عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
1
لێ عیسا چوو چیایێ زەیتونان.
2
ل ئەلندێ زڤڕی پەرستگەهێ. هەمی خەلك هاتنە نك وی، ئەو ژی روینشت و دەست ب فێركرنا وان كر.
3
مامۆستایێن دەستووری و فەریسیان ژنەك ئینا نك وی، كو ل سەر دەهمەنپیسیێ هاتبوو گرتن، وان ئەو ژن ل ناڤەندێ راوەستاند
4
و گۆتە عیسای: «مامۆستا، ئەڤ ژنە ل دەمێ كریارا دەهمەنپیسیێ هاتیە گرتن.
5
د دەستووری دا مووسای فەرمان ل مە كریە كو ژنێن هۆسا بەرباران بكەین. ئەڤجا تۆ چ دبێژی؟»
6
وان ئەڤ تشتە گۆت دا وی تاقی بكەن و تشتەك هەبیت وی پێ تاوانبار بكەن. لێ عیسای پشتا خۆ چەماند و ب تبلا خۆ ل سەر ئەردی دنڤیسی.
7
دەمێ وان هەر پرسیار ژێ دكر، ئەوی پشتا خۆ راست كرەڤە و گۆتە وان: «كی ژ هەوە یێ بێگونەهە، بلا ل بەراهیێ ئەو بەرەكی تێوەركەت.»
8
جارەكا دی پشتا خۆ چەماند و ل سەر ئەردی نڤیسی.
9
دەمێ وان ئەڤ ئاخفتنە بهیستی، ژ یێن پیر بگرە پاشی یێن دی، ئێك ل دویڤ ئێك ژ وێرێ چوون. ب تنێ عیسا ل وێرێ ما و ئەو ژن د جهێ خۆ دا یا راوەستیای بوو.
10
عیسای پشتا خۆ راست كرەڤە و گۆتە وێ: «خانم، كانێنە ئەو؟ ما كەسێ تۆ گونەهبار نەكری؟»
11
وێ بەرسڤ دا: «نەخێر، ئەزبەنی.» عیسای گۆتێ: «ئەز ژی تە گونەهبار ناكەم. هەڕە و ئێدی گونەهان نەكە.»
عیسا رۆناهیا جیهانێیە 
12
عیسا جارەكا دی ل گەل وان ئاخفت و گۆت: «ئەزم رۆناهیا جیهانێ[a] . یێ ل دویڤ من بهێت، د تاریێ دا ناچیت، لێ دێ رۆناهیا ژیانێ بۆ وی بیت.»
13
ئینا فەریسیان گۆتێ: «تۆ شاهدەییێ بۆ خۆ ددەی، شاهدەییا تە نە یا راستە.»
14
ئینا عیسای بەرسڤا وان دا و گۆت: «ئەگەر ئەز شاهدەییێ بۆ خۆ ژی بدەم، شاهدەییا من راستە، چنكو ئەز دزانم ئەز ژ كیرێ یێ هاتیم و دێ چمە كیرێ. لێ هوین نزانن كا ئەز ژ كیرێ هاتیمە و دێ چمە كیرێ.
15
هوین ل دویڤ پیڤەرێن مرۆڤان[b] دادكرنێ دكەن، لێ ئەز كەسێ داد ناكەم.
16
ئەگەر ئەز دادكرنێ بكەم ژی، دادكرنا من یا راستە، چنكو د دادكرنێ دا ئەز نە یێ ب تنێمە، لێ ئەزم و بابێ كو ئەز هنارتیم.
17
د دەستوورێ هەوە دا یا نڤیسیە كو شاهدەییا دوو كەسان یا راستە.[c]
18
ئەز شاهدەییێ بۆ خۆ ددەم و ئەو بابێ ئەز هنارتیم ژی شاهدەییێ بۆ من ددەت.»
19
ئینا وان پرسیار ژێ كر: «كا بابێ تە؟» عیسای بەرسڤ دا: «هوین نە من دنیاسن نە ژی بابێ من. ئەگەر هەوە ئەز نیاسیبام، دا بابێ من ژی نیاسن.»
20
عیسای ئەڤ ئاخفتنە ل نێزیكی سندوقێن بەخشینان، دەمێ وی فێركرن ل پەرستگەهێ دكر، گۆت. لێ كەسێ ئەو دەستەسەر نەكر، چنكو دەمێ وی هێشتا نەهاتبوو.
عیسا نە ژ ڤێ جیهانێیە 
21
عیسای دیسان گۆتە وان: «ئەز دێ چم و هوین دێ ل من گەڕیێن و دێ د گونەهێن خۆ دا مرن. ئەو جهێ ئەز دچمێ، هوین نەشێن بهێنە وێرێ.»
