عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
تێربوونی پێنج هه‌زار كه‌س 
1
دوای ئه‌مه‌ عیسا چوو بۆ ئه‌وبه‌ری ده‌ریاچه‌ی جه‌لیل، كه‌ ده‌ریاچه‌ی ته‌به‌رییه‌یه‌،
2
ئاپۆره‌یه‌ك له‌ خه‌ڵك دوای كه‌وتبوون، چونكه‌ ئه‌و په‌رجووانه‌یان بینیبوو كه‌ له‌ نه‌خۆشه‌كاندا ده‌یكرد.
3
ئینجا عیسا چووه‌ سه‌ر شاخ و له‌وێ له‌گه‌ڵ قوتابییه‌كانی دانیشت.
4
جه‌ژنی په‌سخه‌ی جوله‌كه‌ش نزیك بوو.
5
عیساش چاوی هه‌ڵبڕی و خه‌ڵكێكی له‌ ڕاده‌به‌ده‌ر زۆری بینی ده‌هاتنه‌ لای، به‌ فیلیپۆسی فه‌رموو: «له‌كوێ نان بكڕین و ئه‌مانه‌ نان بده‌ین؟»
6
ئه‌مه‌ی گوت بۆ ئه‌وه‌ی تاقی بكاته‌وه‌، چونكه‌ خۆی ده‌یزانی ده‌بێت چی بكات.
7
فیلیپۆس وه‌ڵامی دایه‌وه‌: «بایی دوو سه‌د دیناریش[a] نان به‌شیان ناكات، ئه‌گه‌ر هه‌ریه‌كه‌یان كه‌مێكی به‌ركه‌وێت.»
8
یه‌كێك له‌ قوتابییه‌كانی كه‌ ئه‌ندراوسی برای شیمۆن په‌ترۆس بوو پێی گوت:
9
«كوڕێك لێره‌یه‌ پێنج نانی جۆ و دوو ماسی پێیه‌. به‌ڵام ئه‌وه‌نده‌ چییه‌ بۆ ئه‌م هه‌مووه‌؟»
10
عیسا فه‌رمووی: «خه‌ڵكه‌كه‌ دابنیشێنن.» ئه‌و شوێنه‌ گیایه‌كی زۆری لێبوو، جا پیاوه‌كان كه‌ پێنج هه‌زار ده‌بوون دانیشتن.
11
عیساش نانه‌كانی وه‌رگرت و سوپاسی خودای كرد، به‌سه‌ر دانیشتووان دابه‌شی كرد، بۆ ماسییه‌كانیش ئاوای كرد، ئه‌وه‌نده‌ی ویستیان.
12
كاتێك تێربوون، به‌ قوتابییه‌كانی فه‌رموو: «ئه‌و په‌لكه‌نانه‌ی ماوه‌ته‌وه‌ كۆی بكه‌نه‌وه‌ تاكو هیچ به‌فیڕۆ نه‌ڕوات.»
13
ئه‌وانیش كۆیان كرده‌وه‌ و دوازده‌ سه‌به‌ته‌یان پڕكرد له‌و په‌لكه‌نانه‌ی ئه‌و پێنج نانه‌ جۆیه‌ی له‌ نانخۆران مابووه‌وه‌.
14
له‌به‌ر ئه‌وه‌ كه‌ خه‌ڵكه‌كه‌ بینییان عیسا چ په‌رجووێكی كرد، گوتیان: «به‌ ڕاستی ئه‌مه‌ پێغه‌مبه‌ره‌كه‌یه‌[b] كه‌ بۆ جیهان دێت.»
15
عیسا زانی ئه‌وان به‌ نیازن بێن و بیگرن تاكو بیكه‌نه‌ پاشا، دیسان به‌ ته‌نها چووه‌ سه‌ر شاخ.
