ڵامی دایه‌وه‌: «من جبرائیلم[j] له‌به‌رده‌م خودا ڕاده‌وه‌ستم، نێردراوم تاكو له‌گه‌ڵت بدوێم و ئه‌م مژده‌یه‌ت بده‌مێ.
20
ئه‌وه‌تا له‌ ئێستاوه‌ تۆ لاڵ ده‌بیت و توانای قسه‌كردنت نامێنێت هه‌تا ئه‌و ڕۆژه‌ی ئه‌م شتانه‌ ڕووده‌ده‌ن، چونكه‌ باوه‌ڕت به‌ قسه‌كه‌م نه‌كرد، ئه‌وه‌ی له‌ كاتی خۆیدا دێته‌ دی.»
21
خه‌ڵكه‌كه‌ چاوه‌ڕوانی زه‌كه‌ریایان ده‌كرد و سه‌رسام ببوون له‌ دواكه‌وتنی له‌ناو په‌رستگادا.
22
كاتێك هاته‌ ده‌ره‌وه‌ نه‌یتوانی له‌گه‌ڵیان بدوێت، جا زانییان كه‌ له‌ په‌رستگادا بینینێكی بۆ ئاشكرا كراوه‌، چونكه‌ به‌ ئیشاره‌ت له‌گه‌ڵیان ده‌دوا و به‌ لاڵی مایه‌وه‌.
23
كاتێك ڕۆژانی خزمه‌تكردنه‌كه‌ی ته‌واوبوو، گه‌ڕایه‌وه‌ ماڵ.
24
دوای ئه‌و ڕۆژانه‌، ئه‌لیساباتی ژنی سكی پڕبوو، پێنج مانگ خۆی شارده‌وه‌ و ده‌یگوت:
25
«یه‌زدان ئه‌مه‌ی بۆ كردم، له‌م ڕۆژانه‌دا چاكه‌ی خۆی نیشان دا و ئابڕووی منی له‌نێو خه‌ڵكدا كڕییه‌وه‌.»
مژده‌ی له‌دایكبوونی عیسا 
26
كاتێك ئه‌لیسابات سكی شه‌ش مانگ‏‏ بوو، خودا جبرائیلی فریشته‌ی نارد بۆ شارێك له‌ ناوچه‌ی جه‌لیل كه‌ ناوی ناسیره‌ بوو،
27
بۆ لای پاكیزه‌یه‌كی ماره‌بڕاو له‌ پیاوێك له‌ بنه‌ماڵه‌ی داود كه‌ ناوی یوسف بوو، ناوی پاكیزه‌كه‌ش مریه‌م بوو.
28
جبرائیل هاته‌ لای مریه‌م و گوتی: «سڵاو، ئه‌ی ئه‌و كه‌سه‌ی نیعمه‌تی خودات به‌سه‌ردا ڕژاوه‌، یه‌زدانت له‌گه‌ڵدایه‌.»
29
به‌ڵام ئه‌و به‌ په‌یامه‌كه‌ زۆر شێوا و بیری كرده‌وه‌، ده‌بێت ئه‌مه‌ چ جۆره‌ سڵاوێك بێت.
30
فریشته‌كه‌ پێی گوت: «مه‌ترسه‌ مریه‌م، چونكه‌ له‌لای خودا ڕه‌زامه‌ندیت به‌ده‌ستهێنا.
31
ئه‌وه‌تا سكت ده‌بێت و كوڕێكت ده‌بێت ناوی لێ ده‌نێیت عیسا.
32
پایه‌به‌رز ده‌بێت و به‌ كوڕی خودای هه‌ره‌به‌رز ناوده‌بردرێت، خودای په‌روه‌ردگاریش ته‌ختی داودی باوكی پێده‌داته‌وه‌.
33
هه‌تاهه‌تایه‌ حوكمڕانی نه‌وه‌ی یاقوب ده‌كات، شانشینه‌كه‌شی كۆتایی نایه‌ت.»
