عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
1
كاتێك هه‌موو نه‌ته‌وه‌كه‌ له‌ ڕووباری ئوردون ته‌واو په‌ڕینه‌وه‌، یه‌زدان به‌ یه‌شوعی فه‌رموو:
2
«دوازده‌ پیاو له‌ گه‌ل بۆ خۆتان هه‌ڵبژێرن، له‌ هه‌ر هۆزه‌ و پیاوێك،
3
فه‌رمانیان پێ بكه‌ن و پێیان بڵێن: ”لێره‌ له‌ناوه‌ڕاستی ڕووباری ئوردونه‌وه‌، له‌ شوێن پێی كاهینه‌كان كه‌ تێیدا جێگیر بوون، دوازده‌ به‌رد هه‌ڵبگرن و له‌گه‌ڵ خۆتان بیانپه‌ڕێننه‌وه‌ و له‌و شوێنه‌دا دایانبنێن كه‌ ئه‌مشه‌و تێیدا ده‌مێننه‌وه‌.“»
4
ئینجا یه‌شوع ئه‌و دوازده‌ پیاوه‌ی بانگكرد كه‌ له‌ نه‌وه‌ی ئیسرائیل هه‌ڵیبژاردبوون، له‌ هه‌ر هۆزه‌ و پیاوێك،
5
یه‌شوع پێی گوتن: «له‌به‌رده‌م سندوقی یه‌زدانی په‌روه‌ردگارتانه‌وه‌ تێپه‌ڕ بن بۆ ناوه‌ڕاستی ڕووباری ئوردون و به‌گوێره‌ی ژماره‌ی هۆزه‌كانی نه‌وه‌ی ئیسرائیل هه‌ریه‌ك له‌ ئێوه‌ به‌ردێك به‌رز بكاته‌وه‌ بۆ سه‌ر شانی،
6
بۆ ئه‌وه‌ی ئه‌مه‌ ببێته‌ نیشانه‌یه‌ك له‌نێوتان. ئه‌گه‌ر سبه‌ینێ منداڵه‌كانتان لێتان بپرسن: ”ئه‌م به‌ردانه‌ چ واتایه‌كی هه‌یه‌؟“
7
ئێوه‌ش پێیان ده‌ڵێن: ”ئاوی ڕووباری ئوردون له‌به‌رده‌م سندوقی په‌یمانی یه‌زدان وه‌ستا. كاتێك له‌ ڕووباری ئوردون په‌ڕینه‌وه‌، ئاوی ئوردون ڕاوه‌ستا، جا ئه‌م به‌ردانه‌ ده‌بنه‌ یادگاری بۆ نه‌وه‌ی ئیسرائیل بۆ هه‌تاهه‌تایه‌.“»
8
نه‌وه‌ی ئیسرائیلیش ئاوایان كرد، هه‌روه‌ك یه‌شوع فه‌رمانی پێ كردن، دوازده‌ به‌ردیان له‌ناوه‌ڕاستی ڕووباری ئوردونه‌وه‌ هه‌ڵگرت، هه‌روه‌ك یه‌زدان به‌ یه‌شوعی فه‌رموو، به‌پێی ژماره‌ی هۆزه‌كانی نه‌وه‌ی ئیسرائیل و له‌گه‌ڵ خۆیاندا په‌ڕاندیانه‌وه‌ بۆ ئه‌و شوێنه‌ی چادریان تێیدا هه‌ڵدا و له‌وێ دایاننان.
9
یه‌شوعیش دوازده‌ به‌رده‌كه‌ی ناو ڕووباری ئوردون كه‌ له‌ شوێن پێی كاهینه‌كانی هه‌ڵگری سندوقی په‌یمان بوون ڕاگیری كرد و هه‌تا ئه‌مڕۆش له‌و شوێنه‌دان.
10
كاهینه‌كانی هه‌ڵگرانی سندوقه‌كه‌ له‌ناوه‌ڕاستی ڕووباری ئوردوندا وه‌ستان هه‌تا هه‌موو ئه‌و شتانه‌ی یه‌زدان فه‌رمانی به‌ یه‌شوع كردبوو به‌ گه‌لی بڵێت به‌گوێره‌ی هه‌موو ئه‌وه‌ی موسا فه‌رمانی به‌ یه‌شوع كردبوو ته‌واو بوو. گه‌ل په‌له‌یان كرد و په‌ڕینه‌وه‌.
