عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
حه‌زره‌تی یه‌حیا 
1
هه‌ر له‌و ڕۆژانه‌دا، یه‌حیای له‌ئاوهه‌ڵكێش[a] له‌ ده‌شتی یه‌هودیا ده‌ركه‌وت و په‌یامی خودای ڕاده‌گه‌یاند،
2
ده‌یگوت: «تۆبه‌ بكه‌ن، چونكه‌ پاشایه‌تی ئاسمان نزیك بووه‌ته‌وه‌.»
3
ئه‌مه‌ش ئه‌وه‌یه‌ كه‌ له‌ ڕێگه‌ی پێغه‌مبه‌ر ئیشایاوه‌ ده‌رباره‌ی گوتراوه‌:
{كه‌سێك له‌ چۆڵه‌وانی هاوار ده‌كات و ده‌ڵێت:
«ڕێگا بۆ هاتنی یه‌زدان ئاماده‌ بكه‌ن،
ڕێچكه‌كانی بۆ ڕێكبخه‌ن.»}[b]
4
جلوبه‌رگی یه‌حیا له‌ مووی وشتر بوو، پشتێنێكی چه‌رمیشی له‌ كه‌مه‌ری ده‌به‌ست، خواردنیشی كولله‌ و هه‌نگوینی كێوی بوو.
5
ئیتر خه‌ڵكی ئۆرشه‌لیم و ته‌واوی یه‌هودیا و هه‌موو ناوچه‌كانی ده‌وروبه‌ری ڕووباری ئوردون هاتنه‌ لای،
6
له‌سه‌ر ده‌ستی ئه‌و له‌ ڕووباری ئوردون له‌ ئاو هه‌ڵده‌كێشران و دانیان به‌ گوناهه‌كانیاندا ده‌نا.
7
كه‌ بینی زۆر له‌ فه‌ریسی[c] و سه‌دوقی[d] بۆ له‌ئاوهه‌ڵكێشانه‌كه‌ی[e] دێن، پێی گوتن: «ئه‌ی بێچووه‌ ماران، كێ ئاگاداری كردوونه‌ته‌وه‌ له‌ ده‌ست تووڕه‌یی داهاتوو هه‌ڵبێن؟
8
با به‌رهه‌مێكتان هه‌بێت له‌ تۆبه‌كردن بوه‌شێته‌وه‌.
9
پێتان وا نه‌بێت ده‌توانن به‌خۆتان بڵێن: ”ئیبراهیم باوكمانه‌.“ پێتان ده‌ڵێم، خودا ده‌توانێت له‌م به‌ردانه‌ نه‌وه‌ بۆ ئیبراهیم دروستبكات.
10
ئه‌وه‌تا ته‌ور خراوه‌ته‌ سه‌ر ڕه‌گی دار، هه‌ر دارێك به‌رهه‌می باش نه‌دات، ده‌بڕدرێته‌وه‌ و فڕێده‌درێته‌ ناو ئاگره‌وه‌.
11
«من بۆ تۆبه‌كردن له‌ ئاوتان هه‌ڵده‌كێشم، به‌ڵام ئه‌وه‌ی له‌دوای من دێت، له‌ من به‌تواناتره‌، شایانی ئه‌وه‌ نیم پێڵاوه‌كانی بۆ هه‌ڵبگرم. ئه‌و له‌ ڕۆحی پیرۆز و له‌ ئاگرتان هه‌ڵده‌كێشێت[f] .
12
شه‌نی به‌ده‌سته‌وه‌یه‌ بۆ پاككردنه‌وه‌ی جۆخینه‌كه‌ی[g] ، گه‌نمه‌كه‌ له‌ ئه‌مباردا كۆده‌كاته‌وه‌ و قه‌سه‌ڵه‌كه‌ش[h] به‌ ئاگرێكی نه‌كوژاوه‌ ده‌سووتێنێت.»
