عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
ساخكرنا كەسەكێ ژ زكماك كۆرە 
1
دەمێ عیسا دەرباز دبوو، مرۆڤەك دیت ژ زكماكی یێ كۆرە بوو.
2
ئینا شاگردێن وی پرسیار ژێ كر: «رابی[a] ، كێ گونەهـ كریە: ئەڤی یان دایك و بابێن وی، كو یێ ژ دایك بووی كۆرە؟»
3
عیسای بەرسڤ دا: «نە ئەوی گونەهـ كریە و نە دایك و بابێن وی، لێ ئەڤ چەندە چێبوو دا كارێن خودێ د وی دا دیار ببن.
4
پێدڤیە ل سەر مە، هێشتا كو رۆژ، ئەم كارێن وی ب جهـ بینین یێ ئەز هنارتیم. شەڤ دێ هێت و هنگی كەس نەشێت چ كاران بكەت.
5
هندی كو ئەز ل جیهانێمە، ئەز رۆناهیا جیهانێمە.»
6
ئەڤ چەندە گۆت و تف كرە ئاخێ، ژ تفێ هەڕیەك چێكر و د چاڤێن وی كەسی دا
7
و گۆتێ: «هەڕە و خۆ د بركا سیلوامێ دا بشوو» (وەرگێڕانا ‹سیلوام›ێ ‹هنارتی›یە). ئینا ئەو چوو و خۆ شویشت و ب چاڤ ڤەكری ڤەگەڕیا.
8
ئینا هەڤسوی و ئەوێن پێشتر ئەو ددیت كو خوازۆكی دكر، گۆتن: «ئەرێ ئەڤە نە ئەو مرۆڤە یێ دروینشت و خوازۆكی دكر؟»
9
هندەكان گۆت: «ئەڤە ئەوە» و هندەكێن دی گۆت: «نەخێر، لێ ئێكێ وەكو ویە.» لێ وی ب خۆ دگۆت: «ئەز ئەوم!»
10
ئینا وان گۆتێ: «چەوا چاڤێن تە ڤەبوون؟»
11
وی بەرسڤ دا: «ئەو زەڵامێ دبێژنێ عیسا هەڕیەك چێكر و د چاڤێن من دا و گۆتە من: ‹هەڕە بركا سیلوامێ و خۆ تێدا بشوو.› ئەز ژی چووم و من خۆ شویشت و چاڤێن من ڤەبوون.»
12
ئینا وان پرسیار ژێ كر: «ئەو زەڵام ل كیرێیە؟» وی گۆت: «ئەز نزانم.»
فەریسی دویڤچوونێ ل سەر رویدانا ساخبوونێ دكەن 
13
وان ئەو مرۆڤێ بەرا هنگی كۆرە ئینا نك فەریسیان.
14
ئەو رۆژا عیسای هەڕی چێكری و چاڤێن كۆرەی ڤەكرین، شەمبی بوو.
15
ئینا فەریسیان ژی پرسیار ژێ كر كا چەوا چاڤێن وی ڤەبوون. ئەوی گۆتە وان: «هەڕی د چاڤێن من دا و من خۆ شویشت و نوكە ئەز یێ دبینم!»
16
ئینا هندەك فەریسیان گۆت: «ئەڤ مرۆڤە نە ژ نك خودێیە، چنكو ئەو پێگیریێ ب شەمبیێ[b] ناكەت.» لێ هندەكێن دی گۆت: «چەوا زەڵامەكێ گونەهكار دشێت ڤان نیشانان بكەت؟» هۆسا د ناڤبەرا وان دا دووبەرەكی هەبوو.
17
وان دیسان پرسیار ژ ئەڤێ كۆرە كر: «تۆ دەربارەی وی، ئەوێ چاڤێن تە ڤەكرین، چ دبێژی؟» ئەوی ژی گۆت: «ئەو پێغەمبەرە.»
18
جوهیان[c] باوەر نەكر كو ئەو یێ كۆرە بوو و چاڤێن وی یێن ڤەبووین، تاكو گازی كریە دایك و بابێن وی یێ چاڤێن وی ڤەبووین
19
و پرسیار ژێ كری: «ئایا ئەڤەیە ئەو كوڕێ هەوە، ئەوێ هوین دبێژن ژ زكماكی یێ كۆرە بوو؟ پا چەوا ئەو نوكە دبینیت؟»
20
دایك و بابێن وی بەرسڤ دا: «ئەم دزانین ئەڤە كوڕێ مەیە و ژ زكماكی یێ كۆرە بوو،
21
لێ ئەم نزانین چەوا نوكە دبینیت و نزانین كێ چاڤێن وی ڤەكرینە. ئەو یێ مەزنە، پرسیارێ ژێ بكەن، ئەو دێ بەرسڤا هەوە دەت.»
