عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
فه‌رمانی كوشتنی عیسا 
1
ئیتر پیلاتۆس عیسای برد و دایه‌ به‌ر قامچی.
2
سه‌ربازه‌كان تاجێكیان له‌ دڕك چنی و خستیانه‌ سه‌ر سه‌ری و كه‌وایه‌كی ئه‌رخه‌وانییان له‌به‌ركرد.
3
لێی ده‌چوونه‌ پێشه‌وه‌، ده‌یانگوت: «سڵاو، ئه‌ی پاشای جوله‌كه‌!» و زلله‌یان لێی ده‌دا.
4
دیسان پیلاتۆس هاته‌ ده‌ره‌وه‌ و پێی گوتن: «بۆتانی ده‌هێنمه‌ ده‌ره‌وه‌ تاكو بزانن هیچ خراپه‌یه‌كی تێدا نابینم!»
5
عیسا به‌ تاجی دڕكاوی و جلی ئه‌رخه‌وانییه‌وه‌ هاته‌ ده‌ره‌وه‌، پیلاتۆس پێی گوتن: «ئه‌وه‌ پیاوه‌كه‌یه‌!»
6
كاتێك كاهینانی باڵا و پاسه‌وانان بینییان، هاواریان كرد: «له‌ خاچی بده‌! له‌ خاچی بده‌!» پیلاتۆس وه‌ڵامی دانه‌وه‌: «ئێوه‌ بیبه‌ن و له‌ خاچی بده‌ن، چونكه‌ خراپه‌ی تێدا نابینم.»
7
ڕابه‌رانی جوله‌كه‌ وه‌ڵامیان دایه‌وه‌: «ته‌وراتمان هه‌یه‌. به‌گوێره‌ی ته‌ورات ده‌بێت بمرێت، چونكه‌ خۆی كردووه‌ته‌ كوڕی خودا.»
8
كاتێك پیلاتۆس گوێی له‌م قسه‌یه‌ بوو زیاتر ترسا.
9
گه‌ڕایه‌وه‌ ناو كۆشكه‌كه‌ و به‌ عیسای گوت: «خه‌ڵكی كوێی؟» به‌ڵام عیسا هیچ وه‌ڵامێكی نه‌دایه‌وه‌.
10
پیلاتۆس پێی گوت: «قسه‌م بۆ ناكه‌یت؟ ئایا نازانیت ده‌سه‌ڵاتم هه‌یه‌ كه‌ ئازادت بكه‌م یان له‌ خاچت بده‌م؟»
11
عیسا وه‌ڵامی دایه‌وه‌: «هیچ ده‌سه‌ڵاتێكت به‌سه‌ر منه‌وه‌ نییه‌، مه‌گه‌ر له‌ سه‌ره‌وه‌ پێت نه‌درابێت. له‌به‌ر ئه‌وه‌ ئه‌وه‌ی منی داوه‌ته‌ ده‌ست تۆ گوناهه‌كه‌ی گه‌وره‌تره‌.»
12
ئیتر پیلاتۆس هه‌وڵی ده‌دا ئازادی بكات، به‌ڵام ڕابه‌رانی جوله‌كه‌ هاواریان ده‌كرد: «ئه‌گه‌ر ئه‌مه‌ ئازاد بكه‌یت، دۆستی قه‌یسه‌ر نیت. هه‌ركه‌سێك خۆی بكاته‌ پاشا، له‌ دژی قه‌یسه‌ر ده‌دوێت.»
13
كاتێك پیلاتۆس گوێی له‌م قسانه‌ بوو، عیسای برده‌ ده‌ره‌وه‌ و له‌سه‌ر كورسی دادوه‌ری دانیشت، له‌ شوێنێك پێی ده‌گوترێ به‌ردڕێژكراو، به‌ عیبریش گه‌باسا.
14
ڕۆژی ئاماده‌كاری جه‌ژنی په‌سخه‌ بوو، نزیكه‌ی كاتژمێر دوازده‌[a] بوو، به‌ جوله‌كه‌كانی گوت: «ئه‌وه‌تا پاشاكه‌تان.»
15
ئه‌وانیش هاواریان كرد: «بیبه‌! بیبه‌! له‌ خاچی بده‌!» پیلاتۆس لێی پرسین: «پاشاكه‌تان له‌ خاچ بده‌م؟» كاهینانی باڵا وه‌ڵامیان دایه‌وه‌: «جگه‌ له‌ قه‌یسه‌ر پاشامان نییه‌.»
16
ئیتر پیلاتۆس دایه‌ ده‌ستیان تاكو له‌ خاچ بدرێت.
ئه‌وانیش عیسایان برد.
