عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
هۆنراوه‌یه‌كی داود كه‌ له‌ ئه‌شكه‌وت بوو. نوێژ. 
1
پڕ به‌ ده‌نگم هاوار بۆ یه‌زدان ده‌كه‌م،
به‌ ده‌نگی به‌رز له‌ یه‌زدان ده‌پاڕێمه‌وه‌.
2
سكاڵای خۆمی له‌به‌رده‌م هه‌ڵده‌ڕێژم،
له‌به‌رده‌می باسی ته‌نگانه‌كانی خۆم ده‌كه‌م.
3
له‌ كاتی وره‌به‌ردانی ڕۆحم،
تۆ شاره‌زای ڕێڕه‌وی منی.
له‌و ڕێگایه‌ی پێیدا ده‌ڕۆم،
خه‌ڵك ته‌ڵه‌یان بۆم ناوه‌ته‌وه‌.
4
ئاوڕ به‌لای ڕاستدا بده‌وه‌ و ببینه‌،
كوا ناسیاوی من؟
په‌ناگا بۆ من قڕبووه‌،
كوا پرسیاركه‌ر له‌ ئه‌حواڵی من؟
5
ئه‌ی یه‌زدان، هاوارم بۆ تۆ كرد،
گوتم: «تۆ په‌ناگای منی،
له‌ خاكی زیندووان تۆ به‌شی منی.»
6
به‌ وردی گوێ له‌ لاوانه‌وه‌م بگره‌،
چونكه‌ زۆر زه‌لیلم،
له‌ ده‌ست ڕاونه‌رانم ده‌ربازم بكه‌،
چونكه‌ له‌ من به‌هێزترن.
7
گیانم له‌ به‌ندیخانه‌ ده‌ربهێنه‌،
بۆ ئه‌وه‌ی ستایشی ناوت بكه‌م.
ئینجا ڕاستودروستان ده‌ورم ده‌گرن،
چونكه‌ چاكه‌م له‌گه‌ڵ ده‌كه‌یت.