34
به‌ڵام مریه‌م به‌ فریشته‌كه‌ی گوت: «ئه‌مه‌ چۆن ده‌بێت، كه‌ من هێشتا پاكیزه‌م؟»
35
فریشته‌كه‌ وه‌ڵامی دایه‌وه‌: «ڕۆحی پیرۆز دێته‌ سه‌رت و هێزی خودای هه‌ره‌به‌رز ده‌بێته‌ سایه‌ی سه‌رت. له‌به‌ر ئه‌وه‌ ئه‌و پیرۆزه‌ی لێت ده‌بێت به‌ كوڕی خودا ناوده‌بردرێت.
36
ئه‌وه‌تا ئه‌لیساباتی خزمیشت به‌و پیرییه‌ سكی پڕه‌ به‌ كوڕێك. ئه‌وه‌ی پێیان ده‌گوت نه‌زۆك سكی شه‌ش مانگه‌،
37
چونكه‌ هیچ شتێك له‌لای خودا مه‌حاڵ نییه‌.»
38
مریه‌م گوتی: «ئه‌وه‌تا من كاره‌كه‌ری یه‌زدانم. ئه‌وه‌ی تۆ ده‌یفه‌رموویت با بێته‌ دی.» فریشته‌كه‌ش به‌جێی هێشت.
دیده‌نی مریه‌م و ئه‌لیسابات 
39
له‌و ڕۆژانه‌دا، مریه‌م هه‌ستا و خێرا بۆ شارۆچكه‌یه‌ك چوو له‌ ناوچه‌ شاخاوییه‌كانی هه‌رێمی یه‌هودیا.
40
چووه‌ ماڵی زه‌كه‌ریا و سڵاوی له‌ ئه‌لیسابات كرد.
41
كاتێك ئه‌لیسابات گوێی له‌ سڵاوه‌كه‌ی مریه‌م بوو، منداڵه‌كه‌ له‌ سكیدا كه‌وته‌ جوڵه‌جوڵ و ئه‌لیسابات پڕبوو له‌ ڕۆحی پیرۆز.
42
ئه‌لیسابات به‌ ده‌نگێكی به‌رز هاواری كرد: «له‌نێو ژناندا به‌ره‌كه‌تداریت، به‌رهه‌می سكت به‌ره‌كه‌تدار ده‌بێت!
43
ئه‌م شكۆیه‌م له‌كوێوه‌ بۆ هات، هه‌تا دایكی گه‌وره‌كه‌م بێت بۆ لام؟
44
چونكه‌ هه‌ر كه‌ ده‌نگی سڵاوه‌كه‌ت به‌ر گوێم كه‌وت، منداڵه‌كه‌ له‌ خۆشیدا له‌ سكمدا هه‌ڵبه‌زییه‌وه‌.
45
خۆزگه‌ ده‌خوازرێت به‌وه‌ی[k] باوه‌ڕی هێناوه‌ كه‌ له‌ یه‌زدانه‌وه‌ چی پێ گوتراوه‌ دێته‌ دی.»
ستایشی مریه‌م 
46
مریه‌میش گوتی:
«گیانم ستایشی یه‌زدان ده‌كات،
47
ڕۆحم به‌ خودای ڕزگاركه‌رم دڵشاده‌،
48
چونكه‌ سه‌یری بێفیزی كاره‌كه‌ره‌كه‌ی كرد.
ئه‌وه‌تا له‌ ئێستاوه‌ هه‌موو نه‌وه‌كان خۆزگه‌ به‌ من ده‌خوازن،
49
چونكه‌ توانادار كاری گه‌وره‌ی بۆ من ئه‌نجام دا،
پیرۆزه‌ ناوی ئه‌و.
50
به‌زه‌ییه‌كه‌ی بۆ ئه‌وانه‌یه‌ كه‌ لێی ده‌ترسن،
نه‌وه‌ دوای نه‌وه‌.
51
به‌ بازووی كاری به‌هێزی ئه‌نجام دا،
ئه‌وانه‌ی به‌ بۆچوونه‌كانی دڵیان لووتبه‌رز بوون، په‌رتوبڵاوی كردنه‌وه‌.
52
ته‌ختی تواناداره‌كانی سه‌ره‌وژێر كردووه‌ و
بێفیزه‌كانی بڵند كرده‌وه‌.
53
برسییه‌كانی له‌ خێروبێر تێر كرد،
ده‌وڵه‌مه‌ندانی به‌ ده‌ستی به‌تاڵ ڕه‌وانه‌ كرده‌وه‌.
