عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
بۆ سلێمان. 
1
ئه‌ی خودایه‌، دادپه‌روه‌ری خۆت بده‌ به‌ پاشا،
ڕاستودروستیت به‌ كوڕی پاشا.
2
با به‌ ڕاستودروستی حوكمی گه‌له‌كه‌ت بكات،
به‌ دادپه‌روه‌ریش هه‌ژاره‌كانت.
3
با چیاكان ئاشتی بۆ گه‌ل دابین بكه‌ن،
گرده‌كان ڕاستودروستی.
4
با دادوه‌ری كڵۆڵانی گه‌ل بكات،
كوڕی نه‌داران ڕزگار بكات،
زۆرداران وردوخاش بكات.
5
با وه‌ك خۆر بمێنێت،
وه‌ك مانگ به‌ درێژایی نه‌وه‌كان.
6
وه‌ك باران به‌سه‌ر گیادا ببارێت،
وه‌ك هه‌ور زه‌وی ئاو بدات،
7
ڕاستودروستان له‌ سه‌رده‌می ئه‌و شكۆفه‌ ده‌كه‌ن،
ئاشتییه‌كی زۆر ده‌بێت هه‌تا فه‌وتانی مانگ.
8
له‌ ده‌ریاوه‌ هه‌تا ده‌ریا حوكم ده‌كات،
له‌ ڕووباری فوراته‌وه‌ هه‌تا ئه‌وپه‌ڕی زه‌وی.
9
بیاباننشینه‌كان كڕنۆشی بۆ ده‌به‌ن و
ناحه‌زانی تۆز ده‌لێسنه‌وه‌.
10
پاشاكانی ته‌رشیش[a] و دوورگه‌ دووره‌كان سه‌رانه‌ ده‌نێرن،
پاشاكانی شه‌با و سه‌با[b] دیاری بۆ دێنن.
11
هه‌موو پاشاكان كڕنۆشی بۆ ده‌به‌ن و
هه‌موو نه‌ته‌وه‌كان خزمه‌تی ده‌كه‌ن.
12
چونكه‌ نه‌دار هاواری بۆ ببات، ده‌ربازی ده‌كات،
چه‌وسێنراوه‌ش كه‌ یارمه‌تیده‌ری نییه‌.
13
به‌زه‌یی به‌ لاواز و نه‌داردا دێته‌وه‌،
گیانی نه‌داره‌كان ڕزگار ده‌كات،
14
گیانیان له‌ سته‌م و توندوتیژی ده‌كڕێته‌وه‌،
خوێنی ئه‌وان له‌لای به‌نرخه‌.
15
ته‌مه‌ن درێژ بێت!
با له‌ زێڕی شه‌بای پێبدرێت،
با هه‌میشه‌ خه‌ڵك نزای بۆ بكه‌ن،
با به‌ درێژایی ڕۆژ داوای به‌ره‌كه‌تی بۆ بكه‌ن.
16
با دانه‌وێڵه‌یه‌كی زۆر له‌سه‌ر زه‌وی بێت،
له‌سه‌ر لووتكه‌ی گرده‌كان،
به‌رهه‌می وه‌ك لوبنان بشه‌كێته‌وه‌،
با ئه‌وانه‌ی له‌ شاره‌كانن وه‌ك گیای كێڵگه‌ چرۆ بكه‌ن.
17
با هه‌تاهه‌تایه‌ ناوی بمێنێت،
هه‌تا خۆر مابێت ناوی به‌رده‌وام بێت.
هه‌موو نه‌ته‌وه‌كان له‌وه‌وه‌ به‌ره‌كه‌تدار بن،
هه‌مووان خۆزگه‌ی پێ بخوازن.
18
ستایش بۆ یه‌زدانی په‌روه‌ردگار، خودای ئیسرائیل،
به‌ ته‌نها ئه‌وه‌ كاری سه‌رسوڕهێنه‌ر ده‌كات.
19
هه‌تاهه‌تایه‌ ستایش بۆ ناوی شكۆداری،
با شكۆمه‌ندییه‌كه‌ی هه‌موو جیهان پڕ بكات.
ئامین و ئامین.
20
لێره‌دا نوێژه‌كانی داودی كوڕی یه‌سا ته‌واو بوون.
  1. a. 72‏:10 ته‌رشیش: دوایین سنووری ڕۆژئاوای جیهان بووه‌ كه‌ ئه‌و سه‌رده‌مه‌ مرۆڤ پێی زانیبێت.
  2. b. 72‏:10 ناوی هۆز و شوێنه‌، ده‌كه‌ونه‌ یه‌مه‌ن و هه‌ندێكیان كۆچیان كردووه‌ بۆ ئه‌سیوپیا. خه‌ڵكه‌كه‌ی به‌ بازرگانی به‌ناوبانگ بوون.