عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
قسه‌ی ئاگور 
1
قسه‌ی ئاگوری كوڕی یاقه‌ و سروشه‌كه‌ی:
ئه‌م پیاوه‌ بۆ ئیتیێلی[a] ڕاگه‌یاند
بۆ ئیتیێل و بۆ ئوخال:
2
«من له‌ هه‌موو مرۆڤێك ده‌به‌نگترم،
تێگه‌یشتنی مرۆڤانه‌م نییه‌.
3
فێری دانایی نه‌بووم و
ناسینی خودای پیرۆزم نییه‌.
4
كێ به‌رزبووه‌وه‌ بۆ ئاسمان و هاته‌ خواره‌وه‌؟
كێ بای له‌ناو هه‌ردوو له‌پی خۆی كۆكرده‌وه‌؟
كێ ئاوی له‌ناو جلدا پێچایه‌وه‌؟
كێ هه‌موو لایه‌كی زه‌وی دامه‌زراند؟
ناوی چییه‌؟ ناوی كوڕه‌كه‌ی چییه‌؟
ئه‌گه‌ر ده‌یزانیت پێم بڵێ!
5
«هه‌موو وشه‌یه‌كی خودا بێگه‌رده‌،
قه‌ڵغانه‌ بۆ ئه‌وانه‌ی په‌نای بۆ ده‌به‌ن.
6
هیچ شتێك بۆ وشه‌كانی زیاد مه‌كه‌،
نه‌وه‌ك سه‌رزه‌نشتت بكات و به‌ درۆزن ده‌ربچیت.
7
«ئه‌ی یه‌زدان، دوو شتم لێ داوا كردیت،
لێمی قه‌ده‌غه‌ مه‌كه‌ پێش مردنم:
8
شتی پووچ و قسه‌ی درۆم لێ دووربخه‌وه‌،
هه‌ژاری یان ده‌وڵه‌مه‌ندیم مه‌ده‌رێ،
نانی پێویستی خۆم ده‌رخوارد بده‌.
9
نه‌وه‌ك تێر بم و نكۆڵیت لێبكه‌م و
بڵێم: ”یه‌زدان كێیه‌؟“
یان نه‌وه‌ك هه‌ژار بم و دزی بكه‌م و
ناوی خودای خۆم بێ ڕێز بكه‌م.
10
«بوختان به‌ خزمه‌تكار مه‌كه‌ له‌لای گه‌وره‌كه‌ی،
نه‌وه‌ك نه‌فره‌تت لێ بكات و تاوانبار بیت.
11
«نه‌وه‌یه‌ك هه‌یه‌ نه‌فره‌ت له‌ باوكی ده‌كات و
دایكی پیرۆز ناكات.
12
نه‌وه‌یه‌ك هه‌یه‌ له‌ ڕوانگه‌ی خۆی پاكه‌،
به‌ڵام خۆی نه‌شوشتووه‌ته‌وه‌ له‌ پیسوپۆخڵییه‌كه‌ی.
13
نه‌وه‌یه‌ك هه‌یه‌ چه‌ند چاو له‌ هه‌وراز و
به‌رز ده‌ڕوانێت.
14
نه‌وه‌یه‌ك هه‌یه‌ ددانه‌كانی شمشێرن و
كاكیله‌كانی چه‌قۆن،
بۆ خواردنی كڵۆڵه‌كان له‌سه‌ر زه‌وی و
نه‌داره‌كان له‌نێو خه‌ڵكی.
15
«زه‌روو[b] دوو كچی هه‌یه‌،
هاوار ده‌كه‌ن: ”بێنه‌، بێنه‌!“
«سێ شت هه‌ن تێر نابن،
چواره‌میش ناڵێت، ”به‌سه‌!“:
16
جیهانی مردووان و منداڵدانی نه‌زۆك و
زه‌وییه‌ك تێر ئاو نه‌بێت و
ئاگرێك هه‌رگیز نه‌ڵێت: ”به‌سه‌!“
17
«ئه‌و چاوه‌ی گاڵته‌ به‌ باوكی بكات و
سووكایه‌تی به‌ گوێڕایه‌ڵی بكات بۆ دایك،
قه‌له‌ڕه‌شه‌كانی دۆڵ هه‌ڵیده‌كۆڵن و
بێچووه‌ سیساركه‌ كه‌چه‌ڵ ده‌یخۆن.
