عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
بینینه‌كه‌ی عۆبه‌دیا 
1
بینینه‌كه‌ی عۆبه‌دیا.
یه‌زدانی باڵاده‌ست سه‌باره‌ت به‌ ئه‌دۆم ئه‌مه‌ ده‌فه‌رموێت،
هه‌واڵێكمان له‌لایه‌ن یه‌زدانه‌وه‌ بیست،
نێردراوێك بۆ نه‌ته‌وه‌كان نێردراوه‌ تاكو پێیان بڵێت:
«هه‌ستن! هه‌ستن بۆ جه‌نگ.»
2
«ئێستا له‌نێو گه‌لاندا بچووكت ده‌كه‌مه‌وه‌،
تۆ زۆر ڕیسوا ده‌بیت.
3
فیزی دڵت هه‌ڵیخه‌ڵه‌تاندی،
ئه‌ی نیشته‌جێی نێو كه‌لێنی تاشه‌به‌رد[a] ،
ئه‌وه‌ی نشینگه‌كه‌ت له‌ به‌رزاییدایه‌،
ئه‌وه‌ی له‌ دڵی خۆتدا ده‌ڵێیت:
”كێ دامده‌گرێته‌ سه‌ر زه‌وی؟“
4
ئه‌گه‌ر وه‌ك هه‌ڵۆ به‌رز بیته‌وه‌ و
ئه‌گه‌ر هێلانه‌ت له‌ناو ئه‌ستێره‌كان دابنێیت،
له‌وێوه‌ ده‌تهێنمه‌ خواره‌وه‌.»
ئه‌وه‌ فه‌رمایشتی یه‌زدانه‌.
5
«ئه‌گه‌ر دز یان چه‌ته‌ی شه‌وانت بۆ بێت،
ئایا ته‌نها ئه‌وه‌ی پێویستیان بێت نایدزن؟
ئه‌گه‌ر ڕه‌زبڕت[b] بۆ بێت
ئایا هه‌ندێك ترێ به‌جێناهێڵن؟
ئای چۆن به‌ ته‌واوی بڕایته‌وه‌!
6
ئای عیسۆ چۆن ده‌پشكێنرێت!
گه‌نجینه‌ شاردراوه‌كانی تاڵان ده‌كرێن!
7
هه‌موو هاوپه‌یمانه‌كانت هه‌تا سنوور ڕاویان نای،
هه‌ڵیانخه‌ڵه‌تاندی و به‌سه‌رتدا زاڵبوون،
ئه‌وانه‌ی نمه‌كی تۆیان كردبوو داوت بۆ ده‌نێنه‌وه‌،
به‌ڵام تۆ تێناگه‌یت.»
8
یه‌زدان ده‌فه‌رموێت:
«ئایا له‌و ڕۆژه‌دا،
دانایان له‌ ئه‌دۆم له‌ناو نابه‌م،
تێگه‌یشتووانیش له‌ چیای عیسۆ؟
9
ئه‌ی تێمان، پاڵه‌وانه‌كانت ده‌تۆقن،
هه‌موو ئه‌وانه‌ی له‌ چیای عیسۆن
به‌ كوشتن له‌ناوده‌چن.
10
له‌به‌ر سته‌می تۆ له‌ یاقوبی برات،
ڕیسوایی داتده‌پۆشێت،
بۆ هه‌تاهه‌تایه‌ له‌ناوده‌چیت.
11
ئه‌و ڕۆژه‌ی ته‌ماشات ده‌كرد
كاتێك بیانییه‌كان سامانه‌كه‌یان داگیر كرد و
نامۆكان هاتنه‌ ناو ده‌روازه‌كانی و
له‌سه‌ر ئۆرشه‌لیم تیروپشكیان كرد،
هه‌روه‌ها تۆش وه‌ك یه‌كێك بووی له‌وان.
12
به‌ڵام نابێت به‌ ڕۆژی كاره‌ساتی براكه‌ت دڵخۆش بیت،
یان له‌ ڕۆژی له‌ناوچوونی نه‌وه‌ی یه‌هودا شادمان بیت،
یان له‌ ڕۆژی ته‌نگانه‌یاندا شانازی بكه‌یت.
