عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
ل سالونیكی 
1
پاولۆس و سیلاس د ئەمفیپۆلیس و ئەپولونیایێ را بورین و گەهشتنە سالونیكی. ل وێرێ كنیشتەیەكا جوهیان هەبوو.
2
ئینا پاولۆس، وەكو هەر جار، چوو د كنیشتێ ڤە و د سێ رۆژێن شەمبی دا ب بەلگەیێن نڤیسارێن پیرۆز دانوستاندن ل گەل وان دكر.
3
وی بۆ وان شڕۆڤە دكر و دسەلماند كو پێدڤی بوو مەسیح ئازارێ بكێشیت و ژ ناڤ مریان راببیت و گۆت: «ئەڤ عیسایێ كو ئەز بۆ هەوە ددەمە نیاسین، ئەو مەسیحە.»
4
هندەك ژ ئامادەبوویان قاییل بوون و خۆ دانە ل گەل پاولۆسی و سیلاسی، ل گەل جەماوەرەكێ مەزن ژ یونانیێن خودێپەرێس و ژمارەیەكا نە یا كێم ژ ژنێن قەدرگران.
5
لێ چاڤێن جوهیان پێ رانەبوون و ژ كەسێن بكێرنەهاتی یێن بازاڕی هندەك مرۆڤێن خراب ئینان، جەماوەرەك كۆم كر و بەرەڵایی د باژێڕی دا پەیدا كر. پاشی وان هێرش كرە سەر مالا یاسونی، دا پاولۆس و سیلاسی راكێشنە بەر دەستێ خەلكی.
6
دەمێ هەردوو ل وێرێ نەدیتین، یاسون و هندەك برایێن دی راكێشانە بەر دەستێ دەستهەلاتدارێن باژێڕی و دكرنە گازی: «ئەڤ كەسێن جیهان سەروبن كری، هاتنە ڤێرێ ژی،
7
یاسونی ئەو یێن مێڤان كرین. رەفتارا وان هەمیان دژی فەرمانێن قەیسەریە، كو دبێژن پاشایەكێ دی هەیە ناڤێ وی عیسایە.»
8
ئەوان ب ڤێ گۆتنێ خەلك و دەستهەلاتدارێن باژێڕی ئازراندن.
9
ئینا پارە وەك گەرەو ژ یاسونی و یێن د گەل دا ستاندن، پاشی بەردان.
ل بیرییە 
10
هەر وێ شەڤێ، برایان پاولۆس و سیلاس بۆ بیرییە ب رێ ئێخستن. دەمێ ئەو گەهشتینە وێرێ، چوونە د كنیشتەیا جوهیان ڤە.
11
ئەڤ جوهییە ژ یێن ل سالونیكی سەرنەرمتر بوون، وان پەیڤا خودێ گەلەك ب گەرمی وەرگرت و رۆژانە نڤیسار دخواندن، دا بزانن كا فێركرنا پاولۆس و سیلاسی یا راست بوو یان نە.
12
ئەڤجا گەلەك ژ وان باوەری ئینا، هەروەسا ژمارەیەكا نە یا كێم ژ ژنێن یونانی یێن قەدرگران و زەڵامان ژی.
13
دەمێ جوهیێن سالونیكی زانی كو پاولۆس یێ مزگینیا پەیڤا خودێ ل بیرییە ژی بەڵاڤ دكەت، هاتن و ل وێرێ ژی خەلك ئازراند و تێكدان پەیدا كر.
14
هەر د وی دەمی دا برایان پاولۆس بەرەڤ دەریایێ ب رێ ئێخست، لێ سیلاس و تیمۆتاوس ل وێرێ مان.
15
ئەوێن پاولۆس دگەهاند، هەتا ئەسینا ل گەل چوون و پشتی فەرمانەك بۆ سیلاسی و تیمۆتاوسی ژ وی وەرگرتی، كو ب زویترین دەم بهێنە نك وی، ئەو ڤەگەڕیان.
ل ئەسینا 
16
دەمێ پاولۆسی ل ئەسینا چاڤەڕێیا وان دكر، گەلەك دلتەنگ بوو، چنكو وی دیت باژێڕ ژ پووتان[a] یێ پڕە.
17
ئینا ل كنیشتەیێ دانوستاندن ل گەل جوهی و خودێپەرێسان دكر، هەروەسا وی رۆژانە دانوستاندن ل گەل وان كەسان دكر، ئەوێن ل بازاڕی دكەفتنە رێیا وی.
18
ئەڤجا هندەك فەیلەسوفێن ئەپیقوری[b] و رەواقی[c] ل گەل وی كەفتنە گەنگەشەیێ و هندەك ژ وان گۆت: «ئەڤی پڕبێژی دڤێت چ ببێژیت؟» هندەكێن دی گۆتن: «یا دیارە ئەڤە راگەهاندنێ بۆ خوداوەندێن بیانی دكەت.» چنكو وی مزگینی دەربارەی عیسای و رابوونا مریان ددا وان.