عیسا به‌سه‌ر ئاودا ده‌ڕوات 
16
كاتێك ئێواره‌ داهات قوتابییه‌كانی بۆ لای ده‌ریاچه‌كه‌ چوونه‌ خواره‌وه‌،
17
سواری به‌له‌مێك بوون و به‌ ده‌ریاچه‌دا بۆ كه‌فه‌رناحوم كه‌وتنه‌ڕێ. تاریك داهات و عیسا هه‌ر نه‌گه‌یشته‌ لایان.
18
ڕه‌شه‌با هه‌ڵیكرد و ده‌ریاچه‌ هه‌ڵچوو.
19
كه‌ نزیكه‌ی بیست و پێنج تاكو سی تیرهاوێژ[c] سه‌وڵیان لێدابوو، عیسایان بینی به‌سه‌ر ئاوه‌كه‌دا ده‌ڕوات و له‌ به‌له‌مه‌كه‌ نزیك ده‌بێته‌وه‌، جا ترسان.
20
به‌ڵام پێی فه‌رموون: «منم، مه‌ترسن!»
21
كه‌ ڕازی بوون سواری به‌له‌مه‌كه‌ی بكه‌ن، ده‌ستبه‌جێ به‌له‌مه‌كه‌ گه‌یشته‌ ئه‌و كه‌ناره‌ی بۆی ده‌چوون.
22
بۆ به‌یانی، ئه‌و خه‌ڵكه‌ی له‌وبه‌ری ده‌ریاچه‌كه‌ ڕاوه‌ستابوون بینییان له‌ به‌له‌مێك زیاتر له‌وێ نه‌بوو، عیساش له‌گه‌ڵ قوتابییه‌كانی سواری به‌له‌م نه‌بوو، به‌ڵكو قوتابییه‌كانی به‌ ته‌نها به‌ڕێكه‌وتبوون.
23
به‌له‌می دیكه‌ش له‌ شاری ته‌به‌رییه‌وه‌ هاتنه‌ نزیك ئه‌و شوێنه‌ی نانه‌كه‌یان لێی خوارد كه‌ عیسای خاوه‌ن شكۆ سوپاسی خودای كرد.
24
كاتێك خه‌ڵكه‌كه‌ بینییان نه‌ عیسا له‌وێیه‌ و نه‌ قوتابییه‌كانی، سواری به‌له‌مه‌كان بوون و چوونه‌ كه‌فه‌رناحوم، له‌ عیسا ده‌گه‌ڕان.
منم نانی ژیان 
25
كه‌ له‌وبه‌ری ده‌ریاچه‌كه‌ دۆزییانه‌وه‌، لێیان پرسی: «ڕابی، كه‌ی گه‌یشتییه‌ ئێره‌؟»
26
عیسا وه‌ڵامی دانه‌وه‌: «ڕاستی ڕاستیتان پێ ده‌ڵێم: ئێوه‌ به‌دوامدا ده‌گه‌ڕێن نه‌ك له‌به‌ر ئه‌وه‌ی په‌رجووه‌كانتان بینی، به‌ڵكو له‌به‌ر ئه‌وه‌ی له‌ نانه‌كه‌تان خوارد و تێر بوون.
27
بۆ خۆراكێك ئیش مه‌كه‌ن كه‌ له‌ناوده‌چێت، به‌ڵكو بۆ خۆراكێك كه‌ بۆ ژیانی هه‌تاهه‌تایی ده‌مێنێته‌وه‌، ئه‌وه‌ی كوڕی مرۆڤ ده‌تانداتێ، چونكه‌ ئه‌مه‌ خودای باوك مۆری لێداوه‌.»
28
له‌به‌ر ئه‌وه‌ لێیان پرسی: «چی بكه‌ین تاكو كاره‌كانی خودا بكه‌ین؟»
29
عیسا وه‌ڵامی دانه‌وه‌: «كاری خودا ئه‌مه‌یه‌: باوه‌ڕ بهێنن به‌وه‌ی ناردوویه‌تی.»
