عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
دلخۆشی ل ئەسمانی 
1
پشتی ڤان تشتان، من دەنگەك بهیست وەكو دەنگەكێ بلند یێ جەماوەرەكێ مەزن ل ئەسمانی بوو، دگۆت:
«هەلێلوویا!
قورتالبوون و مەزناهی و هێز یێن خودایێ مەنە،
2
چنكو حوكمێن وی د راست و دادپەروەرن.
ژ بەر كو وی لەشفرۆشا مەزن سزا دا،
ئەوا ب دەهمەنپیسیا خۆ ئەرد گەنی كری،
هەروەسا وی تۆلا خوینا بەنیێن خۆ ژێ ڤەكر.»[a]
3
جارەكا دی وان گۆت:
«هەلێلوویا!
دویكێلا وێ هەروهەر بلند دبیت.»[b]
4
هەر بیست و چوار ریهسپی و هەر چوار ئافرندەیێن زیندی دەڤ و دەڤ خۆ هاڤێتە ئەردی و بۆ خودایێ روینشتی ل سەر تەختی سوجدە بر و گۆت:
«ئامین! هەلێلوویا!»
5
هنگی دەنگەك ژ تەختی هات و گۆت:
«پەسنا[c] خودایێ مە بكەن، هەی هەمی بەنیێن وی،
ئەوێن ژ وی دترسن، ژ مەزن و بچویكان.»[d]
6
پاشی من دەنگەك بهیست، وەكو دەنگێ جەماوەرەكێ مەزن و وەكو دەنگێ گەلەك ئاڤان و وەكو دەنگێ گڕگڕێن بهێز یێن عەوران بوو، دگۆت:
«هەلێلوویا!
چنكو خودان خودایێ مە، هێزدارێ هەر تشتی، پاشایەتی دكەت.[e]
7
بلا ئەم دلخۆش و دلشاد ببین
و مەزناهیێ بدەینێ!
چنكو داوەتا بەرخی هات
و بویكا وی خۆ ئامادە كریە.
8
دەستهەلات بۆ وێ هاتە دان
كو كتانەكێ نازك یێ شەوقدار و پاقژ بكەتە بەر خۆ.»
ئەو كتانێ نازك كارێن راستدار یێن پیرۆزكریانە.[f]
9
پاشی فریشتەی گۆتە من: «بنڤیسە: ‹خوزیكێن وان یێن بۆ مێڤانداریا داوەتا بەرخی هاتینە داخواز كرن!›» و گۆتە من: «ئەو پەیڤێن خودێ یێن راستن.»[g]
10
ئینا من دەڤ و دەڤ خۆ هاڤێتە بەر پێیێن وی، دا سوجدێ بۆ ببەم، لێ وی گۆتە من: «وە نەكە! ئەز بەنیمە ل گەل تە و برایێن تە یێن شاهدەییێ بۆ عیسایێ مەسیح ددەن. سوجدێ بۆ خودێ ببە! چنكو شاهدەیی بۆ عیسای گەوهەرێ پەیاما خودێیە.[h] »
سیارێ هەسپێ سپی 
11
پشتی هنگی من بەرێ خۆ دایێ ئەسمان ڤەبوو و ئەڤە هەسپەكێ سپی یێ ل وێرێ! سیارێ وی ب ‹دلسۆز› و ‹یێ راست› دهێتە بناڤكرن و ئەو ب دادپەروەری حوكمی دكەت و دجەنگیت.
12
چاڤێن وی وەكو گوڕیا ئاگرینە و گەلەك تانج ل سەر سەرێ وینە. وی ناڤەكێ نڤیسای یێ هەی، كەس وی ناڤی نزانیت ژبلی وی.
13
ب كوركەكێ د خوینێ هەلاندی یێ راپێچای بوو و ب ‹پەیڤا خودێ› هاتیە بناڤكرن.[i]
14
لەشكەرێن ل ئەسمانی یێن راپێچای ب كتانێ نازك یێ سپی و پاقژ ل سەر هەسپێن سپی ب دویڤ وی دكەفتن.
15
ژ دەڤێ وی شیرەكێ تیژ دەردكەڤیت، دا ب وی ل مللەتان بدەت و ‹ئەو دێ ب گۆپالەكێ ئاسنی حوكمداریێ ل سەر وان كەت.›[j] ئەو ب خۆ دێ ئویسلەیا شەرابا تۆڕەبوونا خودێ، هێزدارێ هەر تشتی، ب پێیان گڤێشیت.
16
ل سەر كوركێ وی و ل سەر رانێ وی ناڤەك یێ نڤیسای بوو: ‹پاشایێ پاشایان و خودانێ خودانان.›
17
پشتی هنگی من فریشتەیەك دیت د چاڤێ رۆژێ دا یێ راوەستیای بوو، ب دەنگەكێ بلند كرە گازی و گۆتە هەمی باڵندەیێن د ناڤەڕاستا ئەسمانی دا دفڕن: «وەرن، ل سەر سفرا مەزن یا خودێ كۆم ببن،
18
دا گۆشتێ پاشایان و گۆشتێ فەرماندەیان و گۆشتێ هێزداران و گۆشتێ هەسپان و سیارێن وان و گۆشتێ هەمیان، یێن ئازاد و یێن بەنی، یێن بچویك و یێن مەزن، بخۆن!»[k]
19
پاشی من دیت، دڕندە و پاشایێن ئەردی و لەشكەرێن وان كۆم ببوون، دا ل دژی سیارێ هەسپی و لەشكەرێ وی بجەنگن.
20
ئینا دڕندە و پێغەمبەرێ درەوین ل گەل وی هاتنە گرتن، ئەو پێغەمبەرێ درەوین یێ ژ پێش دڕندەی ڤە نیشانێن حنێرانە دكرن و ب رێكا وان نیشانان ئەو خاپاندن یێن نیشانا دڕندەی قەبیل كری و یێن سوجدە بۆ وێنەیێ وی بری. دڕندە و پێغەمبەرێ درەوین هەردوو ب ساخی بۆ دەریاكا ئاگری یا ب كپریتێ هەل هاتنە هاڤێتن.
21
یێن ماین ب شیرێ ژ دەڤێ سیارێ هەسپی دەردكەفت هاتنە كوشتن و هەمی باڵندە ژ گۆشتێ وان تێر بوون.
  1. a. ‏19‏:2 بنێڕە: زەبوور ‏19‏:9؛ ‏119‏:37؛ گۆتارا مووسای ‏32‏:43؛ زەبوور ‏79‏:10
  2. b. ‏19‏:3 بنێڕە: ئیشایا ‏34‏:10
  3. c. 19‏:5 q پەسن مەدح و سەنا
  4. d. ‏19‏:5 بنێڕە: زەبوور ‏22‏:23؛ ‏134‏:1؛ ‏115‏:13
  5. e. ‏19‏:6 بنێڕە: دەركەفتن ‏15‏:18؛ زەبوور ‏22‏:28؛ دانیێل ‏7‏:14
  6. f. ‏19‏:8 بنێڕە: ئیشایا ‏61‏:10
  7. g. ‏19‏:9 مەتتا ‏22‏:2‏-14
  8. h. ‏19‏:10 دەقێ یونانی دبێژیت: شاهدەیی بۆ عیسای گیانێ پێغەمبەراتیێیە
  9. i. ‏19‏:13 یوحەننا ‏1‏:1
  10. j. 19‏:15 زەبوور 2‏:9
  11. k. ‏19‏:17‏-18 حزقیێل ‏39‏:17‏-20