عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
تیمۆساوس له‌گه‌ڵ پۆڵس و سیلا 
1
پۆڵس گه‌یشته‌ شاری ده‌ربه‌ و پاشان شاری لیسترا، له‌وێ قوتابییه‌ك به‌ ناوی تیمۆساوس هه‌بوو، دایكی جوله‌كه‌یه‌كی باوه‌ڕدار بوو، به‌ڵام باوكی یۆنانی بوو.
2
برایان له‌ لیسترا و كۆنیا به‌ باشه‌ باسی تیمۆساوسیان ده‌كرد.
3
پۆڵس حه‌زی ده‌كرد تیمۆساوس یاوه‌ری بێت، جا بردی تاكو خه‌ته‌نه‌ بكرێت، له‌به‌ر ئه‌و جوله‌كانه‌ی له‌و ناوچانه‌ بوون، چونكه‌ هه‌موو ده‌یانزانی باوكی یۆنانییه‌.
4
ئیتر پۆڵس و هاوڕێكانی له‌‏ شارێكه‌وه‌ ده‌چوون بۆ شارێكی دیكه‌ و ئه‌و فه‌رمانانه‌ی له‌لایه‌ن نێردراوان و پیرانه‌وه‌ له‌ ئۆرشه‌لیم بڕیاریان له‌سه‌ر درابوو، پێیان ڕاده‌گه‌یاندن تاكو په‌یڕه‌وی بكه‌ن.
5
جا كڵێساكان له‌ باوه‌ڕدا به‌هێز ده‌بوون و ڕۆژ له‌دوای ڕۆژ ژماره‌یان زیادی ده‌كرد.
بینینی پۆڵس له‌ تروادا 
6
پاشان پۆڵس و هاوڕێیه‌كانی به‌ ناوچه‌كانی فریجیا و گه‌لاتیادا تێپه‌ڕین، له‌به‌ر ئه‌وه‌ی ڕۆحی پیرۆز ڕێی نه‌دان له‌ ناوچه‌ی ئاسیا په‌یامی خودا ڕابگه‌یه‌نن.
7
كاتێك گه‌یشتنه‌ نزیك ناوچه‌ی میسیا هه‌وڵیان دا به‌ره‌و ناوچه‌ی بیسینیا بڕۆن، به‌ڵام ڕۆحی عیسا ڕێگای نه‌دان.
8
ئه‌وسا به‌ میسیادا تێپه‌ڕین و هاتنه‌ ترۆیاس.
9
له‌ شه‌ودا پۆڵس بینینێكی بۆ ئاشكرا كرا، پیاوێكی مه‌كدۆنی ڕاوه‌ستابوو، لێی ده‌پاڕایه‌وه‌: «وه‌ره‌ بۆ مه‌كدۆنیا و یارمه‌تیمان بده‌.»
10
پاش ئه‌وه‌ی بینینه‌كه‌ی بۆ ئاشكرا كرا، هه‌وڵماندا[a] ده‌ستبه‌جێ به‌ڕێ بكه‌وین بۆ مه‌كدۆنیا، دڵنیا بووین كه‌ خودا بانگی كردووین تاكو مزگێنییان بده‌ینێ.
11
جا به‌ ده‌ریادا له‌ ترۆیاسه‌وه‌ ڕاست بۆ سامۆسراكی ڕۆیشتین و بۆ ڕۆژی دوایی بۆ نیاپۆلیس.
12
له‌وێشه‌وه‌ بۆ فیلیپی كه‌ یه‌كه‌م شاری ناوچه‌ی مه‌كدۆنیایه‌ و جێنشینی ڕۆمانییه‌كانه‌، له‌وێ چه‌ند ڕۆژێك ماینه‌وه‌.
13
له‌ ڕۆژی شه‌ممه‌دا چووینه‌ ده‌ره‌وه‌ی شار بۆ سه‌ر ڕووبار، له‌و بڕوایه‌دا بووین له‌وێ نوێژ بكرێت. دانیشتین قسه‌مان له‌گه‌ڵ ئه‌و ژنانه‌ كرد كه‌ له‌وێ كۆببوونه‌وه‌.
