عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
تیمۆتاوس ل گەل پاولۆس و سیلاسی دچیت 
1
پاشی پاولۆس گەهشتە دەربە، پشتی هنگی گەهشتە لیسترا، ل وێرێ شاگردەك ب ناڤێ تیمۆتاوس هەبوو، دایكا وی جوهی بوو و باوەری ب مەسیحی هەبوو، لێ بابێ وی یونانی بوو.
2
تیمۆتاوسی د ناڤ برایێن باژێڕێ لیسترا و كۆنیایێ دا ناڤودەنگەكێ باش هەبوو.
3
پاولۆسی حەز دكر وی ل گەل خۆ ببەت، ئینا ژ بەر جوهیێن وێ دەڤەرێ سونەت كر، چنكو هەمیان دزانی بابێ وی یونانیە.
4
ئەو ژ باژێڕەكی بۆ باژێڕەكی دگەڕیان و بڕیارێن ریهسپی و هنارتیان ل ئورشەلیمێ داین، بۆ وان رادگەهاندن، دا ئەو پێگیریێ پێ بكەن.
5
ب ڤی ئاوایی كەنیسە د باوەریێ دا موكمتر لێ دهاتن و رۆژ بۆ رۆژێ ژمارەیا باوەرداران پتر لێ دهات.
بینینا پاولۆسی بۆ زەڵامێ مەقدۆنی 
6
ئەو د ناڤبەرا دەڤەرا فریگیە و گالاتیا را دەرباز بوون، چنكو گیانێ پیرۆز وەنەكر پەیڤێ ل هەرێما ئاسیا بەڵاڤ بكەن.
7
دەمێ گەهشتینە دەڤەرا میسیا، وان هەوڵدا بچنە د هەرێما بیتینیایێ دا، لێ گیانێ عیسای نەهێلا.
8
د میسیا را چوون و گەهشتنە باژێڕێ ترویاس.
9
ب شەڤێ بینینەك بۆ پاولۆسی دیار بوو، تێدا مرۆڤەكێ مەقدۆنی یێ راوەستیای بوو، ژ دل هیڤی ژێ دكرن و دگۆتێ: «دەربازی مەقدۆنیا ببە و هاریكاریا مە بكە.»
10
پشتێ وی ئەو بینین دیتی، ئێكسەر مە كارێ خۆ كر بچینە مەقدۆنیایێ، چنكو مە تێ ئینا دەر كو خودێ گازی مە كر، دا مزگینیێ بدەینە خەلكێ وێ دەڤەرێ.
باوەریا لیدیایێ ل فیلیپی 
11
ئەم ژ ترویاس ب گەمیێ راست چووینە ساموتراكیێ، ل رۆژا پاشتر چووینە نیاپۆلیس.
12
ژ وێرێ ئەم چووینە باژێڕێ فیلیپی، كو باژێڕەكێ دەڤەرا ئێكێ یا مەقدۆنیایێ بوو و كۆلۆنیەكا[a] رۆمایی بوو و بۆ چەند رۆژان ئەم ل وێرێ ماین.
13
ل رۆژا شەمبیێ ئەم ژ دەرگەهێ باژێڕی دەركەفتین و چووینە سەر رویباری، ئەم د وێ باوەریێ دا بووین كو وێرێ جهێ نڤێژێ بوو، ئەڤجا ئەم روینشتین و ل گەل وان ژنێن كۆم بووی ئاخفتین.
14
ژنەكا خودێپەرێس گوهداریا مە دكر، ناڤێ وێ لیدیا بوو، خەلكا باژێڕێ تیاتیرا بوو، وێ بازرگانی ب پەڕوكێ بنەفشی دكر، خودانی دلێ وێ ڤەكربوو داكو گوهداریا ئاخفتنێن پاولۆسی بكەت.
15
پشتی ل گەل خێزانا خۆ هاتیە تافیركرن، هیڤی ژ مە كر و گۆت: «ئەگەر هوین وەكو باوەردارەكا خودانی من بهژمێرن، وەرنە مالا من و ل وێرێ بمینن.» ئەڤجا وێ ئەم نەچار كرین.
پاولۆس و سیلاس دهێنە گرتن 
16
رۆژەكێ ئەم دچووینە جهێ نڤێژكرنێ، كەنیزەیەكا گیانێ خێڤزانكیێ تێدا، كەفتە راستا مە، وێ ب كارێ خێڤزانكیێ مفایەكێ مەزن دگەهاندە خودانێن خۆ.
17
ئەو ب دویڤ پاولۆسی و مە كەفت و گازی دكر: «ئەڤ مرۆڤە بەنیێن خودایێ هەری بلندن، بۆ هەوە رێكا قورتالبوونێ ددەنە نیاسین.»
18
ئەوێ ئەڤ چەندە بۆ گەلەك رۆژان دووبارە دكر، ئەڤجا پاولۆس بێزار بوو و گۆتە گیانی: «ب ناڤێ عیسایێ مەسیح، فەرمانێ ل تە دكەم، كو ژێ دەركەڤی.» ئێكسەر ژێ دەركەفت.
