عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
وێرانكردنی شاری عای 
1
ئینجا یه‌زدان به‌ یه‌شوعی فه‌رموو: «مه‌ترسه‌ و وره‌ به‌رمه‌ده‌. هه‌موو جه‌نگاوه‌ره‌كان له‌گه‌ڵ خۆت ببه‌ و هه‌سته‌ سه‌ربكه‌وه‌ بۆ عای، ببینه‌ من پاشاكه‌ی و گه‌له‌كه‌ی و شاره‌كه‌ی و خاكه‌كه‌یم داوه‌ته‌ ده‌ست تۆ.
2
ئه‌وه‌ی به‌ ئه‌ریحا و پاشاكه‌یت كرد، به‌ عای و پاشاكه‌ی بكه‌، به‌ڵام ده‌ستكه‌وته‌كان و ئاژه‌ڵه‌ ماڵییه‌كانی بۆ خۆتان تاڵان بكه‌ن. له‌ پشتییه‌وه‌ بۆسه‌یه‌ك بۆ شاره‌كه‌ بنێوه‌.»
3
جا یه‌شوع و هه‌موو جه‌نگاوه‌ره‌كانی سوپا هه‌ستان بۆ ئه‌وه‌ی به‌سه‌ر عایدا بده‌ن، یه‌شوع سی هه‌زار جه‌نگاوه‌ری قاره‌مانی هه‌ڵبژارد و به‌ شه‌و ناردنی،
4
فه‌رمانی پێ كردن و گوتی: «وریابن، ئێوه‌ له‌ پشته‌وه‌ بۆسه‌ بۆ شاره‌كه‌ ده‌نێنه‌وه‌ و زۆر له‌ شاره‌كه‌ دوور مه‌كه‌ونه‌وه‌ و هه‌مووتان له‌ ئاماده‌باشیدا بن.
5
منیش له‌گه‌ڵ هه‌موو ئه‌م گه‌له‌ له‌ شاره‌كه‌ نزیك ده‌بینه‌وه‌ و ئیتر كه‌ ئه‌وان دێنه‌ ده‌ره‌وه‌ بۆمان، ئێمه‌ وه‌ك یه‌كه‌م جار له‌به‌رده‌میاندا هه‌ڵدێین و
6
ئه‌وان به‌دوامان ده‌كه‌ون هه‌تا له‌ شاره‌كه‌ دووریان ده‌خه‌ینه‌وه‌، چونكه‌ ده‌ڵێن: ”ئه‌وه‌تا وه‌ك یه‌كه‌م جار له‌به‌رده‌ممان هه‌ڵدێن،“ جا له‌به‌رده‌میان هه‌ڵدێین.
7
ئێوه‌ش له‌ بۆسه‌كه‌وه‌ دێنه‌ ده‌ره‌وه‌ و ده‌ست به‌سه‌ر شاره‌كه‌دا ده‌گرن و یه‌زدانی په‌روه‌ردگارتان ده‌یدات به‌ ده‌ستتانه‌وه‌.
8
كاتێك شاره‌كه‌ ده‌گرن، ئاگری تێبه‌ر ده‌ده‌ن، ئه‌وه‌ بكه‌ن وه‌ك یه‌زدان فه‌رمانی پێ كردوون، سه‌یر بكه‌ن ئه‌وه‌ فه‌رمانی منه‌ بۆ ئێوه‌.»
9
ئینجا یه‌شوع ناردنی و ئه‌وانیش بۆ شوێنی بۆسه‌كه‌ ڕۆیشتن و له‌نێوان بێت‌ئێل و عای، له‌ ڕۆژئاوای عای مانه‌وه‌. ئه‌و شه‌وه‌ یه‌شوع له‌ناوه‌ڕاستی گه‌ل مایه‌وه‌.
10
بۆ به‌یانی یه‌شوع زوو له‌ خه‌و هه‌ستا و گه‌له‌كه‌ی كۆكرده‌وه‌ و خۆی و پیرانی ئیسرائیل له‌پێش گه‌له‌وه‌ سه‌ركه‌وتن بۆ عای.
