عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
شێوه‌ گۆڕانی عیسا 
1
ئینجا پێی فه‌رموون: «ڕاستیتان پێ ده‌ڵێم: هه‌ندێك له‌وانه‌ی لێره‌ ڕاوه‌ستاون، مردن ناچێژن هه‌تا شانشینی خودا نه‌بینن به‌ هێزه‌وه‌ دێته‌وه‌.»
2
دوای شه‌ش ڕۆژ، عیسا په‌ترۆس و یاقوب و یۆحه‌نای له‌گه‌ڵ خۆی برد، به‌ ته‌نها بردنییه‌ سه‌ر چیایه‌كی به‌رز، له‌پێشیان شێوه‌ی گۆڕا.
3
جله‌كانی بووه‌ سپییه‌كی بریسكه‌دار، سپیتر له‌وه‌ی كه‌ هه‌ركه‌سێك له‌ جیهاندا بتوانێت بیكات.
4
ئینجا ئه‌لیاس و موسایان بۆ ده‌ركه‌وت، له‌گه‌ڵ عیسادا كه‌وتنه‌ گفتوگۆ.
5
په‌ترۆسیش به‌ عیسای گوت: «ڕابی، پێمان باشه‌ لێره‌ بین، با سێ كه‌پر دروستبكه‌ین، یه‌كێك بۆ تۆ، یه‌كێك بۆ موسا، یه‌كێكیش بۆ ئه‌لیاس.»
6
نه‌یده‌زانی چی ده‌ڵێت، چونكه‌ تۆقیبوون.
7
هه‌ورێكیش هات و سێبه‌ری به‌سه‌ریاندا كرد، ده‌نگێك له‌ هه‌وره‌كه‌وه‌ هات: «ئه‌مه‌ كوڕی خۆشه‌ویستمه‌، گوێی لێ بگرن!»
8
كاتێك له‌ناكاو سه‌یری ده‌وروپشتیان كرد، له‌ عیسا زیاتر كه‌سیان له‌گه‌ڵ خۆیان نه‌بینی.
9
كاتێك له‌ چیاكه‌ ده‌هاتنه‌ خواره‌وه‌، عیسا فه‌رمانی پێدان ئه‌مه‌ی بینیتان به‌ كه‌سی مه‌ڵێن، هه‌تا كوڕی مرۆڤ له‌ناو مردووان هه‌ڵده‌ستێته‌وه‌.
10
ئه‌وانیش بابه‌ته‌كه‌یان بۆ خۆیان هێشته‌وه‌ و گفتوگۆیان بوو: «هه‌ستانه‌وه‌ له‌نێو مردووان چییه‌؟»
11
پرسیاریان لێكرد: «بۆچی مامۆستایانی ته‌ورات ده‌ڵێن: ”ده‌بێت یه‌كه‌م جار ئه‌لیاس بێت“؟»
12
عیسا وه‌ڵامی دانه‌وه‌: «ڕاسته‌، ئه‌لیاس دێت و هه‌موو شتێك ڕێك ده‌خاته‌وه‌. ئه‌ی چۆن ده‌رباره‌ی كوڕی مرۆڤ نووسراوه‌ كه‌ ده‌بێت زۆر ئازار بچێژێت و سووكایه‌تیی پێ بكرێت؟
13
به‌ڵام پێتان ده‌ڵێم، ئه‌لیاس هات و چییان ویست پێیان كرد، هه‌روه‌ك ئه‌وه‌ی له‌باره‌ی ئه‌وه‌وه‌ نووسراوه‌.»
ده‌ركردنی ڕۆحی پیس 
14
كاتێك گه‌یشتنه‌ لای قوتابییه‌كان، خه‌ڵكێكی زۆریان له‌ ده‌وروپشتیان بینی و مامۆستایانی ته‌وراتیش ده‌مه‌قاڵێیان له‌گه‌ڵ ده‌كردن.
15
كه‌ هه‌موو خه‌ڵكه‌كه‌ عیسایان بینی یه‌كسه‌ر سه‌رسام بوون، ڕایانكرد و سڵاویان لێكرد.
16
عیسا لێی پرسین: «له‌باره‌ی چی ده‌مه‌قاڵێیان له‌گه‌ڵ ده‌كه‌ن؟»
17
یه‌كێك له‌ خه‌ڵكه‌كه‌ وه‌ڵامی دایه‌وه‌: «مامۆستا، كوڕه‌كه‌م هێناوه‌ته‌ لات، ڕۆحێكی لاڵی هه‌یه‌.
