عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
بۆ سه‌رۆكی كۆمه‌ڵی مۆسیقاژه‌نان، له‌سه‌ر ئاوازی «مه‌فه‌وتێنه‌.» پاڕانه‌وه‌یه‌كی داود. 
1
ئه‌ی فه‌رمانڕه‌وایان، ئایا له‌ ڕاستیدا به‌ ڕاستودروستی بڕیار ده‌ده‌ن؟
ئایا دادپه‌روه‌رانه‌ حوكمی ئاده‌میزاد ده‌كه‌ن؟
2
به‌ڵكو ئێوه‌ له‌ دڵه‌وه‌ كار به‌ خراپه‌ ده‌كه‌ن،
هه‌روه‌ها ده‌ستتان توندوتیژی له‌سه‌ر زه‌وی ئه‌نجام ده‌دات.
3
به‌دكاران له‌ كاتی له‌دایكبوونه‌وه‌ گومڕان،
له‌ سكی دایكیانه‌وه‌ درۆ ده‌كه‌ن.
4
ژه‌هریان وه‌ك ژه‌هری ماره‌،
وه‌ك ماری كۆبرا كه‌ كه‌ڕه‌ و گوێی خۆی داخستووه‌،
5
كه‌ ئاوازی ئه‌فسونگه‌ران نابیستێت،
هه‌رچه‌نده‌ به‌ شاره‌زاییش ئه‌فسون بكه‌ن.
6
ئه‌ی خودایه‌، ددانیان له‌ ده‌میان بشكێنه‌،
ئه‌ی یه‌زدان، كه‌ڵبه‌ی شێران وردوخاش بكه‌!
7
با بتوێنه‌وه‌ و وه‌ك ئاو بڕۆن،
با تیره‌كانیان بشكێت كاتێك كه‌وان ڕاده‌كێشن.
8
وه‌ك لولپێچ كه‌ ده‌توێته‌وه‌ كاتێك ده‌ڕوات،
وه‌ك منداڵی له‌بارچوو، با خۆر نه‌بینن.
9
پێش ئه‌وه‌ی مه‌نجه‌ڵه‌كانتان هه‌ست به‌ ئاگری دڕكه‌كان بكه‌ن،
چ ته‌ڕ بن چ وشك بن، خراپه‌كانیان ڕاده‌ماڵرێت.
10
كه‌سی ڕاستودروست كه‌ تۆڵه‌ ده‌بینێت شاد ده‌بێت،
پێی خۆی به‌ خوێنی خراپه‌كار ده‌شوا.
11
ئینجا خه‌ڵكی ده‌ڵێن:
«بێگومان كه‌سی ڕاستودروست پاداشتی هه‌یه‌،
بێگومان خودایه‌ك هه‌یه‌ كه‌ دادگایی زه‌وی ده‌كات.»