عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
بۆ سه‌رۆكی كۆمه‌ڵی مۆسیقاژه‌نان، له‌سه‌ر گوڵی سه‌وسه‌نی په‌یمان. پاڕانه‌وه‌یه‌كی داوده‌ بۆ فێركردن. كاتی شه‌ڕكردنی له‌گه‌ڵ ئارامییه‌كانی دوو ڕووبار[a] و ئارامییه‌كانی چۆڤا[b] ، هه‌روه‌ها كاتێك یۆئاب[c] گه‌ڕایه‌وه‌ و له‌ دۆڵی خوێ[d] دوازده‌ هه‌زاری له‌ ئه‌دۆمییه‌كان كوشت. 
1
ئه‌ی خودایه‌، ئێمه‌ت ڕه‌تكرده‌وه‌ و ئێمه‌ت شكاند،
تۆ تووڕه‌ بووی، ئێستا بمانگه‌ڕێنه‌وه‌!
2
تۆ زه‌ویت له‌رزاند و شه‌قت كرد،
شكاوییه‌كانی چاك بكه‌ره‌وه‌، چونكه‌ له‌رزۆكه‌.
3
كاتی سه‌ختت نیشانی گه‌له‌كه‌ت دا،
باده‌ی سه‌رگه‌ردانیت پێمان نۆشی.
4
به‌ڵام بۆ ئه‌وانه‌ی ترسی تۆیان له‌ دڵدایه‌، ئاڵات هه‌ڵكرد،
بۆ ئه‌وه‌ی له‌ دژی تیری دوژمنان بشه‌كێته‌وه‌.[e]
5
به‌ ده‌ستی ڕاستت ده‌ربازمان بكه‌ و یارمه‌تیمان بده‌،
بۆ ئه‌وه‌ی خۆشه‌ویستانت ڕزگاریان بێت.
6
خودا له‌ پیرۆزگاكه‌ی خۆیه‌وه‌ فه‌رموویه‌تی:
«به‌ هاواری خۆشییه‌وه‌ شه‌خه‌م دابه‌ش ده‌كه‌م و
دۆڵی سوكۆت[f] ده‌پێوم.
7
گلعاد هی منه‌، مه‌نه‌شه‌ش هی منه‌،
ئه‌فرایم كڵاوی منه‌،
یه‌هودا[g] داری ده‌سه‌ڵاتی منه‌،
8
مۆئاب[h] ده‌ستشۆرمه‌،
پێڵاوه‌كه‌م فڕێده‌ده‌مه‌ سه‌ر ئه‌دۆم،
له‌سه‌ر فه‌له‌ستیه‌ هاواری سه‌ركه‌وتن ده‌كه‌م.»
9
كێیه‌ ده‌مباته‌ شاری قه‌ڵابه‌ند؟
كێیه‌ پێشڕه‌ویم ده‌كات بۆ ئه‌دۆم؟
10
ئه‌ی خودایه‌، مه‌گه‌ر تۆ نیت كه‌ ئێمه‌ت ڕه‌ت كردووه‌ته‌وه‌ و
ئیتر له‌گه‌ڵ له‌شكره‌كانمان ده‌رناچیت؟
11
یارمه‌تیمان بده‌ به‌رامبه‌ر به‌ دوژمنه‌كه‌،
چونكه‌ ڕزگاری له‌ مرۆڤه‌وه‌ پووچه‌.
12
له‌گه‌ڵ خودا سه‌ركه‌وتن به‌ده‌ستده‌هێنین،
هه‌روه‌ها ئه‌وه‌ دوژمنه‌كانمان ده‌خاته‌ ژێر پێ.
  1. a. 60‏:0 میسۆپۆتامیا، وڵاتی نێوان دجله‌ و فورات.
  2. b. 60‏:0 یه‌كێك بوو له‌ پاشایه‌تییه‌كانی ئارامییه‌كان، ده‌كه‌وته‌ ڕۆژئاوای فوراته‌وه‌.
  3. c. 60‏:0 سه‌ركرده‌ی سوپاكه‌ی داود بوو.
  4. d. 60‏:0 ده‌كه‌وێته‌ باشووری ده‌ریای مردوو.
  5. e. 60‏:4 له‌ ده‌قی عیبری لێره‌ وشه‌ی \+tl سه‌لاه‌\+tl* هه‌یه‌ كه‌ له‌وانه‌یه‌ ئاماژه‌یه‌كه‌ بۆ وه‌ستانی مۆسیقا و خوێندنه‌وه‌.
  6. f. 60‏:6 ناوی دوو شاری كۆنه‌. شه‌خه‌م شارێكی شوورابه‌ند بوو له‌ پاڵ كێوی گریزیم، سوكۆتیش ده‌كه‌وته‌ دووری شه‌ش كیلۆمه‌تر له‌ ڕۆژهه‌ڵاتی ڕووباری ئوردون.
  7. g. 60‏:7 گلعاد كوڕی ماكیره‌ و كوڕه‌زای منه‌ششێیه‌ و منه‌ششێش نۆبه‌ره‌ی یوسفه‌، ئه‌فرایمیش كوڕی دووه‌می یوسفه‌، یه‌هوداش كوڕی یاقوبه‌، بۆیه‌ ئه‌م ناوانه‌ بوون به‌ ناوی هۆز و عه‌شیره‌ته‌كانی ئیسرائیل و هه‌روه‌ها ناوی شار و ناوچه‌كانیان.
  8. h. 60‏:8 خاكی مۆئابییه‌كان، ده‌كه‌وته‌ به‌شی ڕۆژهه‌ڵاتی ده‌ریای مردوو.