22
ئەڤجا جوهیان[d] گۆت: «ئایا ئەو دێ خۆ كوژیت؟ كو دبێژیت: ‹ئەو جهێ ئەز دچمێ، هوین نەشێن بهێنە وێرێ.›»
23
وی گۆتە وان: «هوین ژ خوارێنە، ئەز ژ سڵالم. هوین ژ ڤێ جیهانێنە، ئەز نە ژ ڤێ جیهانێمە.
24
ژ بەر هندێ من گۆتە هەوە: هوین دێ د گونەهێن خۆ دا مرن، چنكو ئەگەر هوین باوەریێ نەئینن كو ئەز ئەوم، دێ د گونەهێن خۆ دا مرن.»
25
ئینا وان پرسیار ژێ كر: «تۆ كی؟» عیسای بەرسڤا وان دا: «ئەز ئەوم یێ كو ژ دەستپێكێ وەرە من گۆتیە هەوە.
26
من گەلەك تشت هەنە كو د دەرهەقا هەوە دا بێژم و هەوە پێ داد بكەم. لێ ئەوێ ئەز هنارتیم یێ راستە و ئەوا من ژ وی بهیستی ئەز وێ دبێژمە جیهانێ.»
27
لێ ئەو تێنەگەهشتن، كو وی بۆ وان بەحسێ بابی دكر.
28
ئینا عیسای گۆتە وان: «دەمێ هەوە كوڕێ مرۆڤ بلند كر، هنگی دێ زانن كو ئەز ئەوم و ئەز چ تشتی ژ نك خۆ ناكەم، لێ كا چەوا بابی ئەز فێر كریم، ئەز وێ دبێژم.
29
ئەوێ ئەز هنارتیم ل گەل منە و وی ئەز نەهێلایمە ب تنێ، چنكو ئەز هەردەم وان تشتان دكەم یێن ئەو پێ رازی دبیت.»
30
دەمێ عیسای ئەڤ ئاخفتنە دگۆتن، گەلەك كەسان باوەری پێ ئینا.
راستی دێ هەوە ئازاد كەت 
31
ئینا عیسای گۆتە وان جوهیێن باوەری پێ ئینای: «ئەگەر هەوە خۆ ل سەر پەیڤا من راگرت، هوین ب راستی شاگردێن منن
32
و هوین دێ راستیێ زانن و راستی دێ هەوە ئازاد كەت.»
33
جوهیان بەرسڤا وی دا: «ئەم ژ دویندەها ئیبراهیمینە و چ جاران بەنیێن كەسێ نەبووین! تۆ چەوا دبێژییە مە: ‹هوین دێ ئازاد بن›؟»
34
عیسای بەرسڤا وان دا: «ب راستی ب راستی دبێژمە هەوە: هەر كەسێ گونەهێ دكەت، ئەو بەنیێ گونەهێیە.
35
بەنی ژی هەروهەر د مالێ دا نامینیت، لێ كوڕ هەروهەر دمینیت.
36
لەوما ئەگەر كوڕ هەوە ئازاد بكەت، هوین دێ ب راستی ئازاد بن.
37
ئەز دزانم هوین ژ دویندەها ئیبراهیمینە، لێ هوین ل دویڤ كوشتنا من دگەڕیێن، چنكو پەیڤا من چ جهـ د دلێ هەوە دا نینە.
38
ئەز وێ دبێژم یا من ل نك بابێ خۆ دیتی، هوین ژی وێ دكەن یا هەوە ژ بابێ خۆ بهیستی.»
زاڕۆكێن ئیبراهیم و زاڕۆكێن ئبلیسی 
39
ئینا وان بەرسڤ دا و گۆت: «بابێ مە ئیبراهیمە.» عیسای گۆتە وان: «ئەگەر هوین كوڕێن ئیبراهیمی بان، دا كارێن ئیبراهیمی كەن.
40
لێ نوكە هوین یێ ل كوشتنا من دگەڕیێن و ئەز كەسەكم كو من ئەو راستی بۆ هەوە گۆتیە یا من ژ خودێ بهیستی. ئەڤ چەندە ئیبراهیمی نەكریە.
41
هوین كارێن بابێ خۆ دكەن.» وان گۆتێ: «ئەم ژ دەهمەنپیسیێ نەبووینە! مە بابەكێ ب تنێ یێ هەی، ئەو ژی خودێ یە.»
