عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
א (ئه‌لف)[a]  
1
خۆزگه‌ به‌وانه‌ ده‌خوازرێ كه‌ ڕێگایان ته‌واوه‌،
ئه‌وانه‌ی به‌پێی فێركردنی یه‌زدان ده‌ڕۆن.
2
خۆزگه‌ به‌وانه‌ ده‌خوازرێ كه‌ یاساكه‌ی په‌یڕه‌و ده‌كه‌ن،
به‌ هه‌موو دڵه‌وه‌ به‌دوایدا ده‌گه‌ڕێن.
3
هه‌روه‌ها خراپه‌ ناكه‌ن و
به‌ ڕێگای ئه‌ودا ده‌ڕۆن.
4
تۆ ڕێنماییه‌كانت داوه‌،
بۆ ئه‌وه‌ی خه‌ڵك به‌ ته‌واوی گوێڕایه‌ڵی بن.
5
خۆزگه‌ ڕێگاكانم بچه‌سپابوونایه‌
له‌ به‌جێگه‌یاندنی فه‌رزه‌كانت!
6
ئه‌و كاته‌ شه‌رمه‌زار نه‌ده‌بووم،
كه‌ ده‌مڕوانییه‌ هه‌موو ڕاسپارده‌كانت.
7
به‌ دڵی پاكه‌وه‌ ستایشت ده‌كه‌م،
كاتێك فێری حوكمه‌ ڕاستودروسته‌كانت ده‌بم.
8
فه‌رزه‌كانت به‌جێده‌هێنم،
به‌ ته‌واوی وازم لێ مه‌هێنه‌.
ב (بێت) 
9
گه‌نج به‌ چی هه‌ڵسوكه‌وتی خۆی بێگه‌رد ده‌كات؟
به‌ پاراستنی وشه‌كانت.
10
به‌ هه‌موو دڵه‌وه‌ به‌دوای تۆدا ده‌گه‌ڕێم،
مه‌هێڵه‌ له‌ ڕاسپارده‌كانت گومڕابم.
11
وشه‌كانی تۆم له‌ناو دڵم شاردووه‌ته‌وه‌،
تاكو له‌ دژی تۆ گوناه نه‌كه‌م.
12
ئه‌ی یه‌زدان، ستایش بۆ تۆ!
فێری فه‌رزه‌كانی خۆتم بكه‌.
13
به‌ لێوه‌كانی خۆم،
باسی هه‌موو حوكمه‌كانی ده‌می تۆ ده‌كه‌م.
14
به‌ په‌یڕه‌وكردنی یاساكانت شاد ده‌بم،
وه‌ك كه‌سێك سامانێكی زۆر ده‌بینێته‌وه‌.
15
له‌ ڕێنماییه‌كانت ورد ده‌بمه‌وه‌،
چاو ده‌بڕمه‌ ڕێگاكانت.
16
به‌ فه‌رزه‌كانت دڵخۆش ده‌بم،
وشه‌كانی تۆم له‌ یاد ناچێت.
ג (گیمێل) 
17
چاكه‌ له‌گه‌ڵ خزمه‌تكاری خۆت بكه‌،
تاكو بژیم و گوێڕایه‌ڵی فه‌رمانه‌كه‌ت بم.
18
چاوم بكه‌ره‌وه‌ تاكو ئه‌وانه‌ ببینم،
كرده‌وه‌ سه‌رسوڕهێنه‌ره‌كان له‌ فێركردنت.
19
من نامۆم له‌ زه‌وی،
ڕاسپارده‌كانی خۆتم لێ مه‌شاره‌وه‌.
20
گیانم توایه‌وه‌ له‌ تامه‌زرۆیی
بۆ حوكمه‌كانت له‌ هه‌موو كاتێك.
21
سه‌رزه‌نشتی لووت به‌رزه‌ نه‌فره‌ت لێكراوه‌كانت كرد،
كه‌ له‌ ڕاسپارده‌كانی تۆ گومڕا بوون.
22
ڕیسوایی و سووكایه‌تیم له‌سه‌ر لابه‌،
چونكه‌ یاسای تۆم په‌یڕه‌و كردووه‌.
23
هه‌رچه‌نده‌ میره‌كان داده‌نیشن و له‌ دژم پیلان ده‌گێڕن،
به‌ڵام خزمه‌تكاره‌كه‌ت له‌ فه‌رزه‌كانت ورد ده‌بێته‌وه‌.