30
ئه‌وانیش لێیان پرسی: «چ په‌رجووێك ده‌كه‌یت تاكو بیبینین و باوه‌ڕت پێ بكه‌ین؟ چی ده‌كه‌یت؟
31
باوباپیرانمان له‌ چۆڵه‌وانی مه‌نیان[d] خوارد، وه‌ك نووسراوه‌: {له‌ ئاسمانه‌وه‌ نانی دانێ تاكو بیخۆن.}[e] »
32
عیساش پێی فه‌رموون: «ڕاستی ڕاستیتان پێ ده‌ڵێم: موسا نه‌بوو نانه‌كه‌ی له‌ ئاسمانه‌وه‌ دانێ، به‌ڵكو باوكمه‌ له‌ ئاسمانه‌وه‌ نانی ڕاستیتان ده‌داتێ،
33
چونكه‌ نانی خودا ئه‌وه‌یه‌ كه‌ له‌ ئاسمانه‌وه‌ دابه‌زیوه‌ و ژیان ده‌به‌خشێته‌ جیهان.»
34
له‌به‌ر ئه‌وه‌ پێیان گوت: «گه‌وره‌م، هه‌موو كاتێك ئه‌و نانه‌مان بده‌رێ.»
35
عیساش پێی فه‌رموون: «منم نانی ژیان. ئه‌وه‌ی بێته‌ لام هه‌رگیز برسی نابێت، ئه‌وه‌ش باوه‌ڕم پێ بهێنێت هه‌رگیز تینووی نابێت.
36
به‌ڵام پێم گوتن، منتان بینیوه‌ و باوه‌ڕیش ناهێنن.
37
هه‌ركه‌سێك باوكم ده‌یداته‌ من دێته‌ لام، ئه‌وه‌ش بێته‌ لام، هه‌رگیز ده‌ریناكه‌م.
38
من له‌ ئاسمانه‌وه‌ دابه‌زیوم، نه‌ك تاكو به‌ خواستی خۆم بكه‌م، به‌ڵكو خواستی ئه‌وه‌ی ناردوومی.
39
ئه‌مه‌ش خواستی ئه‌وه‌یه‌ كه‌ ناردوومی، هه‌ركه‌سێكی پێداوم له‌ده‌ستی نه‌ده‌م، به‌ڵكو له‌ ڕۆژی دواییدا زیندووی ده‌كه‌مه‌وه‌.
40
خواستی باوكم ئه‌مه‌یه‌: هه‌ركه‌سێك ته‌ماشای كوڕه‌كه‌ بكات و باوه‌ڕی پێ بهێنێت ژیانی هه‌تاهه‌تایی ده‌بێت، منیش له‌ ڕۆژی دواییدا زیندووی ده‌كه‌مه‌وه‌.»
41
جوله‌كه‌ش بۆڵه‌بۆڵیان له‌سه‌ر ده‌كرد، چونكه‌ فه‌رمووی: «منم ئه‌و نانه‌ی له‌ ئاسمانه‌وه‌ دابه‌زیوه‌.»
42
گوتیان: «ئه‌مه‌ عیسای كوڕی یوسف نییه‌، كه‌ دایك و باوكی ده‌ناسین؟ ئێستا چۆن ده‌ڵێت ”له‌ ئاسمانه‌وه‌ دابه‌زیوم“؟»
43
عیساش وه‌ڵامی دانه‌وه‌ و پێی گوتن: «له‌ناو خۆتاندا بۆڵه‌بۆڵ مه‌كه‌ن.
44
كه‌س ناتوانێت بێته‌ لام ئه‌گه‌ر باوك ڕاینه‌كێشێت، ئه‌وه‌ی ناردوومی، منیش له‌ ڕۆژی دواییدا زیندووی ده‌كه‌مه‌وه‌.
45
له‌ په‌ڕتووكی پێغه‌مبه‌راندا نووسراوه‌: {هه‌موو له‌ خوداوه‌ فێر ده‌بن.}[f] جا ئه‌وه‌ی له‌ باوكه‌وه‌ بیستبێتی و فێربووبێت دێته‌ لام.