22
دایك و بابێن وی ژ ترسا جوهیان ئەڤ چەندە گۆت، چنكو جوهی رێككەفتبوون كو هەر ئێكێ دانپێدانێ بكەت كو عیسا مەسیحە، ژ جڤاتا كنیشتەیێ بهێتە دەرئێخستن.
23
لەوما دایك و بابێن وی گۆت: «ئەو یێ مەزنە، پرسیارێ ژێ بكەن.»
24
ئەڤجا وان بۆ جارا دوویێ گازی وی مرۆڤێ بەرا هنگی كۆرە كر و گۆتنێ: «ل بەرامبەری خودێ سویند بخۆ كو راستیێ بێژی[d] ! ئەم دزانین ئەو مرۆڤ یێ گونەهكارە.»
25
ئینا وی بەرسڤ دا: «ئەز نزانم ئەو یێ گونەهكارە یان نە، ئەز تشتەكێ ب تنێ دزانم: ئەز یێ كۆرە بووم و نوكە دبینم.»
26
ئینا وان گۆتێ: «ئەوی چ ل تە كر؟ چەوا چاڤێن تە ڤەكرن؟»
27
وی بەرسڤا وان دا: «من نوكە گۆتە هەوە، لێ هەوە گوهێ خۆ نەدایێ. بۆچی هەوە دڤێت جارەكا دی ببهیسن؟ ما هەوە ژی دڤێت ببنە شاگردێن وی؟»
28
ئینا وان جڤین دانێ و گۆتێ: «تۆ شاگردێ وی! لێ ئەم شاگردێن مووساینە.
29
ئەم دزانین خودێ ل گەل مووسای ئاخفتییە، لێ ئەم نزانین ئەڤە ژ كیڤە هاتیە.»
30
ئینا وی مرۆڤی بەرسڤا وان دا: «ئەڤە تشتەكێ سەیرە! هوین نزانن ئەو ژ كیڤە هاتیە، لێ ئەوی چاڤێن من ڤەكرن.
31
ئەم دزانین خودێ گوهێ خۆ نادەتە گونەهكاران، لێ گوهێ خۆ ددەتە وی كەسی یێ ژ خودێ ترس بیت و حەزا وی ب جهـ بینیت.
32
چ جاران كەسێ نە بهیستیە كو ئێكی چاڤێن كەسەكێ ژ زكماك كۆرە ڤەكربن.
33
ئەگەر ئەڤ كەسە ژ خودێ نەبا، ئەو نەدشیا چ بكەت.»
34
ئینا وان بەرسڤا وی دا و گۆتێ: «تۆ ب تەمامی د گونەهێ دا یێ ژ دایك بووی. ما تۆ مە فێر دكەی؟» پاشی ئەو دەرئێخستە ژ دەرڤە.[e]
كۆرەبوونا گیانی 
35
عیسای بهیست كو وان ئەو كەس یێ دەرئێخستیە ژ دەرڤە، ئینا لێگەڕیا و دیت و گۆتێ: «ئەرێ تۆ باوەریێ ب كوڕێ مرۆڤ دئینی؟»
36
ئەوی بەرسڤ دا و گۆت: «ئەزبەنی، ئەو كیە، دا ئەز باوەریێ پێ بینم؟»
37
ئینا عیسای گۆتێ: «تە ئەو یێ دیتی و ئەوە یێ ل گەل تە دئاخڤیت.»
38
ئینا وی گۆت: «خودان، ئەز باوەریێ دئینم» و سوجدە بۆ بر.
39
عیسای گۆت: «ئەز بۆ دادكرنێ یێ هاتیمە ڤێ جیهانێ، داكو ئەوێن نابینن ببینن و یێن دبینن كۆرە ببن.»
40
هندەك فەریسیان، كو ل نك وی بوون، دەمێ ئەڤ چەندە بهیستی، گۆتێ: «ما ئەم ژی د كۆرەینە؟!»
41
عیسای گۆتە وان: «ئەگەر هوین د كۆرە بان، هەوە گونەهـ نەدبوو، لێ هوین دبێژن ‹ئەم دبینین،› ئەڤجا گونەها هەوە دمینیت.»
  1. a. ‏9‏:2 ئانكو مامۆستا
  2. b. ‏9‏:16 بۆ جوهیان رۆژەكا تایبەت و پیرۆزە و كار تێدا ناهێتە كرن. ل فەرهەنگۆكێ بنێڕە \k رۆژا شەمبی\k*.
  3. c. ‏9‏:18 مەبەست پێ رێبەرێن جوهیانن.
  4. d. ‏9‏:24 دەقێ یونانی دبێژیت: ‹مەزناهیێ بدە خودێ›.مەبەست پێ ئەوە وی بدەنە سویندێ.
  5. e. ‏9‏:34 چێدبیت رامان ئەو بیت كو ئەو ژ ئەندامەتیا كەنیسەیێ دەرئێخست.