عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
به‌سه‌ركردنه‌وه‌ی بنه‌ماڵه‌ی یه‌هودا 
1
له‌ به‌هاردا داوای باران له‌ یه‌زدان بكه‌ن،
یه‌زدانه‌ كه‌ هه‌وره‌تریشقه‌ دروستده‌كات.
ئه‌و شه‌سته‌ باران ده‌بارێنێت،
كێڵگه‌ی سه‌وز ده‌داته‌ هه‌مووان.
2
بته‌كان قسه‌ی هه‌ڵخه‌ڵه‌تێنه‌ر ده‌كه‌ن،
فاڵگره‌وه‌كان به‌ درۆ باسی بینین ده‌كه‌ن،
خه‌ونی درۆ ده‌گێڕنه‌وه‌،
به‌بێ سوود دڵنه‌وایی ده‌كه‌ن،
بۆیه‌ وه‌ك مه‌ڕ ده‌گه‌ڕێن،
سه‌رگه‌ردان بوون له‌به‌ر بێ شوانی.
3
«تووڕه‌ییم له‌سه‌ر شوانه‌كان گڕی گرت،
ڕابه‌ره‌كان سزا ده‌ده‌م،
چونكه‌ یه‌زدانی سوپاسالار مێگه‌له‌كه‌ی خۆی،
بنه‌ماڵه‌ی یه‌هودا به‌سه‌رده‌كاته‌وه‌،
ده‌یانكاته‌ ئه‌سپی شكۆی خۆی له‌نێو جه‌نگ.
4
به‌ردی بناغه‌ له‌ یه‌هوداوه‌ دێت،
مێخی ڕه‌شماڵ له‌وێوه‌ دێت،
كه‌وانی جه‌نگ له‌وێوه‌ دێت،
هه‌موو سه‌رۆكێك له‌وێوه‌یه‌.
5
پێكه‌وه‌ وه‌ك پاڵه‌وان ده‌بن،
ئه‌وانه‌ی دوژمنه‌كانیان له‌نێو قوڕی كۆڵانه‌كان ده‌شێلن،
ده‌جه‌نگین، چونكه‌ یه‌زدان له‌گه‌ڵیانه‌،
ئه‌سپ سواره‌كانی دوژمن شه‌رمه‌زار ده‌كه‌ن.
6
«بنه‌ماڵه‌ی یه‌هودا به‌هێز ده‌كه‌م،
بنه‌ماڵه‌ی یوسف ڕزگار ده‌كه‌م.
ده‌یانگه‌ڕێنمه‌وه‌، چونكه‌ به‌زه‌ییم پێیاندا هاته‌وه‌،
وایان لێدێت وه‌ك ئه‌وه‌ی كه‌ ڕه‌تم نه‌كردبنه‌وه‌،
چونكه‌ من یه‌زدانی خودای ئه‌وانم،
وه‌ڵامیان ده‌ده‌مه‌وه‌.
7
ئه‌فرایم وه‌ك پاڵه‌وانه‌كانیان لێدێت،
دڵیان خۆش ده‌بێت هه‌روه‌ك به‌ شه‌راب،
منداڵه‌كانیان ئه‌مه‌ ده‌بینن و دڵخۆش ده‌بن،
دڵیان به‌ یه‌زدان شاد ده‌بێت.
8
ئاماژه‌یان بۆ ده‌كه‌م،
پێكه‌وه‌ كۆیان ده‌كه‌مه‌وه‌.
به‌ دڵنیاییه‌وه‌ ده‌یانكڕمه‌وه‌،
هه‌روه‌كو پێشتر زۆر ده‌بن.
9
هه‌رچه‌نده‌ له‌نێو گه‌لاندا په‌رته‌وازه‌یان ده‌كه‌م،
به‌ڵام له‌ خاكه‌ دووره‌كانه‌وه‌ یادم ده‌كه‌نه‌وه‌.
ئه‌وان له‌گه‌ڵ كوڕه‌كانیان له‌ ژیان ده‌مێننه‌وه‌ و
ده‌گه‌ڕێنه‌وه‌.
10
له‌ خاكی میسره‌وه‌ ده‌یانگه‌ڕێنمه‌وه‌ و
له‌ ئاشوره‌وه‌ كۆیان ده‌كه‌مه‌وه‌.
ده‌یانهێنمه‌ خاكی گلعاد و لوبنان،
جێیان نابێته‌وه‌.
11
به‌ناو ده‌ریای ته‌نگدا تێده‌په‌ڕن،
شه‌پۆله‌كانی ده‌ریا كپ ده‌بن و
هه‌موو قووڵاییه‌كانی ڕووباری نیل وشك ده‌بن.
لووتبه‌رزی ئاشور تێكده‌شكێنرێت و
دارده‌ستی میسر نامێنێت.
12
به‌ یه‌زدان به‌هێزیان ده‌كه‌م و
به‌ ناوی خۆیه‌وه‌ ده‌یپه‌رستن و گوێڕایه‌ڵی ده‌بن.»
ئه‌وه‌ فه‌رمایشتی یه‌زدانه‌.