عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
خۆنزمكردنه‌وه‌ی عیسا 
1
ئه‌گه‌ر یه‌كبوونتان له‌گه‌ڵ مه‌سیح مایه‌ی هاندان بێت، ئه‌گه‌ر خۆشه‌ویستییه‌كه‌ی دڵنه‌واییتان بكات، ئه‌گه‌ر به‌ ڕۆحی پیرۆز هاوبه‌ش بن، ئه‌گه‌ر به‌ سۆز و میهره‌بان بن،
2
ئه‌وا دڵم به‌ ته‌واوی خۆش بكه‌ن كه‌ هاوبیر بن و هه‌مان خۆشه‌ویستیتان هه‌بێت، هه‌روه‌ها یه‌ك دڵ و هاوئامانج بن.
3
هیچ شتێك به‌ خۆپه‌رستی و لووتبه‌رزییه‌وه‌ مه‌كه‌ن، به‌ڵكو به‌ شێوه‌یه‌ك بێفیز بن كه‌ به‌رامبه‌ره‌كه‌تان له‌ خۆتان به‌ باشتر بزانن.
4
هه‌ریه‌كه‌ ته‌ماشای به‌رژه‌وه‌ندی خۆی نه‌كات، به‌ڵكو ته‌ماشای به‌رژه‌وه‌ندی خه‌ڵكی دیكه‌ش بكه‌ن.
5
وه‌ك عیسای مه‌سیح بیر بكه‌نه‌وه‌:
6
ئه‌وه‌ی به‌ سروشتی خۆی خودایه‌،
نه‌یویست یه‌كسانییه‌كه‌ی له‌گه‌ڵ خودا بۆ خۆی بقۆزێته‌وه‌،
7
به‌ڵكو خۆی كرده‌ هیچ[a] ،
شێوه‌ی به‌نده‌ی وه‌رگرت،
وه‌ك مرۆڤی لێهات،
8
كه‌ به‌ ڕوخساری مرۆڤ بینرا،
خۆی نزم كرده‌وه‌ و
تاكو مردن ملكه‌چ بوو، ته‌نانه‌ت مردنی سه‌ر خاچ[b] .
9
له‌به‌ر ئه‌وه‌ خودا زۆر به‌رزی كرده‌وه‌ و
ئه‌و ناوه‌ی[c] دایێ كه‌ له‌ سه‌رووی هه‌موو ناوێكه‌وه‌یه‌،
10
تاكو به‌ ڕاگه‌یاندنی ناوی عیسا هه‌موو ئه‌ژنۆیه‌ك چۆك دابده‌ن،
له‌ ئاسمان و سه‌ر زه‌وی و ژێر زه‌ویش،
11
هه‌روه‌ها هه‌موو زمانێك دان بنێت به‌وه‌دا كه‌ عیسای مه‌سیح خاوه‌ن شكۆیه‌،
بۆ شكۆی خودای باوك.
ڕۆڵه‌كانی خودا بێ گله‌یین 
12
بۆیه‌ خۆشه‌ویستانم، هه‌روه‌ك چۆن كاتێك له‌لاتان بووم هه‌میشه‌ گوێڕایه‌ڵی ڕێنماییه‌كانم بوون، ئێستاش كه‌ له‌لاتان نیم زۆر گرنگتره‌ كه‌ گوێڕایه‌ڵم بن. به‌ ترس و له‌رزه‌وه‌ كۆشش بكه‌ن بۆ ته‌واوكردنی ڕزگاریتان،
13
چونكه‌ خودا خۆی له‌ ئێوه‌دا كار ده‌كات تاكو بتانه‌وێت و كار بكه‌ن بۆ ڕه‌زامه‌ندی ئه‌و.
14
هه‌موو شتێك بێ بۆڵه‌بۆڵ و شه‌ڕه‌قسه‌ بكه‌ن،
15
تاكو بێ گله‌یی و پاك بن، منداڵانی خودا له‌ناو نه‌وه‌یه‌كی چه‌وت و خواردا بێ له‌كه‌ن، له‌نێو ئه‌واندا وه‌ك ئه‌ستێره‌ له‌ گه‌ردووندا ده‌دره‌وشێنه‌وه‌،
16
كاتێك ده‌ست به‌ وشه‌ی ژیانه‌وه‌ بگرن. ئیتر له‌ ڕۆژی مه‌سیحدا ده‌توانم شانازی بكه‌م كه‌ بێهووده‌ غارم نه‌داوه‌ و ڕه‌نجم نه‌كێشاوه‌.
17
به‌ڵام ئه‌گه‌ر بمرم و خوێنم وه‌ك شه‌رابی پێشكه‌شكراو به‌سه‌ر قوربانی و خزمه‌تی باوه‌ڕتاندا بڕژێم،[d] ئه‌وا دڵشاد و دڵخۆشم له‌گه‌ڵتان.