46
كه‌س باوكی نه‌بینیوه‌ جگه‌ له‌وه‌ی له‌ خوداوه‌یه‌، ته‌نها ئه‌وه‌ی له‌ خوداوه‌یه‌ باوكی بینیوه‌.
47
ڕاستی ڕاستیتان پێ ده‌ڵێم: ئه‌وه‌ی باوه‌ڕ بهێنێت ژیانی هه‌تاهه‌تایی هه‌یه‌.
48
منم نانی ژیان.
49
باوباپیرانتان له‌ چۆڵه‌وانیدا مه‌نیان خوارد و مردن.
50
به‌ڵام ئه‌مه‌ ئه‌و نانه‌یه‌ كه‌ له‌ ئاسمانه‌وه‌ دابه‌زیوه‌، تاكو ئه‌وه‌ی لێی بخوات نه‌مرێت.
51
منم ئه‌و نانه‌ زیندووه‌ی كه‌ له‌ ئاسمانه‌وه‌ دابه‌زیوه‌. ئه‌گه‌ر یه‌كێك له‌م نانه‌ بخوات بۆ هه‌تاهه‌تایه‌ ده‌ژیێت. ئه‌و نانه‌ش كه‌ بۆ ژیانی جیهان ده‌یبه‌خشم، جه‌سته‌مه‌.»
52
جوله‌كه‌كان له‌ناو خۆیان ده‌مه‌قاڵه‌یان بوو و ده‌یانگوت: «ئه‌مه‌ چۆن ده‌توانێ جه‌سته‌ی خۆیمان بداتێ بیخۆین؟»
53
له‌به‌ر ئه‌وه‌ عیسا پێی فه‌رموون: «ڕاستی ڕاستیتان پێ ده‌ڵێم: ئه‌گه‌ر جه‌سته‌ی كوڕی مرۆڤ نه‌خۆن و خوێنی نه‌خۆنه‌وه‌، ژیان له‌ ناختاندا نابێت.
54
ئه‌وه‌ی جه‌سته‌م بخوات و خوێنم بخواته‌وه‌ ژیانی هه‌تاهه‌تایی هه‌یه‌، منیش له‌ ڕۆژی دواییدا زیندووی ده‌كه‌مه‌وه‌،
55
چونكه‌ جه‌سته‌م خۆراكی ڕاسته‌قینه‌یه‌ و خوێنیشم خواردنه‌وه‌ی ڕاسته‌قینه‌.
56
ئه‌وه‌ی جه‌سته‌م بخوات و خوێنم بخواته‌وه‌ به‌ منه‌وه‌ په‌یوه‌ست ده‌بێت و منیش به‌وه‌وه‌.
57
وه‌ك باوكی زیندوو ناردوومی، منیش به‌و باوكه‌ زیندووم، ئاواش ئه‌وه‌ی له‌ جه‌سته‌ی من بخوات به‌هۆی منه‌وه‌ ده‌ژیێت.
58
ئه‌مه‌ ئه‌و نانه‌یه‌ كه‌ له‌ ئاسمانه‌وه‌ دابه‌زیوه‌، نه‌ك وه‌كو ئه‌وه‌ی باوباپیران خواردیان و مردن. ئه‌وه‌ی له‌م نانه‌ بخوات هه‌تاهه‌تایه‌ ده‌ژیێت.»
59
ئه‌مانه‌ی له‌ كه‌نیشتێكدا فه‌رموو، له‌ كه‌فه‌رناحوم خه‌ڵكی فێر ده‌كرد.
قوتابییه‌كان گومان ده‌كه‌ن 
60
له‌به‌ر ئه‌وه‌ زۆر له‌ قوتابییه‌كانی كه‌ گوێیان لێبوو، گوتیان: «ئه‌م قسه‌یه‌ گرانه‌! كێ ده‌توانێت وه‌ریبگرێت؟»
61
عیسا له‌ دڵی خۆیدا زانی قوتابییه‌كانی به‌هۆی ئه‌مه‌وه‌ بۆڵه‌بۆڵ ده‌كه‌ن، پێی فه‌رموون: «ئایا ئه‌مه‌ بۆ ئێوه‌ ده‌بێته‌ كۆسپ؟
62
ئه‌ی ئه‌گه‌ر ببینن كوڕی مرۆڤ به‌رزبێته‌وه‌ بۆ ئه‌و شوێنه‌ی یه‌كه‌م جار لێی بوو؟!