24
یاساكانت شادمانی منن،
ئه‌وانه‌ ڕاوێژكاره‌كانی منن.
(دالێت) 
25
گیانم به‌ خۆڵه‌وه‌ نووساوه‌،
به‌گوێره‌ی به‌ڵێنی خۆت بمژیێنه‌وه‌.
26
باسی ڕێگاكانی خۆمم كرد، تۆ به‌ده‌نگمه‌وه‌ هاتیت،
فه‌رزه‌كانی خۆتم فێر بكه‌.
27
ڕێگای ڕێنماییه‌كانی خۆتم تێبگه‌یه‌نه‌،
له‌ كاره‌ سه‌رسوڕهێنه‌ره‌كانت ورد ده‌بمه‌وه‌.
28
گیانم له‌ خه‌فه‌تان توایه‌وه‌،
به‌گوێره‌ی به‌ڵێنی خۆت به‌هێزم بكه‌.
29
ڕێگای درۆم لێ دووربخه‌وه‌،
له‌گه‌ڵم میهره‌بان به‌ و فێری ته‌وراتی خۆتم بكه‌.
30
ڕێگای ڕاستیم هه‌ڵبژاردووه‌،
حوكمه‌كانی تۆم خستووه‌ته‌ به‌رچاوم.
31
ده‌ست به‌ یاساكانی تۆوه‌ ده‌گرم،
ئه‌ی یه‌زدان، ڕێ مه‌ده‌ شه‌رمه‌زار بم!
32
به‌ ڕاكردن له‌سه‌ر ڕێگای ڕاسپارده‌كانت ده‌ڕۆم،
چونكه‌ دڵی منت ئازاد كرد.
ה (هێی) 
33
ئه‌ی یه‌زدان، فێری ڕێگای فه‌رزه‌كانی خۆتم بكه‌،
هه‌تا كۆتایی به‌جێیان ده‌هێنم.
34
تێمبگه‌یه‌نه‌ و فێركردنت په‌یڕه‌و ده‌كه‌م،
به‌ هه‌موو دڵه‌وه‌ گوێڕایه‌ڵی ده‌بم.
35
بمخه‌ سه‌ر ڕێگای ڕاسپارده‌كانت،
چونكه‌ دڵخۆشم ده‌كه‌ن.
36
دڵم بخه‌ره‌ سه‌ر یاساكانت،
نه‌ك سه‌ر قازانج.
37
چاوم وه‌رگێڕه‌ له‌ ته‌ماشاكردنی شتی پووچ،
له‌ ڕێگای خۆتدا بمبوژێنه‌وه‌.
38
به‌ڵێنی خۆت بۆ خزتمه‌تكاره‌كه‌ت بهێنه‌ دی،
ئه‌وه‌ی به‌وانه‌ت داوه‌ كه‌ لێت ده‌ترسن.
39
ئه‌و سووكایه‌تییه‌م له‌سه‌ر لابه‌ كه‌ لێی ده‌ترسم،
چونكه‌ حوكمه‌كانت چاكن.
40
ئه‌وه‌تا په‌رۆشی ڕێنماییه‌كانی تۆم،
به‌ ڕاستودروستی خۆت بمژیێنه‌وه‌.
ו (ڤاڤ) 
41
ئه‌ی یه‌زدان، با خۆشه‌ویستییه‌ نه‌گۆڕه‌كه‌تم بۆ بێت،
ڕزگارییه‌كه‌ت به‌گوێره‌ی به‌ڵێنی خۆت،
42
جا وه‌ڵامی ئه‌وه‌ ده‌ده‌مه‌وه‌ كه‌ گاڵته‌م پێ ده‌كات،
چونكه‌ پشتم به‌ به‌ڵێنی تۆ به‌ستووه‌.
43
وشه‌ی ڕاست هه‌رگیز له‌ ده‌مم دوور مه‌خه‌وه‌،
چونكه‌ ئومێدم به‌ حوكمه‌كانی تۆ هه‌یه‌.
44
به‌ به‌رده‌وامی گوێڕایه‌ڵی فێركردنی تۆ ده‌بم،
هه‌تاهه‌تایه‌ و هه‌تاسه‌ر.
45
به‌ ئازادی ده‌ڕۆم،
چونكه‌ داواكاری ڕێنماییه‌كانی تۆم.
46
له‌به‌رده‌م پاشاكانیش باسی یاساكانی تۆ ده‌كه‌م،
شه‌رمه‌زاریش نابم.
