عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
پاره‌ كۆكردنه‌وه‌ بۆ باوه‌ڕداران 
1
به‌ڵام له‌باره‌ی كۆمه‌ك بۆ گه‌لی پیرۆزی خودا، چۆن كڵێساكانی گه‌لاتیام ڕاسپاردووه‌، ئێوه‌ش ئاوا بكه‌ن.
2
له‌ سه‌ره‌تای هه‌ر هه‌فته‌یه‌ك با هه‌ریه‌كه‌تان چه‌ندی له‌ توانادایه‌ بیخاته‌ لایه‌ك، تاكو كۆمه‌كه‌كه‌ ئه‌و كاته‌ نه‌بێت كه‌ ده‌گه‌مه‌ لاتان.
3
كاتێك گه‌یشتمه‌ لاتان، جا ئه‌وانه‌ی په‌سه‌ندكراون به‌ نامه‌وه‌ ده‌یاننێرم تاكو دیارییه‌كانتان بگه‌یه‌ننه‌ ئۆرشه‌لیم.
4
ئه‌گه‌ر به‌ باشم زانی كه‌ منیش بچم، ئه‌وا له‌گه‌ڵ من ده‌چن.
5
كاتێك له‌ مه‌كدۆنیا تێپه‌ڕیم دێمه‌ لاتان، چونكه‌ به‌ مه‌كدۆنیادا تێده‌په‌ڕم.
6
له‌وانه‌یه‌ ماوه‌یه‌ك له‌لاتان بم، یاخود هه‌موو زستان، تاكو ڕێگای سه‌فه‌رم بۆ ئاسان بكه‌ن بۆ هه‌ر شوێنێك كه‌ بۆی ده‌چم،
7
چونكه‌ ئه‌م جاره‌ نامه‌وێت ته‌نها به‌ سه‌رپێیی بتانبینم، به‌ڵكو هیوادارم ئه‌گه‌ر عیسای خاوه‌ن شكۆ خواستی له‌سه‌ر بێت ماوه‌یه‌ك له‌لاتان بمێنمه‌وه‌.
8
به‌ڵام هه‌تا ڕۆژی په‌نجایه‌مین له‌ ئه‌فه‌سۆس ده‌مێنمه‌وه‌،
9
چونكه‌ ده‌رگایه‌كی فراوان و كاریگه‌رم بۆ كراوه‌ته‌وه‌، زۆر دوژمنیشم هه‌یه‌.
10
ئه‌گه‌ر تیمۆساوس هات، ئاگاداربن با له‌لاتان به‌بێ ترس بێت[a] ، چونكه‌ كاری یه‌زدان ده‌كات، وه‌ك منیش ده‌یكه‌م.
11
با كه‌س به‌ سووكی سه‌یری نه‌كات، به‌ڵكو به‌ ئاشتی بینێرنه‌وه‌ لام، چونكه‌ من و برایان چاوه‌ڕێی ده‌كه‌ین.
12
هه‌روه‌ها سه‌باره‌ت به‌ ئه‌پۆلۆسی برامان، زۆر پاڕامه‌وه‌ كه‌ له‌گه‌ڵ برایان بێته‌ لاتان، ئه‌و هه‌رگیز نه‌یویست ئێستا بێته‌ لاتان، به‌ڵام كه‌ بۆی ڕێككه‌وت، دێت.
كۆتایی 
13
ئێشك بگرن، له‌ باوه‌ڕ بچه‌سپێن، پیاوی ئازابن، به‌هێزبن.
14
هه‌رچییه‌ك ده‌كه‌ن له‌ خۆشه‌ویستییه‌وه‌ بیكه‌ن.
15
ئێوه‌ ده‌زانن ماڵی ستیفاناس له‌ ئه‌خایا پێشه‌به‌ره‌ بوون، خۆیان بۆ خزمه‌تكردنی گه‌لی پیرۆزی خودا ته‌رخان كردبوو، خوشكان، برایان، لێتان ده‌پاڕێمه‌وه‌،
16
تاكو ئێوه‌ش ملكه‌چی وه‌ك ئه‌وانه‌ بن، هه‌موو ئه‌وانه‌ی له‌گه‌ڵیان ئیش ده‌كه‌ن و ماندوو ده‌بن.
17
به‌ هاتنی ستیفاناس و فه‌رتوناتۆس و ئه‌خایكۆس دڵشاد بووم، چونكه‌ شوێنی ئێوه‌یان گرته‌وه‌،
18
چونكه‌ ئه‌وان ڕۆحی من و ئێوه‌یان گه‌شانده‌وه‌، جا ئه‌و جۆره‌ كه‌سانه‌ بناسن.
19
كڵێساكانی ئاسیا سڵاوتان لێده‌كه‌ن. ئه‌كیلا و پریسكیلا، له‌گه‌ڵ ئه‌و كڵێسایه‌ی له‌ ماڵه‌كه‌یانن به‌ ناوی عیسای خاوه‌ن شكۆ به‌ گه‌رمی سڵاوتان لێده‌كه‌ن.
20
هه‌موو خوشك و برایان سڵاوتان لێده‌كه‌ن. به‌ ماچی پیرۆز سڵاو له‌ یه‌كتری بكه‌ن.
21
من پۆڵسم، ئه‌م سڵاوه‌ به‌ ده‌ستی خۆم ده‌نووسم.
22
به‌ڵێ ئه‌و كه‌سه‌ی عیسای خاوه‌ن شكۆی خۆشناوێت با نه‌فره‌تی لێ بێت! ئه‌ی خاوه‌ن شكۆ، وه‌ره‌!
23
نیعمه‌تی عیسای مه‌سیحی خاوه‌ن شكۆتان له‌گه‌ڵ بێت.
24
خۆشه‌ویستی من له‌گه‌ڵ هه‌مووتان بێت كه‌ پابه‌ندن به‌ عیسای مه‌سیح. ئامین.
  1. a. 16‏:10 ترس له‌ ناحه‌زانی خزمه‌تی پۆڵس.