عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
دادوه‌ری له‌ دژی نه‌ته‌وه‌كان 
1
ئه‌ی نه‌ته‌وه‌كان نزیك بنه‌وه‌ هه‌تا گوێ بگرن،
ئه‌ی نه‌ته‌وه‌كان گوێ شل بكه‌ن!
با زه‌وی و هه‌رچی تێیدایه‌ گوێ بگرێت،
جیهان و هه‌موو به‌رهه‌مه‌كانی،
2
چونكه‌ تووڕه‌یی یه‌زدان له‌سه‌ر هه‌موو نه‌ته‌وه‌كانه‌،
هه‌ڵچوونی له‌سه‌ر هه‌موو سوپاكانیانه‌.
به‌ ته‌واوی قڕی كردوون[a] ،
به‌ده‌سته‌وه‌ی داون بۆ سه‌ربڕین.
3
كوژراوه‌كانیان فڕێده‌درێن،
ته‌رمه‌كانیان بۆنی بۆگه‌ن ده‌رده‌كات و
چیاكان له‌ناو خوێنی ئه‌وان ده‌توێنه‌وه‌.
4
خۆر و مانگ و ئه‌ستێره‌كان ده‌توێنه‌وه‌،
ئاسمان وه‌ك تۆمارێك ده‌پێچرێته‌وه‌.
هه‌موو ئه‌ستێره‌كان هه‌ڵده‌وه‌رن،
وه‌ك هه‌ڵوه‌رینی گه‌ڵای مێو،
وه‌ك وه‌رینی هه‌نجیر له‌ داره‌كه‌ی.
5
شمشێری من له‌ ئاسمان تێر ئاو بووه‌،
وا داده‌به‌زێته‌ سه‌ر ئه‌دۆم و
به‌سه‌ر گه‌لێك به‌ نه‌فره‌تم كردووه‌ بۆ حوكم به‌سه‌ردادان.
6
یه‌زدان شمشێرێكی هه‌یه‌ خوێنی لێ ده‌تكێت،
قه‌ڵه‌و بووه‌ به‌ پیو[b] ،
به‌ خوێنی به‌رخ و ته‌گه‌،
به‌ پیوی گورچیله‌ی به‌رانه‌كان،
چونكه‌ یه‌زدان قوربانی سه‌ربڕاوی هه‌یه‌ له‌ بۆزرا و
سه‌ربڕینێكی گه‌وره‌ی هه‌یه‌ له‌ خاكی ئه‌دۆم.
7
گای كێوی له‌گه‌ڵیان ده‌كه‌ون،
گوێره‌كه‌كان له‌گه‌ڵ كه‌ڵه‌گاكان،
زه‌وییان به‌ خوێن ئاو ده‌درێت،
خۆڵیان به‌ پیو قه‌ڵه‌و ده‌بێت.
8
چونكه‌ یه‌زدان ڕۆژی تۆڵه‌سه‌ندنه‌وه‌ی هه‌یه‌،
ساڵی سزادان له‌به‌ر كێشه‌كه‌ی سییۆن.
9
جا ڕووباره‌كانی ئه‌دۆم ده‌بن به‌ قیڕ و
خۆڵه‌كه‌ی به‌ گۆگرد،
زه‌وییه‌كه‌ی ده‌بێت به‌ قیڕی داگیرساو!
10
شه‌و و ڕۆژ ناكوژێته‌وه‌،
دووكه‌ڵی بۆ هه‌تاهه‌تایه‌ به‌رز ده‌بێته‌وه‌.
نه‌وه‌ دوای نه‌وه‌ كاول ده‌بێت،
بۆ هه‌تاهه‌تایه‌ كه‌س پێیدا تێناپه‌ڕێت.
11
كونده‌په‌پووی بیابان و بایه‌قووش داگیری ده‌كه‌ن،
كونده‌په‌پووی گه‌وره‌ و قه‌له‌ڕه‌ش تێیدا نیشته‌جێ ده‌بن.
به‌سه‌ر ئه‌دۆمدا خودا گوریسی پێوانه‌ بۆ خاپوور بوون و
شاووڵی چۆڵبوون درێژ ده‌كات.
12
خانه‌دانه‌كانی هیچیان له‌وێ نابێت كه‌ به‌ شانشینێك داده‌نرێن،
هه‌موو میره‌كانی له‌ناوده‌چن.
13
دڕك له‌ كۆشكه‌كانی شین ده‌بێت،
چقڵ و وشترالووك له‌ قه‌ڵاكانی.
ده‌بێت به‌ مۆڵگای چه‌قه‌ڵ و
لانه‌ی كونده‌په‌پوو.
14
دڕنده‌ بیابانییه‌كان و كه‌متیار پێكده‌گه‌ن،
ته‌گه‌[c] بانگی هاوه‌ڵه‌كانیان ده‌كه‌ن،
شه‌و له‌وێ ئارام ده‌گرێت و
جێی حه‌وانه‌وه‌ بۆ خۆی ده‌دۆزێته‌وه‌.
15
له‌وێ كونده‌په‌پوو هێلانه‌ ده‌كات و هێلكه‌ ده‌كات،
كڕ ده‌كه‌وێت و له‌ژێر سێبه‌ری باڵه‌كانی هه‌ڵیده‌هێنێت.
له‌وێ شاهین و شمقاڕ كۆده‌بنه‌وه‌،
هه‌ریه‌كه‌ و له‌گه‌ڵ تاكه‌كه‌ی.
16
تۆماره‌كه‌ی یه‌زدان بپشكنن و بخوێننه‌وه‌:
یه‌كێك له‌مانه‌ كه‌م نابێته‌وه‌،
هیچ مێینه‌یه‌ك نێره‌كه‌ی خۆی ون ناكات،
چونكه‌ ده‌می ئه‌و فه‌رمانی داوه‌،
ڕۆحی ئه‌و كۆیان ده‌كاته‌وه‌.
17
ئه‌و تیروپشكی بۆ كرد،
ده‌ستی ئه‌و به‌ په‌ت بۆی به‌ش كرد.
بۆ هه‌تاهه‌تایه‌ داگیری ده‌كه‌ن،
نه‌وه‌ دوای نه‌وه‌ تێیدا نیشته‌جێ ده‌بن.
  1. a. 34‏:2 قڕی كردوون: له‌ زمانی عیبری ئه‌م زاراوه‌یه‌ ده‌گه‌ڕێته‌وه‌ بۆ شتێك یان كه‌سێك كه‌ ده‌به‌خشرێت به‌ یه‌زدان، زۆر جار به‌خشینه‌كه‌ به‌ ته‌واوی له‌ ناوده‌بردرێت.
  2. b. 34‏:6 پیو: واته‌ به‌ز، لێره‌ و له‌ ئایه‌تی 7.
  3. c. 34‏:14 نێری، سابرێن.