عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
ڕووخاندنی ئیسرائیل 
1
په‌روه‌ردگارم بینی له‌لای قوربانگاكه‌وه‌ ڕاوه‌ستابوو و فه‌رمووی:
«له‌ سه‌ری كۆڵه‌كه‌كان بده‌
هه‌تا به‌رده‌رگاكان بله‌رنه‌وه‌،
بیانشكێنه‌ به‌سه‌ر سه‌ری هه‌موویاندا و
ئه‌وانه‌ی لێیان ماونه‌ته‌وه‌ به‌ شمشێر ده‌یانكوژم.
كه‌سیان لێ هه‌ڵنایه‌ت و
كه‌سیشیان لێ ده‌رباز نابێت.
2
ئه‌گه‌ر به‌ره‌و جیهانی مردووان هه‌ڵبكۆڵن،
له‌وێوه‌ ده‌ستم ده‌یانگرێت؛
ئه‌گه‌ر بۆ ئاسمانیش سه‌ربكه‌ون،
له‌وێوه‌ دایانده‌گرمه‌ خواره‌وه‌؛
3
ئه‌گه‌ر له‌ لووتكه‌ی كارمه‌ل خۆیان بشارنه‌وه‌،
له‌وێ به‌ شوێنیاندا ده‌گه‌ڕێم و ده‌یانگرم؛
ئه‌گه‌ر له‌ بنی ده‌ریا خۆیان له‌به‌رچاوم بشارنه‌وه‌،
له‌وێ فه‌رمان به‌ مار ده‌ده‌م و پێیانه‌وه‌ ده‌دات.
4
ئه‌گه‌ر له‌پێش دوژمنه‌كانیانه‌وه‌ ڕاپێچ كران،
له‌وێ فه‌رمان به‌ شمشێر ده‌ده‌م و ده‌یانكوژێت.
«چاوه‌كانم ده‌بڕمه‌ سه‌ریان
بۆ خراپه‌ نه‌ك بۆ چاكه‌.»
5
یه‌زدانیش، په‌روه‌ردگاری سوپاسالار،
ئه‌وه‌ی ده‌ست له‌ زه‌وی ده‌دات، زه‌وی ده‌توێته‌وه‌ و
هه‌موو دانیشتووانه‌كه‌ی شیوه‌ن ده‌گێڕن،
هه‌موو خاكه‌كه‌ وه‌ك ڕووباری نیل هه‌ڵده‌كشێت،
وه‌ك ڕووباری میسر داده‌كشێت.
6
ئه‌وه‌ی له‌ ئاسمان كۆشكی خۆی بنیاد ده‌نێت و
له‌ زه‌ویش بناغه‌ی خۆی داده‌مه‌زرێنێت،
ئه‌وه‌ی بانگی ئاوی ده‌ریا ده‌كات و
به‌سه‌ر ڕووی زه‌ویدا ده‌یڕژێنێت،
ناوی یه‌زدانه‌.
7
«ئه‌ی نه‌وه‌ی ئیسرائیل،
ئایا ئێوه‌ بۆ من وه‌ك نه‌وه‌ی كوشییه‌كان[a] نین؟»
ئه‌وه‌ فه‌رمایشتی یه‌زدانه‌.
«ئایا ئیسرائیلم له‌ خاكی میسره‌وه‌ نه‌هێنایه‌ ده‌ره‌وه‌ و
فه‌له‌ستییه‌كان له‌ كریته‌وه‌ و
ئارامییه‌كان له‌ قییره‌وه‌؟
8
«به‌ دڵنیاییه‌وه‌ چاوه‌كانی یه‌زدانی باڵاده‌ست
له‌سه‌ر پاشایه‌تییه‌ گوناهباره‌كه‌ن.
له‌ناوی ده‌به‌م له‌سه‌ر ڕووی زه‌وی،
به‌ڵام بنه‌ماڵه‌ی یاقوب به‌ ته‌واوی له‌ناو نابه‌م.»
ئه‌وه‌ فه‌رمایشتی یه‌زدانه‌.
9
«چونكه‌ من فه‌رمان ده‌ده‌م و
له‌نێو هه‌موو نه‌ته‌وه‌كان بنه‌ماڵه‌ی ئیسرائیل له‌ بێژنگ ده‌ده‌م،
وه‌ك چۆن به‌ بێژنگ له‌ بێژنگ ده‌درێت
بێ ئه‌وه‌ی ده‌نكێك بكه‌وێته‌ سه‌ر زه‌وی.
10
هه‌موو گوناهبارانی گه‌له‌كه‌م
به‌ شمشێر ده‌كوژرێن،
هه‌موو ئه‌وانه‌ی ده‌ڵێن:
”به‌ڵا نزیك نابێته‌وه‌ و نایه‌ته‌ ناومان.“
بنیادنانه‌وه‌ی ئیسرائیل 
11
«له‌و ڕۆژه‌دا چادره‌ ڕووخاوه‌كه‌ی داود
هه‌ڵده‌ده‌مه‌وه‌.
شوورابه‌نده‌ شكێنراوه‌كانی بنیاد ده‌نێمه‌وه‌،
ڕووخاوییه‌كانی دروستده‌كه‌مه‌وه‌،
وه‌ك ڕۆژانی ڕابردوو بنیادی ده‌نێمه‌وه‌،
12
تاكو ئه‌وه‌ی ده‌بنه‌ خاوه‌نی پاشماوه‌ی نه‌ته‌وه‌ی ئه‌دۆم و
هه‌موو ئه‌و نه‌ته‌وانه‌ی ناوی منیان هه‌ڵگرتووه‌.»
ئه‌وه‌ فه‌رمایشتی یه‌زدانه‌، ئه‌وه‌ی ئه‌م كردارانه‌ ئه‌نجام ده‌دات.
13
یه‌زدان ده‌فه‌رموێت:
«سه‌رده‌مێك دێت جوتیار به‌ سه‌پان ده‌گاته‌وه‌ و
شێله‌ری ترێش به‌ چێنه‌ری تۆو.
چیاكان خۆشاوی ترێیان لێ ده‌تكێت و
هه‌موو گرده‌كانیش لێیان ده‌چۆڕێته‌وه‌.
14
ڕاپێچكراوانی ئیسرائیلی گه‌له‌كه‌م ده‌گه‌ڕێنمه‌وه‌.
«شاره‌ كاولكراوه‌كان بنیاد ده‌نێنه‌وه‌ و تێیدا نیشته‌جێ ده‌بن.
ڕه‌زه‌مێو ده‌چێنن و شه‌رابه‌كه‌ی ده‌خۆنه‌وه‌،
باخ ده‌چێنن و له‌ به‌ره‌كه‌ی ده‌خۆن.
15
له‌ خاكه‌كه‌یاندا ده‌یانچێنم،
هه‌رگیز له‌و خاكه‌كه‌ی كه‌ پێم داون هه‌ڵناكه‌نرێن.»
یه‌زدانی په‌روه‌ردگارت ده‌فه‌رموێت.
  1. a. 9‏:7 كووش وڵاتێك بووه‌ له‌ سه‌رووی ڕووباری نیل.