عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
كورنیلیۆس گازی پەترۆسی دكەت 
1
زەڵامەك ل قەیسەریێ هەبوو ناڤێ وی كورنیلیۆس بوو، سەرلەشكەرەكێ[a] هێزا ئیتالیا بوو.
2
ئەو و هەمی بنەمالا وی ژ خودێ ترس و خودێپەرێس بوون، گەلەك خێر ل گەل خەلكێ جوهی دكرن و هەردەم نڤێژ بۆ خودێ دكرن.
3
رۆژەكێ ل نێزیكی دەمژمێر سێیێ پشتی نیڤرۆ د بینینەكێ دا، ب ئاشكرایی دیت فریشتەیەكێ خودێ هاتە نك و گۆتێ: «كورنیلیۆس!»
4
وی ب ترس بەرێ خۆ دا فریشتەی و گۆت: «بەلێ ئەزبەنی؟» ئینا فریشتەی بەرسڤا وی دا: «نڤێژ و خێرێن تە وەك بیرەوەری بلند بوونە بەرامبەر خودێ
5
و ڤێ گاڤێ هندەك زەڵامان بهنێرە یافا و گازی شەمعونێ ناڤدار ب پەترۆس بكە.
6
ئەو مێڤانە ل نك شەمعونێ كەڤلڤان، ئەوێ مالا وی ل نك دەریایێ.»
7
دەمێ ئەو فریشتەیێ ل گەل دئاخفت چووی، كورنیلیۆسی گازی كرە دوو خزمەتكارێن خۆ و سەربازەكێ ژ خودێ ترس یێ هەردەم د گەل دا.
8
ئەوی هەمی تشتێن چێبووین گۆتنە وان و هنارتنە یافا.
بینینا پەترۆسی 
9
ل رۆژا پاشتر ل دەمژمێر دوازدەیی نیڤرۆ، دەمێ هەر سێ زەڵام ب رێكێ ڤە و نێزیكی باژێڕێ یافا دبوون، پەترۆس چوو سەربانی دا نڤێژێ بكەت.
10
ئینا گەلەك برسی بوو و ڤیا تشتەكی بخۆت. دەمێ خوارن بۆ دهاتە ئامادەكرن، بێهش بوو.
11
دیت ئەسمانێ ڤەكریە و تشتەكێ وەكو چارچەڤەكا مەزن یا داددەت، ژ هەر چوار كوژیان ڤە یا گرتییە و یا شۆڕ دبیتە سەر ئەردی.
12
هەمی جۆرێن گیانەوەرێن چوار پێ و خشۆكێن سەر ئەردی و باڵندەیێن ئەسمانی تێدا بوون.
13
ئینا دەنگەكی گۆتێ: «پەترۆس، رابە، ڤەكوژە و بخۆ!»
14
لێ پەترۆسی بەرسڤ دا: «حاشا، خودان! من چ جاران تشتێن هەڕمی و حەرام نەخوارینە.»
15
ئینا دەنگی جارەكا دی گۆتێ: «ئەو تشتێ خودێ پاقژ كری نەبێژە یێ هەڕمیە.»
16
ئەڤ چەندە سێبارە بوو و ئەو تشتێ وەكو چارچەڤێ ڤەگەڕیاڤە ئەسمانی.
17
دەمێ هزرێن پەترۆسی ئالۆز بووین، كا رامانا وێ بینینا دیتی چیە، هەر د وی دەمی دا، ئەو زەڵامێن ژ لایێ كورنیلیۆسی ڤە هاتینە هنارتن، ئەو ب پرسیاران ب مالا شەمعونی كەفتبوون و ل بەر دەری د راوەستیای بوون
18
و پرسیار كر: «ئەرێ شەمعونێ ناڤدار ب پەترۆس ل ڤێرێیە؟»
19
د وی دەمی دا هێشتا پەترۆسی هزر د رامانا وێ بینینێ دا دكر، ئینا گیانی گۆتێ: «سێ زەڵام یێ داخوازا تە دكەن،
20
ئەڤجا رابە و هەڕە خوارێ و ل گەل وان هەڕە و خۆ دوودل نەكە، چنكو من ئەوێن هنارتین.»