18
له‌كوێ بیگرێت، به‌ زه‌ویدا ده‌دات، ده‌می كه‌ف ده‌كات و ددانه‌كانی جیڕده‌كاته‌وه‌ و ڕه‌ق ده‌بێت. داوام له‌ قوتابییه‌كانت كرد ده‌ریبكه‌ن، به‌ڵام نه‌یانتوانی.»
19
عیسا وه‌ڵامی دانه‌وه‌: «ئه‌ی نه‌وه‌ی بێباوه‌ڕ، هه‌تا كه‌ی له‌گه‌ڵتان بم؟ هه‌تا كه‌ی به‌رگه‌تان بگرم؟ منداڵه‌كه‌ بهێننه‌ لام.»
20
ئه‌وانیش هێنایانه‌ لای. كه‌ ڕۆحه‌ پیسه‌كه‌ عیسای بینی، ده‌ستبه‌جێ منداڵه‌كه‌ فێی لێهات و كه‌وته‌ سه‌ر زه‌وی، ده‌گه‌وزی و كه‌ف له‌ ده‌میه‌وه‌ ده‌هات.
21
عیسا له‌ باوكی منداڵه‌كه‌ی پرسی: «له‌ كه‌یه‌وه‌ وای لێهاتووه‌؟»
گوتی: «له‌ منداڵییه‌وه‌.
22
زۆر جاریش خستوویه‌تییه‌ ناو ئاگر و ناو ئاوه‌وه‌ تاكو له‌ناوی ببات. ئه‌گه‌ر ده‌توانیت شتێك بكه‌یت، به‌زه‌ییت پێمان بێته‌وه‌ و یارمه‌تیمان بده‌.»
23
عیسا پێی فه‌رموو: «”ئه‌گه‌ر ده‌توانیت“؟ ئه‌وه‌ی باوه‌ڕ بهێنێت هه‌موو شتێكی بۆ ده‌بێت.»
24
یه‌كسه‌ر باوكی منداڵه‌كه‌ هاواری كرد: «باوه‌ڕم هه‌یه‌، یارمه‌تی بێباوه‌ڕیم بده‌!»
25
عیسا كه‌ بینی خه‌ڵكه‌كه‌ ڕاكه‌ڕاكه‌یانه‌، له‌ ڕۆحه‌ پیسه‌كه‌ی ڕاخوڕی: «ئه‌ی ڕۆحی كه‌ڕولاڵ، فه‌رمانت پێ ده‌كه‌م، لێی وه‌ره‌ ده‌ره‌وه‌ و نه‌چیته‌وه‌ ناوی!»
26
ئینجا ڕۆحه‌ پیسه‌كه‌ هاواری كرد و به‌ توندی فێی لێهێنا و لێی هاته‌ ده‌ره‌وه‌. كوڕه‌كه‌ وه‌ك مردووی لێ هات، ته‌نانه‌ت زۆر كه‌س گوتیان: «مرد.»
27
به‌ڵام عیسا ده‌ستی گرت و هه‌ڵیستانده‌وه‌، ئه‌ویش ڕاوه‌ستا.
28
عیسا چووه‌وه‌ ماڵ، قوتابییه‌كانی به‌ ته‌نها لێیان پرسی: «بۆچی ئێمه‌ نه‌مانتوانی ده‌ریبكه‌ین؟»
29
پێی فه‌رموون: «ئه‌م جۆره‌ به‌ نوێژ نه‌بێت ده‌رناكرێت.»
دووه‌م باسی مردنی عیسا 
30
له‌وێ ڕۆیشتن و به‌ جه‌لیلدا تێپه‌ڕین، عیساش نه‌یویست كه‌س بزانێت،
31
چونكه‌ قوتابییه‌كانی فێرده‌كرد و پێی ده‌فه‌رموون: «كوڕی مرۆڤ ده‌درێته‌ ده‌ست خه‌ڵك و ده‌یكوژن، دوای كوشتنی به‌ سێ ڕۆژ هه‌ڵده‌ستێته‌وه‌.»
32
به‌ڵام ئه‌وان له‌ قسه‌كه‌ تێنه‌گه‌یشتن و ترسان لێی بپرسن.
كێ پایه‌به‌رزتره‌؟ 
33
ئینجا هاتنه‌ كه‌فه‌رناحوم. كه‌ گه‌یشته‌ ماڵه‌وه‌، لێی پرسین: «له‌ ڕێگا گفتوگۆی چیتان ده‌كرد؟»
34
به‌ڵام ئه‌وان بێده‌نگ بوون، چونكه‌ له‌ ڕێگا مشتومڕیان له‌گه‌ڵ یه‌كتر كرد كه‌ كامیان پایه‌به‌رزتره‌.