47
خۆشی له‌ ڕاسپارده‌كانت ده‌بینم،
چونكه‌ حه‌زم لێیانه‌.
48
ده‌ست بۆ ڕاسپارده‌كانت به‌رز ده‌كه‌مه‌وه‌، ئه‌وه‌ی خۆشم ده‌وێت،
سه‌رنج ده‌ده‌مه‌ فه‌رزه‌كانت.
ז (زاین) 
49
په‌یمانی خۆت له‌بیر بێت بۆ خزمه‌تكاره‌كه‌ت،
چونكه‌ هیوات پێم داوه‌.
50
له‌ كاتی ته‌نگانه‌مدا دڵنه‌وایی من ئه‌مه‌یه‌:
به‌ڵێنه‌كه‌ت منی ژیانده‌وه‌.
51
لووتبه‌رزه‌كان زۆر گاڵته‌م پێ ده‌كه‌ن،
به‌ڵام من له‌ فێركردنی تۆ لام نه‌داوه‌.
52
ئه‌ی یه‌زدان، حوكمه‌ له‌مێژینه‌كانی تۆم هاته‌وه‌ یاد،
دڵنه‌واییم هاته‌وه‌.
53
له‌به‌ر به‌دكاران تووڕه‌ییم جۆشا،
ئه‌وانه‌ی وازیان له‌ فێركردنی تۆ هێناوه‌.
54
فه‌رزه‌كانت بوونه‌ بابه‌ت گۆرانییه‌كانم،
له‌ ماڵی ئاواره‌ییم.
55
ئه‌ی یه‌زدان، به‌ شه‌و یادی ناوی تۆ ده‌كه‌مه‌وه‌ و
گوێڕایه‌ڵی فێركردنت ده‌بم.
56
ئه‌م نه‌ریته‌ بۆ من بوو:
ڕێنماییه‌كانی تۆم په‌یڕه‌و كرد.
ח (حێیت) 
57
ئه‌ی یه‌زدان، تۆ به‌شی منی،
به‌ڵێنم داوه‌ گوێڕایه‌ڵی فه‌رمانه‌كانت بم.
58
به‌ هه‌موو دڵه‌وه‌ داوای ڕه‌زامه‌ندی تۆ ده‌كه‌م،
به‌پێی به‌ڵێنی خۆت له‌گه‌ڵم میهره‌بان به‌.
59
له‌ ڕێگای خۆم ڕامام،
پێم به‌ره‌و یاساكانت وه‌رگێڕایه‌وه‌.
60
خێرا بووم و دوا نه‌كه‌وتم
له‌ به‌جێگه‌یاندنی ڕاسپارده‌كانت.
61
گوریسی به‌دكاره‌كان منیان به‌ستاوه‌ته‌وه‌،
به‌ڵام فێركردنی تۆ له‌بیر ناكه‌م.
62
له‌ نیوه‌شه‌ودا هه‌ڵده‌ستم بۆ ئه‌وه‌ی ستایشت بكه‌م
له‌سه‌ر حوكمه‌ ڕاستودروسته‌كانت.
63
من هاوڕێی هه‌موو ئه‌وانه‌م له‌ تۆ ده‌ترسن،
له‌وانه‌ی ڕێنماییه‌كانت په‌یڕه‌و ده‌كه‌ن.
64
ئه‌ی یه‌زدان، خۆشه‌ویستییه‌ نه‌گۆڕه‌كه‌ت زه‌وی پڕكردووه‌،
فه‌رزه‌كانی خۆتم فێر بكه‌.
ט (تێیت) 
65
ئه‌ی یه‌زدان، چاكه‌ت له‌گه‌ڵ خزمه‌تكاره‌كه‌ت كرد،
به‌گوێره‌ی به‌ڵێنی خۆت.
66
هه‌ستی باش و زانینم فێر بكه‌،
چونكه‌ باوه‌ڕم به‌ ڕاسپارده‌كانت هه‌یه‌.
67
به‌ر له‌وه‌ی زه‌لیل بم گومڕا بووم،
به‌ڵام ئێستا گوێڕایه‌ڵی فه‌رمایشته‌كه‌ت ده‌بم.
68
تۆ چاكیت و چاكه‌كاری،
فه‌رزه‌كانی خۆتم فێر بكه‌.