21
پەترۆس چوو خوارێ و گۆتە وان زەڵامان: «ئەزم ئەوێ هوین لێدگەڕن، هوین بۆ چ هاتینە؟»
22
ئینا وان گۆت: «كورنیلیۆسێ سەرلەشكەر، مرۆڤەكێ راستدار[b] و ژ خودێ ترسە و ناڤودەنگەكێ باش د ناڤ هەمی مللەتێ جوهیان دا هەیە و وی فەرمان ژ فریشتەیەكێ پیرۆز وەرگرتییە، كو تە گازی بكەتە مالا خۆ، دا گوهێ خۆ بدەتێ، كا تە چ ئاخفتن هەنە.»
23
ئەڤجا پەترۆسی ئەو داخواز كرنە مالێ و مێڤان كرن.
ل رۆژا پاشتر پەترۆس رابوو و ل گەل وان چوو و هندەك كەس ژ برایان[c] كو خەلكێ یافایێ بوون، ل گەل چوون.
پەترۆس ل مالا كورنیلیۆسی 
24
ل رۆژا پاشتر گەهشتنە قەیسەریێ و كورنیلیۆس ل چاڤەڕێیا وان بوو و ئەوی مرۆڤ و هەڤالێن خۆ یێن نێزیك داخواز كربوون.
25
دەمێ پەترۆس ب ژۆر كەفتی، كورنیلیۆسی خۆ چەماندە بەر پێیێن وی و سوجدە بۆ بر،
26
ئینا پەترۆسی راكرەڤە و گۆتێ: «رابە، ئەز ژی مرۆڤم!»
27
پاشی پەترۆس ب ژۆر كەفت و ئەو ل گەل دئاخفت و دیت گەلەك مرۆڤێن خڕڤەبووین.
28
گۆتە وان: «هوین دزانن كو بۆ مرۆڤێ جوهی حەرامە، تێكهەلیێ ل گەل بیانیەكی بكەت یان ژی سەرەدانا وی بكەت، لێ خودێ یێ نیشا من دای، كو ئەز دەربارەی مرۆڤەكی نەبێژم ئەو یێ حەرامە یان یێ هەڕمییە.
29
لەوما بێی نەرازیبوون ئەز ل دویڤ داخوازا هەوە یێ هاتیم، ئەڤجا ئەز دشێم پرسیار بكەم، بۆچی هەوە ئەز داخواز كرم؟»
30
كورنیلیۆسی بەرسڤ دا: «ژ بەری چوار رۆژان وەكو ڤی دەمی ل دەمژمێر سێیێ، ئەز ل مالا خۆ بووم و من نڤێژ دكر، ژ نشكەكێ ڤە زەڵامەكێ جلك تەیسی ل بەرامبەری من راوەستیا
31
و گۆتە من: ‹كورنیلیۆس، خودێ گوهـ ل نڤێژا تە بوو و خێرێن تە ل بیرا وینە،
32
ئەڤجا هندەك زەڵامان بهنێرە یافا و گازی شەمعونی بكە ئەوێ دبێژنێ پەترۆس، ئەو ل مالا شەمعونێ كەڤلڤان ل نك دەریایێ مێڤانە.›
33
ئەڤجا د جهـ دا من هنارتە ب دویڤ تە را و تە باش كر تۆ هاتی و ئەم هەمی نوكە ل بەرامبەر خودێ دئامادەینە، دا مە گوهـ ل هەمی فەرمانان ببیت، یێن خودانی ل تە كرین.»
گۆتارا پەترۆسی 
34
ئینا پەترۆسی دەست ب ئاخفتنێ كر و گۆت: «ب راستی، ئەز تێگەهشتم كو خودێ لایەنگریا كەسێ ناكەت،
35
لێ د ناڤ هەر مللەتەكی دا، یێ ژ خودێ ترس بیت و راستداریێ بكەت، ئەو ل نك خودێ یێ قەبیلكریە.