19
دەمێ خودانێن وێ دیتی، كو ئێدی ئەو مفای ژ وێ وەرناگرن، پاولۆس و سیلاس گرتن و راكێشانە بەر سینگێ دەستهەلاتداران ل گۆڕەپانا باژێڕی.
20
دەمێ ئیناینە نك دادوەران، گۆتن: «ئەڤ زەڵامە جوهینە و یێ باژێڕێ مە تێك ددەن
21
و فێری هندەك داب و نەریتان دكەن، كو نابیت ئەم رۆمایی پێ رازی ببین و پێگیریێ پێ بكەین.»
22
ئەڤجا خەلكی پێكڤە هێرش كرە سەر وان، دادوەران ژی جلكێن وان د بەر دا ئینان و فەرمان كر وان بدەنە بەر داران.
23
پشتێ ئەو گەلەك قوتاین، هاڤێتنە د زیندانێ دا و فەرمان ل ئەفسەرێ زیندانێ كر، كو باش نوبەداریێ لێ بگریت.
24
ئەوی ژی دەمێ ئەڤ فەرمانە وەرگرتی، ئەو هاڤێتنە د ئاسێترین ژۆرا زیندانێ دا و پێیێن وان بەند كرن.[b]
زیندانڤان و خێزانا وی قورتال دبن 
25
ل نێزیكی نیڤا شەڤێ، پاولۆس و سیلاسی نڤێژ دكرن و ستران ب مەزناهیا خودێ دگۆتن و زیندانیان گوهێ خۆ ددایێ.
26
ژ نشكەكێ ڤە بیڤەلەرزەكا دژوار بنیاتێن زیندانێ تێك هەژاندن، ئێكسەر هەمی دەرگەهـ ڤەبوون و بەندێن هەمی زیندانیان كەفتن.
27
ئەفسەرێ زیندانێ هشیار بوو، دەمێ دیتی دەرگەهێن زیندانێ دڤەكرینە، هزركر كو هەمی گرتی یێن رەڤین، ئێكسەر شیرێ خۆ هەلكێشا و چ نەمابوو خۆ بكوژیت،
28
لێ پاولۆسی ب دەنگەكێ بلند لێ كرە هەوار: «چ زیانێ نەگەهینە خۆ، ئەم هەمی یێ ل ڤێرێ!»
29
ئینا ئەفسەری داخوازا رۆناهیەكێ كر و ب لەز ب ژۆر كەفت و ژ ترسا دا دلەرزی و خۆ هاڤێتە بەر پێیێن پاولۆس و سیلاسی.
30
پاشی ئەو برنە ژ دەرڤە و پرسیار ژ وان كر: «ئەزبەنی، پێدڤیە ئەز چ بكەم، دا قورتال ببم؟»
31
وان بەرسڤ دا: «باوەریێ ب خودان عیسای بینە، تۆ و خێزانا خۆ دێ قورتال بن!»
32
پاشی مزگینیا پەیڤا خودانی گەهاندە وی و هەمیێن ل مالا وی.
33
هەر د وی دەمێ شەڤێ دا ئەفسەرێ زیندانێ ئەو برن و برینێن وان شویشتن. ئێكسەر ئەو و هەمی خێزانا وی هاتنە تافیركرن.
34
پاشی برنە مالا خۆ و سفرە دانا بەر وان، ئینا ئەو و هەمی خێزانا وی گەلەك دلخۆش بوون، چنكو باوەری ب خودێ ئینا.
35
دەمێ بوویە سپێدە، دادوەران هندەك سەربازێن خۆ هنارتنە نك ئەفسەرێ زیندانێ و گۆتنێ: «وان هەردوو كەسان بەردە.»
36
ئەڤجا ئەفسەری گۆتە پاولۆسی: «دادوەران فەرمان یا هنارتی كو هوین بهێنە بەردان، ئەڤجا نوكە وەرنە ژ دەرڤە و ب خێر بچن!»
37
لێ پاولۆسی گۆتە وان: «ئەم بێ دادكرن، ل پێش چاڤێن خەلكی داینە بەر داران، هەر چەندە ئەم هەڤوەڵاتیێن رۆمایینە و ئەم كرینە د زیندانێ دا، نوكە چەوا ب دزی ڤە دێ مە دەرئێخن؟ نەخێر! بلا ئەو ب خۆ بهێن و مە بەردەن!»
38
سەربازان ئەڤ چەندە گەهاندە دادوەران، ئەڤجا دەمێ زانی كو هەردوو رۆمایینە، ئەو ترسیان،
39
ئینا هاتن و داخوازا لێبورینێ ژێ كر و هەردوو دەرئێخستن و داخواز ژێ كر كو ژ باژێڕی دەركەڤن.
40
ئەڤجا ئەو ژ زیندانێ دەركەفتن و چوونە مالا لیدیایێ. ئینا ل وێرێ برا دیتن و ئەو هاندان و ژ باژێڕی دەركەفتن.
  1. a. 16‏:12 q كۆلۆنی: ل فەرهەنگۆكێ بنێڕە.
  2. b. ‏16‏:24 ل وی سەردەمی پێیێن زیندانیان دئێخستنە ئامیرەكێ داری، یێ پێكهاتی بوو ژ دوو پارچەیێن دەپی ل دۆر پێیێن زیندانی دهێنە شداندن.