69
لووتبه‌رزان درۆم بۆ هه‌ڵده‌به‌ستن،
به‌ڵام من به‌ هه‌موو دڵه‌وه‌ ڕێنماییه‌كانت په‌یڕه‌و ده‌كه‌م.
70
دڵیان وه‌ك پیو بێ هه‌سته‌،
به‌ڵام فێركردنت شادییه‌ بۆ من.
71
چاك بوو بۆ من كه‌ زه‌لیل بم،
بۆ ئه‌وه‌ی فێری فه‌رزه‌كانت بم.
72
فێركردنی ده‌می تۆ،
له‌ هه‌زار زێڕ و زیو باشتره‌ بۆ من.
י (یۆد) 
73
ده‌ستی تۆ دروستی كردم و دایڕشتم،
تێمبگه‌یه‌نه‌ هه‌تا فێری ڕاسپارده‌كانت بم.
74
ئه‌وانه‌ی لێت ده‌ترسن شادمان ده‌بن كاتێك ده‌مبینن،
چونكه‌ من هیوام به‌ به‌ڵێنی تۆ هه‌یه‌.
75
ئه‌ی یه‌زدان، زانیم كه‌ حوكمه‌كانت ڕاستودروسته‌،
به‌ دڵسۆزی زه‌لیلیت كردم.
76
با خۆشه‌ویستییه‌ نه‌گۆڕه‌كه‌ت بۆ دڵنه‌واییم بێت،
به‌پێی به‌ڵێنه‌كه‌ت بۆ خزمه‌تكاره‌كه‌ت.
77
با به‌زه‌ییت بێته‌ لام بۆ ئه‌وه‌ی بژیم،
چونكه‌ فێركردنی تۆ شادمانییه‌ بۆ من.
78
با لووتبه‌رزان شه‌رمه‌زار بن، چونكه‌ بوختانیان بۆ هه‌ڵبه‌ستم،
به‌ڵام من سه‌رنج ده‌ده‌مه‌ ڕێنماییه‌كانت.
79
با ئه‌وانه‌ی لێت ده‌ترسن بگه‌ڕێنه‌وه‌ لای من،
ئه‌وانه‌ی له‌ یاساكانی تۆ تێده‌گه‌ن.
80
با دڵم ته‌واو بێت له‌ فه‌رزه‌كانت،
بۆ ئه‌وه‌ی شه‌رمه‌زار نه‌بم.
כ (كاف) 
81
گیانم په‌رۆشی ڕزگاریی تۆیه‌،
ئومێدم به‌ به‌ڵێنی تۆیه‌.
82
چاوم كز بوو له‌ چاوه‌ڕوانی به‌ڵێنه‌كه‌ت،
ده‌پرسم: «كه‌ی دڵنه‌واییم ده‌كه‌یت؟»
83
هه‌رچه‌نده‌ وه‌ك مه‌شكه‌یه‌كی پڕ دووكه‌ڵم[b] لێهاتووه‌،
فه‌رزه‌كانی تۆم له‌یاد نه‌كردووه‌.
84
خزمه‌تكاره‌كه‌ت ده‌بێ چه‌ند ڕۆژ چاوه‌ڕێ بكات؟
كه‌ی حوكم ده‌ده‌یت به‌سه‌ر ئه‌وانه‌ی من ده‌چه‌وسێننه‌وه‌؟
85
لووتبه‌رزان چاڵیان بۆم هه‌ڵكه‌ندووه‌،
ئه‌مه‌ش به‌گوێره‌ی فێركردنی تۆ نییه‌!
86
هه‌موو ڕاسپارده‌كانت جێی متمانه‌ن،
فریام بكه‌وه‌، چونكه‌ به‌ فێڵ ده‌مچه‌وسێننه‌وه‌!
87
وه‌خته‌ له‌سه‌ر زه‌وی كۆتاییم پێ بهێنن،
به‌ڵام من ده‌ستبه‌رداری ڕێنماییه‌كانی تۆ نه‌بووم.
88
به‌پێی خۆشه‌ویستییه‌ نه‌گۆڕه‌كه‌ت بمژیێنه‌وه‌،
یاساكانی ده‌می تۆ په‌یڕه‌و ده‌كه‌م.
ל (لامد) 
89
ئه‌ی یه‌زدان، فه‌رمایشتی تۆ هه‌تاهه‌تاییه‌،
له‌ ئاسمان چه‌سپاوه‌.
