عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
ڕوونكردنه‌وه‌ی په‌ترۆس 
1
نێردراوان و باوه‌ڕداران كه‌ له‌ یه‌هودیا بوون بیستیان كه‌ ناجوله‌كه‌كانیش په‌یامی خودایان وه‌رگرتووه‌.
2
كاتێك په‌ترۆس گه‌ڕایه‌وه‌ ئۆرشه‌لیم باوه‌ڕدارانی خه‌ته‌نه‌كراو ڕه‌خنه‌یان لێ گرت و
3
ده‌یانگوت: «تۆ چوویته‌ ماڵی خه‌ڵكێكی خه‌ته‌نه‌ نه‌كراو و نانت له‌گه‌ڵیان خواردووه‌!»
4
جا په‌ترۆس یه‌ك له‌دوای یه‌ك ده‌ستی كرد به‌ ڕوونكردنه‌وه‌ی ئه‌وانه‌ی كه‌ ڕوویدابوو، گوتی:
5
«له‌ شاری یافا بووم نوێژم ده‌كرد، له‌هۆش خۆم چووم و بینینێكم بۆ ئاشكرا كرا، شتێك له‌ ئاسمانه‌وه‌ وه‌ك چه‌رچه‌فێكی گه‌وره‌ به‌ هه‌ر چوار لایه‌وه‌ بۆ لای من شۆڕكرایه‌وه‌.
6
سه‌یرم كرد و لێی وردبوومه‌وه‌، چوارپێی زه‌وی و ئاژه‌ڵی كێوی، خشۆك و باڵنده‌ی ئاسمانم بینی.
7
ئینجا گوێم له‌ ده‌نگێك بوو پێی فه‌رمووم: ”په‌ترۆس هه‌سته‌، سه‌ربڕه‌ و بخۆ!“
8
«به‌ڵام گوتم: ”نه‌خێر، ئه‌ی په‌روه‌ردگار، چونكه‌ هه‌رگیز گڵاو و حه‌رام نه‌چووه‌ته‌ ده‌مم.“
9
«ده‌نگه‌كه‌ دووباره‌ له‌ ئاسمانه‌وه‌ فه‌رمووی: ”ئه‌وه‌ی خودا پاكی كردووه‌ته‌وه‌ تۆ به‌ گڵاوی دامه‌نێ.“
10
ئه‌مه‌ سێباره‌ بووه‌وه‌ و هه‌موو شته‌كان بۆ ئاسمان ڕاكێشرانه‌وه‌.
11
«ئه‌وه‌ بوو یه‌كسه‌ر سێ پیاو له‌پێش ئه‌و ماڵه‌ ڕاوه‌ستان كه‌ ئێمه‌ی لێبوو، له‌ قه‌یسه‌رییه‌وه‌ بۆ لام نێردرابوون،
12
ڕۆحی پیرۆز پێی فه‌رمووم كه‌ بێ دوودڵی له‌گه‌ڵیان بڕۆم، ئه‌م شه‌ش برایه‌ش له‌گه‌ڵم هاتن و چووینه‌ ماڵی پیاوه‌كه‌.
13
ئه‌ویش بۆی گێڕاینه‌وه‌ چۆن فریشته‌ی له‌ ماڵه‌كه‌یدا بینیوه‌ ڕاوه‌ستاوه‌ و گوتوویه‌تی: ”بنێره‌ بۆ یافا به‌دوای شیمۆندا كه‌ نازناوی په‌ترۆسه‌،
14
ئه‌و په‌یامێكتان ده‌داتێ به‌هۆیه‌وه‌ خۆت و هه‌موو ماڵه‌كه‌ت ڕزگارتان ده‌بێت.“
15
«كاتێك ده‌ستم به‌ قسه‌ كرد، ڕۆحی پیرۆزیان به‌سه‌ردا ڕژا، وه‌ك له‌ سه‌ره‌تادا هاته‌ سه‌ر ئێمه‌ش.
