عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
ده‌ركردنی ڕۆحی پیس 
1
ئینجا گه‌یشتنه‌ ئه‌وبه‌ری ده‌ریاچه‌كه‌، بۆ هه‌رێمی گه‌راسین.
2
كاتێك عیسا له‌ به‌له‌مه‌كه‌ دابه‌زی، یه‌كسه‌ر له‌ناو گۆڕستان پیاوێكی تووشبوو ڕۆحی پیسی تێدابوو،
3
له‌ناو گۆڕستاندا ده‌ژیا، كه‌س نه‌یده‌توانی چیتر بیبه‌ستێته‌وه‌، ته‌نانه‌ت به‌ زنجیریش.
4
زۆر جار به‌ كۆت و زنجیر ده‌به‌سترایه‌وه‌، به‌ڵام زنجیره‌كانی ده‌پچڕاند و كۆته‌كانیشی ده‌شكاند، كه‌س نه‌یده‌توانی به‌سه‌ریدا زاڵ بێت.
5
شه‌و و ڕۆژ به‌رده‌وام له‌ناو گۆڕستان و له‌ چیاكاندا بوو، هاواری ده‌كرد و به‌ به‌رد له‌شی خۆی بریندار ده‌كرد.
6
كاتێك له‌ دووره‌وه‌ عیسای بینی، ڕایكرد و كڕنۆشی بۆ برد.
7
به‌ ده‌نگێكی به‌رز هاواری كرد: «چیت له‌ من ده‌وێت، ئه‌ی عیسای كوڕی خودای هه‌ره‌به‌رز؟ سوێندت ده‌ده‌م به‌ خودا، ئه‌شكه‌نجه‌م مه‌ده‌!»
8
چونكه‌ عیسا پێی فه‌رمووبوو: «ئه‌ی ڕۆحی پیس، له‌ پیاوه‌كه‌ وه‌ره‌ ده‌ره‌وه‌!»
9
ئینجا لێی پرسی: «ناوت چییه‌؟»
پێی گوت: «ناوم لێگیۆنه‌[a] ، چونكه‌ ئێمه‌ زۆرین.»
10
زۆریش له‌ عیسا پاڕایه‌وه‌ نه‌یاننێرێته‌ ده‌ره‌وه‌ی ناوچه‌كه‌.
11
له‌وێ ڕانه‌ به‌رازێكی گه‌وره‌ له‌ قه‌د شاخه‌كه‌ ده‌له‌وه‌ڕان،
12
ڕۆحه‌ پیسه‌كان له‌ عیسا پاڕانه‌وه‌: «بماننێره‌ ناو به‌رازه‌كان، با بچینه‌ ناویان.»
13
ئه‌ویش ڕێی پێدان. ڕۆحه‌ پیسه‌كان هاتنه‌ ده‌ره‌وه‌ و چوونه‌ ناو به‌رازه‌كان، ئینجا ڕانه‌كه‌ كه‌ نزیكه‌ی دوو هه‌زار ده‌بوون، به‌ خێرایی له‌ قه‌راغی شاخه‌كه‌وه‌ بۆ ناو ده‌ریاچه‌كه‌ هه‌ڵدێران و خنكان.
14
به‌رازه‌وانه‌كان ڕایانكرد، هه‌واڵیان دا به‌ شار و كێڵگه‌كان. خه‌ڵكه‌كه‌ش هاتن تاكو ببینن چی ڕوویداوه‌.
15
هاتنه‌ لای عیسا، بینییان ئه‌وه‌ی له‌شكرێك ڕۆحی پیسی تێدابوو، دانیشتووه‌ و پۆشته‌یه‌ و ئاقڵه‌، جا ترسان.
16
ئه‌وانه‌ش كه‌ بینیبوویان چی به‌سه‌ر به‌رازه‌كان و كه‌سه‌كه‌ هات كه‌ ڕۆحی پیسی تێدابوو، ڕووداوه‌كه‌یان بۆ خه‌ڵكه‌كه‌ گێڕایه‌وه‌.
17
ئیتر ده‌ستیان به‌ پاڕانه‌وه‌ كرد له‌ عیسا تاكو له‌ ناوچه‌كه‌یان بڕوات.
18
كاتێك عیسا سواری به‌له‌مه‌كه‌ ده‌بوو، ئه‌وه‌ی ڕۆحی پیسی تێدابوو، لێی پاڕایه‌وه‌ كه‌ له‌گه‌ڵی بێت.
19
ڕێگای نه‌دا، به‌ڵكو پێی فه‌رموو: «بڕۆ ناو ماڵ و كه‌سوكاره‌كه‌ت، بۆیان بگێڕه‌وه‌ په‌روه‌ردگار چی بۆت كردووه‌ و چۆن به‌زه‌یی پێتدا هاته‌وه‌.»
20
جا ڕۆیشت و له‌ ده‌ شاره‌كه‌[b] ده‌ستی به‌ جاڕدانی هه‌موو ئه‌وه‌ كرد كه‌ عیسا بۆی كردبوو. هه‌موو سه‌رسام بوون.
زیندووكردنه‌وه‌ی كچێك 
21
دیسان عیسا به‌ به‌له‌مه‌كه‌ په‌ڕییه‌وه‌ ئه‌وبه‌ر، هه‌ر له‌ده‌م ئاوه‌كه‌ بوو خه‌ڵكێكی زۆر لێی كۆبوونه‌وه‌.
