عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
ته‌نگانه‌ و یارمه‌تی 
1
قوڕبه‌سه‌رت تێكده‌ر،
كه‌ خۆت تێكنه‌دراویت!
قوڕبه‌سه‌رت تاڵانكه‌ر،
كه‌ تاڵانیان نه‌كردوویت!
كاتێك له‌ تێكدان ته‌واو ده‌بیت
خۆت تێكده‌درێیت،
كاتێك له‌ تاڵان بوویته‌وه‌
خۆت تاڵان ده‌كرێیت.
2
ئه‌ی یه‌زدان، له‌گه‌ڵماندا میهره‌بان به‌،
هیوامان به‌ تۆیه‌.
هه‌موو به‌یانییه‌ك ببه‌ هێزمان و
هه‌روه‌ها ڕزگاریمان له‌ كاتی ته‌نگانه‌دا.
3
له‌ نه‌ڕه‌ی ده‌نگت گه‌لان ڕایانكرد،
كه‌ ڕاپه‌ڕیت نه‌ته‌وه‌كان په‌رت بوون.
4
ئه‌ی نه‌ته‌وه‌كان، ده‌ستكه‌وته‌كانتان كۆ ده‌كرێنه‌وه‌ وه‌ك چۆن كولله‌ له‌ ده‌غڵ ده‌دات،
وه‌ك ڕه‌وه‌ كولله‌ خه‌ڵك ڕووتتان ده‌كه‌نه‌وه‌.
5
یه‌زدان پایه‌به‌رزه‌، چونكه‌ نیشته‌جێی به‌رزاییه‌،
سییۆن له‌ ڕاستودروستی و دادپه‌روه‌ری پڕ ده‌كات.
6
ده‌وڵه‌مه‌ندی ڕزگاری، دانایی و زانین
ده‌بێته‌ مایه‌ی دڵنیای كاته‌كانت.
له‌خواترسی كلیلی ئه‌و گه‌نجینه‌یه‌.
7
ئه‌وه‌تا دلێره‌كانیان له‌ ده‌ره‌وه‌ ده‌قیژێنن،
نێردراوانی ئاشتی به‌ تاڵی ده‌گرین.
8
ڕێگاكان چۆڵ بوون،
بڕانه‌وه‌ ڕێبواران.
په‌یمان شكا و
شایه‌ته‌كانی ڕه‌تكرانه‌وه‌ و
كه‌س به‌ هیچ دانانرێت.
9
زه‌وی شیوه‌ن ده‌كات و سیس بوو،
لوبنان ڕیسوا بوو، داڕزا،
شارۆن وه‌ك بیابانی عه‌راڤای[a] لێهات،
باشان و كارمه‌ل ڕووتانه‌وه‌.
10
یه‌زدان ده‌فه‌رموێت: «ئێستا هه‌ڵده‌ستم،
ئێستا به‌ گه‌وره‌ ده‌زانرێم،
ئێستا بڵند ده‌كرێمه‌وه‌.
11
به‌ گیا دووگیان ده‌بن و
كاتان ده‌بێت،
هه‌ناسه‌تان ئاگره‌ و خۆتان ده‌خوات.
12
گه‌لان ده‌بن به‌ گه‌چ،
وه‌ك چقڵی بڕاوه‌ به‌ ئاگر ده‌سووتێنرێن.»
13
ئه‌ی دووره‌كان گوێتان لێ بێت چیم كردووه‌،
ئه‌ی نزیكه‌كان هێزم بزانن!
14
گوناهباران له‌ سییۆن تۆقین،
گڵاوه‌كان له‌رز دایگرتن:
«كێ له‌ ئێمه‌ له‌ناو ئاگری لووشده‌ر ده‌مێنێته‌وه‌؟
كێ له‌ ئێمه‌ له‌ناو سووتانی هه‌میشه‌یی ده‌مێنێته‌وه‌؟»
15
ئه‌وه‌ی به‌ ڕاستودروستی هه‌ڵسوكه‌وت ده‌كات و
ڕاستی ده‌ڵێت،
ئه‌وه‌ی قازانجی زۆرداری ڕه‌ت ده‌كاته‌وه‌ و
ده‌ست له‌ به‌رتیل وه‌رگرتن ده‌شوات،
ئه‌وه‌ی له‌ بیستنی خوێنڕشتن گوێی خۆی كه‌ڕ ده‌كات و
له‌ بینینی خراپه‌ چاوی خۆی ده‌نوقێنێت،
16
ئه‌و له‌ به‌رزایی نیشته‌جێ ده‌بێت،
قه‌ڵای چیاكان په‌ناگایه‌تی،
نانی ده‌درێت و
ئاوی مسۆگه‌ره‌.
17
چاوت پاشا له‌ جوانی خۆیدا ده‌بینێت،
سنوورێكی فراوان ده‌بینن.
18
دڵت له‌ تۆقین ڕاده‌مێنێت:
«كوا خامه‌ی نهێنی[b] و كوا باجگر؟
كوا به‌رپرسی قولله‌كان؟»
19
ئیتر گه‌لی دڕنده‌ نابینن،
گه‌لێك قسه‌یان ئاڵۆزه‌ بۆ بیستن،
زمانیان گرانه‌ تێیان ناگه‌یت.
20
بڕوانه‌ سییۆن شاری جه‌ژنمان،
چاوه‌كانت ئۆرشه‌لیم ده‌بینن،
ماڵێكی ئاسووده‌، چادرێك ناگوازرێته‌وه‌.
سنگه‌كانی هه‌رگیز هه‌ڵناكه‌نرێن،
هیچ كام له‌ گوریسه‌كانی ناپسێن.
21
بێگومان له‌وێ یه‌زدانی توانادار پشتگیرمان ده‌بێت.
شوێنی ڕووباره‌كان و كه‌ناری جۆگه‌ فراوانه‌كان ده‌بێت.
كه‌شتی سه‌وڵدار پێیدا ناڕوات و
كه‌شتی مه‌زن پێیدا تێناپه‌ڕێت.
22
چونكه‌ یه‌زدان دادوه‌رمانه‌،
یه‌زدان فه‌رزدانه‌رمانه‌،
یه‌زدان پاشامانه‌،
ئه‌و ڕزگارمان ده‌كات.
23
گوریسه‌كانت شل بوون،
بنكه‌ی دار ئاڵای كه‌شتییه‌كه‌یان توند ناكه‌ن،
چارۆكه‌ بڵاو ناكه‌نه‌وه‌.
ئینجا ده‌ستكه‌وتی زۆر دابه‌ش كرا،
شه‌له‌كانیش تاڵانییان تاڵان كرد.
24
دانیشتووی سییۆن ناڵێت، «نه‌خۆش كه‌وتم،»
ئه‌و گه‌له‌ی تێیدا نیشته‌جێیه‌ تاوانه‌كانی به‌خشراو ده‌بێت.
  1. a. 33‏:9 شیوێك بوو له‌ ده‌ریاچه‌ی جه‌لیله‌وه‌ هه‌تا ده‌ریای مردوو.
  2. b. 33‏:18 ‏ڕازپۆش.