عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
زه‌بوورێكی داود. 
1
ئه‌ی یه‌زدان، گوێ له‌ قسه‌كانم بگره‌،
له‌ ناڵه‌م وردبه‌ره‌وه‌.
2
گوێ له‌ هاوارم بگره‌، ئه‌ی پاشا و خودام،
چونكه‌ لێت ده‌پاڕێمه‌وه‌.
3
ئه‌ی یه‌زدان، به‌یانییان گوێ له‌ ده‌نگم ده‌گریت،
به‌یانییان خۆم ئاماده‌ ده‌كه‌م بۆ نوێژكردن و چاوه‌ڕێ ده‌كه‌م.
4
چونكه‌ تۆ خودایه‌ك نیت خراپه‌ت پێ خۆش بێت،
به‌دكار له‌گه‌ڵت نیشته‌جێ نابێت.
5
لووتبه‌رزه‌كان له‌به‌رچاوت ناوه‌ستن،
ڕقت له‌ هه‌موو به‌دكارێك ده‌بێته‌وه‌،
6
ئه‌وانه‌ی به‌ درۆ قسه‌ ده‌كه‌ن تۆ له‌ناویان ده‌به‌یت،
یه‌زدان قێزی له‌ كه‌سی خوێنڕێژ و فێڵباز ده‌بێته‌وه‌.
7
به‌ڵام من، به‌هۆی خۆشه‌ویستییه‌ نه‌گۆڕه‌كه‌ت، دێمه‌ ناو ماڵی تۆ،
به‌ ترسی تۆوه‌ به‌ره‌و په‌رستگا پیرۆزه‌كه‌ت كڕنۆش ده‌به‌م.
8
ئه‌ی یه‌زدان، له‌به‌ر دوژمنه‌كانم به‌ ڕاستودروستی خۆت ڕێنماییم بكه‌،
ڕێگای خۆت ته‌خت بكه‌ له‌پێشم.
9
چونكه‌ له‌سه‌ر زمانی ئه‌وان قسه‌ی ڕاست نییه‌،
ناوه‌ڕۆكیان له‌ناوچوونه‌،
قوڕگیان گۆڕێكی كراوه‌یه‌،
زمانیان فێڵی لێ ده‌ڕژێت.
10
ئه‌ی خودایه‌، تاوانباریان بكه‌!
با بكه‌ونه‌ ناو تۆڕی پیلانی خۆیانه‌وه‌،
له‌به‌ر زۆری گوناهه‌كانیان ده‌ریانبكه‌،
چونكه‌ له‌ دژی تۆ یاخی بوون.
11
به‌ڵام با هه‌موو ئه‌وانه‌ی په‌نا به‌ تۆ ده‌گرن دڵخۆش بن،
با هه‌تاهه‌تایه‌ گۆرانی شادی بڵێن.
ده‌یانخه‌یته‌ ژێر سێبه‌ری خۆته‌وه‌،
هه‌تا هه‌موو ئه‌وانه‌ی ناوی تۆیان خۆشده‌وێت به‌ تۆ شاد بن.
12
چونكه‌ ئه‌ی یه‌زدان، تۆ ڕاستودروستان به‌ره‌كه‌تدار ده‌كه‌یت،
به‌ ڕه‌زامه‌ندی خۆت وه‌ك قه‌ڵغان ده‌وریان ده‌ده‌یت.