14
یه‌ك له‌وان كه‌ گوێی ده‌گرت ژنێكی خواپه‌رست بوو به‌ ناوی لیدیا، خه‌ڵكی شاری سیاتیرا و بازرگانی كوتاڵی گرانبه‌ها بوو. مه‌سیحی خاوه‌ن شكۆ دڵی كرده‌وه‌ تاكو سه‌رنج بداته‌ قسه‌كانی پۆڵس.
15
كاتێك خۆی و خاووخێزانی له‌ ئاو هه‌ڵكێشران، پاڕایه‌وه‌: «ئه‌گه‌ر به‌ڕاستی باوه‌ڕتان وایه‌ كه‌ من باوه‌ڕم به‌ مه‌سیحی خاوه‌ن شكۆ هێناوه‌، ئه‌وا وه‌رنه‌ ماڵه‌كه‌م و بمێننه‌وه‌.» ئیتر ناچاری كردین.
ده‌ركردنی ڕۆحی جادووگه‌ریێتی 
16
كاتێك بۆ شوێنی نوێژكردن ده‌چووین، تووشی كاره‌كه‌رێك بووین ڕۆحی فاڵچیێتی تێدابوو، به‌ كاری فاڵچیێتییه‌كه‌ی قازانجێكی زۆری بۆ خاوه‌نه‌كانی به‌ده‌ستده‌هێنا.
17
به‌دوای پۆڵس و ئێمه‌ كه‌وت و هاواری ده‌كرد: «ئه‌م مرۆڤانه‌ به‌نده‌ی خودای هه‌ره‌به‌رزن، ڕێگای ڕزگاریتان بۆ ڕاده‌گه‌یه‌نن.»
18
چه‌ندین ڕۆژ ئه‌مه‌ی ده‌كرد، تاكو پۆڵس بێزار بوو، ئاوڕی دایه‌وه‌ و به‌ ڕۆحه‌كه‌ی گوت: «به‌ ناوی عیسای مه‌سیح فه‌رمانت پێده‌ده‌م، لێی وه‌ره‌ ده‌ره‌وه‌!» یه‌كسه‌ر ڕۆحه‌ پیسه‌كه‌ لێی هاته‌ ده‌ره‌وه‌.
پۆڵس و سیلا له‌ به‌ندیخانه‌ 
19
كاتێك خاوه‌نه‌كانی بینییان سه‌رچاوه‌ی داهاتیان بڕا، پۆڵس و سیلایان گرت، ڕایانكێشانه‌ بازاڕ بۆ به‌رده‌م ده‌سه‌ڵاتداران.
20
بردییاننه‌ پێش دادوه‌ران و گوتیان: «ئه‌م پیاوانه‌ شاره‌كه‌مان ده‌شێوێنن، جوله‌كه‌ن و
21
نه‌ریتێك بڵاو ده‌كه‌نه‌وه‌ كه‌ دروست نییه‌ ئێمه‌ی ڕۆمانی وه‌ریبگرین یان كاری پێ بكه‌ین.»
22
ئیتر خه‌ڵكه‌كه‌ پێكڕا لێیان هه‌ستان و دادوه‌ران فه‌رمانیان دا كه‌ جله‌كانیان بدڕێنرێن و داركاری بكرێن.
23
جا زۆر داركارییان كردن و خستیاننه‌ به‌ندیخانه‌وه‌، فه‌رمانیان به‌ چاودێری به‌ندیخانه‌كه‌ دا به‌ توندی پاسه‌وانیان بكات.
24
ئه‌ویش كه‌ ئه‌م فه‌رمانه‌ی بۆ هات، فڕێیدانه‌ ناو قووڵایی به‌ندیخانه‌كه‌ و پێیانی خسته‌ ناو كۆته‌وه‌.
25
له‌ نیوه‌ی شه‌ودا پۆڵس و سیلا نوێژیان ده‌كرد و گۆرانی ڕۆحییان بۆ خودا ده‌گوت، به‌ندكراوانی دیكه‌ش گوێیان لێبوو.
26
له‌ناكاو بوومه‌له‌رزه‌یه‌كی به‌هێز ڕوویدا، بناغه‌ی به‌ندیخانه‌كه‌ی هه‌ژاند، ده‌ستبه‌جێ هه‌موو ده‌رگاكان كرانه‌وه‌ و كۆتی هه‌مووان بووه‌وه‌.