13
نابێت بچیته‌ ناو ده‌روازه‌ی گه‌له‌كه‌م
له‌ ڕۆژی كاره‌ساتیان،
یان به‌ ناخۆشییه‌كه‌یان دڵخۆش بیت
له‌ ڕۆژی كاره‌ساتیان،
یان ده‌ستت بۆ سامانه‌كه‌یان درێژ بكه‌یت
له‌ ڕۆژی كاره‌ساتیان.
14
نابێت له‌سه‌ر دووڕیانه‌كان بوه‌ستیت
بۆ كوشتنی ده‌ربازبووه‌كانیان،
نابێت هه‌ڵاتووه‌كانیان ڕاده‌ست بكه‌یت
له‌ ڕۆژی ته‌نگانه‌یاندا.
15
«ڕۆژی یه‌زدان[c] بۆ هه‌موو گه‌لان نزیكه‌.
هه‌روه‌ك ئه‌وه‌ی كردت ئاوات پێ ده‌كرێته‌وه‌،
كرده‌وه‌كانت به‌سه‌ر خۆت دێته‌وه‌.
16
هه‌روه‌ك له‌سه‌ر كێوی پیرۆزم خواردتانه‌وه‌،
هه‌موو گه‌لان به‌رده‌وام جامی سزا ده‌خۆنه‌وه‌؛
ده‌خۆنه‌وه‌ و ده‌خۆنه‌وه‌ و
وه‌ك ئه‌وه‌یان لێدێت كه‌ هه‌رگیز نه‌بووبن.
17
به‌ڵام ده‌ربازبوون له‌سه‌ر كێوی سییۆن ده‌بێت،
پیرۆز ده‌بێت،
بنه‌ماڵه‌ی یاقوبیش به‌شه‌ میراتی خۆیان وه‌رده‌گرن.
18
بنه‌ماڵه‌ی یاقوب ده‌بێته‌ ئاگر و
بنه‌ماڵه‌ی یوسف ده‌بێته‌ گڕ؛
بنه‌ماڵه‌ی عیسۆش ده‌بێته‌ پووش،
جا گڕیان تێبه‌رده‌ده‌ن و ده‌یانخۆن.
بنه‌ماڵه‌ی عیسۆ كه‌سیان لێ ده‌رباز نابێت.»
ئه‌مه‌ فه‌رمایشتی یه‌زدانه‌.
19
خه‌ڵكی نه‌قه‌ب
چیای عیسۆ داگیر ده‌كه‌ن،
خه‌ڵكی زوورگه‌كانیش
خاكی فه‌له‌ستییه‌كان.
ده‌بنه‌ خاوه‌نی كێڵگه‌كانی ئه‌فرایم و سامیره‌،
بنیامینیش ده‌بێته‌ خاوه‌نی گلعاد.
20
ئه‌و كۆمه‌ڵه‌ی ڕاپێچكراوانی ئیسرائیل كه‌ له‌ كه‌نعانن
هه‌تا سه‌ره‌فه‌ند ده‌ست به‌سه‌ر خاكه‌كه‌دا ده‌گرن؛
ڕاپێچكراوانی ئۆرشه‌لیمیش كه‌ له‌ سفاره‌دن
ده‌ست به‌سه‌ر شارۆچكه‌كانی نه‌قه‌بدا ده‌گرن.
21
ڕزگاركه‌رانی خاكه‌كه‌ش سه‌رده‌كه‌ونه‌ سه‌ر كێوی سییۆن
بۆ فه‌رمانڕه‌وایه‌تی له‌سه‌ر چیای عیسۆ.
پاشایه‌تیش بۆ یه‌زدان ده‌بێت.
  1. a. 1‏:3 پایته‌ختی ئه‌دۆم ناوی سه‌له‌ع بوو، كه‌ هه‌مان وشه‌ی عیبرییه‌ بۆ تاشه‌به‌رد.
  2. b. 1‏:5 ڕه‌زبڕ: ئه‌وه‌ی به‌رهه‌می ڕه‌زی ده‌بڕێته‌وه‌.
  3. c. 1‏:15 ڕۆژی سزادانی گوناهباران و ڕزگاركردنی گه‌لی خودا.