عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
1
له‌ پۆڵس، ‏بانگكراو له‌سه‌ر خواستی خودا، تاكو ببێت به‌ نێردراوی عیسای مه‌سیح، هه‌روه‌ها له‌ سۆستانیسی برامانه‌وه‌،
2
بۆ كڵێسای خودا له‌ شاری كۆرنسۆس، ئه‌وانه‌ی عیسای مه‌سیح پیرۆزی كردوون، بانگكراون بۆ پیرۆزبوون له‌گه‌ڵ ئه‌وانه‌ی له‌ هه‌موو شوێنێكدا به‌ ناوی عیسای مه‌سیحی گه‌وره‌مان نزا ده‌كه‌ن، گه‌وره‌ی ئێمه‌ و ئه‌وانیشه‌:
3
با نیعمه‌ت[a] و ئاشتی له‌ خودای باوكمان و عیسای مه‌سیحی خاوه‌ن شكۆوه‌ له‌گه‌ڵتان بێت.
4
سه‌باره‌ت به‌ ئێوه‌ هه‌میشه‌ سوپاسی خودام ده‌كه‌م، بۆ ئه‌و نیعمه‌ته‌ی خودا كه‌ به‌هۆی عیسای مه‌سیحه‌وه‌ پێتان دراوه‌.
5
به‌هۆی ئه‌وه‌وه‌ له‌ هه‌موو بوارێكه‌وه‌ ده‌وڵه‌مه‌ند بوون، له‌ هه‌موو وته‌ و زانینێك.
6
خودا به‌و شێوه‌یه‌ شایه‌تی ئێمه‌ بۆ مه‌سیح له‌ ئێوه‌دا ده‌چه‌سپێنێت.
7
بۆیه‌ له‌ هیچ به‌هره‌یه‌ك كه‌موكوڕیتان نییه‌، هه‌روه‌ها به‌ په‌رۆشه‌وه‌ چاوه‌ڕوانی ده‌ركه‌وتنی عیسای مه‌سیحی گه‌وره‌مان بن.
8
ئه‌وه‌ی هه‌تا كۆتایی ده‌تانچه‌سپێنێت، تاكو له‌ ڕۆژی عیسای مه‌سیحی گه‌وره‌ماندا بێ گله‌یی بن.
9
خودا به‌وه‌فایه‌، ئه‌وه‌ی بانگی كردن بۆ پێكه‌وه‌ ژیان له‌گه‌ڵ كوڕه‌كه‌ی، عیسای مه‌سیحی گه‌وره‌مان.
ناكۆكی نێوان باوه‌ڕداران 
10
ئه‌ی خوشكان و برایان، به‌ ناوی عیسای مه‌سیحی گه‌وره‌مان لێتان ده‌پاڕێمه‌وه‌ كه‌ هه‌مووتان یه‌ك هه‌ڵوێست بن، دووبه‌ره‌كی له‌نێوانتاندا نه‌بێت، به‌ڵكو هه‌مووتان یه‌ك بیر و ڕاتان هه‌بێت.
11
ئه‌ی برایانم، چونكه‌ ماڵی خلۆیی هه‌واڵیان دامێ ناكۆكی له‌نێوانتاندا هه‌یه‌.
12
مه‌به‌ستم ئه‌مه‌یه‌: یه‌كێكتان ده‌ڵێت: «من هی پۆڵسم»، یه‌كێكی دیكه‌: «من هی ئه‌پۆلۆسم»، یان «من هی په‌ترۆسم[b] »، یان «من هی مه‌سیحم.»
13
ئایا مه‌سیح به‌شكراوه‌؟ یان پۆڵس له‌ پێناوتاندا له‌ خاچ دراوه‌؟ یان به‌ ناوی پۆڵس له‌ ئاو هه‌ڵكێشران؟
14
سوپاس بۆ خودا كه‌ستانم له‌ ئاو هه‌ڵنه‌كێشا، كریسپۆس و گایۆس نه‌بێت،
15
نه‌وه‌ك یه‌كێك بڵێت به‌ ناوی منه‌وه‌ له‌ ئاو هه‌ڵكێشراوه‌.
16
هه‌روه‌ها ستیفاناس و خاووخێزانه‌كه‌یم له‌ ئاو هه‌ڵكێشاوه‌، جگه‌ له‌مانه‌ نازانم كه‌سی دیكه‌م له‌ ئاو هه‌ڵكێشابێت،
17
چونكه‌ مه‌سیح نه‌یناردووم بۆ له‌ئاوهه‌ڵكێشان، به‌ڵكو بۆ مزگێنیدان، ئه‌مه‌ش نه‌ك به‌ دانایی و قسه‌ی زیره‌كانه‌، نه‌وه‌ك هێزی خاچی مه‌سیح پووچه‌ڵ بێته‌وه‌.