11
هه‌روه‌ها هه‌موو ئه‌و له‌شكره‌ی له‌گه‌ڵیدا بوون سه‌ركه‌وتن و چوونه‌ پێشه‌وه‌ و هاتنه‌ به‌رامبه‌ر شاره‌كه‌، له‌ باكووری عای چادریان هه‌ڵدا و دۆڵه‌كه‌ له‌نێوان ئه‌وان و عای بوو.
12
یه‌شوع نزیكه‌ی پێنج هه‌زار پیاوی نارد و له‌نێوان بێت‌ئێل و عای، له‌ ڕۆژئاوای عای له‌ بۆسه‌دا داینان.
13
ئیتر گه‌ل، واته‌ هه‌موو له‌شكره‌كه‌ كه‌ له‌ باكووری شاره‌كه‌ بوو له‌گه‌ڵ ئه‌وانه‌ی كه‌ له‌ بۆسه‌كه‌ی ڕۆژئاوای شاره‌كه‌ بوون، جێگیر بوون، یه‌شوعیش ئه‌و شه‌وه‌ چووه‌ ناوه‌ڕاستی دۆڵه‌كه‌.
14
كاتێك پاشای عای ئه‌مه‌ی بینی، خۆی و پیاوانی شاره‌كه‌ به‌یانی زوو به‌ په‌له‌ هاتنه‌ ده‌ره‌وه‌ بۆ به‌ره‌نگاربوونه‌وه‌ی ئیسرائیل له‌ به‌رزاییه‌ك كه‌ ده‌یڕوانییه‌ «عه‌راڤا[a] »، به‌ڵام پاشا نه‌یده‌زانی كه‌ له‌ پشت شاره‌كه‌وه‌ بۆسه‌یه‌كی بۆ نراوه‌ته‌وه‌.
15
یه‌شوع له‌گه‌ڵ هه‌موو ئیسرائیل وایان پیشان دا كه‌ شكستیان خواردوو و به‌ ڕێگای چۆڵه‌وانیدا هه‌ڵاتن.
16
له‌نێو هه‌موو خه‌ڵكی شاری عای بانگه‌واز بڵاو بووه‌وه‌ كه‌ دوایان بكه‌ون، ئه‌وانیش دوای یه‌شوع كه‌وتن و له‌ شاره‌كه‌ دووركه‌وتنه‌وه‌.
17
یه‌ك پیاو له‌ عای یان له‌ بێت‌ئێل نه‌ما كه‌ به‌دوای ئیسرائیل نه‌كه‌وتبێت. شاره‌كه‌یان به‌ كراوه‌یی به‌جێهێشت و به‌دوای ئیسرائیل كه‌وتن.
18
ئینجا یه‌زدان به‌ یه‌شوعی فه‌رموو: «ڕمه‌كه‌ی ده‌ستت ڕووه‌و عای بگره‌، چونكه‌ من ده‌یده‌مه‌ ده‌ستته‌وه‌.» یه‌شوعیش ئه‌و ڕمه‌ی به‌ ده‌ستیه‌وه‌ بوو ڕووه‌و شاره‌كه‌ی كرد.
19
كاتێك ده‌ستی درێژكرد ئه‌وانه‌ی له‌ بۆسه‌كه‌ بوون به‌ په‌له‌ له‌ جێی خۆیان هه‌ستان و ڕایانكرد و چوونه‌ ناو شاره‌كه‌وه‌ و گرتیان و به‌ په‌له‌ سووتاندیان.
20
پیاوه‌كانی عای ئاوڕیان دایه‌وه‌ و ته‌ماشایان كرد وا دووكه‌ڵی شاره‌كه‌ بۆ ئاسمان به‌رز بووه‌ته‌وه‌ و هیچ جێیه‌كیش نییه‌ بۆی هه‌ڵبێن، نه‌ به‌ملا و نه‌ به‌ولا، ئیسرائیلییه‌كانیش كه‌ بۆ چۆڵه‌وانی ڕایانده‌كرد به‌سه‌ر ڕاونه‌ره‌كاندا هه‌ڵگه‌ڕانه‌وه‌.