له‌ئاوهه‌ڵكێشانی عیسا 
13
ئینجا عیسا له‌ جه‌لیله‌وه‌ هاته‌ ئوردون، تاكو له‌سه‌ر ده‌ستی یه‌حیا له‌ ئاو هه‌ڵبكێشرێت.
14
به‌ڵام یه‌حیا ده‌یویست ڕایگرێت و ده‌یگوت: «من پێویستیم به‌وه‌یه‌ له‌سه‌ر ده‌ستی تۆ له‌ ئاو هه‌ڵبكێشرێم، كه‌چی تۆ دێیت بۆ لای من؟»
15
عیساش وه‌ڵامی دایه‌وه‌: «ئێستا ڕێگا بده‌، چونكه‌ ئاوا له‌ ئێمه‌ ده‌وه‌شێته‌وه‌ هه‌تا هه‌موو ڕاستودروستییه‌ك[i] ته‌واو بكه‌ین.» ئینجا ڕێی دا.
16
كاتێك عیسا له‌ ئاو هه‌ڵكێشرا، ده‌ستبه‌جێ له‌ ئاوه‌كه‌ هه‌ستایه‌وه‌. ئه‌وه‌ بوو ئاسمانی بۆ كرایه‌وه‌ و بینی ڕۆحی خودا وه‌ك كۆترێك نیشته‌وه‌ و هاته‌ سه‌ری.
17
ده‌نگێكیش له‌ ئاسمانه‌وه‌ فه‌رمووی: «ئه‌مه‌ كوڕی خۆشه‌ویستمه‌، ئه‌وه‌ی زۆر پێی دڵشادم.»
  1. a. 3‏:1 یه‌حیا به‌م نازناوه‌ ناسراوه‌ به‌هۆی ئه‌وه‌ی كه‌ له‌ ڕووباری ئوردون ئه‌و خه‌ڵكه‌ی له‌ ئاو هه‌ڵده‌كێشا كه‌ تۆبه‌یان ده‌كرد.
  2. b. 3‏:3 \+xt ئیشایا 40‏:3‏\+xt*‏
  3. c. 3‏:7 یان په‌ره‌شین، مه‌زه‌بێكی جوله‌كه‌ بوون، له‌ به‌جێگه‌یاندنی ته‌ورات توندڕه‌و بوون.
  4. d. 3‏:7 مه‌زه‌بێكی جوله‌كه‌ بوون كه‌ زۆربه‌یان كاهین بوون، باوه‌ڕیان به‌ فریشته‌ و هه‌ستانه‌وه‌ نه‌بوو.
  5. e. 3‏:7 یۆنانی: \+tl باپتسمه‌\+tl*، به‌ واتای شوشتن دێت بۆ پاكبوونه‌وه‌ له‌ گوناه، وه‌ك (بسمیلكردن).
  6. f. 3‏:11 به‌ واتای شوشتن دێت بۆ پاكبوونه‌وه‌ له‌ گوناه به‌هۆی ڕۆحی پیرۆز.
  7. g. 3‏:12 جۆخین یان سه‌رخه‌رمان ئه‌و زه‌وییه‌ ته‌رخانكراوه‌یه‌ كه‌ له‌لایه‌ن وه‌رزێر و جوتیاره‌وه‌ به‌كارهێنراوه‌ بۆ كوتانی دانه‌وێڵه‌ له‌سه‌ری له‌دوای كۆكردنه‌وه‌ی له‌ كێڵگه‌.
  8. h. 3‏:12 قه‌سه‌ڵ لاسكه‌ وشكه‌كه‌یه‌ كه‌ دوای دروێنه‌ ده‌مێنێته‌وه‌، كاتێك قه‌سه‌ڵه‌كه‌ ده‌كوترێت ده‌بێت به‌ كا.
  9. i. 3‏:15 مه‌به‌ست ئه‌وه‌یه‌ كه‌ ده‌بێت هه‌موو شتێك به‌گوێره‌ی خواستی خودا په‌یڕه‌و بكرێت.