عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
زه‌بوورێكی ئاساف. 
1
بێگومان خودا چاكه‌ بۆ ئیسرائیل،
بۆ دڵپاكه‌كان.
2
به‌ڵام من خه‌ریك بوو پێم بخزێت و
زۆری نه‌مابوو هه‌نگاوم بخلیسكێت،
3
چونكه‌ به‌غیلیم به‌ لووتبه‌رزه‌كان برد،
كه‌ ئاسووده‌یی به‌دكارانم دی.
4
چونكه‌ ترسیان له‌ مردن نییه‌،
جه‌سته‌یان ته‌ندروست و قه‌ڵه‌وه‌.
5
له‌ ڕه‌نجكێشانی مرۆڤ به‌ده‌رن،
وه‌ك خه‌ڵكی تێناكه‌ون.
6
بۆیه‌ لووتبه‌رزییان وه‌ك ملوانكه‌ له‌ مل كردووه‌ و
به‌رگی توندوتیژییان پۆشیوه‌.
7
خراپه‌ له‌ دڵی بێ به‌زه‌ییانه‌وه‌ دێت،
لێكدانه‌وه‌ی دڵیان بێ سنووره‌.
8
گاڵته‌جاڕی ده‌كه‌ن و به‌ خراپه‌ ده‌دوێن،
به‌ لووتبه‌رزییه‌وه‌ باسی سته‌م ده‌كه‌ن.
9
ڕووی ده‌میان له‌ ئاسمان كردووه‌،
زمانیشیان به‌سه‌ر زه‌ویدا ده‌گێڕن.
10
بۆیه‌ خه‌ڵكی خۆیان دێنه‌ لایان و
باوه‌ڕ به‌ قسه‌كانیان ده‌كه‌ن[a] .
11
ده‌ڵێن: «چۆن خودا ده‌زانێت؟
ئایا له‌لای هه‌ره‌به‌رز زانیاری هه‌یه‌؟»
12
ئه‌وه‌تا ئه‌مانه‌ به‌دكارن،
هه‌میشه‌ له‌ خۆشیدان و سامانیان له‌ زیادبووندایه‌.
13
بێگومان به‌ بێهووده‌ دڵی خۆمم به‌ پاكی ڕاگرتووه‌،
ده‌ستیشم به‌ بێگه‌ردی شوشتووه‌.
14
به‌ درێژایی ڕۆژ لێم قه‌ومابوو،
هه‌تا به‌ره‌به‌یان ته‌مبێ كرابووم.
15
ئه‌گه‌ر به‌ ڕاشكاوی قسه‌م ده‌كرد،
ئه‌وا له‌گه‌ڵ منداڵه‌كانت ناپاك ده‌بووم.
16
كاتێك ویستم له‌مه‌ تێبگه‌م،
به‌ ئه‌ركێكی سه‌ختم بینی،
17
هه‌تا چوومه‌ ناو پیرۆزگای خودا،
ئه‌وسا له‌ چاره‌نووسیان گه‌یشتم.
18
به‌ ڕاستی له‌ جێگایه‌كی خلیسك داتناون،
تووشی وێرانیت كردوون.
19
چۆن به‌ چاوتروكانێك وێران بوون،
له‌ ترسان به‌ ته‌واوی له‌ناوچوون!
20
ئه‌ی په‌روه‌ردگار، وه‌ك خه‌ون كاتی به‌ئاگا هاتنه‌وه‌،
له‌ كاتی به‌ئاگایی وه‌ك خه‌ون ڕیسوایان ده‌كه‌یت.
21
كاتێك دڵم ته‌نگ بوو،
وه‌ك شمشێر هه‌ناومی بڕی،
22
گێل و نه‌زان بووم،
له‌لای تۆ وه‌ك ئاژه‌ڵم لێهات.
23
له‌گه‌ڵ ئه‌وه‌شدا، من هه‌میشه‌ له‌لای تۆم،
ده‌سته‌ ڕاستی منت گرت.
24
به‌ ئامۆژگاریت ڕێنماییم ده‌كه‌یت،
پاشان بۆ شكۆمه‌ندیم ده‌به‌یت.
25
له‌ تۆ به‌ولاوه‌ له‌ ئاسمان كێم هه‌یه‌؟
ئه‌گه‌ر له‌گه‌ڵ تۆ بم، له‌سه‌ر زه‌ویش هیچ نییه‌ ئاره‌زووی بكه‌م.
26
جه‌سته و دڵم كۆتاییان پێهات،
به‌ڵام هه‌تاهه‌تایه‌ هێزی دڵ و به‌شی من خودایه‌.
27
چونكه‌ ئه‌وه‌تا ئه‌وانه‌ی له‌ تۆ دوورن وێڵ ده‌بن،
ئه‌وانه‌ی ناپاكیت له‌گه‌ڵ بكه‌ن دوایان ده‌بڕیته‌وه‌.
28
به‌ڵام نزیكبوونه‌وه‌ له‌ خودا بۆ من باشه‌،
یه‌زدانی باڵاده‌ستم كرد به‌ په‌ناگام،
هه‌تا باسی هه‌موو كرده‌وه‌كانت بكه‌م.
  1. a. 73‏:10 عیبری: ئاو به‌ زۆری ده‌خۆنه‌وه‌.