عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
پەترۆس روهنكرنێ بۆ كەنیسەیێ پێشكێش دكەت 
1
هنارتی و برایان ل یەهودیایێ بهیست كو مللەتێن نەجوهی ژی پەیڤا خودێ یا وەرگرتی.
2
دەمێ پەترۆس سەركەفتیە ئورشەلیمێ، باوەردارێن سونەتكری[a] رەخنە لێ گرت
3
و گۆتن: «تۆ چوویە مالا زەڵامێن سونەتنەكری[b] و تە ل گەل وان خوار!»
4
پەترۆسی دەست پێ كر بۆ وان ئێك ل دویڤ ئێكێ شڕۆڤە كر و گۆت:
5
«من ل باژێڕێ یافا نڤێژ دكر و د بێهشیێ دا من بینینەك دیت كو تشتەكێ وەكو چارچەڤەكا مەزن داددا، ژ هەر چوار كوژیان ڤە ژ ئەسمانی دهاتە شۆڕكرن و نێزیكی من بوو.
6
دەمێ من باش بەرێ خۆ دایێ و هزر تێدا كری، من گیانەوەرێن چوارپێ یێن ئەردی و دڕندە و خشۆك و باڵندەیێن ئەسمانی دیتن.
7
هنگی من گوهـ ل دەنگەكی بوو، گۆتە من: ‹پەترۆس، رابە، ڤەكوژە و بخۆ.›
8
ئینا من بەرسڤ دا: ‹حاشا، خودان! تشتێ هەڕمی یان حەرام چ جاران نەچوویە د دەڤێ من دا.›
9
ئینا ئەوی دەنگی دووبارە ژ ئەسمانی بەرسڤا من دا: ‹ئەو تشتێ خودێ پاقژ كری، نەبێژە یێ هەڕمیە.›
10
ئەڤ تشتە سێبارە بوو و پاشی هەمی بۆ ئەسمانی هەلكێشانەڤە.
11
هەر د وی دەمی دا، سێ زەڵام ل بەر دەرگەهێ وێ مالا ئەم لێ مێڤان راوەستیان، كو ژ قەیسەریێ هنارتبوونە ب دویڤ من را.
12
ئینا گیانی فەرمان ل من كر كو بێ دوودلی ل گەل وان بچم. ئەڤ هەر شەش برایە ل گەل من هاتن و ئەم چووینە د مالا وی زەڵامی ڤە یێ ئەو هنارتینە ب دویڤ من را.
13
وی ژی بۆ مە ڤەگێڕا كا چەوا وی فریشتە دیت د مالا وی ڤە یێ راوەستیایە و دبێژیتە وی: ‹هندەكان بهنێرە یافا و گازی شەمعونی بكە، ئەوێ دبێژنێ پەترۆس.
14
ئەو دێ پەیامەكێ گەهینیتە تە، تۆ و هەمی خەلكێ مالا تە دێ پێ قورتال بن.›
15
دەمێ من دەست ب ئاخفتنێ كری، گیانێ پیرۆز ب سەر وان دا هات، هەروەكو ل دەستپێكێ ب سەر مە دا هاتی.
16
ئینا گۆتنا خودانی هاتە بیرا من، كو گۆتبوو: ‹یوحەننای ب ئاڤێ تافیر كر، لێ هوین دێ ب گیانێ پیرۆز هێنە تافیركرن.›[c]
17
ئەڤجا ئەگەر خودێ ئەو دیاری دابیتە وان وەكو یا دایە مە، دەمێ مە باوەری ب خودان عیسایێ مەسیح ئینای، ما ئەز كیمە دا بشێم بەرهنگاریا خودێ بكەم؟»
18
دەمێ وان گوهـ ل ڤێ چەندێ بووی، بێدەنگ بوون. ئەوان پەسنا[d] خودێ كر و گۆتن: «ئانكو خودێ لخۆزڤڕین ژ بۆ ژیانێ یا دایە مللەتێن نەجوهی ژی.»
كەنیسەیا ئەنتاكیایێ 
19
ئەڤجا ئەوێن ژ ئەگەرێ وێ تەپەسەریا پشتی كوشتنا ستیڤانۆسی بەڵاڤبووین، چوونە فینیقیا و قوبرس و ئەنتاكیایێ و وان بەحسێ مزگینیێ بۆ كەسێ نەدكر، ژبلی جوهیان.
20
لێ هندەك ژ وان هەبوون، خەلكێ قوبرس و قەیرەوانێ بوون، دەمێ گەهشتینە ئەنتاكیایێ، بۆ یونانیان ژی دئاخفتن و مزگینیا خودان عیسای ددایێ.
21
دەستێ خودانی ل گەل وان بوو و ژمارەیەكا زۆر باوەری ئینا و بۆ خودانی زڤڕین.
22
ئەڤ نوچە گەهشتە كەنیسەیا ئورشەلیمێ، ئینا ئەوان بارناباس هنارتە ئەنتاكیایێ.
23
دەمێ گەهشتی و كەرەما خودێ دیتی، گەلەك كەیفخۆش بوو و هەمی هاندان كو ژ دل ل گەل خودانی بمینن.
24
ئەو مرۆڤەكێ باش بوو و ژ گیانێ پیرۆز و باوەریێ یێ پڕ بوو. گەلەك كەس ژی گەهشتنە خودانی.
25
بارناباس چوو تەرسوسێ دا ل شائوولی بگەڕیێت،
26
دەمێ دیتی، وی ئەو ئینا ئەنتاكیایێ. ساڵەكا رەبەق ئەو پێكڤە ل گەل كەنیسەیێ كۆم دبوون و گەلەك كەس فێر دكرن. بۆ جارا ئێكێ ل ئەنتاكیایێ شاگرد ب ‹مەسیحی› هاتنە بناڤكرن.
27
ل وان رۆژان هندەك پێغەمبەر ژ ئورشەلیمێ ژۆردا هاتنە ئەنتاكیایێ.
28
ئێك ژ وان رابوو ناڤێ وی ئاگابۆس بوو و ب گیانێ پیرۆز دیار كر كو نێزیكە دێ كولبەكا مەزن ل هەمی جیهانێ[e] چێبیت. (ئەڤ كولبە ل سەر دەمێ قەیسەر كلودیوسی چێبوو.)
29
ئینا شاگردان ل ئەنتاكیایێ بڕیار دا، كو هەر ئێك ل دویڤ پێچێبوونا خۆ هاریكاریێ بۆ برایێن[f] ل یەهودیایێ بهنێریت.
30
وان ئەڤ چەندە كر و ب دەستێ بارناباسی و شائوولی بۆ ریهسپیان هنارت.
  1. a. ‏11‏:2 ئانكو جوهیێن باوەری ب عیسای ئینای
  2. b. ‏11‏:3 ئانكو كەسێن نەجوهی
  3. c. 11‏:16 كارێن هنارتیان 1‏:5
  4. d. ‏11‏:18 مەدح و سەنا
  5. e. ‏11‏:28 مەبەست پێ هەمی ئیمپراتۆریا رۆمایێیە.
  6. f. ‏11‏:29 ئانكو باوەردارێن