21
جا كه‌ یه‌شوع و هه‌موو ئیسرائیل بینییان بۆسه‌كه‌ شاره‌كه‌ی گرتووه‌ و دووكه‌ڵی شاره‌كه‌ به‌رز بووه‌ته‌وه‌، گه‌ڕانه‌وه‌ و له‌ پیاوه‌كانی عاییان دا.
22
جه‌نگاوه‌ران له‌ناو بۆسه‌كه‌ش له‌ شاره‌كه‌وه‌ بۆ په‌لاماردانیان هاتنه‌ ده‌ره‌وه‌ و پیاوه‌كانی عای كه‌وتنه‌ نێوان ئیسرائیلییه‌كان. ئه‌مان له‌م لاوه‌ و ئه‌وان له‌ولاوه‌، ئینجا لێیان دان تاكو كه‌سیان لێ نه‌ما هه‌ڵبێت و ده‌رباز بێت.
23
به‌ڵام پاشای عاییان به‌ زیندوویی ده‌ستگیر كرد و بردیانه‌ به‌رده‌م یه‌شوع.
24
پاش ئه‌وه‌ی ئیسرائیل له‌ كوشتنی هه‌موو پیاوه‌كانی عای بوونه‌وه‌ كه‌ له‌ كێڵگه‌ و چۆڵه‌وانیدا دوایان كه‌وتبوون هه‌تا قڕیان بكه‌ن، هه‌موو ئیسرائیلییه‌كان گه‌ڕانه‌وه‌ ناو شار و هه‌موو ئه‌و دانیشتووانانه‌یان به‌ شمشێر كوشت كه‌ له‌وێ مابوونه‌وه‌.
25
سه‌رجه‌م دانیشتووانی عای، هه‌موو ئه‌وانه‌ی له‌و ڕۆژه‌دا كه‌وتن له‌ پیاو و له‌ ژن، دوازده‌ هه‌زار كه‌س بوون.
26
یه‌شوعیش ئه‌و ده‌سته‌ی كه‌ ڕمه‌كه‌ی پێ درێژكردبوو نه‌یگه‌ڕانده‌وه‌ دواوه‌ هه‌تا سه‌رجه‌م دانیشتووانی عای قڕ بوون[b] .
27
به‌ڵام نه‌وه‌ی ئیسرائیل ئاژه‌ڵی ماڵی و ده‌ستكه‌وتی ئه‌و شاره‌یان بۆ خۆیان تاڵان كرد، به‌گوێره‌ی فه‌رمایشتی یه‌زدان كه‌ فه‌رمانی به‌ یه‌شوع كردبوو.
28
ئینجا یه‌شوع عایی سووتاند[c] و كردییه‌ گردێكی وێرانی هه‌تاهه‌تایی، هه‌تا ئه‌مڕۆش هه‌روا ماوه‌ته‌وه‌.
29
هه‌روه‌ها لاشه‌ی پاشای عایی هه‌تا ئێواره‌ له‌سه‌ر دار هه‌ڵواسی، له‌ كاتی ئاوابوونی خۆر یه‌شوع فه‌رمانی دا و لاشه‌كه‌یان هێنا خواره‌وه‌ و له‌به‌رده‌م ده‌روازه‌ی شاره‌كه‌ فڕێیان دا و كۆمه‌ڵه‌ به‌ردێكی گه‌وره‌یان له‌سه‌ر كه‌ڵه‌كه‌ كرد كه‌ هه‌تا ئه‌مڕۆ ماوه‌ته‌وه‌.
تازه‌كردنه‌وه‌ی په‌یمانه‌كه‌ له‌ كێوی عێبال 
30
ئینجا یه‌شوع قوربانگایه‌كی بۆ یه‌زدانی په‌روه‌ردگاری ئیسرائیل له‌ كێوی عێبال بنیاد نا.
