عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
چاككردنه‌وه‌ی كه‌سێكی به‌ زگماك نابینا 
1
كاتێك كه‌ عیسا به‌ ڕێگادا تێده‌په‌ڕی، پیاوێكی بینی كه‌ به‌ زگماك نابینا بوو،
2
قوتابییه‌كانی لێیان پرسی، گوتیان: «ڕابی، كێ گوناهی كردووه‌، ئه‌م پیاوه‌ یان دایك و باوكی، وا به‌ زگماك نابینایه‌؟»
3
عیسا وه‌ڵامی دایه‌وه‌: «نه‌ ئه‌مه‌ گوناهی كردووه‌ نه‌ دایك و باوكیشی، به‌ڵكو تاكو كاره‌كانی خودای تێدا ده‌ربكه‌وێت.
4
هه‌تا ڕۆژه‌ له‌سه‌رمانه‌ كاری ئه‌وه‌ بكه‌ین كه‌ ناردوومی، چونكه‌ شه‌و دادێت و كه‌س ناتوانێت كاری تێدا بكات.
5
ئه‌وه‌نده‌ی له‌ جیهاندام، من ڕووناكی جیهانم.»
6
ئه‌مه‌ی فه‌رموو و تفی له‌سه‌ر زه‌وی كرد، به‌ تفه‌كه‌ قوڕی گرته‌وه‌، به‌ قوڕه‌كه‌ش چاوی پیاوه‌كه‌ی سواخ دا.
7
پێی فه‌رموو: «بڕۆ له‌ گۆمی سیلوام خۆت بشۆ،» (سیلوام واته‌ نێردراو). جا ڕۆیشت، خۆی شوشت و به‌ چاوی ساغه‌وه‌ گه‌ڕایه‌وه‌ ماڵه‌وه‌.
8
ئینجا دراوسێ و ئه‌وانه‌ی پێشتر بینیبوویان سواڵ ده‌كات گوتیان: «ئه‌مه‌ ئه‌وه‌ نییه‌ داده‌نیشت و سواڵی ده‌كرد؟»
9
هه‌ندێك گوتیان: «خۆیه‌تی.»
هه‌ندێكی دیكه‌ گوتیان: «نه‌خێر، به‌ڵام له‌و ده‌چێت.»
ئه‌ویش ده‌یگوت: «من ئه‌وم.»
10
ئینجا لێیان پرسی: «ئه‌ی چۆن چاوت كرایه‌وه‌؟»
11
وه‌ڵامی دایه‌وه‌: «پیاوێك پێی ده‌گوترێ عیسا، قوڕی گرته‌وه‌ و چاومی سواخ دا، پێی فه‌رمووم: ”بڕۆ له‌ گۆمی سیلوام خۆت بشۆ.“ منیش ڕۆیشتم، خۆمم شوشت و پاشان چاوه‌كانم بینییان.»
12
لێیان پرسی: «ئه‌و له‌كوێیه‌؟»
گوتی: «نازانم.»
13
جا ئه‌وه‌ی پێشتر نابینا بوو بردییانه‌ لای فه‌ریسییه‌كان.
14
ئه‌و ڕۆژه‌ی عیسا قوڕه‌كه‌ی گرته‌وه‌ و چاوی كرده‌وه‌ شه‌ممه‌ بوو.
15
له‌به‌ر ئه‌وه‌ فه‌ریسییه‌كان لێیان پرسی كه‌ چۆن چاوی چاك بووه‌ته‌وه‌. پیاوه‌كه‌ وه‌ڵامی دانه‌وه‌: «قوڕی خسته‌ سه‌ر چاوم، منیش شوشتم و ئێستا ده‌بینم.»
16
هه‌ندێك له‌ فه‌ریسییه‌كان گوتیان: «ئه‌م پیاوه‌ له‌ خوداوه‌ نییه‌، چونكه‌ شه‌ممه‌ ناپارێزێت.[a] »
به‌ڵام هه‌ندێكی دیكه‌ گوتیان: «چۆن پیاوێكی گوناهبار ده‌توانێت په‌رجووی به‌م جۆره‌ بكات؟» ئیتر دووبه‌ره‌كی كه‌وته‌ نێوانیان.
17
دیسان به‌ نابیناكه‌یان گوت: «تۆ ده‌رباره‌ی ئه‌و چی ده‌ڵێی، چونكه‌ چاوی تۆی چاك كرده‌وه‌؟»
گوتی: «پێغه‌مبه‌ره‌.»
18
ڕابه‌رانی جوله‌كه‌كان باوه‌ڕیان نه‌كرد كه‌ ئه‌مه‌ نابینا بووه‌ و ئێستا ده‌بینێت، ئیتر دایك و باوكی ئه‌وه‌یان بانگكرد كه‌ ده‌بینێت.
19
لێیان پرسین: «ئایا ئه‌مه‌ كوڕتانه‌ كه‌ ده‌ڵێن به‌ زگماك نابینا بووه‌؟ ئه‌ی ئێستا چۆن ده‌بینێت؟»
20
دایك و باوكی وه‌ڵامیان دایه‌وه‌: «ده‌زانین ئه‌مه‌ كوڕمانه‌ و به‌ زگماك نابینا بوو.
21
به‌ڵام نازانین ئێستا چۆن ده‌بینێت، یان نازانین كێ چاوی چاك كردووه‌ته‌وه‌. له‌ خۆی بپرسن، ئه‌و گه‌وره‌یه‌ و باسی خۆی ده‌كات.»