54
به‌ یارمه‌تیدانی گه‌لی ئیسرائیلی به‌نده‌ی خۆی
هه‌تاهه‌تایه‌ به‌زه‌ییه‌كه‌ی به‌بیر هێنایه‌وه‌
55
له‌گه‌ڵ ئیبراهیم و نه‌وه‌كه‌ی،
هه‌روه‌ك به‌ڵێنی به‌ باوباپیرانمان دا.»
56
مریه‌م له‌لای ئه‌لیسابات نزیكه‌ی سێ مانگ مایه‌وه‌، پاشان گه‌ڕایه‌وه‌ بۆ ماڵه‌كه‌ی خۆی.
له‌دایكبوونی حه‌زره‌تی یه‌حیا 
57
ئه‌لیسابات كاتی منداڵبوونی هات و كوڕێكی بوو.
58
جا دراوسێ و خزمانی بیستیان یه‌زدان ده‌رگای به‌زه‌یی فراوانی خۆی بۆ كردووه‌ته‌وه‌، له‌گه‌ڵی شادمان بوون.
59
له‌ ڕۆژی هه‌شته‌مدا بۆ خه‌ته‌نه‌كردنی منداڵه‌كه‌ هاتن، له‌سه‌ر ناوی باوكی ناویان لێنا زه‌كه‌ریا.
60
به‌ڵام دایكی گوتی: «نه‌خێر، ناوی ده‌نرێت یه‌حیا[l]
61
پێیان گوت: «كه‌س له‌ خزمانت به‌م ناوه‌ ناونه‌نراوه‌.»
62
ئینجا ئیشاره‌تیان بۆ باوكی كرد، ده‌یه‌وێت چ ناوێكی لێ بنێت.
63
ته‌خته‌یه‌كی داوا كرد و له‌سه‌ری نووسی: «ناوی یه‌حیایه‌.» هه‌موو سه‌رسام بوون.
64
ده‌ستبه‌جێ ده‌م و زمانی زه‌كه‌ریا كرایه‌وه‌، قسه‌ی كرد و ستایشی خودای ده‌كرد.
65
هه‌موو دراوسێكانیان ترسیان لێ نیشت و له‌ سه‌راپای ناوچه‌ شاخاوییه‌كانی یه‌هودیا هه‌موو ئه‌م شتانه‌ بوو به‌ قسه‌ و باسی سه‌ر زاری خه‌ڵكی.
66
هه‌موو ئه‌وانه‌ی ئه‌م باسه‌یان بیست له‌ دڵی خۆیاندا گوتیان: «ئایا ئه‌م منداڵه‌ ده‌بێته‌ چی؟» چونكه‌ ده‌ستی یه‌زدانی له‌گه‌ڵ بوو.
ستایشی زه‌كه‌ریا 
67
زه‌كه‌ریای باوكیشی پڕبوو له‌ ڕۆحی پیرۆز و پێشبینی كرد، گوتی:
68
«ستایش بۆ یه‌زدانی په‌روه‌ردگاری ئیسرائیل،
چونكه‌ گه‌له‌كه‌ی به‌سه‌ركرده‌وه‌ و كڕییه‌وه‌[m] .
69
هێزی ڕزگاریمانی هه‌ستانده‌وه‌،
له‌ بنه‌ماڵه‌ی داودی به‌نده‌ی،
70
وه‌ك چۆن له‌ كۆنه‌وه‌ له‌ ڕێگه‌ی پێغه‌مبه‌ره‌ پیرۆزه‌كانییه‌وه‌ دواوه‌،
71
بۆ ڕزگاربوون له‌ ده‌ست دوژمنان و
هه‌موو ناحه‌زانمان،
72
هه‌روه‌ها بۆ به‌خشینی به‌زه‌یی به‌ باوباپیرانمان و
په‌یوه‌ستبوون به‌ په‌یمانه‌ پیرۆزه‌كه‌ی،
73
واته‌ ئه‌و سوێنده‌ی كه‌ بۆ ئیبراهیمی باپیره‌ گه‌وره‌مانی خوارد:
74
كه‌ ئێمه‌ له‌ ده‌ست دوژمن ڕزگارمان بێت و
بێ ترس ئه‌و بپه‌رستین،
75
هه‌موو ڕۆژانی ژیانمان به‌ پیرۆزی و ڕاستودروستی[n] له‌به‌رده‌میدا بین.