31
هه‌روه‌ك موسای به‌نده‌ی یه‌زدان فه‌رمانی به‌ نه‌وه‌ی ئیسرائیل كردبوو، به‌پێی ئه‌وه‌ی له‌ په‌ڕتووكی ته‌وراتی موسادا نووسراوه‌، قوربانگایه‌ك له‌ به‌ردی نه‌تاشراو، كه‌ ئامێری ئاسنی به‌سه‌ردا به‌رز نه‌كرابووه‌وه‌، قوربانی سووتاندنیان بۆ یه‌زدان سه‌رخسته‌ سه‌ری و قوربانی هاوبه‌شییان[d] سه‌ربڕی.
32
له‌وێ یه‌شوع له‌به‌رچاوی نه‌وه‌ی ئیسرائیل وێنه‌یه‌كی له‌و فێركردنه‌ نووسییه‌وه‌ كه‌ موسا نووسیبووی.
33
هه‌موو ئیسرائیلیش نامۆ و هاوڵاتی وه‌ك یه‌ك، له‌گه‌ڵ پیر و كوێخا و دادوه‌ریان له‌ته‌نیشت سندوقه‌كه‌وه‌، له‌م لا و ئه‌و لاوه‌ به‌رامبه‌ر به‌ كاهینه‌ لێڤییه‌كان هه‌ڵگرانی سندوقی په‌یمانی یه‌زدان وه‌ستان، نیوه‌یان به‌لای كێوی گه‌ریزیم و نیوه‌كه‌ی دیكه‌یان به‌لای كێوی عێبال، وه‌ك چۆن له‌وه‌و پێش موسای به‌نده‌ی یه‌زدان فه‌رمانی دابوو، كاتێك فه‌رمانی دا بۆ داواكردنی به‌ره‌كه‌ت بۆ گه‌لی ئیسرائیل.
34
پاشان هه‌موو وشه‌كانی ئه‌و فێركردنه‌ی خوێنده‌وه‌، به‌ره‌كه‌ت و نه‌فره‌ت، به‌گوێره‌ی هه‌موو ئه‌وه‌ی له‌ په‌ڕتووكی ته‌وراتدا نووسرابوو.
35
وشه‌یه‌ك نه‌بوو له‌ هه‌موو ئه‌و شتانه‌ی كه‌ موسا فه‌رمانی پێ كردبوو، كه‌ یه‌شوع نه‌یخوێنێته‌وه‌، له‌به‌رده‌م هه‌موو كۆمه‌ڵی ئیسرائیلدا به‌ ئافره‌ت و منداڵ و ئه‌و نامۆیانه‌ش كه‌ له‌نێویاندا بوو.
  1. a. 8‏:14 عه‌راڤا شیوێك بوو له‌ ده‌ریاچه‌ی جه‌لیله‌وه‌ هه‌تا ده‌ریای مردوو.
  2. b. 8‏:26 قڕ بوون: له‌ زمانی عیبری ئه‌م زاراوه‌یه‌ ده‌گه‌ڕێته‌وه‌ بۆ شتێك یان كه‌سێك كه‌ ده‌به‌خشرێت به‌ یه‌زدان، زۆر جار به‌خشینه‌كه‌ به‌ ته‌واوی له‌ ناوده‌بردرێت.
  3. c. 8‏:28 یه‌شوع عایی سووتاند: واته‌ یه‌شوع و پیاوه‌كانی شاری عاییان سووتاند.
  4. d. 8‏:31 قوربانی هاوبه‌شی: ئه‌م قوربانییه‌ هاوده‌می قوربانی سووتاندن بوو. ته‌نها یه‌ك كه‌س هه‌ڵده‌ستا به‌ دابینكردنی ئه‌م قوربانییه‌، به‌ڵام له‌گه‌ڵ خه‌ڵكی دیكه‌ به‌شی زۆری ئه‌م قوربانییه‌یان له‌به‌رده‌م خودا ده‌خوارد وه‌ك هێمایه‌ك بۆ پێكه‌وه‌ ژیان. بڕوانه‌\+xt لێڤییه‌كان 7‏:11‏-15.‏\+xt*‏