19
ئەڤجا ئەو بر و چوونە ئەریوپاگوسێ[d] و گۆتنێ: «ئەرێ ئەم دشێین بزانین ئەو فێركرنێن نوی یێن تۆ رادگەهینی چنە؟
20
ئەم یێ تشتێن سەیر ژ تە دبهیسین، مە دڤێت بزانین رامانا وان چیە؟»
21
چنكو هەمی خەلكێ ئەسینا و بیانیێن ل وێرێ دئاكنجی، خۆ ب چڤە مژویل نەدكر، ژبلی گۆتن و بهیستنا تشتێن نوی.
22
ئینا پاولۆس ل نیڤا ئەریوپاگوسێ راوەستیا و گۆت: «گەلی خەلكێ ئەسینا، ئەز یێ دبینم هوین ژ هەمی لایان ڤە، گەلەك دئاییندارن،
23
چنكو دەمێ ئەز دگەڕیام و من باش بەرێ خۆ ددا تشتێن هوین دپەرێسن، من قوربانگەهەك دیت، ل سەر نڤیسی بوو: ‹بۆ خودایەكێ نەنیاس.› ئەڤجا ئەڤ خودایێ هوین دپەرێسن و نانیاسن، ئەز وی بۆ هەوە ددەمە نیاسین.
24
ئەو خودایێ جیهان و هەر تشتێ تێدا ئافراندین، ئەو خودانێ ئەرد و ئەسمانیە و د پەرستگەهێن دەستكردێن مرۆڤان دا ئاكنجی نابیت.
25
ب دەستێن مرۆڤان ژی ناهێتە خزمەت كرن، هەروەكو وی پێدڤی ب تشتەكی هەبیت، چنكو ئەو ب خۆ ژیانێ و هەناسەیێ و هەر تشتەكی ددەتە هەمیان.
26
وی هەمی مللەتێن جیهانێ ژ ئێك كەس ئافراندن، كو ل سەر رویێ ئەردی هەمیێ ئاكنجی ببن و دەم و سنوورێن ئاكنجیبوونا وان دانان،
27
دا ل خودێ بگەڕن، بەلكو ب لەپەقوتێ ڤێ بكەڤن، هەر چەندە ب راستی ئەو ژ هەر ئێك ژ مە نە یێ دویرە.
28
چنكو ‹ب وی ئەم دژین و دلڤین و یێن هەین[e] ،› هەروەكو هندەك هەلبەستڤانێن هەوە ژی گۆتی: ‹ئەم ژی ژ دویندەها[f] وینە[g] .›
29
ئەڤجا، ژ بەر كو ئەم دویندەها خودێینە، پێدڤیە ئەم هزر نەكەین كو خودینی وەكو زێڕی، یان زیڤی، یان بەرییە، كو ب شارەزایی و هونەرێ مرۆڤەكی هاتبیتە نەخشكرن!
30
خودێ بەرێ خۆ ل سەردەمێن نەزانینێ گرت، لێ نوكە ئەو فەرمانێ ل هەمی مرۆڤان ل هەر جهەكی دكەت، ل خۆ بزڤڕن.
31
چنكو وی رۆژەكا دانای كو دادپەروەرانە هەمی جیهانێ ل سەر دەستێ زەڵامەكێ وی دەستنیشانكری، داد بكەت. وی گرۆڤە ژی دایە هەمیان، دەمێ ئەو ژ ناڤ مریان راكری.»
32
دەمێ ئامادەبوویان گوهـ ل رابوونا مریان بووی، هندەك ژ وان سڤكاتی پێ كر، لێ هندەكێن دی گۆتێ: «ل دۆر ڤی بابەتی، دێ ل دەمەكێ دی گوهێ خۆ دەینە تە.»
33
ئەڤجا پاولۆس ژ ناڤ وان دەركەفت.
34
لێ هندەك كەس گەهشتنێ و باوەری ئینا، ژ وان دیونیسیوس ئەوێ ئەندام د جڤاتا ئەریوپاگوسێ دا و ژنەك ناڤێ وێ داماریس بوو و هندەكێن دی ژی ل گەل وان.
  1. a. ‏17‏:16 صەنەمان
  2. b. 17‏:18 q ئەپیقوری: رێبازەكا فەلسەفیە. ل فەرهەنگۆكێ بنێڕە.
  3. c. 17‏:18 q رەواقی رێبازەكا فەلسەفیە. ل فەرهەنگۆكێ بنێڕە.
  4. d. ‏17‏:19 ناڤێ گرەكیە كو جڤاتا باژێڕێ ئەسینا ل وێرێ كۆم دبوو، هەروەسا ناڤێ ڤێ جڤاتێ ژی بوو.
  5. e. ‏17‏:28 ژ هەلبەستەكا «ئەپیمەنیدیس»ی هاتیە وەرگرتن، كو خەلكێ گزیرتەیا كریتە و ل ساڵێن 600 ب. ز. ژیایە.
  6. f. ‏17‏:28 نەسل یان زوڕیەت
  7. g. ‏17‏:28 ژ هەلبەستەكا «ئارەتۆس»ی هاتیە وەرگرتن، كو خەلكێ هەرێما كیلیكیایە و ل ساڵێن ‏315‏-240 ب. ز. ژیایە.