76
«تۆش ئه‌ی منداڵ، به‌ پێغه‌مبه‌ری خودای هه‌ره‌به‌رز ناوده‌بردرێیت،
چونكه‌ پێش یه‌زدان ده‌كه‌ویت، تاكو ڕێگای بۆ ئاماده‌ بكه‌یت،
77
تاكو به‌ گه‌له‌كه‌ی ڕابگه‌یه‌نیت
به‌ لێخۆشبوونی گوناهه‌كانیان ڕزگاریان ده‌بێت،
78
به‌هۆی به‌زه‌ییه‌ به‌سۆزه‌كه‌ی خودامانه‌وه‌،
كه‌ به‌هۆیه‌وه‌ ڕووناكی له‌ به‌رزاییه‌وه‌ به‌سه‌رماندا ده‌دره‌وشێته‌وه‌،
79
تاكو به‌سه‌ر ئه‌وانه‌ی له‌ تاریكی و له‌ سێبه‌ری مه‌رگدا دانیشتوون بدره‌وشێته‌وه‌،
بۆ ئه‌وه‌ی پێیه‌كانمان به‌ ڕێگای ئاشتیدا ببات.»
80
منداڵه‌كه‌ش گه‌شه‌ی ده‌كرد و له‌ ڕۆحدا به‌هێز ده‌بوو، له‌‏ چۆڵه‌وانی مایه‌وه‌ هه‌تا ئه‌و ڕۆژه‌ی كه‌ خۆی بۆ گه‌لی ئیسرائیل ده‌رخست.
  1. a. 1‏:1 ناوێكی یۆنانییه‌، واته‌ ئه‌وه‌ی خودای خۆشده‌وێت.
  2. b. 1‏:1 مه‌به‌ست له‌ هاتنه‌دی هه‌موو پێشبینییه‌كانی پێغه‌مبه‌رانه‌ سه‌باره‌ت به‌ مه‌سیح.
  3. c. 1‏:2 یۆنانی: وشه‌كه‌: مه‌به‌ست له‌ په‌یامی مه‌سیحه‌.
  4. d. 1‏:5 كاهین: پیاوێكی ئایینی جوله‌كه‌یه‌ كه‌ هه‌ڵده‌ستێ به‌ ئه‌ركی قوربانی كردن له‌ناو په‌رستگا و فێركردنی خه‌ڵك.
  5. e. 1‏:5 گروپێكی كاهینان بوون له‌ نه‌وه‌ی ئه‌بیا.
  6. f. 1‏:6 ته‌ورات.
  7. g. 1‏:9 یه‌كێك له‌ كاهینان هه‌ڵده‌ستا به‌ دانانی بخوور له‌ناو قوربانگا.
  8. h. 1‏:13 یه‌حیا: عیبری: یۆخه‌ننه‌ن، واته‌ خودا میهره‌بانه‌، له‌لای هه‌ندێك به‌ یۆحه‌نا ناسراوه‌.
  9. i. 1‏:17 خودا پێش هاتنی مه‌سیح یه‌حیای نارد.
  10. j. 1‏:19 جبرائیل: یه‌كێكه‌ له‌و دوو فریشته‌یه‌ی كه‌ له‌ كتێبی پیرۆزدا ناویان هاتووه‌، بڕوانه‌ \+xt دانیال 8‏:16‏\+xt*‏.
  11. k. 1‏:45 به‌وه‌ی: لێره‌دا ده‌گه‌ڕێته‌وه‌ بۆ كه‌سی سێیه‌می تاكی مێ، كه‌ مه‌به‌ستی له‌ مریه‌مه‌.
  12. l. 1‏:60 بڕوانه‌ \+xt 1‏:13‏\+xt*.
  13. m. 1‏:68 به‌ واتای ڕزگاری كرد.
  14. n. 1‏:75 له‌به‌رچاوی خودا ڕاست و دادپه‌روه‌رانه‌ بین.