90
دڵسۆزیت نه‌وه‌ دوای نه‌وه‌یه‌،
زه‌ویت دامه‌زراند و ده‌مێنێت.
91
ئه‌وان به‌ حوكمه‌كانی تۆ هه‌تا ئه‌مڕۆ ماون،
چونكه‌ هه‌مووان خزمه‌تكاری تۆن.
92
ئه‌گه‌ر فێركردنی تۆ سه‌رچاوه‌ی شادیم نه‌ده‌بوو،
به‌ زه‌لیلی خۆم له‌ناوده‌چووم.
93
هه‌رگیز ڕێنماییه‌كانت له‌بیرناكه‌م،
چونكه‌ به‌وان منت ژیانده‌وه‌.
94
من هی تۆم، ڕزگارم بكه‌،
چونكه‌ به‌دوای ڕێنماییه‌كانی تۆدا گه‌ڕاوم.
95
به‌دكاره‌كان خۆیان بۆم ماتداوه‌ هه‌تا بمفه‌وتێنن،
به‌ڵام من له‌ یاساكانی تۆ ڕاده‌مێنم.
96
بۆ هه‌موو ته‌واوییه‌ك سنوورم بینی،
به‌ڵام ڕاسپارده‌ی تۆ زۆر فراوانه‌.
מ (میم) 
97
چه‌ند حه‌زم له‌ فێركردنی تۆیه‌!
به‌ درێژایی ڕۆژ لێی ورد ده‌بمه‌وه‌.
98
به‌هۆی ڕاسپارده‌كانت له‌ دوژمنه‌كانم داناتر بووم،
چونكه‌ هه‌تاهه‌تایه‌ بۆ منه‌.
99
له‌ هه‌موو مامۆستاكانم هۆشمه‌ندتر بووم،
چونكه‌ له‌ یاساكانت ورد ده‌بمه‌وه‌.
100
له‌ پیره‌كان زیاتر تێده‌گه‌م،
چونكه‌ ڕێنماییه‌كانت په‌یڕه‌و ده‌كه‌م.
101
پێی خۆمم قه‌ده‌غه‌ كردووه‌ له‌ هه‌موو ڕێگایه‌كی خراپ،
بۆ ئه‌وه‌ی گوێڕایه‌ڵی فه‌رمانی تۆ بم.
102
له‌ حوكمه‌كانی تۆ لام نه‌داوه‌،
چونكه‌ تۆ خۆت فێرت كردووم.
103
به‌ڵێنه‌كانت چه‌ند شیرینن بۆ زمانم،
له‌ هه‌نگوین شیرینترن بۆ ده‌مم.
104
له‌ ڕێنماییه‌كانی تۆ تێگه‌یشتنم به‌ده‌ستهێنا،
بۆیه‌ ڕقم له‌ هه‌موو ڕێگایه‌كی خواره‌.
נ (نون) 
105
وشه‌كانی تۆ چران بۆ پێیه‌كانم،
ڕووناكییه‌ بۆ ڕێگام.
106
سوێندم خواردووه‌ و به‌جێی ده‌هێنم،
كه‌ ملكه‌چی حوكمه‌ ڕاستودروسته‌كانت ده‌بم.
107
ئه‌ی یه‌زدان، زۆر ئازارم چێژتووه‌،
جا به‌پێی به‌ڵێنی خۆت بمژیێنه‌وه‌.
108
ئه‌ی یه‌زدان، به‌ ستایشه‌ خۆویسته‌كانی ده‌مم ڕازی به‌،
حوكمه‌كانی خۆتم فێر بكه‌.
109
هه‌میشه‌ گیانم له‌ناو ده‌ستمدایه‌،
به‌ڵام فێركردنی تۆ له‌بیرناكه‌م.
110
به‌دكاران ته‌ڵه‌یان بۆم ناوه‌ته‌وه‌،
به‌ڵام من له‌ ڕێنماییه‌كانی تۆ گومڕا نابم.
111
یاساكانت هه‌تاهه‌تایه‌ گه‌نجینه‌ن بۆ من،
چونكه‌ ئه‌وان شادی دڵمن.
112
دڵم بۆ به‌جێهێنانی فه‌رزه‌كانت ته‌رخان ده‌كه‌م،
هه‌تاهه‌تایه‌ و هه‌تا كۆتایی.
ס (سامخ) 
113
ڕقم له‌ كه‌سانی دوودڵه‌،
حه‌زم له‌ فێركردنی تۆیه‌.