22
یه‌كێك له‌ پێشه‌وایانی كه‌نیشت هات، ناوی یایرۆس بوو، كاتێك عیسای بینی، له‌به‌رپێی كه‌وت و
23
زۆر لێی پاڕایه‌وه‌: «كچه‌ بچووكه‌كه‌م له‌ سه‌ره‌مه‌رگدایه‌، وه‌ره‌ ده‌ستی له‌سه‌ر دابنێ تاكو چاك بێته‌وه‌ و بژیێت.»
24
عیسا له‌گه‌ڵی چوو، خه‌ڵكێكی زۆر دوای كه‌وت و پاڵه‌په‌ستۆیان لێ ده‌كرد.
چاككردنه‌وه‌ی ژنێك 
25
ژنێك دوازده‌ ساڵ بوو خوێنبه‌ربوونی هه‌بوو.
26
به‌ ده‌ستی چه‌ندین پزیشك ئازاری زۆری چێژتبوو، ئه‌وه‌ی هه‌یبوو خه‌رجی كردبوو، به‌ڵام هیچ سوودێكی نه‌بوو، به‌ڵكو خراپتر ببوو.
27
باسی عیسای بیستبوو، بۆیه‌ هاته‌ ناو خه‌ڵكه‌كه‌ و له‌ دواوه‌ ده‌ستی له‌ كراسه‌كه‌ی دا،
28
چونكه‌ له‌ دڵی خۆیدا گوتی: «ئه‌گه‌ر ته‌نها ده‌ست له‌ كراسه‌كه‌ی بده‌م، چاكده‌بمه‌وه‌.»
29
ده‌ستبه‌جێ خوێن لێچوونه‌كه‌ی ڕاوه‌ستا و له‌ له‌شیدا هه‌ستی به‌ چاكبوونه‌وه‌ كرد له‌ نه‌خۆشییه‌كه‌ی.
30
یه‌كسه‌ر عیساش زانی هێزێك لێی هاته‌ ده‌ره‌وه‌، ئاوڕی له‌ خه‌ڵكه‌كه‌ دایه‌وه‌ و فه‌رمووی: «كێ ده‌ستی له‌ كراسه‌كه‌م دا؟»
31
قوتابییه‌كانی وه‌ڵامیان دایه‌وه‌: «ده‌بینیت خه‌ڵكه‌كه‌ پاڵه‌په‌ستۆت لێده‌كه‌ن، كه‌چی ده‌فه‌رمووی كێ ده‌ستی لێدام؟»
32
به‌ڵام عیسا چاوی ده‌گێڕا، تاكو بزانێت كێ بوو وای كرد.
33
ژنه‌كه‌ش به‌ ڕووداوه‌كه‌ی خۆی ده‌زانی، به‌ ترس و له‌رزه‌وه‌ هات، له‌به‌رده‌می كه‌وت و هه‌مووی به‌ ڕاستی پێ گوت.
34
ئه‌ویش پێی فه‌رموو: «كچم، باوه‌ڕه‌كه‌ت تۆی چاككرده‌وه‌، بڕۆ به‌ سه‌لامه‌ت و له‌ نه‌خۆشییه‌كه‌ت چاكببه‌وه‌.»
35
كاتێك عیسا قسه‌ی ده‌كرد، كه‌سانێك له‌ ماڵی پێشه‌وای كه‌نیشته‌وه‌ هاتن، گوتیان: «كچه‌كه‌ت مرد، ئیتر ئه‌زیه‌ت مه‌خه‌ره‌ به‌ر مامۆستا.»
36
به‌ڵام عیسا گوێی به‌ قسه‌كه‌یان نه‌دا، به‌ پێشه‌واكه‌ی كه‌نیشتی فه‌رموو: «مه‌ترسه‌، ته‌نها باوه‌ڕت هه‌بێت.»
37
نه‌یهێشت كه‌س له‌گه‌ڵی بچێت، په‌ترۆس و یاقوب و یۆحه‌نای برای یاقوب نه‌بێت.
38
هاتنه‌ ماڵی پێشه‌واكه‌ی كه‌نیشت، بینی هه‌را و گریان و شیوه‌نێكی زۆره‌.
39
چووه‌ ژووره‌وه‌، پێی فه‌رموون: «بۆچی هه‌راتانه‌ و ده‌گریێن؟ كچه‌كه‌ نه‌مردووه‌، نوستووه‌.»
40
به‌مه‌ خه‌ڵكه‌كه‌ پێی پێكه‌نین.
به‌ڵام عیسا هه‌موویانی ده‌ركرده‌ ده‌ره‌وه‌، دایك و باوكی منداڵه‌كه‌ی برد له‌گه‌ڵ ئه‌وانه‌ی له‌گه‌ڵی بوون و چووه‌ ژووره‌وه‌ بۆ ئه‌و شوێنه‌ی منداڵه‌كه‌ی لێبوو.
41
ده‌ستی منداڵه‌كه‌ی گرت و پێی فه‌رموو: «تالیسا، قوم!» واته‌: «كیژۆڵه‌، پێت ده‌ڵێم هه‌سته‌!»
42
كچه‌كه‌ كه‌ ته‌مه‌نی دوازده‌ ساڵ بوو، ده‌ستبه‌جێ هه‌ستا و ده‌ستی به‌ ڕۆیشتن كرد، جا هه‌موویان زۆر سه‌رسام بوون.
43
به‌ توندیش ڕایسپاردن كه‌س به‌مه‌ نه‌زانێت و فه‌رمووی شتێكی بده‌نێ با بیخوات.
  1. a. 5‏:9 لێگیۆن: لاتینی، واته‌ له‌شكری 6000 سه‌ربازی.
  2. b. 5‏:20 ده‌ شاره‌كه‌: دیكاپۆلیس، ده‌كه‌وێته‌ ڕۆژهه‌ڵاتی ڕووباری ئوردون.