18
جا ئێوه‌ش ئاوا دڵشاد بن و له‌گه‌ڵم دڵخۆش بن.
تیمۆساوس و ئه‌په‌فرۆدیتۆس 
19
هیوادارم به‌ یارمه‌تی عیسای خاوه‌ن شكۆ بتوانم زوو تیمۆساوس بنێرم بۆ لاتان، تاكو به‌ زانینی هه‌واڵتان منیش دڵخۆش بم،
20
چونكه‌ كه‌سم نییه‌ وه‌ك ئه‌و به‌ دڵسۆزی بایه‌خ به‌ كاروبارتان بدات،
21
له‌به‌ر ئه‌وه‌ی هه‌موویان به‌دوای به‌رژه‌وه‌ندی خۆیاندا ده‌گه‌ڕێن، نه‌ك هی عیسای مه‌سیح.
22
به‌ڵام ئێوه‌ ئاگاداری شاره‌زایی تیمۆساوسن، چونكه‌ هه‌روه‌ك چۆن منداڵ له‌گه‌ڵ باوكیدا خزمه‌ت ده‌كات، ئه‌ویش به‌ هه‌مان شێوه‌ له‌گه‌ڵ من خزمه‌تی له‌ مزگێنیدان كردووه‌.
23
بۆیه‌ هیوادارم هه‌ركه‌ بۆم ڕوون بووه‌وه‌ كاروبارم چۆن به‌ڕێوه‌ ده‌چێت، یه‌كسه‌ر ئه‌و بنێرم.
24
متمانه‌م به‌ مه‌سیحه‌ كه‌ خۆشم به‌م زووانه‌ دێم.
25
به‌ڵام به‌ پێویستم زانی ئه‌په‌فرۆدیتۆس بنێرمه‌ لاتان، كه‌ له‌گه‌ڵم برا و هاوكار و هاوسه‌ربازه‌، نێردراوی ئێوه‌یه‌ و خزمه‌تكاری پێویستییه‌كانمه‌.
26
ئه‌و په‌رۆشی دیداری هه‌مووتانه‌ و دڵته‌نگ بوو، چونكه‌ نه‌خۆشی ئه‌وتان بیستووه‌.
27
به‌ ڕاستی نه‌خۆش بوو، خه‌ریك بوو بمرێت، به‌ڵام خودا به‌زه‌یی پێدا هاته‌وه‌، نه‌ك ته‌نها به‌ ئه‌ودا، به‌ڵكو به‌زه‌یی به‌ منیشدا هاته‌وه‌، بۆ ئه‌وه‌ی خه‌فه‌ت له‌دوای خه‌فه‌تم نه‌بێت.
28
بۆیه‌ خێراتر ناردم، تاكو به‌ بینینه‌وه‌ی دڵشاد بن و منیش خه‌فه‌تم كه‌م بێته‌وه‌.
29
كه‌واته‌ به‌وپه‌ڕی شادییه‌وه‌ به‌ ناوی مه‌سیحی خاوه‌ن شكۆوه‌ پێشوازی لێ بكه‌ن و ڕێز له‌وانه‌ی وه‌ك ئه‌و بگرن،
30
چونكه‌ له‌ پێناوی كاری مه‌سیحدا ڕووبه‌ڕووی مه‌رگ بووه‌وه‌ و ژیانی خۆی خسته‌ مه‌ترسییه‌وه‌، تاكو ئه‌و خزمه‌ته‌ بكات كه‌ ئێوه‌ نه‌تانتوانی بۆ منی بكه‌ن.
  1. a. 2‏:7 یۆنانی: خۆی له‌ هه‌موو مافه‌كانی بێبه‌ش كرد.
  2. b. 2‏:8 له‌خاچدان قورسترین سزا بووه‌ له‌لایه‌ن ڕۆمانییه‌كانه‌وه‌، هه‌روه‌ها له‌لایه‌ن جوله‌كه‌كان نه‌فره‌ت بووه‌، بڕوانه‌ \+xt دواوتار 21‏:23‏\+xt*.
  3. c. 2‏:9 له‌م هه‌ڵوێسته‌دا له‌ زمانی عیبری (ناوه‌كه‌) واته‌ ناوی خودا.
  4. d. 2‏:17 مه‌به‌ستی نووسه‌ر لێره‌دا واته‌ من ده‌مرم، نه‌ریت و باو بووه‌ كه‌ خواردنه‌وه‌ی گرنگ وه‌ك قوربانی ڕژێنراوه‌. بڕوانه‌ \+xt لێڤییه‌كان 23‏:18‏\+xt*‏.