عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
نموونه‌ی جوتیارێك 
1
دیسان عیسا له‌ كه‌ناری ده‌ریاچه‌ی جه‌لیل ده‌ستی كرد به‌ فێركردنی خه‌ڵك، خه‌ڵكێكی ئێجگار زۆر لێی كۆبووه‌وه‌، تاكو وای لێهات چووه‌ ناو به‌له‌مێكی ناو ئاوه‌كه‌ دانیشێت، هه‌موو خه‌ڵكه‌كه‌ش له‌ نزیك ئاوه‌كه‌ له‌سه‌ر وشكانی بوون.
2
به‌ نموونه‌ زۆر شتی فێركردن، له‌ فێركردنه‌كه‌یدا پێیانی فه‌رموو:
3
«گوێ بگرن، جوتیارێك چووه‌ ده‌ره‌وه‌ تۆو بكات.
4
كه‌ تۆوی ده‌وه‌شاند، هه‌ندێكی كه‌وتنه‌ سه‌ر ڕێگا، باڵنده‌ش هاتن و خواردیانن.
5
هه‌ندێكیش كه‌وتنه‌ سه‌ر زه‌وییه‌كی به‌رده‌ڵان كه‌ خۆڵی كه‌م بوو، خێرا سه‌ریان ده‌ركرد، چونكه‌ زه‌وییه‌كه‌ی قووڵ نه‌بوو.
6
به‌ڵام كه‌ ڕۆژ هه‌ڵهات سووتان و وشك بوون، چونكه‌ ڕه‌گیان نه‌بوو.
7
هه‌ندێكیشیان كه‌وتنه‌ نێو دڕكان، دڕكه‌كان گه‌وره‌ بوون و خنكاندیانن و به‌رهه‌میان نه‌دا.
8
هه‌ندێكیش كه‌وتنه‌ سه‌ر زه‌وییه‌كی باش، ڕوان، گه‌شه‌یان كرد و به‌رهه‌میان دا، یه‌ك به‌ سی و یه‌ك به‌ شه‌ست و یه‌ك به‌ سه‌د.»
9
ئینجا فه‌رمووی: «ئه‌وه‌ی گوێی بیستنی هه‌یه‌، با ببیستێت!»
10
كاتێك به‌ ته‌نها بوو، ئه‌وانه‌ی له‌ ده‌وروپشتی بوون له‌گه‌ڵ دوازده‌كه‌[a] ، ده‌رباره‌ی نموونه‌كه‌ لێیان پرسی.
11
ئه‌ویش پێی فه‌رموون: «نهێنی شانشینی خودا به‌ ئێوه‌ دراوه‌، به‌ڵام ئه‌وانه‌ی له‌ ده‌ره‌وه‌ن هه‌موو شتێكیان به‌ نموونه‌ پێ ده‌گوترێت،
12
بۆ ئه‌وه‌ی
«{به‌ سه‌یركردن سه‌یر بكه‌ن، به‌ڵام نه‌بینن،
به‌ بیستن ببیستن، به‌ڵام تێنه‌گه‌ن،
نه‌وه‌ك بگه‌ڕێنه‌وه‌ و ببه‌خشرێن!}[b] »
13
ئینجا پێی فه‌رموون: «ئایا له‌م نموونه‌یه‌ تێنه‌گه‌یشتن؟ باشه‌ چۆن له‌ هه‌موو نموونه‌كان تێده‌گه‌ن؟
14
جوتیاره‌كه‌ په‌یامی خودا تۆو ده‌كات.
15
هه‌ندێك كه‌س وه‌كو ئه‌و تۆوانه‌ن كه‌ ده‌كه‌ونه‌ سه‌ر ڕێگاكه‌، كه‌ په‌یامه‌كه‌یان لێ تۆو ده‌كرێت، كاتێك ده‌یبیستن ده‌ستبه‌جێ شه‌یتان دێت و ئه‌و په‌یامه‌یه‌ ده‌بات كه‌ تێیاندا تۆوكراوه‌.