22
دایك و باوكی له‌ ترسی ڕابه‌رانی جوله‌كه‌ ئه‌مه‌یان گوت، چونكه‌ ته‌گبیریان كردبوو هه‌ركه‌سێك دانبنێت كه‌ عیسا مه‌سیحه‌كه‌یه‌، له‌ كه‌نیشت ده‌ریده‌كه‌ن.
23
له‌به‌ر ئه‌وه‌ دایك و باوكی گوتیان: «ئه‌و گه‌وره‌یه‌، له‌ خۆی بپرسن.»
24
دیسان فه‌ریسییه‌كان ئه‌و پیاوه‌ی پێشتر نابینا بوو بانگیان كرد و پێیان گوت: «سوێند به‌ خودا بخۆ كه‌ ڕاستییه‌كه‌ بڵێیت! ده‌زانین ئه‌م پیاوه‌ گوناهباره‌.»
25
كابرا وه‌ڵامی دایه‌وه‌: «ئه‌گه‌ر ئه‌و گوناهباره‌، نازانم، به‌ڵام یه‌ك شت ده‌زانم، نابینا بووم و ئێستا ده‌بینم.»
26
له‌به‌ر ئه‌وه‌ لێیان پرسی: «چی لێكردیت؟ چۆن چاوی تۆی كرده‌وه‌؟»
27
وه‌ڵامی دانه‌وه‌: «پێم گوتن گوێتان لێ نه‌گرتم. بۆچی دیسان ده‌تانه‌وێ ببیستن؟ ئێوه‌ش ده‌تانه‌وێ ببنه‌ قوتابی ئه‌و؟»
28
جنێویان پێیدا و گوتیان: «تۆ قوتابی ئه‌ویت! به‌ڵام ئێمه‌ قوتابی موساین.
29
ده‌زانین خودا قسه‌ی له‌گه‌ڵ موسا كرد، به‌ڵام نازانین ئه‌مه‌ له‌كوێوه‌ هاتووه‌.»
30
كابرا وه‌ڵامی دانه‌وه‌: «ئه‌مه‌ شتێكی سه‌یره‌! ئه‌و چاوی كردوومه‌ته‌وه‌، ئێوه‌ش نازانن ئه‌و له‌كوێوه‌ هاتووه‌.
31
ئێمه‌ ده‌زانین خودا گوێ له‌ گوناهباران ناگرێت، به‌ڵام ئه‌گه‌ر یه‌كێك له‌خواترس بێت و خواستی خودا په‌یڕه‌و بكات، ئه‌وا گوێی لێ ده‌گرێت.
32
هه‌رگیز نه‌بیستراوه‌ یه‌كێك چاوی مرۆڤێكی به‌ زگماك نابینای چاك كردبێته‌وه‌.
33
ئه‌گه‌ر ئه‌م كه‌سه‌ له‌ خوداوه‌ نه‌بێت، نه‌یده‌توانی هیچ بكات.»
34
پێیان گوت: «تۆ به‌ ته‌واوی له‌ گوناه له‌دایك بوویت. تۆ فێرمان ده‌كه‌یت؟» جا ده‌ریانكرده‌ ده‌ره‌وه‌[b] .
35
عیسا بیستی ده‌ریانكردووه‌، دۆزییه‌وه‌ و پێی فه‌رموو: «باوه‌ڕ به‌ كوڕی مرۆڤ ده‌كه‌یت؟»
36
كابرا وه‌ڵامی دایه‌وه‌: «گه‌وره‌م، ئه‌و كێیه‌ تاكو باوه‌ڕی پێ بكه‌م؟»
37
عیسا پێی فه‌رموو: «تۆ ئه‌وت بینیوه‌، ئه‌و هه‌مان ئه‌و كه‌سه‌یه‌ كه‌ ئێستا قسه‌ت له‌گه‌ڵ ده‌كات.»
38
ئه‌ویش گوتی: «گه‌وره‌م، باوه‌ڕ ده‌كه‌م.» ئینجا كڕنۆشی بۆ برد.
39
عیسا فه‌رمووی: «بۆ حوكمدان هاتوومه‌ته‌ ئه‌م جیهانه‌، تاكو ئه‌وانه‌ی نابینان ببینن و ئه‌وانه‌ی ده‌بینن كوێر بن.»
40
هه‌ندێك فه‌ریسی كه‌ له‌گه‌ڵی بوون گوێیان له‌مه‌ بوو، لێیان پرسی: «ئایا ئێمه‌ش كوێرین؟»
41
عیسا پێی فه‌رموون: «ئه‌گه‌ر ئێوه‌ كوێر بوونایه‌ گوناهتان نه‌ده‌بوو. به‌ڵام ئێستا ئێوه‌ ده‌ڵێن: ”ده‌بینین،“ له‌به‌ر ئه‌وه‌ گوناهه‌كه‌تان ده‌مێنێته‌وه‌.»
  1. a. 9‏:16 به‌گوێره‌ی ڕاسپارده‌ی ته‌وراتی موسا نابێت له‌ ڕۆژی شه‌ممه‌ هیچ كارێك بكرێت، جوله‌كه‌ زۆر به‌ توندی په‌یڕه‌ویان ده‌كرد. بڕوانه‌\+xt ده‌رچوون 20‏:8‏-11.‏\+xt*‏
  2. b. 9‏:34 ده‌ركردن له‌ كه‌نیشت و پچڕانی په‌یوه‌ندی له‌گه‌ڵ هه‌موو جوله‌كه‌یه‌ك.