عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
شانشینی ڕاستودروستی 
1
ئه‌وه‌تا پاشایه‌ك به‌ ڕاستودروستی پاشایه‌تی ده‌كات و
میرانیش به‌ دادوه‌ری سه‌رۆكایه‌تی ده‌كه‌ن،
2
مرۆڤ وه‌ك حه‌شارگه‌یه‌ك ده‌بێت له‌ ڕووی با و
وه‌ك چه‌تر له‌ ڕووی لێزمه‌ی باران،
وه‌ك جۆگه‌ی ئاو له‌ شوێنێكی وشكدا و
وه‌ك سێبه‌ری تاشه‌به‌ردێكی گه‌وره‌ له‌ خاكی ماندووبووندا.
3
چاوی بینه‌ران كز نابێت و
گوێی گوێگره‌كان ده‌بیستێت.
4
دڵی هه‌ڵه‌شه‌كان زانین تێده‌گات و
زمانی زمانگرانه‌كان به‌ ڕوونی و ڕه‌وانی ده‌دوێن.
5
ئیتر گێل بانگ ناكرێت، ڕێزدار،
به‌ فێڵبازیش ناگوترێت، خانه‌دان،
6
چونكه‌ گێل به‌ گێلی ده‌دوێت و
دڵیشی خراپه‌ ده‌كات،
بۆ ئه‌وه‌ی گڵاوی ئه‌نجام بدات،
له‌ دژی یه‌زدان بوختان هه‌ڵده‌به‌ستێت،
بۆ ئه‌وه‌ی برسی تێر نه‌بێت و
تینوو له‌ خواردنه‌وه‌ بێبه‌ش بێت.
7
ڕێبازی فێڵبازیش خراپه‌ و
پیلانی به‌دكاری ده‌گێڕێت،
هه‌تا به‌ قسه‌ی درۆ كڵۆڵان ته‌فروتونا بكات
ئه‌گه‌ر قسه‌ی نه‌دارانیش ڕاست بێت.
8
به‌ڵام ڕێزدار به‌ ڕێزداری پلان داده‌نێت و
له‌سه‌ر ڕێزیش جێگیر ده‌بێت.
ئافره‌تانی ئۆرشه‌لیم 
9
ئه‌ی ئافره‌ته‌ له‌خۆڕازییه‌كان،
هه‌ستن گوێ له‌ ده‌نگی من بگرن!
ئه‌ی كیژه‌ دڵنیاكان،
گوێ شل بكه‌ن بۆ قسه‌ی من!
10
ئه‌ی دڵنیاكان، ڕۆژانێك پتر له‌ یه‌ك ساڵ
له‌رز ده‌تانگرێت،
چونكه‌ ڕه‌زچنین به‌سه‌رچوو و
كۆكردنه‌وه‌ نایه‌ت.
11
ئه‌ی ئافره‌ته‌ له‌خۆڕازییه‌كان، بله‌رزن!
ئه‌ی كیژه‌ دڵنیاكان له‌رز بتانگرێت!
جلتان دابكه‌نن و خۆتان ڕووت بكه‌نه‌وه‌،
گوش له‌ كه‌مه‌رتان ببه‌ستن.
12
له‌ سنگی خۆتان بده‌ن بۆ كێڵگه‌ به‌رداره‌كان،
بۆ ڕه‌زی به‌ردار،
13
بۆ خاكی گه‌له‌كه‌م
دڕكوداڵ ده‌ڕوێت،
به‌ڵێ، بۆ هه‌موو ماڵه‌ شاده‌كان،
بۆ شاره‌ گه‌شاوه‌كه‌.
14
بێگومان كۆشك چۆڵ ده‌كرێت،
شاری قه‌ره‌باڵغ چۆڵ ده‌بێت،
قه‌ڵا و قولله‌ی چاودێری له‌گه‌ڵ زه‌وی ته‌خت ده‌بن بۆ هه‌تاهه‌تایه‌،
ده‌بن به‌ سه‌یرانگای كه‌ره‌كێوییه‌كان، له‌وه‌ڕگا بۆ مێگه‌له‌كان،
15
بۆ ئه‌وه‌ی له‌ به‌رزاییه‌وه‌ ڕۆحی خودا به‌سه‌رماندا بڕژێت،
جا چۆڵه‌وانی ده‌بێت به‌ باخ و
باخیش به‌ دارستان داده‌نرێت.
16
جا دادپه‌روه‌ری له‌ چۆڵه‌وانی نیشته‌جێ ده‌بێت و
ڕاستودروستیش له‌ناو باخ داده‌نیشێت.
17
جا ئه‌نجامدانی ڕاستودروستی ئاشتی ده‌بێت و
كاری ڕاستودروستیش ئارامی و ئاسووده‌یی هه‌تاهه‌تایی.
18
ئینجا گه‌لی من له‌ ئاشتی و ئاوه‌دانی نیشته‌جێ ده‌بێت و
له‌ نشینگه‌ی ئاسووده‌یی و
شوێنی پشوودانه‌كانیان به‌ ئارامی.
19
ته‌رزه‌ ده‌بارێت و دارستانه‌كان ده‌كوتێت،
شاره‌كه‌ به‌ ته‌واوی ده‌كه‌وێنێت،
20
به‌ڵام خۆزگه‌ به‌ خۆتان
كاتێك تۆو له‌ده‌م هه‌موو ئاوه‌كان ده‌چێنن و
گا و گوێدرێژه‌كانتان ده‌له‌وه‌ڕن.