16
قسه‌كه‌ی عیسای خاوه‌ن شكۆم به‌بیر هاته‌وه‌ كه‌ فه‌رمووی: ”یه‌حیا له‌ئاوهه‌ڵكێشانی كرد، به‌ڵام ئێوه‌ له‌ ڕۆحی پیرۆز هه‌ڵده‌كێشرێن.“
17
جا ئه‌گه‌ر خودا هه‌مان به‌هره‌ی به‌وان دابێت هه‌روه‌ك به‌ ئێمه‌ی داوه‌ كه‌ باوه‌ڕمان به‌ عیسای مه‌سیحی خاوه‌ن شكۆ هێنا، ئیتر من كێم بتوانم ڕێگا له‌ خودا بگرم؟»
18
كاتێك گوێیان له‌مه‌ بوو، بێده‌نگ بوون و ستایشی خودایان كرد، گوتیان: «كه‌واته‌ خودا تۆبه‌كردنی بۆ ژیان به‌ نه‌ته‌وه‌كانیش به‌خشیوه‌.»
كڵێسای ئه‌نتاكیا 
19
ئینجا ئه‌و كه‌سانه‌ی به‌هۆی ئه‌و چه‌وسانه‌وه‌یه‌ی به‌سه‌ر ستیفانۆسدا هات په‌رشوبڵاو بوونه‌وه‌، په‌ڕینه‌وه‌ بۆ فینیكیا و قوبرس و ئه‌نتاكیا، باسی په‌یامی خودایان بۆ كه‌س نه‌ده‌كرد، بۆ جوله‌كه‌ نه‌بێت.
20
به‌ڵام هه‌ندێكیان خه‌ڵكی قوبرس و كورێن[a] بوون، كاتێك هاتنه‌ ئه‌نتاكیا، قسه‌یان بۆ یۆنانییه‌كان ده‌كرد و مزگێنیی عیسای خاوه‌ن شكۆیان ده‌دا.
21
یه‌زدان پشتگیری كردن، ژماره‌یه‌كی زۆر باوه‌ڕیان هێنا و بۆ عیسای خاوه‌ن شكۆ گه‌ڕانه‌وه‌.
22
ئه‌م هه‌واڵه‌ گه‌یشته‌ كڵێسای ئۆرشه‌لیم، ئه‌وانیش به‌رناباسیان بۆ ئه‌نتاكیا نارد.
23
كاتێك گه‌یشت و نیعمه‌تی خودای بینی، دڵشاد بوو، هه‌مووانی هاندا به‌ هه‌موو دڵیانه‌وه‌ له‌گه‌ڵ مه‌سیحی خاوه‌ن شكۆ بمێننه‌وه‌،
24
چونكه‌ پیاوچاك بوو، پڕبوو له‌ ڕۆحی پیرۆز و باوه‌ڕ. خه‌ڵكێكی زۆریش هاتنه‌ پاڵ مه‌سیحی خاوه‌ن شكۆ.
25
ئه‌وسا چوو بۆ ته‌رسۆس تاكو به‌دوای شاولدا بگه‌ڕێت،
26
كاتێك دۆزییه‌وه‌ بۆ ئه‌نتاكیای هێنا. ئیتر ساڵێكی ته‌واو له‌ كڵێسا كۆبوونه‌وه‌ و خه‌ڵكێكی زۆریان فێركرد. یه‌كه‌م جاریش له‌ ئه‌نتاكیا قوتابییه‌كان ناویان لێنرا مه‌سیحی[b] .
27
له‌و ڕۆژانه‌دا هه‌ندێك پێغه‌مبه‌ر له‌ ئۆرشه‌لیمه‌وه‌ هاتنه‌ ئه‌نتاكیا،
28
یه‌كێك له‌وان ناوی ئاگابۆس بوو، هه‌ستا و له‌ ڕێگه‌ی ڕۆحی پیرۆزه‌وه‌ پێشبینیی كرد كه‌ قاتوقڕییه‌كی گه‌وره‌ هه‌موو جیهان ده‌گرێته‌وه‌، ئه‌وه‌ی له‌ سه‌رده‌می كلودیۆسیش ڕوویدا.
29
بۆیه‌ قوتابییه‌كان بڕیاریان دا هه‌ریه‌كه‌ به‌گوێره‌ی توانای خۆی یارمه‌تی بنێرێت بۆ ئه‌و خوشك و برایانه‌ی له‌ یه‌هودیا ده‌ژین.
30
جا به‌مه‌ هه‌ستان و به‌ ده‌ستی به‌رناباس و شاول بۆ پیرانییان نارد.
  1. a. 11‏:20 گه‌وره‌ترین شار له‌ وڵاتی لیبیا له‌و سه‌رده‌مه‌.
  2. b. 11‏:26 یۆنانی: \+tl كریستیانۆی\+tl*.