36
هوین پەیاما وی دزانن ئەوا بۆ مللەتێ ئیسرائیلێ هنارتی. ئەو مزگینیدانا ئاشتیێیە ژ دەولەتسەرێ عیسایێ مەسیح، ئەوێ كو خودانێ هەمیانە.
37
هەروەسا هوین وی تشتی دزانن ئەوێ ل سەرانسەری یەهودیایێ رویدای، پشتی وێ تافیركرنا یوحەننای بانگەواز بۆ كری، ل جەلیلێ دەست پێ كر،
38
كا چەوا خودێ عیسایێ ناسیرەیی ب گیانێ پیرۆز و ب هێزێ زەیت كر[d] ، ئەڤجا ئەو ژ جهەكی دچوو جهەكی و چاكی دكرن و هەمی ئەوێن ئبلیسی ئێخستینە بن هێزا خۆ، ساخ دكرن، چنكو خودێ د گەل وی دا بوو.
39
ئەم شاهدین ل سەر هەمی تشتێن وی ل دەڤەرا جوهیان و ئورشەلیمێ كرین. ئەوان عیسا ب دارەكی ڤە هەلاویست و كوشت.
40
لێ خودێ ئەو ل رۆژا سێیێ راكرەڤە و رێ داكو دیار ببیت،
41
نە بۆ هەمی خەلكی، لێ ب تنێ بۆ وان شاهدێن بەری هنگی ژ لایێ خودێ ڤە هاتینە هەلبژارتن، ئانكو بۆ مە ئەوێن پشتی رابوونا وی ژ ناڤ مریان ل گەل وی خواری و ڤەخواری.
42
وی فەرمان ل مە كر، ئەم خەلكی ئاگەهدار بكەین و شاهدەییێ بدەین، كو ئەڤە ئەوە یێ خودێ وەكو دادوەر بۆ مریان و زیندیان دەستنیشان كری.
43
هەمی پێغەمبەر شاهدەییێ بۆ ددەن، كو هەر كەسێ باوەریێ ب وی بینیت، دێ لێبورینا گونەهان ب ناڤێ وی وەرگریت.»
یێن نەجوهی گیانێ پیرۆز وەردگرن 
44
دەمێ هێشتا پەترۆس دئاخفت، گیانێ پیرۆز ب سەر وان هەمیان دا هات، ئەوێن ئەو ئاخفتن دبهیست.
45
ئینا باوەردارێن سونەتكری، یێن ل گەل پەترۆسی هاتین حێبەتی بوون، چنكو دیاریا گیانێ پیرۆز ب سەر مللەتان ژی دا هات.
46
چنكو گوهـ ل وان بوو یێ ب زمانێن دی دئاخڤن و پەسنا[e] خودێ دكەن. ئەڤجا پەترۆسی گۆت:
47
«ئایا ئێك دشێت ئاڤێ قەدەغە بكەت، دا ئەڤێن وەكو مە گیانێ پیرۆز وەرگرتی نەهێنە تافیركرن؟»
48
ئینا فەرمان داكو ئەو ب ناڤێ عیسایێ مەسیح بهێنە تافیركرن، پاشی داخواز ژ پەترۆسی كر، كو چەند رۆژەكان ل نك وان بمینیت.
  1. a. 10‏:1 سەرلەشكەر، د ناڤ لەشكەرێ رۆمایی دا، سەركێشێ سەد سەربازان بوو.
  2. b. 10‏:22 ئەوێ كو كریارا وی یا راست و دروستە
  3. c. ‏10‏:23 برا: مەبەست پێ باوەردارن
  4. d. ‏10‏:38 زەیتكرن هێمایە كو خودێ ئەو هەلبژارت و گیانێ پیرۆز رشتە سەر وی. ل فەرهەنگۆكێ بنێڕە: \k زەیتكرن\k*
  5. e. ‏10‏:46 مەدح و سەنا