مه‌سیح دانایی و توانای خودایه‌ 
18
په‌یامی خاچ بۆ له‌ناوچووان گێلایه‌تییه‌، به‌ڵام بۆ ئێمه‌ی ڕزگاربووان هێزی خودایه‌.
19
له‌به‌ر ئه‌وه‌ی نووسراوه‌:
{دانایی داناكان له‌ناوده‌به‌م،
تێگه‌یشتنی تێگه‌یشتووان به‌لاوه‌ ده‌نێم.}[c]
20
كوا دانا؟ كوا مامۆستای ته‌ورات؟ كوا كه‌سی به‌ ده‌موزاری ئه‌م دنیایه‌؟ ئایا خودا دانایی ئه‌م جیهانه‌ی نه‌كردووه‌ته‌ گێلایه‌تی؟
21
خودا به‌ دانایی خۆی، مه‌به‌ستی بوو كه‌ خه‌ڵك بیناسێت، نه‌ك له‌ ڕێگه‌ی دانایی جیهانه‌وه‌، به‌ڵكو خودا ویستی له‌ ڕێگه‌ی مزگێنییه‌وه‌ باوه‌ڕداران ڕزگار بكات، ئه‌و مزگێنییه‌ی خه‌ڵكانێك به‌ گێلایه‌تی ده‌زانن.
22
جوله‌كه‌ داوای نیشانه‌ ده‌كه‌ن و یۆنانی هه‌وڵی دانایی ده‌ده‌ن،
23
به‌ڵام ئێمه‌ مه‌سیحی له‌خاچدراو جاڕده‌ده‌ین، بۆ جوله‌كه‌ كۆسپه‌ و بۆ نه‌ته‌وه‌كان گێلایه‌تییه‌،
24
به‌ڵام بۆ بانگكراوان، جوله‌كه‌ و ناجوله‌كه‌، مه‌سیح هێزی خودا و دانایی خودایه‌،
25
چونكه‌ گێلایه‌تی خودا له‌ مرۆڤ داناتره‌، لاوازی خودا له‌ مرۆڤ به‌هێزتره‌.
26
ئه‌ی خوشك و برایان، بیربكه‌نه‌وه‌ چۆن بوون كاتێك خودا بانگی كردن. به‌پێی پێوانه‌ مرۆییه‌كان كه‌متان دانا بوون، هه‌روه‌ها كه‌م كه‌ستان توانادار و له‌ بنه‌ماڵه‌ی ناودار بوون.
27
به‌ڵام خودا ئه‌وه‌ی هه‌ڵبژارد كه‌ به‌ڵای جیهانه‌وه‌ گێلن، تاكو داناكان شه‌رمه‌زار بن، لاوازه‌كانی هه‌ڵبژارد تاكو به‌هێزه‌كان شه‌رمه‌زار بن.
28
خودا پایه‌نزمه‌كانی جیهان و ڕق لێبووه‌وه‌ و ئه‌وانه‌ی هه‌ڵبژارد كه‌ هیچ نه‌بوون، تاكو ئه‌وانه‌ له‌ناوببات كه‌ خۆیان به‌ شت ده‌زانن،
29
تاكو هیچ مرۆڤێك[d] له‌به‌رده‌م خودا شانازی نه‌كات.
30
به‌ڵام ئێوه‌ به‌هۆی خوداوه‌ باوه‌ڕتان به‌ عیسای مه‌سیح هێنا، ئه‌وه‌ی خودا بۆ ئێمه‌ی كرد به‌ دانایی و ڕاستودروستی، پیرۆزكردن و كڕینه‌وه‌.[e]
31
تاكو وه‌ك ئه‌وه‌ی نووسراوه‌: {ئه‌وه‌ی شانازی ده‌كات، با شانازی به‌ یه‌زدانه‌وه‌ بكات.}[f]
  1. a. 1‏:3 خودا نیعمه‌ت به‌ مرۆڤ ده‌به‌خشێت، به‌ واتای به‌خشینێكی خودایه‌ كه‌ به‌بێ ئه‌وه‌ی شایسته‌ی بین خودا پێمان ده‌به‌خشێت.
  2. b. 1‏:12 یۆنانی: \+tl كێفاس\+tl*.
  3. c. 1‏:19 \+xt ئیشایا 29‏:14.‏\+xt*‏
  4. d. 1‏:29 یۆنانی: جه‌سته‌یه‌ك.
  5. e. 1‏:30 واته‌ مه‌سیح ئێمه‌ی له‌ مردن كڕییه‌وه‌.
  6. f. 1‏:31 \+xt یه‌رمیا 9‏:24.‏\+xt*‏