63
ڕۆحی پیرۆز ژیان ده‌دات، به‌ڵام جه‌سته‌ به‌ كه‌ڵك نایه‌ت. ئه‌و قسانه‌ی پێم گوتن ڕۆح و ژیانن.
64
به‌ڵام هه‌ندێكتان باوه‌ڕ ناكه‌ن،» كه‌ عیسا له‌ سه‌ره‌تاوه‌ ئه‌وانه‌ی ده‌ناسی كه‌ باوه‌ڕ ناهێنن، هه‌روه‌ها كێیه‌ ئه‌وه‌ی به‌ گرتنی ده‌دات.
65
ئینجا فه‌رمووی: «له‌به‌ر ئه‌وه‌ پێم گوتن، كه‌س ناتوانێ بێت بۆ لام، مه‌گه‌ر باوك ڕێگه‌ی پێدابێت.»
66
له‌و كاته‌وه‌ زۆر له‌ قوتابییه‌كانی گه‌ڕانه‌وه‌ و ئیتر له‌گه‌ڵی نه‌ده‌گه‌ڕان.
67
له‌به‌ر ئه‌وه‌ عیسا به‌ دوازده‌كه‌ی[g] فه‌رموو: «ئه‌ی ئێوه‌ ناتانه‌وێ بڕۆن؟»
68
شیمۆن په‌ترۆس وه‌ڵامی دایه‌وه‌: «گه‌وره‌م، بچینه‌ لای كێ؟ وته‌كانی ژیانی هه‌تاهه‌تایی له‌لای تۆیه‌.
69
ئێمه‌ش باوه‌ڕمان هێنا و زانیمان كه‌ تۆ پیرۆزه‌كه‌ی خودایت.»
70
عیسا وه‌ڵامی دانه‌وه‌: «ئایا من ئێوه‌ی دوازده‌م هه‌ڵنه‌بژاردووه‌؟ به‌ڵام یه‌كێك له‌ ئێوه‌ ئیبلیسه‌!»
71
ئه‌و باسی یه‌هوزای شیمۆنی ئه‌سخه‌ریوتی ده‌كرد، چونكه‌ به‌ته‌مابوو به‌ گرتنی بدات كه‌ یه‌كێكه‌ له‌ دوازده‌ قوتابییه‌كه‌.
  1. a. 6‏:7 دینارێك كرێی ڕۆژانه‌ی كرێكارێك بوو.
  2. b. 6‏:14 پێغه‌مبه‌ره‌كه‌: ئه‌و پێغه‌مبه‌ره‌یه‌ كه‌ موسا باسی ده‌كات. واته‌ عیسا. بڕوانه‌ دواوتار 18‏:15، \+xt یۆحه‌نا 1‏:45‏\+xt*‏.
  3. c. 6‏:19 ده‌كاته‌ نزیكه‌ی پێنج هه‌تا شه‌ش كیلۆمه‌تر.
  4. d. 6‏:31 مه‌ن: ئه‌و خۆراكه‌یه‌ كه‌ خودا له‌ سه‌رده‌می موسا له‌ ئاسمانه‌وه‌ بۆ گه‌لی ئیسرائیلی باراند. بڕوانه‌ \+xt ده‌رچوون 16‏:4‏\+xt*‏.
  5. e. 6‏:31 \+xt ده‌رچوون 16‏:4 و زه‌بووره‌كان 78‏:24‏،25‏.‏\+xt*‏
  6. f. 6‏:45 \+xt ئیشایا 54‏:13‏\+xt*‏
  7. g. 6‏:67 دوازده‌ قوتابییه‌كه‌ی عیسا.