له‌خاچدان 
17
عیساش خاچه‌كه‌ی خۆی هه‌ڵگرت و چوو به‌ره‌و ئه‌و شوێنه‌ی كه‌ پێی ده‌گوترێ شوێنی كاسه‌سه‌ر، به‌ عیبریش پێی ده‌گوترێ گولگۆسا.
18
له‌وێ له‌گه‌ڵ دوو كه‌سی دیكه‌ له‌ خاچیان دا، هه‌ریه‌كه‌ له‌ لایه‌كییه‌وه‌، عیساش له‌ناوه‌ڕاستیان.
19
پیلاتۆسیش له‌سه‌ر ته‌خته‌یه‌ك نووسی: «عیسای ناسیره‌یی، پاشای جوله‌كه‌.» له‌سه‌ر خاچه‌كه‌ دایكوتا.
20
جوله‌كه‌یه‌كی زۆر نووسراوه‌كه‌یان خوێنده‌وه‌ كه‌ به‌ عیبری و لاتینی و یۆنانی نووسرابوو، چونكه‌ ئه‌و شوێنه‌ی عیسای تێدا له‌ خاچ درابوو له‌ شاره‌وه‌ نزیك بوو.
21
كاهینانی باڵای جوله‌كه‌ به‌ پیلاتۆسیان گوت: «مه‌نووسه‌: پاشای جوله‌كه‌، به‌ڵام بنووسه‌: ”خۆی گوتی من پاشای جوله‌كه‌م.“»
22
پیلاتۆس وه‌ڵامی دایه‌وه‌: «ئه‌وه‌ی نووسیومه‌، نووسیومه‌.»
23
كاتێك سه‌ربازه‌كان عیسایان له‌ خاچ دا، جله‌كانیان برد و كردیانه‌ چوار پارچه‌، بۆ هه‌ر سه‌ربازێك پارچه‌یه‌ك. كراسه‌كه‌شیان برد، كراسه‌كه‌ بێ دروومان بوو، له‌سه‌رڕا یه‌ك پارچه‌ چنرابوو.
24
له‌به‌ر ئه‌وه‌ به‌ یه‌كتریان گوت: «با نه‌یدڕێنین. با تیروپشكی له‌سه‌ر بكه‌ین بزانین بۆ كێ ده‌بێت.»
ئه‌مه‌ش ڕوویدا تاكو نووسراوه‌ پیرۆزه‌كه‌ بێته‌ دی كه‌ فه‌رموویه‌تی:
{جلوبه‌رگه‌كه‌ی منیان له‌نێو خۆیان به‌شكرد و
تیروپشكیان له‌سه‌ر كراسه‌كه‌م كرد.}[b]
جا سه‌ربازه‌كان ئه‌مه‌یان كرد.
25
له‌لای خاچه‌كه‌ی عیسا، دایكی و پووری و مریه‌می ژنی كلۆپا و مریه‌می مه‌جده‌لی ڕاوه‌ستابوون.
26
كاتێك عیسا دایكی بینی و ئه‌و قوتابییه‌ش كه‌ خۆشی ده‌ویست له‌لای ڕاوه‌ستاوه‌، به‌ دایكی فه‌رموو: «ژنه‌كه‌، ئه‌وه‌تا كوڕی تۆ.»
27
به‌ قوتابییه‌كه‌شی فه‌رموو: «ئه‌وه‌تا دایكی تۆ.» ئیتر له‌و كاته‌وه‌ قوتابییه‌كه‌ بردییه‌وه‌ ماڵی خۆی.
مردنی عیسا 
28
پاشان، له‌به‌ر ئه‌وه‌ی عیسا زانی كه‌ هه‌موو شتێك ته‌واو بووه‌، هه‌روه‌ها بۆ ئه‌وه‌ی نووسراوه‌ پیرۆزه‌كه‌[c] بێته‌ دی، فه‌رمووی: «تینوومه‌.»
29
گۆزه‌یه‌كی پڕ له‌ سركه‌ دانرابوو، ئیسفه‌نجێكی پڕ له‌ سركه‌یان خسته‌ سه‌ر لقه‌ زوفایه‌ك و به‌رزیان كرده‌وه‌ بۆ ده‌می.
30
كاتێك عیسا تامی سركه‌كه‌ی كرد، فه‌رمووی: «ته‌واو بوو.» له‌دوای ئه‌وه‌ سه‌ری دانه‌واند و گیانی سپارد.
31
پاشان ڕابه‌رانی جوله‌كه‌ داوایان له‌ پیلاتۆس كرد قاچی له‌خاچدراوان بشكێنرێن و ته‌رمه‌كانیان هه‌ڵبگیردرێن، چونكه‌ ڕۆژی ئاماده‌كاری بوو، ئه‌و شه‌ممه‌یه‌ ڕۆژێكی گه‌وره‌ بوو، تاكو ته‌رمه‌كان له‌ شه‌ممه‌دا له‌سه‌ر خاچ نه‌مێنن.