16
ئه‌وانه‌ی تر كه‌ له‌سه‌ر به‌رده‌ڵانه‌كه‌ تۆوكران، ئه‌وانه‌ن كه‌ په‌یامه‌كه‌ ده‌بیستن و یه‌كسه‌ر به‌ خۆشییه‌وه‌ وه‌ریده‌گرن،
17
به‌ڵام بۆ ماوه‌یه‌كی كه‌م ده‌مێنن چونكه‌ ڕه‌گیان نییه‌، دواتر له‌به‌ر په‌یامه‌كه‌ تووشی ته‌نگانه‌ و چه‌وسانه‌وه‌ ده‌بن، یه‌كسه‌ر ده‌كه‌ون.
18
ئه‌وانه‌ی دیكه‌ كه‌ له‌نێو دڕكه‌كاندا تۆوكران، ئه‌مانه‌ ئه‌وه‌ن كه‌ په‌یامه‌كه‌ ده‌بیستن،
19
به‌ڵام خه‌می ژیان و فریوخواردنی ده‌وڵه‌مه‌ندی و ئاره‌زووی شته‌كانی دیكه‌ دێنه‌ ناوه‌وه‌ و په‌یامه‌كه‌ ده‌خنكێنن، ئیتر بێ به‌رهه‌م ده‌بن.
20
ئه‌وانه‌ی دیكه‌ كه‌ له‌سه‌ر زه‌وییه‌كی چاك تۆوكران، ئه‌وانه‌ن كه‌ په‌یامه‌كه‌ ده‌بیستن و وه‌ریده‌گرن و به‌رهه‌م ده‌ده‌ن، یه‌ك به‌ سی و یه‌ك به‌ شه‌ست و یه‌ك به‌ سه‌د.»
نموونه‌ی چرا 
21
ئینجا پێی فه‌رموون: «ئایا خه‌ڵكی چرا هه‌ڵده‌كه‌ن تاكو بیخه‌نه‌ ژێر ته‌شت یان نوێنه‌وه‌؟ باشه‌ له‌سه‌ر چرادان داینانێن؟
22
چونكه‌ شاردراوه‌ نییه‌ ئاشكرا نه‌بێت و نهێنی نییه‌ ده‌رنه‌كه‌وێت.
23
ئه‌گه‌ر یه‌كێك گوێی هه‌یه‌ بۆ بیستن، با ببیستێت.»
نموونه‌ی پێوانه‌ 
24
هه‌روه‌ها پێی فه‌رموون: «وردببنه‌وه‌ له‌وه‌ی ده‌یبیستن. به‌و پێوانه‌یه‌ی ئێوه‌ بۆ خه‌ڵك ده‌یپێون، خودا بۆتان ده‌پێوێته‌وه‌ و زیاتریشتان ده‌داتێ،
25
چونكه‌ ئه‌وه‌ی هه‌یه‌تی، پێی ده‌درێت، ئه‌وه‌ش كه‌ نییه‌تی، ته‌نانه‌ت ئه‌وه‌ی هه‌شیه‌تی لێی ده‌سه‌نرێته‌وه‌.»
نموونه‌ی گه‌شه‌كردنی تۆوێك 
26
هه‌روه‌ها فه‌رمووی: «شانشینی خودا له‌ مرۆڤێك ده‌چێت تۆو بوه‌شێنێته‌ سه‌ر زه‌وی.
27
شه‌و ده‌خه‌وێت و ڕۆژ هه‌ڵده‌ستێت، تۆوه‌كه‌ سه‌ر ده‌رده‌كات و گه‌شه‌ ده‌كات، ئه‌ویش نازانێت چۆن ده‌بێت.
28
زه‌وی له‌ خۆیه‌وه‌ به‌رهه‌م ده‌دات، یه‌كه‌م جار گیا، ئینجا گوڵه‌گه‌نم، پاشان له‌ گوڵه‌گه‌نمه‌كه‌دا گه‌نمی ته‌واو.
29
به‌ڵام كاتێك به‌ره‌كه‌ پێ ده‌گات، ده‌ستبه‌جێ داسی لێ گیر ده‌كات، چونكه‌ دروێنه‌ی هاتووه‌.»
