عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
به‌ردی زیندوو 
1
بۆیه‌ هه‌موو ڕق و هه‌موو فێڵ و دووڕوویی و چاوپیسی و هه‌موو زه‌مكردنێك دابكه‌نن.
2
وه‌ك ساوای تازه‌ له‌دایك بوو، ئاره‌زووتان له‌ شیری ڕۆحی پاك بێت، تاكو به‌مه‌ بۆ ڕزگاری گه‌شه‌ بكه‌ن،
3
چونكه‌ تامتان كردووه‌ كه‌ مه‌سیحی باڵاده‌ست چاكه‌.
4
ئه‌وه‌ی ئێوه‌ دێنه‌ لای، به‌رده‌ زیندووه‌كه‌یه‌، له‌لایه‌ن خه‌ڵكه‌وه‌ ڕه‌تكراوه‌ته‌وه‌، به‌ڵام له‌لایه‌ن خوداوه‌ هه‌ڵبژێردراوه‌ و گرانبه‌هایه‌،
5
ئێوه‌ش وه‌ك به‌ردی زیندوو له‌ خانووێكی ڕۆحی بنیادنراون، بۆ كاهینیێتی پیرۆز، بۆ كردنی قوربانییه‌ ڕۆحییه‌ قبوڵكراوه‌كان بۆ خودا له‌ ڕێگه‌ی عیسای مه‌سیحه‌وه‌،
6
چونكه‌ له‌ نووسراوه‌ پیرۆزه‌كاندا هاتووه‌:
{ئه‌وه‌تا به‌ردێك له‌ سییۆن داده‌نێم،
گرنگترین به‌ردی بناغه‌ی[a] هه‌ڵبژێردراو و گرانبه‌ها،
ئه‌وه‌ی پشتی پێ ببه‌ستێت شه‌رمه‌زار نابێت.}[b]
7
بۆیه‌ بۆ ئێوه‌ كه‌ باوه‌ڕتان هێناوه‌ ئه‌م به‌رده‌ گرانبه‌هایه‌، به‌ڵام بۆ بێباوه‌ڕان،
{ئه‌و به‌رده‌ی وه‌ستاكان ڕه‌تیان كرده‌وه‌،
بوو به‌ گرنگترین به‌ردی بناغه‌،}[c]
8
هه‌روه‌ها:
{ده‌بێته‌ به‌ردێك بۆ كۆسپ،
تاشه‌به‌ردێكیش كه‌ لێی بكه‌ونه‌ خواره‌وه‌.}[d]
ئه‌وانه‌ ساتمه‌ ده‌كه‌ن و ده‌كه‌ون چونكه‌ گوێڕایه‌ڵی وشه‌ی خودا نین، هه‌ر ئه‌مه‌شه‌ چاره‌نووسیان.
9
به‌ڵام ئێوه‌ گه‌لێكی هه‌ڵبژێردراون، كاهینیێتی شاهانه‌، نه‌ته‌وه‌یه‌كی پیرۆز، گه‌لی تایبه‌تی خودان[e] ، تاكو چاكییه‌كانی ئه‌وه‌ ڕابگه‌یه‌نن كه‌ بانگی كردوون له‌ تاریكییه‌وه‌ بۆ ڕووناكییه‌ سه‌یره‌كه‌ی.
10
پێشتر گه‌ل نه‌بوون، به‌ڵام ئێستا گه‌لی خودان، پێشتر به‌زه‌ییتان وه‌رنه‌گرتبوو، به‌ڵام ئێستا به‌زه‌ییتان وه‌رگرت.
11
خۆشه‌ویستان، وه‌ك نامۆ و بێگانه‌ لێتان ده‌پاڕێمه‌وه‌ له‌ هه‌وه‌سه‌كانی جه‌سته‌ دوور بكه‌ونه‌وه‌، كه‌ له‌ دژی ده‌روون ده‌جه‌نگێت.
12
با له‌نێو بێباوه‌ڕاندا ڕه‌وشتتان باش بێت، تاكو كاتێك بوختانتان پێ ده‌كه‌ن گوایا ئێوه‌ به‌دكارن، كرده‌وه‌ چاكه‌كانتان ببینن و له‌ ڕۆژی به‌سه‌ركردنه‌وه‌ی خوداش ئه‌وان شكۆداری بكه‌ن.