42
عیسای گۆتە وان: «ئەگەر خودێ بابێ هەوە با، دا هوین حەز ژ من كەن، چنكو ئەز ژ نك خودێ یێ دەركەفتیم و هاتیم. ئەز ژ نك خۆ نەهاتیمە، لێ ئەوی ئەز یێ هنارتیم.
43
بۆچی هوین د ئاخفتنا من ناگەهن؟ چنكو هوین نەشێن پەیڤا من ببهیسن.
44
هوین ژ بابێ خۆ ئبلیسینە و هەوە دڤێت حەزێن بابێ خۆ ب جهـ بینن. ئەو ل دەستپێكێ مێركوژ بوو و چ جاران لایەنگرێ راستیێ نەبوو، چنكو راستی د وی دا نینە. دەمێ ئەو درەوێ دكەت، ئەو ل گۆر سرۆشتێ خۆ دئاخڤیت، چنكو ئەو درەوینە و بابێ درەوێیە.
45
لێ چنكو ئەز راستیێ دبێژم، هوین باوەر ژ من ناكەن.
46
كی ژ هەوە دشێت گونەهەكێ ل سەر من بسەلمینیت؟ ئەڤجا ئەگەر ئەز راستیێ دبێژم، بۆچی هوین باوەر ژ من ناكەن؟
47
ئەوێ ژ خودێ بیت، دێ گوهێ خۆ دەتە پەیڤا خودێ. هوین نە ژ خودێ نە، لەوما هوین گوهێ خۆ نادەنێ.»
48
ئینا جوهیان بەرسڤ دا و گۆتێ: «ما ئەم راست نابێژین كو تۆ سامەری و ئەجنەیەكی تۆ یێ هنگافتی؟»
49
عیسای بەرسڤ دا: «ئەجنەی ئەز نە هنگافتیمە، لێ ئەز رێزێ ل بابێ خۆ دگرم و هوین من بێڕێز دكەن.
50
ئەز بۆ خۆ ل مەزناهیێ ناگەڕیێم، لێ ئێكێ هەی بۆ من لێ دگەڕیێت و ئەو دادكرنێ ژی دكەت.
51
ب راستی ب راستی دبێژمە هەوە: یێ پەیڤا من ب جهـ بینیت، چ جاران مرنێ نابینیت.»
52
جوهیان گۆتێ: «نوكە ئەم پشتڕاست بووین كو ئەجنەیەكی تۆ یێ هنگافتی! ئیبراهیم مر و پێغەمبەر مرن، و تۆ دبێژی: ‹یێ پەیڤا من ب جهـ بینیت تام ناكەتە مرنێ.›
53
ئەرێ تۆ ژ بابێ مە ئیبراهیمی مەزنتری؟ ئەو مر، پێغەمبەر ژی مرن. تۆ خۆ چ ددانی؟»
54
عیسای بەرسڤ دا: «ئەگەر ئەز خۆ مەزن بكەم، مەزناهیا من یا بێ بهایە. بابێ من ئەوێ هوین دبێژن: ‹ئەو خودایێ مەیە،› ئەوە من مەزن دكەت.
55
هوین وی نانیاسن، لێ ئەز وی دنیاسم. ئەگەر من گۆتبا ئەز وی نانیاسم، دا ئەز ژی وەكو هەوە درەوین بم. لێ ئەز وی دنیاسم و پەیڤا وی ب جهـ دئینم.
56
بابێ هەوە ئیبراهیم یێ دلشاد بوو كو دێ رۆژا من بینیت، وی دیت و كەیفخۆش بوو.»
57
ئینا جوهیان گۆتێ: «هێشتا ژیێ تە نەبوویە پێنجی ساڵ و تە ئیبراهیم دیتیە؟»
58
عیسای گۆتە وان: «ب راستی ب راستی دبێژمە هەوە: بەری ئیبراهیم ببیت، ئەز هەمە.»
59
ئینا وان بەر هەلگرتن، دا وی بەرباران بكەن، لێ وی خۆ ڤەشارت و ژ پەرستگەهێ دەركەفت.
  1. a. ‏8‏:12 ل فەرهەنگۆكێ بنێڕە \k جەژنا كەپرەشینان\k*. گەلەك بۆچوون دبێژن كو عیسایێ مەسیح ئەڤ ئاخفتنە ل ڤێ جەژنێ گۆت.
  2. b. ‏8‏:15 دەقێ یونانێ دبێژیت: ل دویڤ لەشی
  3. c. 8‏:17 گۆتارا مووسای 19‏:15
  4. d. ‏8‏:22 مەبەست پێ رێبەرێن جوهیانن.