نموونه‌ی ده‌نكه‌ خه‌رده‌ل 
30
هه‌روه‌ها فه‌رمووی: «شانشینی خودا له‌ چی ده‌چێت؟ به‌ چ نموونه‌یه‌ك ڕوونی بكه‌ینه‌وه‌؟
31
شانشینی خودا وه‌ك ده‌نكه‌ خه‌رده‌لێكه‌[c] ، كاتێك له‌سه‌ر زه‌وی تۆو ده‌كرێت، له‌ هه‌موو تۆوه‌كانی سه‌ر زه‌وی بچووكتره‌.
32
كاتێك تۆو ده‌كرێت، گه‌شه‌ ده‌كات و له‌ هه‌موو ڕووه‌كه‌كان گه‌وره‌تر ده‌بێت و لقی گه‌وره‌ ده‌رده‌كات، به‌ شێوه‌یه‌ك باڵنده‌ی ئاسمان ده‌توانن له‌ژێر سێبه‌ریدا هێلانه‌ بكه‌ن.»
33
هه‌تا ئه‌و ئاسته‌ی ده‌یانتوانی لێی تێبگه‌ن، عیسا به‌ زۆر نموونه‌ی له‌و شێوه‌یه‌ خه‌ڵكی فێر ده‌كرد.
34
به‌بێ نموونه‌ قسه‌ی بۆ نه‌ده‌كردن، به‌ڵام كاتێك به‌ ته‌نها ده‌بوو له‌گه‌ڵ قوتابییه‌كانی خۆی هه‌موو واتاكانی بۆ ڕوون ده‌كردنه‌وه‌.
هێمنكردنه‌وه‌ی ڕه‌شه‌با 
35
له‌و ڕۆژه‌دا، كاتێك ئێواره‌ داهات، پێی فه‌رموون: «با بپه‌ڕینه‌وه‌ ئه‌وبه‌ر.»
36
ئه‌وانیش خه‌ڵكه‌كه‌یان به‌جێهێشت و وه‌كو خۆی به‌ به‌له‌مه‌كه‌ بردیان، به‌له‌می دیكه‌شی له‌گه‌ڵ بوو.
37
ئینجا ڕه‌شه‌بایه‌كی توند هه‌ڵیكرد، شه‌پۆله‌كان به‌ توندی له‌ به‌له‌مه‌كه‌یان ده‌دا، كه‌ خه‌ریك بوو پڕبێت له‌ ئاو.
38
عیسا له‌ دواوه‌ سه‌ری خستبووه‌ سه‌ر سه‌رینێك و خه‌وتبوو. هه‌ڵیانساند و پێیان گوت: «مامۆستا، به‌لاته‌وه‌ گرنگ نییه‌ ئه‌گه‌ر له‌ناوبچین؟»
39
ئه‌ویش هه‌ستا و له‌ ڕه‌شه‌باكه‌ی ڕاخوڕی و به‌ ده‌ریاچه‌كه‌ی فه‌رموو: «بێده‌نگ به‌! هێمن به‌!» ڕه‌شه‌باكه‌ وه‌ستا و بووه‌ هێمنییه‌كی ته‌واو.
40
ئینجا پێی فه‌رموون: «بۆچی ئه‌وه‌نده‌ ده‌ترسن؟ هێشتا باوه‌ڕتان نییه‌؟»
41
ئه‌وانیش تۆقین و به‌ یه‌كترییان ده‌گوت: «ئه‌مه‌ كێیه‌؟ ته‌نانه‌ت با و ده‌ریاش گوێرایه‌ڵی ده‌بن!»
  1. a. 4‏:10 دوازده‌ قوتابییه‌كه‌ی عیسا.
  2. b. 4‏:12 \+xt ئیشایا 6‏:9‏\+xt*‏ و 10.
  3. c. 4‏:31 ڕووه‌كێكه‌ له‌ وڵاتی فه‌له‌ستین ده‌ڕوێت، به‌رزییه‌كه‌ی له‌ ماوه‌ی ساڵێك له‌ ڕواندنی ده‌گاته‌ نزیكه‌ی 3 بۆ 4 مه‌تر.