114
تۆ په‌ناگا و قه‌ڵغانی منیت،
هیوام به‌ به‌ڵێنی تۆیه‌.
115
ئه‌ی به‌دكاره‌كان، لێم دوور بكه‌ونه‌وه‌،
تاكو ڕاسپارده‌كانی خودای خۆم په‌یڕه‌و بكه‌م.
116
به‌پێی به‌ڵێنه‌كه‌ی خۆت پشتم بگره‌ هه‌تا بژیم،
له‌ ئومێدی خۆم شه‌رمه‌زارم مه‌كه‌.
117
پشتم بگره‌ و ڕزگارده‌بم،
هه‌میشه‌ چاوم له‌ فه‌رزه‌كانت ده‌بێت.
118
هه‌موو ئه‌وانه‌ی له‌ فه‌رزه‌كانی تۆ گومڕا بوون ڕه‌تیان ده‌كه‌یته‌وه‌،
چونكه‌ فێڵه‌كه‌یان پووچه‌.
119
هه‌موو به‌دكارانی زه‌وی وه‌ك خڵت جیا ده‌كه‌یته‌وه‌،
بۆیه‌ حه‌زم له‌ یاساكانته‌.
120
له‌شم له‌ تۆقینی تۆ ده‌له‌رزێت و
له‌ حوكمه‌كانت ده‌ترسم.
ע (عه‌ین) 
121
دادپه‌روه‌ری و ڕاستودروستیم به‌جێهێناوه‌،
ڕاده‌ستی زۆردارم مه‌كه‌.
122
به‌ڵێن بده‌ چاكه‌ له‌گه‌ڵ خزمه‌تكاری خۆت بكه‌یت،
با لووتبه‌رزه‌كان سته‌مم لێ نه‌كه‌ن.
123
چاوم شل بوو له‌ په‌رۆشیم بۆ ڕزگارییه‌كه‌ت،
بۆ به‌ڵێنی ڕاستودروستیت[c] .
124
به‌پێی خۆشه‌ویستییه‌ نه‌گۆڕه‌كه‌ت له‌گه‌ڵ خزمه‌تكاره‌كه‌ت ڕه‌فتار بكه‌،
فێری فه‌رزه‌كانی خۆتم بكه‌.
125
من خزمه‌تكاری تۆم، تێمبگه‌یه‌نه‌،
بۆ ئه‌وه‌ی له‌ یاساكانت تێبگه‌م.
126
كاتی كاركردنه‌ بۆ یه‌زدان،
چونكه‌ فێركردنی تۆ شكێنراوه‌.
127
له‌به‌ر ئه‌وه‌ی حه‌ز له‌ ڕاسپارده‌كانت ده‌كه‌م
زیاتر له‌ زێڕ، له‌ زێڕی پوخته‌كراو،
128
هه‌روه‌ها له‌به‌ر ئه‌وه‌ی هه‌موو ڕێنماییه‌كانت به‌ ڕاست ده‌زانم،
ڕقم له‌ هه‌موو ڕێگایه‌كی خواره‌.
פ (پێ) 
129
یاساكانت سه‌رسوڕهێنه‌ره‌،
بۆیه‌ گیانم په‌یڕه‌ویان ده‌كات.
130
ڕوونكردنه‌وه‌ی فه‌رمایشته‌كانت ڕووناكی ده‌به‌خشێت،
تێگه‌یشتنیش به‌ نه‌زانه‌كان.
131
ده‌مم كرده‌وه‌ و هه‌ناسه‌بڕكێمه‌،
چونكه‌ په‌رۆشی ڕاسپارده‌كانی تۆم.
132
ئاوڕم لێ بده‌وه‌ و له‌گه‌ڵم میهره‌بان به‌،
وه‌ك حوكمت بۆ ئه‌وانه‌ی ناوی تۆیان خۆشده‌وێت.
133
هه‌نگاوه‌كانم له‌سه‌ر وته‌كه‌ت بچه‌سپێنه‌،
مه‌هێڵه‌ هیچ گوناهێك به‌سه‌رمدا زاڵ بێت.
134
له‌ زۆرداری مرۆڤ بمكڕه‌وه‌،
بۆ ئه‌وه‌ی ڕێنماییه‌كانی تۆ په‌یڕه‌و بكه‌م.
135
ڕووت به‌سه‌ر خزمه‌تكاری خۆتدا بدره‌وشێنه‌وه‌،
فێری فه‌رزه‌كانی خۆتم بكه‌.
