عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
1
دیسان ئه‌لیهو گوتی:
2
«تۆزێك ئارامم له‌گه‌ڵ بگره‌ جا پێتی نیشان ده‌ده‌م
كه‌ هێشتا قسه‌ هه‌یه‌ له‌به‌ر خودا بگوترێت.
3
زانینم له‌ دووره‌وه‌ هه‌ڵده‌گرم و
ڕاستودروستی ده‌ده‌مه‌ پاڵ دروستكه‌ره‌كه‌م.
4
به‌ڕاستی قسه‌كانم درۆ نین،
ئه‌و كه‌سه‌ی زانیاری ته‌واوه‌ له‌لای تۆیه‌.
5
«خودا مه‌زنه‌ و به‌ چاوی سووك ته‌ماشای كه‌س ناكات،
گه‌وره‌یه‌ و ئامانجه‌كه‌ی چه‌سپاوه‌.
6
خراپه‌كار ناژیێنێت و
مافی زه‌لیلان ده‌دات.
7
چاوه‌كانی له‌سه‌ر كه‌سی ڕاستودروست لا نادات،
به‌ڵكو له‌گه‌ڵ پاشایان له‌سه‌ر ته‌خت دایانده‌نیشێنێت و
هه‌تاسه‌ر پایه‌داریان ده‌كات.
8
ئه‌گه‌ر به‌ زنجیر ببه‌سترێنه‌وه‌،
ئه‌گه‌ر به‌ په‌تی زه‌لیلی ببردرێن،
9
كرده‌وه‌ و یاخیبوونه‌كانی خۆیانیان بۆ ده‌رده‌خات،
چونكه‌ لووتبه‌رز بوون.
10
گوێیه‌كانیان بۆ ئاگاداركردنه‌وه‌ ده‌كاته‌وه‌ و
فه‌رمانیان پێ ده‌كات له‌ خراپه‌كانیان تۆبه‌ بكه‌ن.
11
ئه‌گه‌ر گوێ بگرن و بیپه‌رستن،
ڕۆژگاریان به‌ باشه‌ و
ساڵانیان به‌ خۆشی به‌سه‌رده‌به‌ن.
12
ئه‌گه‌ر گوێش نه‌گرن،
به‌ شمشێر له‌ناوده‌چن و
به‌ نه‌زانی ده‌مرن.
13
«خوانه‌ناسان تووڕه‌یی كۆده‌كه‌نه‌وه‌،
هاواری فریاكه‌وتن ناكه‌ن كه‌ بیانبه‌ستێته‌وه‌.
14
له‌نێو پیاوه‌ له‌شفرۆشه‌كانی نزرگه‌كان
له‌ گه‌نجیێتیدا ده‌مرن.
15
به‌ڵام فریای كڵۆڵ ده‌كه‌وێت له‌ زه‌لیلییه‌كه‌ی و
له‌ كاتی ته‌نگانه‌ گوێیان ده‌كاته‌وه‌.
16
«هه‌روه‌ها له‌ ڕووی ته‌نگانه‌ پاڵت پێوه‌ ده‌نێت
به‌ره‌و شوێنێكی پانوبه‌رین و بێ به‌ربه‌ست و
سه‌ر خوانه‌كه‌ت پڕ ده‌بێت له‌ خواردنی به‌تام.
17
به‌ڵام ئێستا ئه‌و حوكمدانه‌ی كه‌ بۆ خراپه‌كاره‌ به‌سه‌ر تۆدا درا،
حوكمدان و دادپه‌روه‌ری ده‌تگرن.
18
ئاگاداربه‌ ده‌وڵه‌مه‌ندی په‌لكێشت نه‌كات،
زۆری به‌رتیل به‌ڕه‌ڵات ناكات.
19
ئایا ده‌وڵه‌مه‌ندیت بۆ فریاكه‌وتن
له‌ ته‌نگانه‌ ده‌تپارێزێت
یان هه‌موو ئه‌و كۆششكردنه‌ له‌ تواناتدایه‌؟
20
تامه‌زرۆی شه‌و مه‌به‌،
هه‌تا خه‌ڵك له‌ ماڵه‌كانیان ڕابكێشیت.
21
ئاگاداربه‌! ئاوڕ له‌ خراپه‌ مه‌ده‌وه‌،
چونكه‌ ئه‌مه‌ت هه‌ڵبژارد نه‌ك زه‌لیلی.
22
«خودا به‌ توانای خۆی پایه‌به‌رزه‌.
كێ وه‌ك ئه‌و مامۆستایه‌؟
23
كێ ڕێگای ئه‌وی به‌سه‌ردا سه‌پاندووه‌؟
یان كێ پێی ده‌ڵێت: ”خراپه‌ت كردووه‌؟“
24
له‌بیرت بێت كه‌ كاره‌كه‌ی به‌ مه‌زن بزانیت،
كه‌ خه‌ڵكی گۆرانی به‌سه‌ردا ده‌ڵێن.
25
هه‌موو مرۆڤ ده‌یبینێت؛
خه‌ڵكی له‌ دووره‌وه‌ ته‌ماشای ده‌كه‌ن.
26
خودا چه‌ند مه‌زنه‌ و ئێمه‌ش نایناسین و
ژماره‌ی ساڵه‌كانی ناپشكێنرێن.
27
«دڵۆپه‌كانی ئاو ڕاده‌كێشێت،
ده‌یانكات به‌ هه‌ور پاشان ده‌یانبارێنێت؛
28
له‌ هه‌وره‌كانه‌وه‌ بارانێكی زۆر
به‌سه‌ر ئاده‌میزاد ده‌ڕژێنێت.
29
ئایا كه‌س تێده‌گات چۆن هه‌وره‌كان په‌رت ده‌كات
یان چۆن له‌ كه‌پره‌كه‌یه‌وه‌ هه‌وره‌تریشقه‌ ده‌نێرێت؟
30
ببینه‌ بروسكه‌ی خۆی به‌سه‌ر خۆیدا په‌رتوبڵاو ده‌كات و
قووڵایی ده‌ریا داده‌پۆشێت،
31
چونكه‌ به‌مه‌ حوكمڕانی گه‌لان ده‌كات و
به‌ پڕی خواردن ده‌دات.
32
به‌ ده‌سته‌كانی بروسكه‌ ده‌گرێت و
فه‌رمانی پێده‌دات له‌ دوژمن بدات.
33
گرمه‌كه‌ی ڕایده‌گه‌یه‌نێت،
مه‌ڕوماڵاتیش به‌ هاتنی ده‌زانن.