11
كاتێك هه‌موو گه‌ل ته‌واو په‌ڕینه‌وه‌، سندوقی یه‌زدان و كاهینه‌كانیش به‌ به‌رده‌م گه‌لدا په‌ڕینه‌وه‌.
12
نه‌وه‌ی ڕه‌ئوبێن و نه‌وه‌ی گاد و نیوه‌ی هۆزی مه‌نه‌شه‌ش به‌ چه‌كه‌وه‌ له‌به‌رده‌م نه‌وه‌ی ئیسرائیل په‌ڕینه‌وه‌، هه‌روه‌ك موسا پێی گوتبوون[a] .
13
نزیكه‌ی چل هه‌زار چه‌كدار بۆ شه‌ڕكردن له‌به‌رده‌م یه‌زدان په‌ڕینه‌وه‌ بۆ جه‌نگ به‌ره‌و ده‌شته‌كانی ئه‌ریحا.
14
له‌و ڕۆژه‌ یه‌زدان له‌به‌رچاوی هه‌موو ئیسرائیل یه‌شوعی به‌رز ڕاگرت، ئه‌وانیش به‌ درێژایی ژیانی یه‌شوع ڕێزێكی تایبه‌تیان بۆی هه‌بوو، هه‌روه‌ك چۆن ڕێزیان له‌ موسا گرتبوو.
15
هه‌روه‌ها یه‌زدان به‌ یه‌شوعی فه‌رموو:
16
«فه‌رمان به‌ كاهینه‌كانی هه‌ڵگرانی سندوقی په‌یمانی بكه‌ با له‌ ڕووباری ئوردونه‌وه‌ سه‌ربكه‌ون.»
17
یه‌شوعیش فه‌رمانی به‌ كاهینه‌كان كرد و گوتی: «له‌ ڕووباری ئوردونه‌وه‌ سه‌ربكه‌ون.»
18
ئه‌وه‌ بوو له‌گه‌ڵ سه‌ركه‌وتنی كاهینه‌كانی هه‌ڵگری سندوقی په‌یمانی یه‌زدان له‌ناوه‌ڕاستی ڕووباری ئوردونه‌وه‌، بن پێی كاهینه‌كان كه‌وته‌ سه‌ر وشكانی، ئاوی ڕووباری ئوردون گه‌ڕایه‌وه‌ شوێنی خۆی و وه‌ك پێشتر بووه‌وه‌ به‌ لافاو.
19
گه‌لیش له‌ ده‌یه‌م ڕۆژی مانگی یه‌كدا له‌ ڕووباری ئوردونه‌وه‌ سه‌ركه‌وتن و له‌ گلگال له‌ سنووری ڕۆژهه‌ڵاتی ئه‌ریحا چادریان هه‌ڵدا.
20
ئه‌و دوازده‌ به‌رده‌ش كه‌ له‌ ڕووباری ئوردونه‌وه‌ هێنابوویان، یه‌شوع له‌ گلگال كه‌ڵه‌كه‌ی كردن و
21
به‌ نه‌وه‌ی ئیسرائیلی گوت: «ئه‌گه‌ر سبه‌ینێ نه‌وه‌كانتان له‌ باوباپیرانی خۆیانیان پرسی: ”ئه‌م به‌ردانه‌ چین؟“
22
پێیان بناسێنن و پێیان بڵێن: ”نه‌وه‌ی ئیسرائیل به‌سه‌ر وشكانی له‌م ڕووباری ئوردونه‌ په‌ڕینه‌وه‌.“
23
چونكه‌ یه‌زدانی په‌روه‌ردگارتان ئاوی ڕووباری ئوردونی له‌به‌رده‌میاندا وشك كرد هه‌تا په‌ڕینه‌وه‌، هه‌روه‌ك ئه‌وه‌ی به‌ ده‌ریای سووری كرد كه‌ له‌به‌رده‌مماندا وشكی كرد هه‌تا ئێمه‌ په‌ڕینه‌وه‌.
24
ئه‌مه‌ی كرد هه‌تا هه‌موو گه‌لانی خاكه‌كه‌ بزانن كه‌ ده‌ستی یه‌زدان به‌هێزه‌، تاوه‌كو هه‌تاهه‌تایه‌ له‌ یه‌زدانی په‌روه‌ردگارتان بترسن.»
  1. a. 4‏:12 هه‌روه‌ك موسا پێی گوتبوون: بڕوانه‌ 1‏:12‏-15 و دواوتار 3‏:18‏-20.