عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
1
ئه‌ی لوبنان، ده‌رگاكانت بكه‌ره‌وه‌،
تاكو ئاگر دار ئورزه‌كانت بخوات!
2
ئه‌ی دار سنه‌وبه‌ر، واوه‌یلا بكه‌، چونكه‌ دار ئورز كه‌وت،
داره‌ گه‌وره‌كان تێكشكێنران!
ئه‌ی دار به‌ڕووه‌كانی باشان، واوه‌یلا بكه‌ن،
چونكه‌ دارستانه‌ چڕه‌كان تێكدران!
3
گوێ له‌ واوه‌یلای شوانه‌كان بگرن،
چونكه‌ له‌وه‌ڕگا ده‌وڵه‌مه‌نده‌كانیان وێران بوون!
گوێ له‌ نه‌ڕه‌ی شێره‌كان بگرن،
چونكه‌ ده‌وه‌نه‌كانی ڕووباری ئوردون وێران بوون.
دوو شوان 
4
یه‌زدانی خوداكه‌م ئه‌مه‌ ده‌فه‌رموێت: «ئه‌و مێگه‌له‌ی بۆ سه‌ربڕینه‌ بیله‌وه‌ڕێنه‌.
5
ئه‌وانه‌ی ده‌یانكڕن و سه‌ریان ده‌بڕن، سزاش نادرێن. فرۆشیاره‌كانیان ده‌ڵێن: ”ستایشی یه‌زدان ده‌كه‌م، كه‌ ده‌وڵه‌مه‌ندی كردم!“ شوانه‌كانیان به‌زه‌ییان پێیاندا نایه‌ته‌وه‌.»
6
یه‌زدان ده‌فه‌رموێت: «له‌به‌ر ئه‌وه‌ ئیتر به‌زه‌ییم به‌ دانیشتووانی خاكه‌كه‌دا نایه‌ته‌وه‌، به‌ڵكو هه‌ریه‌كه‌یان ده‌ده‌مه‌ ده‌ست نزیكه‌كه‌ی و پاشاكه‌ی. ئه‌وان خاكه‌كه‌ وێران ده‌كه‌ن، كه‌سیش له‌ ده‌ستی ئه‌وان ده‌رباز ناكه‌م.»
7
ئه‌و مێگه‌له‌م له‌وه‌ڕاند كه‌ بۆ سه‌ربڕینه‌، به‌ تایبه‌تی كڵۆڵترینی مه‌ڕه‌كان. ئینجا دوو گۆچانم بۆ خۆم برد، یه‌كێكیانم ناونا «په‌سه‌ندی» و ئه‌وی دیكه‌شم ناونا «یه‌كگرتن» و مێگه‌له‌كه‌م له‌وه‌ڕاند.
8
له‌ یه‌ك مانگدا هه‌ر سێ شوانه‌كه‌م ده‌ركرد.
مێگه‌له‌كه‌ ڕقی لێم بووه‌وه‌، من ئارامیم لێیان نه‌ما و
9
فه‌رمووم: «ناتانله‌وه‌ڕێنم. ئه‌وی مردار ده‌بێته‌وه‌، با مردار ببێته‌وه‌؛ ئه‌وه‌ی له‌ناوده‌چێت، با له‌ناوبچێت؛ ئه‌وانه‌ش كه‌ ده‌مێننه‌وه‌، با گۆشتی یه‌كتری بخۆن.»
10
ئینجا ئه‌و گۆچانه‌م برد كه‌ ناوی «په‌سه‌ندی» بوو شكاندم، تاكو ئه‌و په‌یمانه‌م هه‌ڵوه‌شێنمه‌وه‌ كه‌ له‌گه‌ڵ هه‌موو گه‌لاندا به‌ستم.
11
له‌و ڕۆژه‌دا په‌یمانه‌كه‌ هه‌ڵوه‌شایه‌وه‌، به‌و شێوه‌یه‌ كڵۆڵترینی مه‌ڕه‌كان، ئه‌وانه‌ی چاویان تێبڕیبووم زانییان كه‌ ئه‌وه‌ فه‌رمایشتی یه‌زدان بووه‌.
12
ئینجا پێم گوتن: «ئه‌گه‌ر پێتان باشه‌، كرێیه‌كه‌م بده‌نێ، ئه‌گه‌ر نا لێیگه‌ڕێن.» ئینجا سی پارچه‌ زیوی كرێیه‌كه‌ی منیان كێشا.
13
یه‌زدان پێی فه‌رمووم: «فڕێیبده‌ بۆ گۆزه‌كه‌ره‌كه‌.» ئه‌و نرخه‌ به‌هاداره‌ی كه‌ منیان پێی هه‌ڵسه‌نگاند! منیش سی پارچه‌ زیوه‌كه‌م وه‌رگرت و فڕێمدا بۆ گۆزه‌كه‌ره‌كه‌ی ناو ماڵی یه‌زدان.
14
ئینجا گۆچانه‌كه‌ی دیكه‌م شكاند، كه‌ ناوی «یه‌كگرتن» بوو، تاكو برایه‌تی نێوان یه‌هودا و ئیسرائیل هه‌ڵبوه‌شێنمه‌وه‌.
15
جا یه‌زدانم پێی فه‌رمووم: «جارێكی دیكه‌ كه‌لوپه‌لی شوانێكی گێل بۆ خۆت ببه‌،
16
چونكه‌ من شوانێك له‌ خاكه‌كه‌ هه‌ڵده‌ستێنمه‌وه‌ كه‌ گرنگی به‌ ونبووه‌كان نادات، له‌ ساواكان ناگه‌ڕێت، برینداره‌كان چاره‌سه‌ر ناكات، ئه‌وانه‌ی ته‌ندروستییان باشه‌ نایانله‌وه‌ڕێنێت، به‌ڵام گۆشتی قه‌ڵه‌وه‌كان ده‌خوات و سمیان ده‌ردێنێت.
17
«قوڕبه‌سه‌ر شوانی هیچوپووچ،
ئه‌وه‌ی وازی له‌ مێگه‌له‌كه‌ هێناوه‌!
با شمشێر له‌سه‌ر قۆڵ و چاوی ڕاستی بێت!
با قۆڵی به‌ ته‌واوی وشك بێت و
چاوی ڕاستی به‌ ته‌واوی كۆره‌ بێت!»