35
عیسا دانیشت و دوازده‌ قوتابییه‌كه‌ی بانگكرد، پێی فه‌رموون: «ئه‌گه‌ر یه‌كێك ویستی یه‌كه‌م بێت، با له‌دوای هه‌مووان و خزمه‌تكاری هه‌مووان بێت.»
36
ئینجا منداڵێكی هێنا و له‌ناوه‌ڕاستیاندا ڕایگرت، گرتییه‌ باوه‌شی و پێی فه‌رموون:
37
«ئه‌وه‌ی به‌ ناوی منه‌وه‌ پێشوازی له‌ یه‌كێك له‌م منداڵانه‌ بكات، پێشوازی له‌ من ده‌كات، ئه‌وه‌ی پێشوازیم لێ بكات، پێشوازی له‌ من ناكات، به‌ڵكو له‌وه‌ی ناردوومی.»
ئه‌وه‌ی دژمان نییه‌ له‌گه‌ڵمانه‌ 
38
یۆحه‌نا پێی گوت: «مامۆستا، یه‌كێكمان بینی به‌ ناوی تۆوه‌ ڕۆحی پیسی ده‌رده‌كرد، ئێمه‌ش ڕێمان لێ گرت، چونكه‌ دوامان ناكه‌وێت.»
39
عیسا فه‌رمووی: «ڕێی لێ مه‌گرن، كه‌س نییه‌ به‌ ناوی منه‌وه‌ په‌رجوو بكات و بتوانێت له‌دوای ماوه‌یه‌كی كورت به‌ خراپه‌ باسم بكات،
40
چونكه‌ ئه‌وه‌ی دژمان نییه‌ له‌گه‌ڵمانه‌.
41
ئه‌وه‌ی به‌ ناوی منه‌وه‌ جامێك ئاوی پێدان، له‌به‌ر ئه‌وه‌ی هی مه‌سیحن، ڕاستیتان پێ ده‌ڵێم پاداشتی ون نابێت.
كۆسپ دروستكردن 
42
«ئه‌وه‌ی ببێته‌ كۆسپ بۆ یه‌كێك له‌م بچووكانه‌ی كه‌ باوه‌ڕیان به‌ من هه‌یه‌، باشتره‌ بۆی به‌رداشێكی گه‌وره‌ به‌ ملیه‌وه‌ هه‌ڵبواسرێت و فڕێبدرێته‌ ده‌ریاوه‌.
43
ئه‌گه‌ر ده‌ستت بۆت بووه‌ كۆسپ، بیبڕه‌وه‌. بۆ تۆ باشتره‌ به‌ یه‌ك ده‌سته‌وه‌ بچیته‌ ناو ژیانه‌وه‌ له‌وه‌ی دوو ده‌ستت هه‌بێت و بچیته‌ دۆزه‌خ، ناو ئاگرێك كه‌ كوژانه‌وه‌ی بۆ نییه‌.
44
⌟له‌وێ كرمه‌كانیان نامرێت و ئاگره‌كه‌ ناكوژێته‌وه‌.⌞
45
ئه‌گه‌ر پێت بۆت بووه‌ كۆسپ، بیبڕه‌وه‌. بۆ تۆ باشتره‌ به‌ یه‌ك پێیه‌وه‌ بچیته‌ ناو ژیانه‌وه‌ له‌وه‌ی دوو پێت هه‌بێت و فڕێبدرێیته‌ ناو دۆزه‌خ.
46
⌟له‌وێ كرمه‌كانیان نامرن و ئاگره‌كه‌ ناكوژێته‌وه‌.⌞
47
ئه‌گه‌ر چاوت بۆت بووه‌ كۆسپ، ده‌ریبهێنه‌. بۆ تۆ باشتره‌ به‌ یه‌ك چاو بچیته‌ ناو شانشینی خوداوه‌ له‌وه‌ی دوو چاوت هه‌بێت و فڕێبدرێیته‌ ناو دۆزه‌خ.
48
«{له‌وێ كرمه‌كانیان نامرن و
ئاگره‌كه‌ ناكوژێته‌وه‌.}[a]
49
هه‌موو كه‌سێك به‌ ئاگر سوێر ده‌كرێت.
50
«خوێ باشه‌، به‌ڵام ئه‌گه‌ر خوێ سوێرییه‌كه‌ی نه‌ما، به‌ چی سوێری ده‌كه‌نه‌وه‌؟ با خوێتان تێدابێت و له‌گه‌ڵ یه‌كتری له‌ ئاشتیدا بن.»
  1. a. 9‏:48 \+xt ئیشایا 66‏:24‏\+xt*‏