عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
1
ناوبانگی چاك له‌ ده‌وڵه‌مه‌ندی گه‌وره‌ خوازراوتره‌،
په‌سه‌ندی چاكیش له‌ زێڕ و زیو باشتره‌.
2
ده‌وڵه‌مه‌ند و هه‌ژار له‌مه‌دا یه‌كده‌گرنه‌وه‌،
دروستكه‌ری هه‌ردووكیان یه‌زدانه‌.
3
ژیر خراپه‌ ده‌بینێت و خۆی ده‌شارێته‌وه‌،
به‌ڵام ساویلكه‌ مل پێوه‌ده‌نێت و سزا ده‌درێ.
4
پاداشتی بێفیزی و له‌خواترسی
ده‌وڵه‌مه‌ندی و ڕێزداری و ژیانه‌.
5
چقڵ و ته‌ڵه‌ له‌ ڕێگای پیاوی خواردایه‌،
به‌ڵام ئه‌وه‌ی خۆی بپارێزێت لێی دوور ده‌كه‌وێته‌وه‌.
6
منداڵ له‌سه‌ر ئه‌و ڕێگایه‌ ڕابهێنه‌ كه‌ پێویسته‌ بیگرێت،
پیریش بێت لێی لا نادات.
7
ده‌وڵه‌مه‌ند به‌سه‌ر هه‌ژاردا حوكم ده‌كات،
قه‌رزاریش كۆیله‌ی خاوه‌ن قه‌رزه‌.
8
ئه‌وه‌ی ناڕه‌وایی بچێنێت دروێنه‌ی خراپه‌ ده‌كات،
كوته‌كی تووڕه‌ییشی ده‌فه‌وتێت.
9
ئه‌وه‌ی چاوتێر بێت به‌ره‌كه‌تدار ده‌بێت،
چونكه‌ له‌ نانی خۆی ده‌داته‌ هه‌ژار.
10
گاڵته‌جاڕ ده‌ربكه‌، ناكۆكی ده‌ڕوات،
دووبه‌ره‌كی و ڕیسواییش نامێنێت.
11
ئه‌وه‌ی حه‌زی له‌ دڵپاكی بێت و قسه‌ی شیرین بێت
پاشا ده‌بێته‌ دۆستی.
12
چاوی یه‌زدان چاودێری زانیاری ده‌كات،
به‌ڵام قسه‌ی ناپاكان سه‌ره‌وژێر ده‌كات.
13
ته‌مبه‌ڵ ده‌ڵێت: «شێرێك له‌ ده‌ره‌وه‌یه‌!
ئه‌گه‌ر بچمه‌ گۆڕه‌پانه‌كان ده‌كوژرێم!»
14
ده‌می ژنی به‌دڕه‌وشت چاڵێكی قووڵه‌،
ئه‌وه‌ی به‌ر تووڕه‌یی یه‌زدان بكه‌وێت ده‌كه‌وێته‌ ناوی.
15
گێلی به‌ دڵی منداڵه‌وه‌ گرێدراوه‌،
به‌ڵام گۆچانی ته‌مبێكردن دووری ده‌خاته‌وه‌ لێی.
16
ئه‌وه‌ی زۆرداری له‌ هه‌ژار بكات بۆ ئه‌وه‌ی بۆ خۆی زیاد بكات و
ئه‌وه‌ی به‌ ده‌وڵه‌مه‌ند ببه‌خشێت، بێگومان هه‌ردووكیان به‌ره‌و نه‌بوونییه‌.
قسه‌ی دانایان 
17
گوێ شل بكه‌ و قسه‌ی دانایان ببیسته‌،
دڵت بده‌ زانیاری من،
18
چونكه‌ جوانه‌ ئه‌گه‌ر له‌ ناختدا هه‌ڵیبگریت و
تێكڕا له‌سه‌ر لێوه‌كانت بچه‌سپێن.
19
بۆ ئه‌وه‌ی پشتبه‌ستنت به‌ یه‌زدان بێت،
ئه‌مڕۆ تۆ فێر ده‌كه‌م، به‌ڵێ تۆ.
20
ئایا سی په‌ندم بۆ نه‌نووسیوی
سه‌باره‌ت به‌ ڕاوێژ و زانیاری،
21
بۆ ئه‌وه‌ی دروستی قسه‌ی ڕاستیت فێر بكه‌م،
هه‌تا وه‌ڵامه‌ ڕاستییه‌كان بده‌یته‌وه‌ ئه‌وانه‌ی كه‌ تۆیان ناردووه‌؟
22
هه‌ژار تاڵان مه‌كه‌ له‌به‌ر هه‌ژارییه‌كه‌ی و
نه‌بوون وردوخاش مه‌كه‌ له‌ دادگا،
23
چونكه‌ یه‌زدان به‌رگری له‌ كێشه‌كه‌یان ده‌كات و
ئه‌وانه‌ی تاڵانیان ده‌كه‌ن گیانیان تاڵان ده‌كات.
24
مه‌به‌ براده‌ری كه‌سی تووڕه‌،
هاوڕێیه‌تی كه‌سی هه‌ڵچوو مه‌كه‌،
25
نه‌وه‌ك له‌ ڕێچكه‌ی ئه‌وان ڕابێیت،
خۆت تووشی ته‌ڵه‌ بكه‌یت.
26
له‌وانه‌ مه‌به‌ كه‌ ته‌وقه‌ ده‌كه‌ن[a] ،
ده‌سته‌به‌ری قه‌رزی خه‌ڵك مه‌كه‌.
27
ئه‌گه‌ر نه‌تبوو بیده‌یته‌وه‌،
بۆچی نوێنه‌كه‌ی ژێرت ببردرێت.
28
سنووری كۆن مه‌گوازه‌وه‌،
ئه‌وه‌ی باوباپیرانت دایانناوه‌.
29
ئایا ئه‌و كه‌سه‌ت بینیوه‌ به‌ ده‌ستوبرده‌ له‌ كاره‌كه‌ی؟
له‌به‌رده‌م پاشاكان ڕاده‌وه‌ستێت[b] ،
نه‌ك له‌به‌رده‌م خه‌ڵكی بێ ناوبانگ.
  1. a. 22‏:26 ته‌وقه‌كردن به‌ مه‌به‌ستی ڕێككه‌وتن به‌بێ هیچ به‌ڵگه‌نامه‌یه‌ك.
  2. b. 22‏:29 كاركردن له‌نێو ده‌سته‌ی خزمه‌تكارانی پاشا.