32
ئینجا سه‌ربازه‌كان هاتن و هه‌ردوو قاچی ئه‌وه‌ی یه‌كه‌م و ئه‌وی دیكه‌یان شكاند كه‌ له‌گه‌ڵ عیسادا له‌ خاچ درابوون.
33
به‌ڵام كاتێك هاتنه‌ لای عیسا بینییان وا مردووه‌، قاچییان نه‌شكاند.
34
به‌ڵام یه‌كێك له‌ سه‌ربازه‌كان ڕمێكی له‌ كه‌له‌كه‌ی دا، ده‌ستبه‌جێ خوێن و ئاو ده‌رچوو.
35
ئه‌و پیاوه‌ی ئه‌مه‌ی بینی شایه‌تی دا، شایه‌تییه‌كه‌شی ڕاسته‌. خۆی ده‌زانێت كه‌ ڕاست ده‌ڵێت، تاكو ئێوه‌ باوه‌ڕ بهێنن.
36
ئه‌مه‌ ڕوویدا تاكو نووسراوه‌ پیرۆزه‌كه‌ بێته‌ دی: {هیچ ئێسكێكی ئه‌و ناشكێنرێت!}[d]
37
هه‌روه‌ها نووسراوێكی پیرۆزی دیكه‌ش ده‌فه‌رموێ: {ته‌ماشای ئه‌وه‌ ده‌كه‌ن كه‌ ڕمیان لێداوه‌.}[e]
ناشتنی عیسا 
38
پاش ئه‌وه‌ یوسفی خه‌ڵكی ڕامه‌ كه‌ له‌ ترسی ڕابه‌رانی جوله‌كه‌ به‌ نهێنی قوتابی عیسا بوو، داوای له‌ پیلاتۆس كرد تاكو ته‌رمی عیسا ببات، پیلاتۆسیش ڕێی دا. ئه‌ویش هات و ته‌رمه‌كه‌ی برد.
39
نیقۆدیمۆسیش هات، ئه‌وه‌ی یه‌كه‌م جار به‌ شه‌و هاته‌ لای عیسا. له‌گه‌ڵ خۆی نزیكه‌ی سی لیتر[f] موڕ[g] ی تێكه‌ڵاو به‌ ئه‌لوای[h] هێنا.
40
جا ته‌رمه‌كه‌ی عیسایان برد و به‌ كه‌تان له‌گه‌ڵ بۆن پێچایانه‌وه‌، وه‌ك نه‌ریتی جوله‌كه‌یه‌ له‌ كفن كردن.
41
له‌و شوێنه‌ی عیسای تێدا له‌ خاچ درا باخچه‌یه‌كی لێبوو، له‌ باخچه‌كه‌شدا گۆڕێكی نوێی لێبوو كه‌سی تێدا نه‌نێژرابوو.
42
له‌به‌ر ڕۆژی ئاماده‌كاری جوله‌كه‌كان عیسایان له‌وێ دانا[i] ، چونكه‌ گۆڕه‌كه‌ نزیك بوو.
  1. a. 19‏:14 یۆنانی: كاتژمێری شه‌شه‌م.
  2. b. 19‏:24 \+xt زه‌بووره‌كان 22‏:18‏\+xt*‏
  3. c. 19‏:28 بڕوانه‌\+xt زه‌بووره‌كان 69‏:21‏\+xt*‏
  4. d. 19‏:36 \+xt ده‌رچوون 12‏:46 و زه‌بووره‌كان 34‏:20.‏\+xt*‏
  5. e. 19‏:37 \+xt زه‌كه‌ریا 12‏:10‏\+xt*‏.
  6. f. 19‏:39 یۆنانی: سه‌د لترا نزیكه‌ی سی لیتری سه‌رده‌می ئێستامان ده‌كات.
  7. g. 19‏:39 بڕوانه‌ \+xt مه‌تا 2‏:11‏\+xt*‏.
  8. h. 19‏:39 ئه‌لوا: ڕووه‌كێكی دڕكاوییه‌ وه‌ك (سه‌باڕ)، شله‌یه‌كی تێدایه‌ بۆ پێست باشه‌. بڕوانه‌\+xt زه‌بووره‌كان 45‏:8‏\+xt*‏ هتد.
  9. i. 19‏:42 له‌ كه‌لتوری جوله‌كه‌ مردوو له‌ شوێنێكی وه‌ك ئه‌شكه‌وت دانراوه‌ و ده‌رگای له‌سه‌ر داخراوه‌. بڕوانه‌ \+xt مه‌تا 27‏:60‏\+xt*‏.