عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
ئاگەهداریكرنا دەولەمەندێن زۆردار 
1
وەرن گەلی دەولەمەندان، ژ بەر وان دەردەسەریێن دێ ب سەرێ هەوە هێن، بگریێن و قێڕیان راهێلن.
2
سامانێ هەوە یێ گەنی بووی و خویركان جلكێن هەوە خوارینە،
3
زێڕ و زیڤێن هەوە یێن ژەنگی بووین، ژەنگا وان دێ شاهدەییێ ل سەر هەوە دەت و وەكو ئاگری دێ گۆشتێ هەوە خۆت. هەوە د رۆژێن دویماهیێ[a] دا گەنجینە كۆم كر.[b]
4
ئەڤە ئەو كرێیا هەوە نەدایە وان پالەیان یێن زەڤیێن هەوە دروین، دكەتە قێژی. هەوارا یێن دروین كری یا گەهشتیە گوهێن خودانێ لەشكەران.[c]
5
هەوە ل جیهانێ ژیانەكا شاهانە و ب كەیف دەرباز كر و دلێ خۆ بۆ رۆژا سەرژێكرنێ ربیتە كر.
6
هەوە یێ بێگونەهـ گونەهبار كر و كوشت، هەر چەندە ئەو بەرهنگاریا هەوە ناكەت.
بێهنفرەهی د ئازاركێشانێ دا 
7
ئەڤجا گەلی برا، تا هاتنا خودانی بێهنا خۆ فرەهـ كەن. بەرێ خۆ بدەنێ كا چەوا جۆتیار چاڤەڕێی بەرهەمێ پڕبها یێ ئەردی دكەت، بێهنا خۆ لێ فرەهـ دكەت تاكو بارانێن پاییز و بهارێ لێ دبارن.
8
هوین ژی بێهنا خۆ فرەهـ كەن و دلێ خۆ موكم كەن، چنكو هاتنا خودانی یا نێزیكە.
9
پتەپتێ ل سەر ئێكودوو نەكەن گەلی برا، دا هوین نەهێنە دادكرن. ئەڤە دادڤان ل بەر دەرگەهی یێ راوەستیایە!
10
گەلی برا، بۆ خۆ پێغەمبەرێن ب ناڤێ خودانی ئاخفتین بكەنە نموونەیا بێهنفرەهیێ د ئازاركێشانێ دا.
11
ئەڤە ئەم خوزیێ ب وان رادهێلین یێن خۆڕاگرتی. هەوە خۆڕاگرتنا ئەیوبی بهیستیە و هەوە دیت كا ل دویماهیێ خودانی بۆ وی چ كر. چنكو خودان گەلەك یێ دلنازك و دلۆڤانە.[d]
12
لێ بەری هەر تشتەكی، برایێن من، سویند نەخۆن: نە ب ئەسمانی و نە ب ئەردی و نە ژی ب تشتەكێ دی. بلا «بەلێ» یا هەوە «بەلێ» بیت و «نە» یا هەوە «نە» بیت، دا نەهێنە دادكرن.[e]
نڤێژا باوەریێ 
13
ما ئێك د ناڤ هەوە دا هەیە ئازارێ بكێشیت؟ بلا نڤێژێ بكەت. ما ئێكێ دلخۆش هەیە؟ بلا سترانێن پەسنكرنا[f] خودێ بێژیت.
14
ما ئێك د ناڤ هەوە دا هەیە یێ نەساخ بیت؟ بلا ریهسپیێن كەنیسەیێ داخواز كەت و ئەو نڤێژێ ل سەر بكەن و ب ناڤێ خودانی وی زەیت كەن.[g]
15
نڤێژا ب باوەری دێ نەساخی ساخ كەت و خودان دێ وی راكەتەڤە و ئەگەر وی گونەهەك كربیت، دێ لێ هێتە بورین.
16
لەوما بۆ ئێكودوو دانپێدانێ ب گونەهێن خۆ بكەن و بۆ ئێكودوو نڤێژان بكەن، دا هوین ساخ ببن. نڤێژا مرۆڤێ راستدار گەلەك یا ب هێز و كاریگەرە.
17
ئلیاس ژی مرۆڤەكێ وەكو مە بوو. وی ب گەرمی نڤێژ كر كو باران نەباریت، ئەڤجا سێ ساڵ و شەش هەیڤان باران ل سەر رویێ ئەردی نەباری.
18
پاشی وی دیسان نڤێژ كر، ئەڤجا ئەسمانی باران باراند و ئەردی بەرهەمێ خۆ دەرئێخست.[h]
19
گەلی برایێن من، ئەگەر ئێك ژ هەوە ژ راستیێ ڤاڕێ بوو و ئێكی ئەو ڤەگەڕاند،
20
بلا بزانیت كو ئەوێ گونەهكارەكی ژ رێكا وی یا ڤاڕێ ڤەگەڕینیت، ئەو دێ كەسەكی ژ مرنێ قورتال كەت و گەلەك گونەهان نخێڤیت.[i]
  1. a. 5‏:3 بەهرا پتر مەبەست پێ ئەو رۆژن یێن نێزیكی هاتنەڤەیا عیسایێ مەسیح، كو دێ هێت دا جیهانێ داد بكەت. كارێن هنارتیان 2‏:17‏-21؛ 2 تیمۆتاوس 3‏:1‏-5؛ 2 پەترۆس 3‏:3‏-7
  2. b. 5‏:2‏-3 مەتتا 6‏:19
  3. c. 5‏:4 گۆتارا مووسای 24‏:14‏-15
  4. d. 5‏:11 ئەیوب 1‏:1‏-22؛ 2‏:10؛ 42‏:10‏-17؛ زەبوور 103‏: 8
  5. e. 5‏:12 مەتتا 5‏:34‏-37
  6. f. 5‏:13 پەسن: مەدح و سەنا
  7. g. 5‏:14 مەرقۆس 6‏:13. ل فەرهەنگۆكێ بنێڕە \k زەیتكرن\k*
  8. h. 5‏:17‏-18 1پاشا 17‏:1؛ 18‏:1؛ 18‏:41‏-45
  9. i. 5‏:20 1 پەترۆس 4‏:8