عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
گۆرانییه‌ك، زه‌بوورێكی كوڕانی قۆره‌ح. 
1
یه‌زدان مه‌زنه‌ و شایانی هه‌موو ستایشێكه‌،
له‌ شاری خودامان، له‌ كێوی پیرۆزی خۆی.
2
كێوی سییۆن جوانه‌ له‌ به‌رزاییدا،
خۆشی هه‌موو زه‌وییه‌،
وه‌ك لووتكه‌ی شاخی چافۆن[a] ،
شاری پاشای گه‌وره‌یه‌[b] .
3
خودا له‌ناو قه‌ڵاكانی
وه‌ك په‌ناگایه‌ك ناسراوه‌.
4
ئه‌وه‌تا پاشاكان هێزیان كۆكرده‌وه‌،
ئه‌وه‌تا پێكه‌وه‌ هاتنه‌ پێشه‌وه‌،
5
كه‌ بینییان تاسان،
به‌ ترسه‌وه‌ هه‌ڵاتن.
6
له‌وێ له‌رزیان لێهات،
ژانیان گرت، وه‌ك ژن له‌ كاتی منداڵبوون.
7
وه‌ك كه‌شتییه‌كانی ته‌رشیش[c] تێكت شكاندن،
به‌ بای ڕۆژهه‌ڵات ته‌فروتونات كردن.
8
هه‌روه‌ك بیستمان،
ئاواش بینیمان
له‌ شاری یه‌زدانی سوپاسالار،
له‌ شاری خودامان:
«خودا هه‌تاهه‌تایه‌ ده‌یچه‌سپێنێت.»[d]
9
ئه‌ی خودایه‌، له‌ ناوه‌ندی په‌رستگاكه‌ت
بیر له‌ خۆشه‌ویستییه‌ نه‌گۆڕه‌كه‌ت ده‌كه‌ینه‌وه‌.
10
ئه‌ی خودایه‌، وه‌ك ناوت
ستایشت ده‌گاته‌ ئه‌وپه‌ڕی زه‌وی،
ده‌سته‌ ڕاستت پڕه‌ له‌ ڕاستودروستی.
11
كێوی سییۆن شادمان ده‌بێت،
كچانی[e] یه‌هودا دڵخۆش ده‌بن
به‌هۆی دادوه‌رییه‌كانت.
12
به‌ ده‌وری سییۆندا بگه‌ڕێن، به‌ ده‌وریدا بسووڕێنه‌وه‌،
قولله‌كانی بژمێرن،
13
له‌ شووراكانی وردبنه‌وه‌،
بڕواننه‌ قه‌ڵاكانی،
هه‌تا بۆ نه‌وه‌ی داهاتووی باس بكه‌ن.
14
هه‌تاهه‌تایه‌ ئه‌م خودایه‌ خودامانه‌،
تاكو مردنیش ئه‌و ڕابه‌رمانه‌.
  1. a. 48‏:2 شاخی پیرۆز له‌ باكوور، له‌ فینیكیا، كه‌ له‌ ئه‌ندێشه‌ی خه‌ڵك شوێنی نیشته‌جێبوونی خودا بووه‌.
  2. b. 48‏:2 مه‌به‌ست له‌ پاشای گه‌وره‌، خودایه‌. بڕوانه‌ 47‏:2؛ 48‏:1.
  3. c. 48‏:7 جۆره‌ كه‌شتییه‌كی تایبه‌ت بوون كه‌ بۆ بازرگانی به‌كارده‌هێنران.
  4. d. 48‏:8 له‌ ده‌قی عیبری لێره‌ وشه‌ی \+tl سه‌لاه‌\+tl* هه‌یه‌ كه‌ له‌وانه‌یه‌ ئاماژه‌یه‌كه‌ بۆ وه‌ستانی مۆسیقا و خوێندنه‌وه‌.
  5. e. 48‏:11 له‌ كه‌لتوری عیبری به‌ گونده‌كانی ده‌وروبه‌ری شاره‌كان ده‌گوترێ كچانی.