27
كه‌ چاودێره‌كه‌ به‌ئاگا هات و بینی ده‌رگاكانی به‌ندیخانه‌ كراونه‌ته‌وه‌، شمشێری هه‌ڵكێشا به‌ته‌مابوو خۆی بكوژێت، وایزانی به‌ندكراوان ڕایانكردووه‌.
28
به‌ڵام پۆڵس هاواری كرد: «هیچ له‌ خۆت مه‌كه‌، هه‌موومان لێره‌ین!»
29
ئه‌ویش داوای ڕووناكی كرد، چووه‌ ژووره‌وه‌ و ده‌له‌رزی، له‌به‌رده‌م پۆڵس و سیلا چۆكی دادا.
30
ئه‌وسا بردنییه‌ ده‌ره‌وه‌ و گوتی: «گه‌وره‌كانم، پێویسته‌ چی بكه‌م تاكو ڕزگارم بێت؟»
31
گوتیان: «باوه‌ڕ به‌ عیسای خاوه‌ن شكۆ بهێنه‌، خۆت و خێزانه‌كه‌ت ڕزگارتان ده‌بێت.»
32
جا په‌یامی مه‌سیحی خاوه‌ن شكۆی بۆ خۆی و هه‌موو ئه‌وانه‌ی له‌ ماڵه‌كه‌یدا بوون ڕاگه‌یاند.
33
ئیتر چاودێره‌كه‌ له‌و كاته‌ی شه‌ودا بردنی و برینه‌كانی ساڕێژ كرد، ده‌ستبه‌جێ خۆی و خاووخێزانه‌كه‌ی له‌ ئاو هه‌ڵكێشران.
34
ئینجا بردنییه‌ ماڵه‌وه‌ و خواردنی بۆ دانان، خۆی و خاووخێزانه‌كه‌ی زۆر دڵشاد بوون، كه‌ باوه‌ڕیان به‌ خودا هێنابوو.
35
كه‌ ڕۆژبووه‌وه‌ فه‌رمانڕه‌واكان پۆلیسیان نارد و گوتیان: «پیاوه‌كان ئازاد بكه‌ن.»
36
چاودێری به‌ندیخانه‌ ئه‌م هه‌واڵه‌ی دایه‌ پۆڵس: «فه‌رمانڕه‌وایان ناردوویانه‌ كه‌ ئازاد بكرێن، بۆیه‌ ئێستا وه‌رنه‌ ده‌ره‌وه‌ و بڕۆن به‌ سه‌لامه‌ت.»
37
به‌ڵام پۆڵس پێی گوتن: «به‌ بێ دادگایی كردن و به‌ ئاشكرا داركارییان كردین و فڕێیان داینه‌ به‌ندیخانه‌، ئێمه‌ش هاوڵاتی ڕۆمانین، ئایا ئێستا به‌ نهێنی ده‌رمانده‌كه‌ن؟ نه‌خێر! به‌ڵكو با خۆیان بێن ده‌رمانبهێنن.»
38
پۆلیسه‌كان ئه‌م قسانه‌یان به‌ فه‌رمانڕه‌وایان ڕاگه‌یاند، ئه‌وانیش كاتێك زانییان پۆڵس و سیلا هاوڵاتی ڕۆمانین ترسان.
39
ئیتر هاتن و لێیان پاڕانه‌وه‌، بردییاننه‌ ده‌ره‌وه‌ و داوایان لێكردن شاره‌كه‌ به‌جێبهێڵن.
40
كاتێك پۆڵس و سیلا له‌ به‌ندینخانه‌ هاتنه‌ ده‌ره‌وه‌، چوون بۆ ماڵی لیدیا، له‌وێ له‌گه‌ڵ خوشك و برای باوه‌ڕداران كۆبوونه‌وه‌ و هانیان دان، پاشان ڕۆیشتن.
  1. a. 16‏:10 به‌ڵگه‌یه‌ بۆ ئاماده‌بوونی لۆقای پزیشك له‌گه‌ڵ پۆڵس.