136
جۆگه‌ی ئاو له‌ چاوه‌كانم داده‌ڕژێت،
چونكه‌ فێركردنت په‌یڕه‌و ناكرێت.
צ (تسادێ) 
137
ئه‌ی یه‌زدان، تۆ ڕاستودروستیت،
حوكمه‌كانت ڕاستن.
138
ئه‌و یاسایانه‌ی ده‌رتكردووه‌ ڕاستودروستن و
به‌ ته‌واوی جێی متمانه‌ن.
139
دڵگه‌رمیم سووتاندمی،
چونكه‌ دوژمنانم فه‌رمانه‌كانی تۆیان له‌بیر كردووه‌.
140
به‌ڵێنی تۆ زۆر تاقیكراوه‌ته‌وه‌،
خزمه‌تكاره‌كه‌ت حه‌زی لێیه‌تی.
141
من بچووك و ڕیسوام،
به‌ڵام ڕێنماییه‌كانت له‌ یاد ناكه‌م.
142
ڕاستودروستیت هه‌تاهه‌تایی ته‌واوه‌ و
فێركردنت ڕاسته‌.
143
ته‌نگانه‌ و ناخۆشیم تووشبووه‌،
به‌ڵام ڕاسپارده‌كانت شادی منن.
144
یاساكانت هه‌تاهه‌تایه‌ ڕاستودروستن،
تێمبگه‌یه‌نه‌ بۆ ئه‌وه‌ی بژیم.
ק (قۆف) 
145
پڕ به‌ دڵ هاوار ده‌كه‌م، ئه‌ی یه‌زدان، وه‌ڵامم بده‌وه‌،
فه‌رزه‌كانت به‌جێده‌هێنم.
146
هاوار بۆ تۆ ده‌كه‌م، ڕزگارم بكه‌!
یاساكانت په‌یڕه‌و ده‌كه‌م.
147
پێش به‌ره‌به‌یان هه‌ڵده‌ستم و هاوارت بۆ ده‌هێنم،
ئومێدم به‌ به‌ڵێنی تۆ هه‌یه‌.
148
به‌ درێژایی شه‌و به‌ئاگام،
بۆ ئه‌وه‌ی له‌ به‌ڵێنه‌كانت وردببمه‌وه‌.
149
به‌گوێره‌ی خۆشه‌ویستییه‌ نه‌گۆڕه‌كه‌ت گوێ له‌ ده‌نگم بگره‌،
ئه‌ی یه‌زدان، به‌گوێره‌ی حوكمه‌كانت[d] بمژیێنه‌وه‌.
150
پیلانگێڕان نزیك بوونه‌وه‌،
له‌ فێركردنی تۆ دووركه‌وتوونه‌ته‌وه‌.
151
به‌ڵام ئه‌ی یه‌زدان، تۆ زۆر نزیكیت،
هه‌موو ڕاسپارده‌كانت ڕاستن.
152
له‌مێژه‌ له‌ یاساكانت ده‌زانم،
كه‌ بۆ هه‌تاهه‌تایه‌ داتناوه‌.
ר (ڕێیش) 
153
سه‌یری ئازارم بكه‌ و ده‌ربازم بكه‌،
چونكه‌ فێركردنی تۆ له‌بیر ناكه‌م.
154
پارێزه‌ری له‌ گرفته‌كه‌م بكه‌ و بمكڕه‌وه‌،
به‌گوێره‌ی به‌ڵێنه‌كه‌ت بمژیێنه‌وه‌.
155
ڕزگاری له‌ به‌دكاران دووره‌،
چونكه‌ به‌دوای فه‌رزه‌كانتدا ناگه‌ڕێن.
156
ئه‌ی یه‌زدان، به‌زه‌ییت زۆره‌،
به‌گوێره‌ی حوكمه‌كانت بمژیێنه‌وه‌.
157
دوژمنانم و ئه‌وانه‌ی ده‌مچه‌وسێننه‌وه‌ زۆرن،
به‌ڵام له‌ یاساكانی تۆ لام نه‌داوه‌.
158
خیانه‌تكارانم بینی بێزم هاته‌وه‌،
چونكه‌ گوێڕایه‌ڵی فه‌رمانه‌كانت نه‌بوون.
