عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
سڵاڤ 
1
ژ من، پەترۆس، هنارتیێ عیسایێ مەسیح،
بۆ كۆچبەرێن بەڵاڤبووی ل هەرێمێن پۆنتۆس، گالاتیا، كەپەدۆكیا، ئاسیا و بیتینیایێ،
2
ئەوێن ل دویڤ زانینا پێشوەخت یا خودایێ باب هاتینە هەلبژارتن و ب گیانێ پیرۆز هاتینە تەرخانكرن، دا گوهداریا عیسایێ مەسیح بكەن و ب خوینا وی بهێنە رەشاندن[a] :
كەرەم و ئاشتی ل سەر هەوە زێدە ببن.
هیڤیا زیندی 
3
مەزناهی بۆ خودێ، بابێ خودانێ مە عیسایێ مەسیح، ئەوێ ل دویڤ دلۆڤانیا خۆ یا زێدە ب رێكا رابوونا عیسایێ مەسیح ژ ناڤ مریان، ژدایكبوونەكا نوی دایە مە و هۆسا مە هیڤیەكا زیندی
4
و میراتەكێ پویچ نابیت و ناهەڕمیت و ناچرمسیت هەیە. ئەو بۆ هەوە ل ئەسمانان هاتیە هەلگرتن.
5
هوین ئەون یێن ب رێكا باوەریێ ژ لایێ هێزا خودێ ڤە دهێنە پاراستن، بۆ وێ قورتالبوونێ كو یا ئامادەیە د دەمێ دویماهیێ دا بهێتە ئاشكراكرن.
6
هوین ب وێ چەندێ دلخۆش دبن، سەرەڕای كو نوكە دڤێت هوین بۆ دەمەكێ كورت ژ بەر تاقیكرنێن جۆراوجۆر تووشی خەمگینیێ ببن،
7
دا بەلگەیێ باوەریا هەوە -ئەوێ ب بهاتر ژ زێڕێ ژ ناڤ دچیت، یێ كو ب ئاگری دهێتە تاقیكرن- ببیتە جهێ پەسن[b] و مەزناهی و سەربلندیێ ل دەمێ دیاربوونا عیسایێ مەسیح.
8
سەرەڕای كو هەوە ئەو نەدیتیە، لێ هوین حەز ژ وی دكەن و سەرەڕای كو نوكە هوین وی نابینن، لێ هوین باوەریێ پێ دئینن، ب دلخۆشیەكا پڕی مەزناهی و ناهێتە سالۆخدان دلخۆش دبن.
9
چنكو هوین ئەنجامێ باوەریا خۆ وەردگرن، ئەو ژی قورتالبوونا گیانێن هەوەیە.
10
دەربارەی ڤێ قورتالبوونێ، پێغەمبەرێن كو بۆ وێ كەرەما دێ بۆ هەوە بیت پێشبینی كری، لێگەڕیان و ڤەكۆلین كرن.
11
گیانێ مەسیحی یێ د وان دا، پێشوەخت بۆ وان ل سەر ئازارێن مەسیحی و مەزناهیێن پشتی هنگی دێ هێن شاهدەیی ددا، وان ژی بزاڤ دكر كو بزانن كا كەنگی و د رەوشەكا چەوا دا دێ ئەڤ چەندە روی دەت.
12
بۆ وان هاتە دیاركرن، كو وان نە بۆ خۆ، لێ بۆ هەوە خزمەت دكر، دەمێ بەحسێ وان تشتان دكر یێن نوكە بۆ هەوە هاتینە راگەهاندن، ب رێكا وان یێن ب هێزا گیانێ پیرۆز، ئەوێ ژ ئەسمانی هاتیە هنارتن، مزگینی دایە هەوە. فریشتە ژی گەلەك حەز دكەن ل وان تشتان بنێڕن.
هاندان بۆ ژیانەكا پیرۆز 
13
لەوما مێشكێ خۆ بۆ كاری ئامادە بكەن[c] و ل سەر هشێن خۆ بن، ب تەمامی هیڤیا خۆ ب وێ كەرەمێ ڤە گرێ بدەن، ئەوا ل دەمێ دیاربوونا عیسایێ مەسیح دێ بۆ هەوە هێتە ئینان.
14
وەكو زاڕۆكێن گوهدار، خۆ ل گەل ئارەزوویێن بەرێ یێن دەمێ نەزانینا خۆ نەگونجینن،
15
لێ كا چەوا ئەوێ گازی هەوە كری یێ پیرۆزە، هوین ژی د هەمی رەفتارێن خۆ دا د پیرۆز بن.
16
چنكو یا هاتیە نڤیسین: «د پیرۆز بن، چنكو ئەز یێ پیرۆزم.»[d]
17
ئەگەر هوین هەوارا خۆ دگەهیننە وی، وەكو بابێ خۆ، ئەوێ بێی لایەنگری، ل دویڤ كارێ هەر كەسەكی، حوكمی ددەت، د ترسا وی دا دەمێ كۆچبەریا خۆ دەرباز بكەن.
18
چنكو هوین دزانن كو هوین نە ب تشتێن ژ ناڤ دچن، وەكو زێڕ یان زیڤ، ژ وێ ژیانا بێمفا یا هەوە ژ باب و باپیرێن خۆ وەرگرتی، هاتینە ئازاد كرن،
19
لێ ب خوینەكا بهاگران، هەروەكو یا بەرخەكێ بێكێماسی و بێپنی بیت، هاتینە ئازاد كرن، ئەو ژی خوینا مەسیحیە.
20
ئەو بەری دامەزراندنا جیهانێ هاتە دەستنیشانكرن، لێ ژ پێخەمەت هەوە د ڤان سەردەمێن دویماهیێ دا هاتە دیار كرن.
21
ب رێكا وی هەوە باوەری ب خودێ هەیە، ئەو خودایێ ئەو ژ ناڤ مریان راكری و مەزناهی دایێ، لەوما باوەری و هیڤیا هەوە ب خودێیە.
22
هەوە دەروونێ خۆ ب ملكەچبوونا راستیێ پاقژ كریە و هۆسا حەزژێكرنا هەوە یا برایانە یا بێ دووڕویاتیە، ئەڤجا ژ نیڤا دلی ب گەرمی حەز ژ ئێكودوو بكەن.
23
هوین ب رێكا پەیڤا خودێ یا زیندی یا دمینیت ژ دایك بووینەڤە، نە ژ تۆڤەكێ كو پویچ دبیت، لێ ژ یێ پویچ نابیت.
24
چنكو:
«هەمی مرۆڤ وەكو گیاینە
و هەمی مەزناهیا وی وەكو كولیلكا گیایە.
گیا هشك دبیت و كولیلك دوەریێت.
25
لێ پەیڤا خودانی هەتا هەتایێ دمینیت.»[e]
ئەڤە ئەو پەیڤە یا بۆ هەوە وەكو مزگینی هاتیە راگەهاندن.
  1. a. 1‏:2 دەركەفتن 24‏:3‏-8؛ عیبرانی 9‏:18‏-21
  2. b. 1‏:7 q پەسن مەدح و سەنا
  3. c. 1‏:13 دەقێ یونانی دبێژیت: ‹ناڤتەنگا مێشكێ خۆ گرێ بدەن›
  4. d. 1‏:16 پەرستن و پیرۆزی 11‏:44‏-45؛ 19‏:2؛ 20‏:7
  5. e. 1‏:25 ئیشایا 40‏:6‏-8