18
«سێ شت هه‌ن زۆر سه‌یرن بۆ من،
چواره‌میش تێناگه‌م:
19
ڕێگای هه‌ڵۆ له‌ ئاسمان،
ڕێگای مار له‌سه‌ر به‌رد،
ڕێگای كه‌شتی له‌ناو جه‌رگه‌ی ده‌ریا و
ڕێگای پیاویش له‌گه‌ڵ كچ.
20
«ئه‌مه‌ هه‌ڵسوكه‌وتی ژنی داوێنپیسه‌:
ده‌خوات[c] و ده‌می ده‌سڕێته‌وه‌ و
ده‌ڵێت: ”خراپه‌م نه‌كردووه‌!“
21
«زه‌وی له‌ژێر سێ شتدا ده‌له‌رزێت و
له‌ژێر چواره‌میش ناتوانێت به‌رگه‌ بگرێت،
22
خزمه‌تكارێك كه‌ بووبێته‌ پاشا،
گێلێك كه‌ تێر نان بێت،
23
ئافره‌تێك بێ ناز بێت و مێرد بكات،
كه‌نیزه‌یه‌ك ببێت به‌ میراتگری خاتوونه‌كه‌ی.
24
«چوار شت هه‌ن له‌سه‌ر زه‌وی بچووكن
به‌ڵام له‌ دانایان داناترن:
25
مێرووله‌ كۆمه‌ڵێكی بێهێزن،
به‌ڵام له‌ هاویندا خواردنی خۆیان ئه‌مبار ده‌كه‌ن.
26
گۆڕهه‌ڵكه‌نه‌ كۆمه‌ڵێكی بێ توانان،
به‌ڵام له‌ناو به‌رد لانه‌كانیان دروستده‌كه‌ن.
27
كولله‌ پاشایان نییه‌،
به‌ڵام هه‌موویان پۆل پۆل ده‌جوڵێن.
28
مارمێلكه‌ به‌ده‌ست ده‌گیرێن،
به‌ڵام له‌ كۆشكی پاشادان.
29
«سێ شت هه‌ن هه‌نگاویان سه‌نگینه‌ و
چواره‌میش ڕۆیشتنی سه‌نگینه‌:
30
شێر كه‌ پاڵه‌وانی هه‌موو گیانداره‌كانه‌،
له‌ ڕووی هیچ شتێك ناگه‌ڕێته‌وه‌،
31
كه‌ڵه‌شێری به‌ فیز، ته‌گه‌،
پاشایه‌كیش له‌ سه‌ركردایه‌تی له‌شكره‌كه‌ی.
32
«ئه‌گه‌ر گێلایه‌تیت كرد به‌ خۆهه‌ڵكێشانت،
یان پیلانی خراپت نایه‌وه‌،
ده‌ستت بخه‌ره‌ سه‌ر ده‌مت!
33
چونكه‌ شیر بهه‌ژێنیت كه‌ره‌ی لێ ده‌رده‌چێت،
لووت بهه‌ژێنیت خوێنی لێ دێت،
تووڕه‌ییش بهه‌ژێنیت ناكۆكی لێ پێدا ده‌بێت.»
  1. a. 30‏:1 ئیتیێل: بڕوانه‌ \+xt نه‌حه‌میا 11‏:7‏\+xt*‏.
  2. b. 30‏:15 زێروو، جۆره‌ كرمێكی مشه‌خۆره‌، هه‌روه‌ها له‌ چاره‌سه‌ركردنی نه‌خۆشی بۆ مژینی خوێن به‌كاردێت.
  3. c. 30‏:20 مه‌به‌ست لێی جووت ده‌بێت.