عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
1
یه‌زدانم خۆشده‌وێت،
چونكه‌ گوێ له‌ ده‌نگ و له‌ پاڕانه‌وه‌م ده‌گرێت،
2
چونكه‌ گوێی خۆی بۆم شل كرد،
هه‌تا ماوم هه‌ر لێ ده‌پاڕێمه‌وه‌.
3
تۆڕی مه‌رگ ده‌وری دام،
ناخۆشی جیهانی مردووان كه‌وته‌ سه‌رم،
ده‌رد و ته‌نگانه‌م چێژت.
4
به‌ ناوی یه‌زدانه‌وه‌ ده‌پاڕێمه‌وه‌:
«ئه‌ی یه‌زدان، تكات لێ ده‌كه‌م، گیانم ده‌رباز بكه‌!»
5
یه‌زدان میهره‌بان و ڕاستودروسته‌،
خودامان به‌ به‌زه‌ییه‌.
6
یه‌زدان چاودێری خه‌ڵكی ساكار ده‌كات،
كاتێك زه‌لیل بووم، ئه‌و ڕزگاری كردم.
7
ئه‌ی گیانی من، بگه‌ڕێوه‌ بۆ ئارامی خۆت،
چونكه‌ یه‌زدان چاكه‌ی به‌سه‌رتدا باراند.
8
تۆ گیانی منت له‌ مردن ڕزگار كرد،
چاوه‌كانم له‌ فرمێسك،
پێیه‌كانم له‌ خزان،
9
تاكو دۆستایه‌تی یه‌زدان بكه‌م
له‌ خاكی زیندووان.
10
باوه‌ڕم كرد، بۆیه‌ قسه‌م كرد:
«من زۆر ده‌رده‌دارم!»
11
من له‌ كاتی تۆقینه‌كه‌مدا، گوتم:
«مرۆڤ هه‌موو درۆزنن!»
12
چی بده‌مه‌وه‌ یه‌زدان،
به‌رامبه‌ر هه‌موو چاكه‌كانی بۆ من.
13
جامی ڕزگاری به‌رز ده‌كه‌مه‌وه‌ و
به‌ ناوی یه‌زدانه‌وه‌ ده‌پاڕێمه‌وه‌.
14
نه‌زره‌كانم بۆ یه‌زدان به‌جێده‌هێنم،
به‌رامبه‌ر به‌ هه‌موو گه‌له‌كه‌ی.
15
یه‌زدان مردنی خۆشه‌ویستانی
له‌به‌رچاو سه‌نگینه‌.
16
ئه‌ی یه‌زدان، من به‌ ڕاستی خزمه‌تكاری تۆم،
من خزمه‌تكاری تۆم، كوڕی كه‌نیزه‌كه‌ت،
تۆ كۆته‌كانی منت كرده‌وه‌.
17
قوربانی سوپاسگوزاری بۆ تۆ سه‌رده‌بڕم،
به‌ ناوی یه‌زدانه‌وه‌ ده‌پاڕێمه‌وه‌.
18
نه‌زره‌كانم بۆ یه‌زدان به‌جێده‌هێنم،
به‌رامبه‌ر به‌ هه‌موو گه‌له‌كه‌ی،
19
له‌ حه‌وشه‌ی ماڵی یه‌زداندا،
له‌ ناوه‌ندی تۆدا، ئه‌ی ئۆرشه‌لیم.
هه‌لیلویا!