159
ببینه‌ چه‌نده‌ حه‌زم له‌ ڕێنماییه‌كانته‌،
ئه‌ی یه‌زدان، به‌گوێره‌ی خۆشه‌ویستییه‌ نه‌گۆڕه‌كه‌ت بمژیێنه‌وه‌.
160
هه‌موو وشه‌كانی تۆ ڕاستییه‌،
هه‌موو حوكمه‌ ڕاستودروسته‌كانی هه‌تاهه‌تایین.
ש (شین) 
161
میره‌كان به‌بێ هۆ ده‌مچه‌وسێننه‌وه‌،
به‌ڵام دڵم له‌ فه‌رمایشتی تۆ ده‌تۆقێت.
162
به‌ به‌ڵێنه‌كانت دڵشاد ده‌بم،
وه‌ك یه‌كێك ده‌ستكه‌وتێكی زۆری چنگكه‌وتبێت.
163
ڕقم له‌ درۆیه‌ و قێزم لێی ده‌بێته‌وه‌،
به‌ڵام حه‌زم له‌ فێركردنی تۆیه‌.
164
ڕۆژانه‌ حه‌وت جار ستایشت ده‌كه‌م،
بۆ حوكمه‌ ڕاستودروسته‌كانت.
165
ئاشتیێكی گه‌وره‌ بۆ ئه‌وانه‌ی حه‌ز له‌ فێركردنت ده‌كه‌ن،
هیچ شتێك بۆیان نابێته‌ كۆسپ.
166
ئه‌ی یه‌زدان، هیوام به‌ ڕزگاریی تۆیه‌،
ڕاسپارده‌كانی تۆم په‌یڕه‌و كرد.
167
گیانم یاساكانت په‌یڕه‌و ده‌كات،
چونكه‌ زۆر حه‌زم لێیه‌تی.
168
ڕێنمایی و یاساكانی تۆ په‌یڕه‌و ده‌كه‌م،
چونكه‌ هه‌موو ڕێگاكانم له‌به‌رده‌متن.
ת (تاو) 
169
ئه‌ی یه‌زدان، با هاوارم بگاته‌ به‌رده‌مت،
به‌گوێره‌ی په‌یمانی خۆت تێمبگه‌یه‌نه‌.
170
با پاڕانه‌وه‌م بێته‌ به‌رده‌مت،
به‌گوێره‌ی به‌ڵێنه‌كه‌ت ده‌ربازم بكه‌.
171
با لێوم ستایشی لێ بڕژێت،
چونكه‌ فێری فه‌رزه‌كانی خۆتم ده‌كه‌یت.
172
با زمانم گۆرانی به‌سه‌ر وته‌كه‌تدا بڵێ،
چونكه‌ هه‌موو ڕاسپارده‌كانت ڕاستودروستن.
173
با ده‌ستت ئاماده‌بێت بۆ یارمه‌تیم،
چونكه‌ ڕێنماییه‌كانی تۆم هه‌ڵبژاردووه‌.
174
ئه‌ی یه‌زدان، من به‌ په‌رۆشم بۆ ڕزگاریی تۆ،
فێركردنت شادی منه‌.
175
با گیانم بژیێته‌وه‌ بۆ ئه‌وه‌ی ستایشت بكه‌م،
حوكمه‌كانت یارمه‌تیم بدات.
176
وه‌ك به‌رخی وێڵ گومڕا بووم،
به‌دوای خزمه‌تكاره‌كه‌تدا بگه‌ڕێ،
چونكه‌ ڕاسپارده‌كانی تۆم له‌بیر نه‌كردووه‌.
  1. a. 119‏:0 ڕێكخستنی پیته‌كان به‌پێی ڕێكخستنی عیبرییه‌ \+tl ئه‌لف، بێت، گیمێل\+tl*… هتد، له‌ ده‌قه‌ عیبرییه‌كه‌ سه‌ری دێڕه‌كان به‌و پیته‌ ده‌ستپێده‌كه‌ن كه‌ له‌ژێر به‌شی ئه‌و پیته‌ن.
  2. b. 119‏:83 به‌ مه‌به‌ست وشك و بێ سووده‌.
  3. c. 119‏:123 مه‌به‌ستی له‌ به‌جێهێنانی به‌ڵێنی ڕاستودروسته‌.
  4. d. 119‏:149 مه‌به‌ست له‌ بڕیاری خودایه‌ به‌گوێره‌ی په‌یمانی خۆی بۆ به‌خشینی ژیانی هه‌تاهه‌تایی بۆ بێتاوانكراوان.