ملكه‌چی بۆ ده‌سه‌ڵاتداران 
13
له‌به‌ر مه‌سیحی باڵاده‌ست ملكه‌چی هه‌موو ده‌زگایه‌كی مرۆڤانه‌ بن: بۆ پاشا وه‌ك ده‌سه‌ڵاتدار،
14
یان بۆ پارێزگاران وه‌ك نێردراوی ئه‌و بۆ سزادانی به‌دكاران و ستایشی چاكه‌كاران،
15
چونكه‌ خواستی خودا ئاوایه‌، به‌ چاكه‌كاری نه‌زانی گێله‌كان بێده‌نگ بكه‌ن.
16
وه‌ك مرۆڤی ئازاد بژین، به‌ڵام نه‌ك ئازادی په‌رده‌ی به‌دكاری بێت، به‌ڵكو وه‌ك به‌نده‌ی خودا بژین.
17
ڕێز له‌ هه‌مووان بگرن، هاوباوه‌ڕانتان خۆشبوێ، له‌ خودا بترسن، ڕێز له‌ پاشا بگرن.
نموونه‌ی ئازاره‌كانی مه‌سیح 
18
ئه‌ی كۆیله‌كان، به‌ هه‌موو ترسه‌وه‌ ملكه‌چی گه‌وره‌كانتان بن، نه‌ك ته‌نها بۆ چاك و دڵنه‌رمه‌كان، به‌ڵكو بۆ تونده‌كانیش،
19
چونكه‌ ئه‌گه‌ر كه‌سێك له‌به‌ر ویژدانی به‌رامبه‌ر خودا به‌رگه‌ی ژانی ئازاری زۆرداری بگرێت، ئه‌مه‌ جێی ستایشه‌.
20
به‌ڵام ئه‌گه‌ر هه‌ڵه‌تان كرد و لێتان درا و به‌رگه‌تان گرت، ئه‌مه‌ چ شانازییه‌كه‌؟ بۆیه‌ ئه‌گه‌ر چاكه‌ بكه‌ن و له‌ ئازاردا به‌رگه‌تان گرت، ئه‌مه‌ جێی ستایشه‌ له‌لای خودا.
21
بۆ ئه‌مه‌ بانگكراون، له‌به‌ر ئه‌وه‌ی مه‌سیحیش له‌ پێناوتاندا ئازاری چێژت و نموونه‌ی بۆ به‌جێهێشتن، تاكو به‌ هه‌نگاوه‌كانیدا بڕۆن.
22
{ئه‌وه‌ی هیچ گوناهێكی نه‌كردبوو،
فڕوفێڵی له‌سه‌ر زار نه‌بوو.}[f]
23
ئه‌وه‌ی جنێوی پێده‌درا و جنێوی نه‌ده‌دایه‌وه‌، ئازار ده‌درا و هه‌ڕه‌شه‌ی نه‌ده‌كرد، به‌ڵكو خۆی ده‌دایه‌ ده‌ست ئه‌وه‌ی حوكمی دادپه‌روه‌رانه‌یه‌.
24
ئه‌وه‌ی خودی خۆی له‌ له‌شیدا له‌سه‌ر دار گوناهه‌كانمانی هه‌ڵگرت، تاكو سه‌باره‌ت به‌ گوناه بمرین و بۆ ڕاستودروستی بژین. به‌ برینه‌كانی ئه‌و چاكبوونه‌وه‌.[g]
25
چونكه‌ ئێوه‌ وه‌ك مه‌ڕی ونبوو وابوون، به‌ڵام ئێستا گه‌ڕانه‌وه‌ لای شوان و چاودێری گیانتان.
  1. a. 2‏:6 یان قولینچك.
  2. b. 2‏:6 \+xt ئیشایا 28‏:16.‏\+xt*‏
  3. c. 2‏:7 \+xt زه‌بووره‌كان 118‏:22‏\+xt*‏
  4. d. 2‏:8 \+xt ئیشایا 8‏:14.‏\+xt*‏
  5. e. 2‏:9 بڕوانه‌\+xt ده‌رچوون 19‏:5‏-6 و ئیشایا 43‏:20‏،21‏\+xt*‏.
  6. f. 2‏:22 \+xt ئیشایا 53‏:9.‏\+xt*‏
  7. g. 2‏:24 بڕوانه‌\+xt ئیشایا 53‏:5‏\+xt*‏